Skip to content

Skip to secondary menu

Skip to table of contents

Yehofa Kotoigi

Okanisitongo

Sama e du a wani fu Yehofa aini a ten ya?

 PISI 20

San den baala di e tii a wooko fu u e du aini a ten ya?

San den baala di e tii a wooko fu u e du aini a ten ya?

Den baala di be e tii a wooko aini a fosi yalihondoo

Den baala e leisi wan biifi fu den baala di e tii a wooko a hii goontapu

Aini a fosi yalihondoo, da den baala di be e tii a wooko, a be wan pikin guupu sama, dati be de „den aposteli anga den owluman aini Yelusalem foto”. A den be e teke gaan bosoloiti gi ala den salfuwan aini den kemeente (Toli 15:2). Fosi den du wan sani di den kuudei fi en, da den be e holi wan pikin kuutu a fesi kaba fu luku san Beibel e taki fu a pisi toli de. Den be e meke a yeye fu Gadu tii den tu (Toli 15:25). Na a seefi fasi de e du sani te na a dei fu tide ete.

Gadu e koboloiki den baala de fu du a wani fi en. Den salufu baala di e tii a wooko fu Yehofa Kotoigi aini a ten ya, e booko den ede tuutuu fu sabi san Gadu Wowtu e taki. Den abi tyaipi ondoofeni te ai go anga fa a wooko fu u mu du. Den sa fa fu piki akisi tu di abi fu du anga a dini fu Gadu. Ala wiki de e kon a makandii fu holi wan pikin kuutu fu luku san den baala anga sisa fu den a hii goontapu abi fanowdu. Leti enke fa a be de aini a fosi yalihondoo, a so den baala ya e gi den leli di komoto aini Beibel. De e sende den bosikopu ya aini biifi, efuso anga den owluman di e waka a den kemeente. A sani ya e yeepi a foluku fu Gadu fu denki anga du sani na a seefi fasi (Toli 16:4, 5). Den baala di e tii a wooko a hii goontapu e seeka sani a fesi fu gi u leli fu Beibel. De e gi u taanga tu fu peleiki a bun nyunsu fayafaya, anga de e poti baala tu fu tyai faantiwowtu aini a kemeente.

Den baala ya e meke a yeye fu Gadu tii den. Den baala di e tii a wooko, e suku a tii fu Yehofa, a moo gaan Gadu, anga Yesesi di de Edeman fu a kemeente (1 Korentesama 11:3; Efeisesama 5:23). Den baala di e tii a wooko a hii goontapu nái si denseefi enke fesiman fu a foluku fu Gadu. Makandii anga ala den taa salufu Kelesten de e „waka na a Pikin Sikapu [Yesesi] baka na ala pe ai go” (Openbaring 14:4). Ai bigi gi den te wi e begi gi den, fu den sa poi du a wooko fu den bun.

  • Sama a be den baala di be e tii a wooko aini a fosi yalihondoo?

  • Fa den baala di e tii a wooko a hii goontapu e suku a tii fu Gadu aini a ten ya?