Skip to content

Skip to secondary menu

Skip to table of contents

Yehofa Kotoigi

Okanisitongo

Gadu abi bun nyunsu gi u!

 PISI 15

Fu saide meke i mu tan teke leli fu Yehofa?

Fu saide meke i mu tan teke leli fu Yehofa?

1. Fa yu o fende wini te ye tan teke leli fu Beibel?

A de kiin taki den sani fu Beibel di i leli aini a buku ya, meke a lobi di i abi gi Yehofa kon moo bigi. I mu tan meke moiti fu a lobi di yu abi gi Yehofa kon moo taanga (1 Peitilisi 2:2). Efi i á wani lasi a howpu di i abi fu libi fu tego, da i mu kon koosube a Yehofa, fu di yu e sutudeli a Wowtu fi en.Leisi Yohanisi 17:3; Yudasi 21.

A biibi fi i o kon moo taanga te ye tan teke leli fu Gadu. A biibi fi i o yeepi i fu du san Gadu wani (Hebelei 11:1, 6). A o yeepi i fu tyali fu den sondu di i be e du, anga fu daai i libi.Leisi Apaiti 3:19.

2. Fa taa sama sa fende wini te yu e leli sabi sani fu Gadu?

Yu anga Yehofa sa de bunbun mati

A tuu taki yu o wani paati den sani di i leli anga taa sama, bika ala u lobi fu du a sani de. Te yu e tan sutudeli, da yu o leli fa i sa koboloiki a Beibel te yu e taki fu a biibi fi i aini Yehofa, efuso te yu e taki fu a bun nyunsu.Leisi Lomeini 10:13-15.

Fuu sama e bigin paati a bun nyunsu gi den mati, anga den famii fu den. Ma i mu sabi fa yu e taki anga den. A moo bun fi i taigi den san Gadu paamisi u, a peesi fi i taigi den taki a keliki fu den á bun. Pakisei tu taki, fuu leisi sama e moo luku den bun manii di yu abi, moo enke den sani di yu e taki.Leisi 2 Timotiyesi 2:24, 25.

3. Sowtu gaandi i sa fende?

A biibi fi i o kon moo taanga te yu e tan teke leli fu a Wowtu fu Gadu. Bakaten, i sa gi iseefi abaa a Yehofa aini  begi fu toon wan mati fi en. A so i sa toon wan fu den sama fu a osufamii fi en.Leisi 2 Kolenti 6:18.

4. Fa i sa tan meke go a fesi?

I sa go moo a fesi te yu e tan sutudeli a Wowtu fu Gadu (Hebelei 5:13, 14). Begi wan fu den Yehofa Kotoigi fu a kon leli i sani fu Beibel anga a buku San Bijbel kan leri wi? O moo yu e sutudeli a Wowtu fu Gadu, o moo sani sa waka bun aini i libi.Leisi Pisalon 1:1-3; 73:27, 28.

A Yehofa na a sama di abi a bun nyunsu. En na a koloku Gadu. I sa kon koosube a Yehofa te yu e kon koosube na a foluku fi en (Hebelei 10:24, 25). Te yu e tan meke moiti fu piisii Yehofa ati, da a so yu e meke moiti fu kisi a tuutuu libi, a tego libi. Fu tuu, a moo bun sani di i sa du, a fu kon koosube a Gadu.Leisi 1 Timotiyesi 1:11; 6:19.