Tro jë kowe la alien

Tro jë kowe la itre mekune ka co

Tro jë kowe la itre alien

Itretre Anyipici Iehova

Drehu

Ita Ne Thup  |  Na. 1 2018

Inamacane Ka Cile Hut Qa Hnine La Tusi Hmitrötr

Inamacane Ka Cile Hut Qa Hnine La Tusi Hmitrötr

PANE MEKUNE JË: Epuni a nango ngenu e hnine la ketre musée ka tiqa hnei ewekë ka hekö. Itre ewekë ka kaqakaqa me hnyeqetr me ka hao, nge sine pë hë itre xan. Ngo ame thene la nöjei ewekë cili, casi pe hi la ka pexej, nge ka mama hnyawa la pengön ej. Celë hi matre hnyingëne jë epun kowe lai ka xomiujine la ihamë e hnine lai musée, ka hape, “Ka hnyipixe la ewekë celë hune la itre xan?” Nge sa jë hi angeic ka hape, “Waea. Ketre ewekë lai ka hekö catr hune la itre xan.” Hnyingëne hmaca jë hi epun, ka hape, “Hnei epuni hna thupën me nyidrawan ej?” Sa hmaca jë hi angeic ka hape, “Waea, hna lepe ej hnei eny ka catr nge hna maniën. Nge göi thele fe la itre ka atrekënö troa thë me angazon ej.” Ame hë e cili, epuni a hain me hnying, ka hape, ‘Nga hna kuca hnei nemen la ewekë celë?’

Ame la Tusi Hmitrötr, tre, ketre itusi lai nyine hain ke, ka hekö catre kö ej hune la itre xa itus. Eje hi, hetre itre xa itusi fe ka hekö. Ngo ame pe, hnyeqetr catre hë itre ej. Ame pena la itre hna qaja e hnine la itre itusi cili göne la sias, tre, hna jelethoin hnene la itre ka ithel. Nge hna lueluëne la itre ini hna hamën. Ketre, ame la itre eamo hna hamën hnine la itre itus, göne la itre mec tre, tha kolo kö a nyinyin, ngo kolo pena ha angazon catrën. Nyimutre e hnine la itre hna cinyihane cili, ka tha pexeje kö maine ka hnyeqetr.

Ngo ka ketrepengöne kö la Tusi Hmitrötr. Hna nyiqane cinyihane ej, a 3 500 hë lao macatre ngo ka pexeje palahi ej enehila. Qaane ekö, hnene la itre atr hna thele troa apatren ej. Hnei angatre hna dreuthetrij me wathebon me jele tha nyipiewekëne la Tusi Hmitrötr, ngo ame pe ka pexeje palahi ej enehila. Ngacama hna qaja ka hape, ketre itusi ka hekö la Tusi Hmitrötr, ngo nyimutre la itre ewekë hnene ej hna anyipicin. Tune la itre ewekë ka eatre hë, memine la  itre ewekë ka troa traqa elany.—Wange ju lo hna eköhagen hna hape, “Ka Hekö Maine Ka Loi Palahi Enehila?

ITRE EAMO KA NYIPIEWEKË ENEHILA

Maine jë hne së hna isa hnying ka hape, ‘Hapeu, ka nyipiewekë palakö la itre ini ne la Tusi Hmitrötr enehila?’ Maine aja së troa sa la hnyinge celë, nyipiewekë tro sa pane isa hnying, ka hape: ‘Nemene la itre jol ka tru hna melën hnene la nöjei atr enehila? Nemene la jol ka axouenyi së?’ Maine jë tro sa mekune la itre isi, me itre ka angazone la ihnadro, me ka ihumuth, maine ka qenatrekënö pena. Ngo tro sa pane ce wang la itre xa eamo hna hamën hnei Tusi Hmitrötr. Loi e tro fe sa isa hnying, ka hape, ‘Maine tro la itre atr a mele thenge la itre eamo cili, hapeu tro kö a mingöminge la mel e celë fen?’

TROA HNIIN LA TINGETING

“Manathithi angete ailoin, ke tro ha qeje angat’ ite nekö i Akötesie.” (Mataio 5:9) “E ateine nyipunie, lapa loi ju me nöjei ate asë.”—Roma 12:18.

TROA IHNIM ME NUE LA NGAZO I KETRE

“Manathithi angete ihnim, ke tro pena ha hnimi angat.” (Mataio 5:7) “Loi e ixomi hninekeune me inuekeune nyipunie, maine hete gele i kete ate koi kete ; hna nue nyipunie hnei Keriso, kete tro nyipunie a tun.”—Kolose 3:13.

TROA CAS NGACAMA NYIMU HANE NGÖNETREI

Hnei Akötresieti “hna xupe qa ngöne la ka casi la nöjei ate asë troa lapane cailo fene hnengödrai.” (Ite Huliwa 17:26) “Tha hnei Akötesieti hna iwangate hmekunyine ite ate, ngo hna kapa hnei anganyidëti la ate qoue nyidë me kuca la thina ka meköt, ngöne la nöjei nöj’ asë.”—Ite Huliwa 10:34, 35.

TROA METRÖTRËNE LA IHNADRO

“Ame hnei Iehova Akötesieti hna xome la ate, me ami angeice ngöne la hlapa e Edena troa eën’ eje me thupën.” (Genese 2:15) Nge Akötresieti elanyi a “troa apatrene la itre ka angazone la ihnadro.”—Hna Amamane 11:18, MN.

