Skip to content

Skip to secondary menu

Skip to table of contents

Yehofa Kotoigi

Okanisitongo

Sama e du a wani fu Yehofa aini a ten ya?

 PISI 3

Fa sama be kon sabi den tuu leli fu Beibel baka?

Fa sama be kon sabi den tuu leli fu Beibel baka?

Beibel ondoosukuman, 1870

A fosi Waktitoren, 1879

A Waktitoren aini a ten ya

Beibel be taki a fesi taki baka te Kelestesi be o dede, da falisi leliman be o kon de a mindii den Kelesten. Den be o leli sama sani di á sikiifi aini Beibel (Toli 20:29, 30). A so sani be waka tuu enke fa Beibel be taki. Den be mokisa den leli fu Yesesi anga falisi leli. A so meke falisi biibi kon de (2 Timotiyesi 4:3, 4). Fa u sa sabi aini a ten ya taki wi e fusutan bunbun san Beibel e leli tuutuu?

A yuu be doo gi Yehofa fu soi sama sa a den tuu leli fu Beibel. A be taki a fesi taki ’a tuu sabi be o kon ipi aini den kiiboi dei’ (Daniyeli 12:4). Aini a yali 1870, wan tu teli sii sama di be e suku fu kon sabi a tuu biibi, be kon si taki fuu fu den sani di keliki e leli, á de aini Beibel. A dati meke den be bigin meke a moiti fu kon sabi san a den tuutuu leli fu Beibel. Yehofa yeepi den fu fusutan a Beibel.

Kiin ati sama be go ondoosuku a Beibel finifini. Den fayafaya Beibel Ondoosukuman ya, den di be waka a wi fesi, be fende wan fasi fu sutudeli Beibel. Na a seefi fasi wi e sutudeli ete aini a ten ya. Den be e taki anga makandaa fu wan toli fu Beibel. Te den be kaba anga a wan de, da den be e teke wan taawan. Te den be doo wan pisi di den á be poi fusutan, da den be e suku taa Beibeltekisi di be e tyai a wan de kon a kiin. Te den be kuudei anga denseefi fu wan pisi fu Beibel, anga te taa pisi fu Beibel be e holibaka gi a toli de, da den be e sikiifi en a pampila tapu. A so den be e meke a Beibel seefi tyai den toli fi en kon a kiin gi den. Den be kon fusutan san Beibel e taki tuutuu fu a nen fu Gadu anga a Kownukondee, san A abi a pakisei gi libisama anga goontapu. Den kon sabi san e pasa anga wan sama baka te a dede, anga a howpu fu a opobaka. A ondoosuku fu den, puu den aini somen falisi biibi anga gwenti.Yohanisi 8:31, 32.

Aini a yali 1879, den Beibel Ondoosukuman kon fusutan taki a yuu be doo fu meke sama a hii goontapu kon sabi den tuu leli fu Beibel. Neen meke aini a yali de, den be bigin meke a buku di wi e kai A Waktitoren A e taki fu Yehovah Kownukondre, di wi e paati gi sama aini a ten ya tu. Aini a ten ya, wi e leli sama den tuu toli fu Beibel aini 240 kondee anga sowan 750 tongo. Noiti ete a fesi sama be kon sabi a tuu leli so ipi a goontapu!

  • San be pasa anga den tuutuu leli fu Beibel baka di Kelestesi dede?

  • San be yeepi u fu kon sabi den tuu toli fu Beibel baka?