Skip to content

Skip to secondary menu

Skip to table of contents

Yehofa Kotoigi

Okanisitongo

Gadu abi bun nyunsu gi u!

 PISI 13

San o pasa anga den keliki?

San o pasa anga den keliki?

1. Na ala keliki bun?

Ala keliki abi bun sama aini. A bun fu sabi taki Gadu e si den sowtu bun sama de, anga ai booko en ede anga den tu. A wan tyali sani taki sama koboloiki keliki fu du somen ogii (2 Kolenti 4:3, 4; 11:13-15). Nyunsu e soi taki son keliki e holibaka gi sama fu feti anga lanti fu kondee, fu kii sama, fu feti oloku anga fu du ogii ati sani anga pikinengee. Den sani ya e meke sama di e biibi tuutuu a Gadu, fii tyali!Leisi Mateyesi 24:3-5, 11, 12.

A tuu biibi e gi gaandi na a nen fu Gadu, ma falisi keliki e gi en atiboon. Falisi keliki e leli sama sani di á sikiifi aini Beibel. Den e leli taawan falisi sani fu Gadu, anga fu den dedesama. Ma Yehofa wani meke sama kon sabi sama neen tuutuu.Leisi Eseikiyeli 18:4; 1 Timotiyesi 2:3-5.

2. San o pasa anga den keliki?

Ma koloku taki den keliki á poi koli Gadu taki den lobi en, aladi na a goontapu fu Saatan den lobi (Yakowbesi 4:4). Beibel e kai ala den falisi keliki „A Gaanbigi Babilon”. Babilon na a nen di den be e kai a foto aini a ten fu Nowa, pe falisi keliki komoto. A ná o teke langa moo fosi Gadu poli ala den keliki di e koli anga e tyotyo libisama.Leisi Kon A Kiin 17:1, 2, 5, 16, 17; 18:8.

Moo bun nyunsu de ete. Yehofa á feegete den bun sama a hii goontapu, di e daai lontu ete aini den falisi keliki. Ai tyai den sama ya kon a wan, bika Ai leli den a waaleiti.Leisi Mika 4:2, 5.

 3. Sowtu sani den bun ati libisama mu du?

A tuu biibi e tyai sama kon a wan

Yehofa e booko en ede anga sama di lobi san tuu anga san bun. Ai wasikoi den fu den lowe komoto aini den falisi keliki. Sama di lobi Gadu de kabakaba fu kengi a libi fu den, fu meke Gadu fii piisii.Leisi Kon A Kiin 18:4.

Aini hawten, da bun ati sama be piisii di den aposteli be paati a bun nyunsu gi den. Yehofa be leli den wan nyun fasi fa den mu libi. Den á be o libi sosokaali moo, ma den ben o abi wan howpu. U sa leli wan sani fu den sama ya, bika di den yee a bun nyunsu, neen den poti a dini fu Yehofa na a fosi peesi aini den libi.Leisi 1 Tesalonika 1:8, 9; 2:13.

Yehofa e kai iniiwan sama di komoto aini falisi keliki, fu kon aini a famii fu tuutuu diniman fi En. Efi i teke a kai fu Yehofa ya, da yu o toon en mati. Yu o fende wan nyun famii fu baala anga sisa di e dini Yehofa, anga di lobi yu. Yu o fende tego libi tu.Leisi Maakusi 10:29, 30; 2 Kolenti 6:17, 18.

4. Fa Gadu o meke ala sama a hii goontapu de anga piisii?

A kuutu di Gadu o kuutu den falisi keliki, a wan bun nyunsu. A sani de o puu tyotyo anga dwengi a hii goontapu. Da noiti moo falisi keliki o koli sama, efuso tyai paati fasi kon a libisama mindii. Ala libisama o dini a wan kodo tuutuu Gadu makandii.Leisi Kon A Kiin 18:20, 21; 21:3, 4.