TROA THIPETRIJE LA MECIUN ME KUCI NGAZO

“Wange kö, thupë nyipunie, ke meciunejë ; qa ngöne la tha mele kö la ate hnene la etrune la nöjei ewekë hnei angeice hna heteny.” (Luka 12:15) “Ngo ame la kuci ngazo, me ite thina ka sisi asë, me meciun, te, the qaja hmaca thei nyipunie, ke tha ijije kowe la ange ka hmitöt .”—Efeso 5:3.

TROA THIINA KA MEKÖT ME CATRE HULIWA

“Eëhuni a ajane troa loi thina ngöne la nöjei ewekë asëjëihë.” (Heberu 13:18) “Ame la ate kë’ nö, the ënö hmaca kö ; ngo loi pe tro angeic’ a huliwa.”—Efeso 4:28.

TROA XATUANE LA ITRE KA AKÖTR

“Haji angete hni ka ewë, xatuanejë la ite ka kucakuca, xomi hnine ahoeane ju la nöjei ate asëjëihë.” (1 Thesalonika 5:14) “Troa wange la ite neköeng, me ite sine föe ngöne la aköte i angat.”—Iakobo 1:27.

Tha Tusi Hmitrötr hmekuje kö a hamë eamo. Ngo eje mina fe a amamane koi së la aqane tro sa trongëne itre ej ngöne la mele së. Maine tro la nöjei atr a melëne la itre hna amekötin hnei Tusi Hmitrötr, tune lo itre hne së hna qaja trongën e caha hun, haawe tha tro kö a tru menu la itre jol me itre akötr e celë fen. Nyipici laka, ka hetre thangane catr la itre trepene meköti ne la Tusi Hmitrötr, nge itre ka ihmeku hnyawa memine la itre ewekë hna melën enehila. Haawe nemene hë la thangane la itre trepene meköti ne la Tusi Hmitrötr ngöne la mele së enehila?

 AQANE TROA KEPE THANGAN ENEHILA

Öni Iesu, lo atr ka inamacan, ka hape: “Inamacane hnene la nöjei huliwa ne ej.” (Mataio 11:19) Hapeu ka nyipici kö lai? Easa qaja ka hape, ka inamacane la ketre atr, e ka hetre thangane ka loi la nöjei huliwa hnei angeic hna kuca. E cili, tro hë epuni a hnying ka hape, ‘Maine ka hetre menene la Tusi Hmitrötr, hapeu tro kö lai a hetre thangane ngöne la meleng? Nemene la aqane tro ej a xatua ni, ngöne la itre jol hnenge hna cile kow enehila?’ Hanawange la ketre ceitun.

Ame koi Delphine *, ka lolo la mele i eahlo pine laka, ka catre huliwa eahlo. Ngo ame ju hi la ketre ijin, hna traqa itrai la itre jol koi angeic. Hna meci la neköi eahlo jajinyi thöth, nge kola jol la faipoipo i eahlo, nge göi pë fe manie eahlo. Eahlo a mekune hmaca la itre jol cili me hape, “Hleuhleu catre ni, tha kolo hmaca kö lo eni ekö, patre hë la neköng, patre hë la föeng, nge pëhë hnalapang. Kösë pëhë aliene la meleng, pëhë trengecatreng, nge thatreine kö ni mekun, göne la itre drai elany.”

Delphine petre hi a hane öhne la enyipiewekëne la itre hna qaja e celë, lo kola hape, “Ame la nöjei drai ne la ite macate huni, te, [semitre] la o macate ne it’ ej ; nge maine egöcate kö, te, [eitre] la o macate, ngo ngazo me aköte la emingömingön’ it’ ej ; ke hna weje catë hun, ame hna sheshepi hun.”—Salamo 90:10.

 Ame ngöne la itre ijine akötre cili, hnei Delphine hna öhnyi ixatua qa hnine la Tusi Hmitrötr. Nge ka hetre thangane catr ngöne la mele i eahlo. Tune la hna troa amamane ngöne la köni tane mekun e thupen, nyimutre la itre atr hna xatuane hnei Tusi Hmitrötr. Hnei angatr hna nue ej troa xomiujine la mele i angatr ngöne itre ijine jol. Ame koi angatr, ceitune hi la Tusi Hmitrötr memine lo ewekë hna amë ngöne musée, hna qaja e caha hun. Ka isapengöne catre la Tusi Hmitrötr memine la itre itusi ka hekö nge ka hnyiqetre hë. Hapeu, hnene kö laka, hna kuca ketrepengönëne ej? Nyipici kö laka, ej a qatrenge la itre mekuna i Akötresie, ngo tha mekuna i atre kö?—1 Thesalonika 2:13.

Maine jë hnei epuni fe hna hane mekun, ka hape, xoxopatre hi la mel, ngo tru pe hnei itre jol. Haawe, ekaa la hnë troa öhnyi ixatua me iakeukawany me eamo, ngöne la kola traqa itrai la itre jol?

Hanawange la köni aqane tro la Tusi Hmitrötr a xatua së ngöne la mele së. Ej a ini së la aqane troa

  1. neëne la itre jol.

  2. cile kowe la itre jol.

  3. xomihnine la itre jol ka cile hut.

Tro la itre tane mekun e thupen a qejepengöne la köni götrane cili.

^ par. 24 Ame ngöne la tane mekun celë memine la köni xan e thupen, tre, hna saze la itre ej.