Skip to content

Skip to secondary menu

Skip to table of contents

Yehofa Kotoigi

Okanisitongo

Gadu abi bun nyunsu gi u!

 PISI 14

Saide meke Gadu abi wan olikanisâsi?

Saide meke Gadu abi wan olikanisâsi?

1. Saide meke Yehofa be teke den Islayeli sama enke en foluku?

Gadu be teke den bakapikin fu Abalaham enke a foluku fi en, neen a poti weiti gi den. A kai a foluku de „Islayeli”. A den a gi a faantiwowtu fu a tuu biibi anga a Wowtu fi en (Pisalon 147:19, 20). Neen ede meke ala nasi be sa fende wini fu a foluku Islayeli.Leisi Genesesi 22:18.

Gadu be teke a foluku fu Islayeli enke den kotoigi fi en. A fasi fa sani be waka anga den Islayeli sama aini a ten di pasa, e soi u den wini di wi e fende te wi e gi yesi a Gadu (Deitolonomi 4:6). Neen ede meke taa sama be sa kon leli sabi Gadu anga yeepi fu den Islayeli sama.Leisi Yesaya 43:10, 12.

2. Saide meke Yehofa wani den tuu Kelesten mu wooko makandii enke wan guupu?

Bakaten Yehofa á be fende den Islayeli sama bun moo, neen a teke a Kelesten kemeente poti a den peesi (Mateyesi 21:43; 23:37, 38). Aini a ten ya, a Kelesten kemeente teke a peesi fu den Islayeli sama. Den tuu Kelesten a den kotoigi fu Yehofa aini a ten ya.Leisi Apaiti 15:14, 17.

Yesesi be seeka den bakaman fi en, fu peleiki gi sama anga fu yeepi den fu toon bakaman fi en (Mateyesi 10:7, 11; 24:14; 28:19, 20). A wooko ya be o du moo ipi aini a pisi ten di a goontapu be o kon a wan kaba. Fanafu libisama de a goontapu, noiti ete Yehofa be tyai miliyunmiliyun sama fu ala nasi kon a wan so, fu dini en (Kon A Kiin 7:9, 10). Den Kelesten e wooko makandii enke wan guupu fu gi den denseefi taanga sikin, anga fu yeepi makandii. A hii goontapu, na a wan leli den e kisi a den komakandaa.Leisi Hebelei 10:24, 25.

 3. Fa a olikanisâsi fu Yehofa Kotoigi bigin aini a ten ya?

Aini a yali 1870, da wan pikin guupu fu Beibel ondoosukuman be kon leli sabi den tuu toli fu Beibel di sama be kon feegete. Den be kon fusutan taki Yesesi sete a Kelesten kemeente fu peleiki gi sama. Neen ede meke den bigin peleiki a bun nyunsu fu a Kownukondee a hii goontapu. Den be teke a nen Yehofa Kotoigi aini a yali 1931.Leisi Apaiti 1:8; 2:1, 4; 5:42.

4. Fa Yehofa e tii a olikanisâsi fi en aini a ten ya?

Aini hawten, da den Kelesten kemeente be e fende wini fu den baala di be e tii a wooko. Den baala ya be e fusutan taki a Yesesi na a Edeman fu a kemeente (Apaiti 16:4, 5). Aini a ten ya Yehofa Kotoigi a hii goontapu e fende wini tu fu den baala di e tii a wooko. Den baala ya di e tii a wooko, a owluman di abi ondoofeni. Den e luku fa sani e waka a den beikantoo fu Yehofa Kotoigi a hii goontapu. A den beikantoo ya di de a hii goontapu, de e puu den buku poti aini taa tongo, anga den e meke buku fu leli sama aini pasa 600 tongo. Na a fasi de, den baala di e tii a wooko a hii goontapu e gi ala den moo enke 100.000 kemeente taanga sikin anga leli. Aini ibiiwan fu den kemeente baala de, di e dini enke owluman efuso baala di e teke fesi. Den baala ya, e solugu den sikapu fu Gadu anga lobi.Leisi 1 Peitilisi 5:2, 3.

Yehofa Kotoigi de enke wan guupu di e peleiki a bun nyunsu, anga di e yeepi sama toon bakaman fu Yesesi. Leti enke den aposteli, a so den e peleiki osu fu osu (Apaiti 20:20). Wi de kabakaba fu leli den bun ati sama di lobi den tuu toli fu Beibel. Ma Yehofa Kotoigi a ná wan olikanisâsi namo da a kaba, ma wi a wan gaan famii tu di abi wan lobi ati Tata. Wi na baala anga sisa di e booko ede anga makandii (2 Tesalonika 1:3). Den Yehofa Kotoigi de enke wan guupu di e du sani fu piisii Gadu, anga di e yeepi taawan. Neen ede meke den Kotoigi a den moo koloku libisama a goontapu.Leisi Pisalon 33:12; Apaiti 20:35.