Skip to content

Skip to secondary menu

Skip to table of contents

Yehofa Kotoigi

Okanisitongo

Gadu abi bun nyunsu gi u!

 PISI 10

Fa yu o du man sabi sowtu biibi na a tuutuu wan?

Fa yu o du man sabi sowtu biibi na a tuutuu wan?

1. A wan kodo tuu biibi namo de?

„U mu koni anga den falisi polofeiti.”MATEYESI 7:15.

A fu wan kodo biibi namo Yesesi be leli den bakaman fi en, dati na a tuu biibi. A de enke wan pasi di e tyai sama go na a libi fu tego. Yesesi be taki: „A wan tu sama namo e fende a pasi ya” (Mateyesi 7:14). A soso a biibi di e du sani enke fa a Wowtu fu Gadu e taki, Gadu e fende bun. Ala den tuu diniman fu Gadu be o de aini wan kodo biibi namo.Leisi Yohanisi 4:23, 24; 14:6; Efese 4:4, 5.

2. Sowtu sani Yesesi be piki u a fesi fu falisi biibi?

„Den e taki anga mofu taki den sabi Gadu, ma a lei de e lei, bika den du fu den, e soi taki den á sabi Gadu.”TITESI 1:16.

Yesesi be wasikoi wi a fesi taki falisi polofeiti be o tyai fanya kon aini a tuu biibi. Te yu o si den da yu o denki taki den a tuu biibiman, bika a dati den e taki. Ma tokuso iseefi o poi si taki den a ná tuutuu biibiman. Fa a waka? Bika a soso aini a tuu biibi i poi fende tuu biibiman. Na a hii fasi fa den e libi wi o si taki den a tuutuu biibiman.Leisi Mateyesi 7:13-23.

3. Fa yu o du man sabi sama a den tuutuu diniman fu Gadu?

Luku den feifi sani ya di e soi sama a den tuutuu diniman fu Gadu:

  • Tuu Kelesten sama e si a Beibel enke a Wowtu fu Gadu. Den du ala san den poi fu koboloiki den leli fu Beibel aini a libi fu den. Son keliki, a sani di libisama e pakisei de e leli sama. Ma a tuu biibi á de so (Mateyesi  15:7-9). Den tuutuu diniman fu Gadu e du den sani tu di den e leli taa sama.Leisi Yohanisi 17:17; 2 Timotiyesi 3:16, 17.

  • Den tuutuu bakaman fu Yesesi be o lesipeki a nen fu Gadu, Yehofa. Yesesi be e lesipeki a nen fu Gadu bika a be e meke sama kon sabi a nen ya. A be e yeepi sama fu den kon sabi Gadu. A be e leli den tu fu den begi taki a nen fu Gadu mu kon santa (Mateyesi 6:9). Sowtu keliki de na a pisi pe yu e tan, di e leli sama a nen fu Gadu?Leisi Yohanisi 17:26; Lomeini 10:13, 14.

  • Tuu Kelesten sama e paati a bosikopu fu a Kownukondee fu Gadu. Gadu be sende Yesesi kon fu paati a bun nyunsu fu a Kownukondee. Na a Kownukondee fu Gadu na a wan enkii sani di sa poi yeepi libisama. A fu a Kownukondee ya Yesesi be e taki naamo te enke a dede (Lukasi 4:43; 8:1; 23:42, 43). A be taki den bakaman fi en be o paati a bun nyunsu ya tu. Efu wan sama kon a yu fu taki fu a Kownukondee fu Gadu, da fu sowtu biibi i denki taki a de?Leisi Mateyesi 24:14.

  • Den bakaman fu Yesesi nái teke paa anga a ogii goontapu ya. I sa sabi den bakaman fu Yesesi, bika den nái mumui aini politiki efuso den toobi di de aini a kondee ini (Yohanisi 17:16; 18:36). Den nái libi den ogii libi fu den sama fu goontapu. Den nái teke den takuu manii fu den tu.Leisi Yakowbesi 4:4.

  • Tuu Kelesten abi tuutuu lobi gi denseefi. A Wowtu fu Gadu e leli tuu Kelesten taki den mu lesipeki ala sowtu nasi sama. Anga ala fa falisi biibi e holibaka fayafaya gi den feti fu goontapu, tokuso noiti den tuu Kelesten e du a sani de (Mika 4:1-3). A peesi fu tuu Kelesten du sani teke nen gi denseefi, da den e koboloiki den ten anga den gudu di den abi, fu yeepi taawan anga fu gi den taanga sikin.Leisi Yohanisi 13:34, 35; 1 Yohanisi 4:20.

4. I poi sabi sowtu biibi na a bun wan?

Sowtu wan fu den keliki e du ala den sani di sikiifi aini a Wowtu fu Gadu, e lesipeki a nen fu Gadu, e paati a bosikopu taki na a Kownukondee fu Gadu wawan too na a wan enkii sani di e gi u howpu? Sowtu biibi e soi tuutuu lobi gi sama anga a nái go a feti? I sabi sowtu wan?Leisi 1 Yohanisi 3:10-12.