Skip to content

Skip to secondary menu

Skip to table of contents

Yehofa Kotoigi

Okanisitongo

Sama e du a wani fu Yehofa aini a ten ya?

 PISI 10

San na a Osufamii Anbegi?

San na a Osufamii Anbegi?

Zuid-Koreya

Balazilikondee

Australiya

Gineya

Senten hawten, Yehofa be wani taki ibii osufamii be mu du sani makandii. A be wani den du sani makandii fu toon mati fi En, anga fu meke a lobi di den abi enke osufamii kon moo taanga tu (Deitolonomi 6:6, 7). Neen ede meke Yehofa Kotoigi e poti wan fasiti yuu a wanse ala wiki fu dini Yehofa makandii enke osufamii. Anga piisii de e sidon makandii fu taki toli fu Beibel, anga sani di a osufamii fu den abi fanowdu. Winsi a yu wawan e tan, tokuso i sa koboloiki a ten de gi Gadu te yu e sutudeli wan toli fu Beibel di i lobi.

A Osufamii Anbegi o yeepi u fu kon moo koosube a Yehofa. „Kon koosube a Yehofa, da enseefi o kon koosube a yu” (Yakowbesi 4:8). Wi o sabi Yehofa moo bun te wi e leli sabi den fasi fi en finifini anga den du fi en di sikiifi aini a Beibel. Wan makiliki fasi fa u sa bigin anga a osufamii anbegi a te wi e leisi a Beibel makandii enke osufamii. U sa leisi den pisi di u mu leisi ala wiki gi A libi fu wi enke Kelesten anga a peleikiwooko konmakandaa makandii. Ibii sama mu kisi wan pisi fu leisi, da bakadati den sa taki san den leli efuso san den leli fu Beibel.

A Osufamii Anbegi e yeepi osufamii fu meke a lobi di den abi gi denseefi kon moo taanga. Ai yeepi man anga uman, dada anga mama, anga den pikin fu den. Den o lobi denseefi moo te de e sutudeli a Beibel makandii. A mu de wan piisii sani, wan sani di ala sama aini a osu mu e angii fi en ala wiki. Dada anga mama mu holi den yali fu den pikin fu den a pakisei fu sabi fu on sowtu toli den o luku anga den. Den sa taki fu son pisi aini A Wakititolen anga a Ontwaakt! efuso den sa suku sani na a website fu wi a jw.org. U sa taki anga den fu den polobelema di den miti a sikoo. Yeepi den fu den sabi san den mu du te den sowtu sani de e miti den. Kande u sa luku wan felon a JW Broadcasting (tv.jw.org), da u taki fi en. U sa leli singi den singi makandii di wi o singi a wiki de a komakandaa. Te u kaba anga a osufamii anbegi u sa nyan efuso diingi wan switi sani makandii.

Te wi abi a apaiti dei de ala wiki, da a o yeepi ala sama aini a osufamii fu abi piisii te de e sutudeli a Wowtu fu Gadu. Yehofa o belesi den moiti fu u dyow.Psalm 1:1-3.

  • Saide meke wi e poti ten a wanse fu holi a osufamii anbegi?

  • Fa dada anga mama sa meke a osufamii anbegi de wan piisii sani gi a hii osufamii?