AME la itre hmi e cailo fen, tune la hmi katolik, memine la nöjei hmi Orthodoxe, me itre ka hmi koi Bouddha me itre xan ju kö, ke, angatre asë hi a sajuëne la ini laka tha tro kö la itre hene ne la hmi angatr a hane faipoipo. Nge ketre, kola mekune hnene la itre atr, ka hape, ame la thangane la hna lapa cas me tha faipoipo la itre hene ne hmi, ke, kuci huliwa ka sis.

Celë hi matre, ijije hi tro sa hnying, ka hape, ame la troa tha faipoipo, ke, hna amekötine kö lai hnei Tusi Hmitrötr kowe la itre Keresiano? Tro sa pane ce wange la qane la ini cili, memine la mekuna i Akötresie göne lai. Celë hi ka troa xatua së troa sa la hnyinge cili.

THA FAIPOIPO NGÖNE LA HMI

Kola qejepengöne hnene la Encyclopædia Britannica, la aliene la troa tha faipoipo. Kola qaja ka hape, “ame la troa tha faipoipo, tre, celë hi ketre aqane mel, ene laka tha tro kö a hane ce meköle trefën. Nge celë hi hna amekötine kowe la itre hene ne hmi.” Ame ngöne la cainöj hna tro fë hnei paap Benoît XVI lo macatre 2006 ngöne la cour de Rome, hnei nyidrëti hna qaja, ka hape, “celë hi ketre hna majemine kuca, ngöne lo hneijine i ange Aposetolo.”

Ngo ame la troa tha faipoipo ke, tha ketre ewekë kö hna majemine kuca hnene la itre pane Keresiano ekö ngöne lo hneijine i Iesu. Ka mele Paulo aposetolo ngöne la hneijine cili. Hnei angeic hna hmekëne la itre keresiano qa ngöne la itre ka “jëthenge la ite u ne amenun” me “shawa troa faipoipo.” —1 Timoteo 4:1-3.

Ame ngöne lo hnaaluene hadredre macatre thupe i Keriso, kola ha mama la aqane mele cili thene la itre hmi ne la itre götrane kuë ka uun, ka hape, itre Keresiano angatr. Kola qaja ngöne la itusi hna hape, Celibacy and Religious Traditions, ka hape, “ketre aqane tro hi lai a cile kowe la itre huliwa ka sis hna kuca ekö, ngöne lo ijine musi angatre Roma.”

Ame hë ngöne lo itre macatre thupen, hnene la itre hene ne hmi hna acatrene la mekun laka, tro la itre hene hmi a lapa pë föen. Hnei angatre hna mekune ka hape, ame la troa ce meköl tre, ka sis nge tha ka ihmeku kö memine  la itre huliwa hna xome hnene la itre hene ne hmi. Hna qaja hnene la Encyclopædia Britannica, ka hape, “ame la pune lo hna treene ne hadredre lao macatre, nyimutre la itre hene ne hmi me itre hnamiatr ka xomi föe.”

Ame ngöne lo itre macatre 1123 me 1139, tre, hna amekötine ngöne lo itre icasikeu ka tru hna hape, Conciles de Latran hna kuca e Roma, ka hape, tha tro kö a hane faipoipo la itre hene ne hmi. Tha hna saze kö la mekune cili thene la hmi katolik uti hë enehila. Jëne la hna amekötine cili, hnene la hmi hna trongëne lai wanga troa pë ka sajuëne ej, nge tro ha pë aliene la itre kees thatraqane elanyi la itre neköne la itre hene ne hmi ka faipoipo.

MEKUNA I AKÖTRESIE GÖNE LA TROA THA FAIPOIPO

Kola mama hnyawa la mekuna i Akötresie göne la troa tha faipoipo e hnine la Wesi Ula i Nyidrë, ene la Tusi Hmitrötr. Easa e la itre trengewekë i Iesu thatraqane la itre ka tha faipoipo, ngöne lo nyidrëti a hape, “thatraqane la baselaia ne hnengödrai.” (Mataio 19:12) Kolo mina fe a qaja hnei Paulo aposetolo göne la itre Keresiano ka iëne troa xötrethenge la tulu i nyidrë, ka hape, tha tro pë hë angatr a hane fapoipo “pine la maca ka loi.”—1 Korinito 7:37, 38; 9:23.

Ngo ame pe tha hnei Iesu kö me Paulo hna amekötine kowe la itre Keresiano troa lapa pë föe. Hnei Iesu hna qaja la pengöne la itre ka tha hane kö faipoipo, ka hape, ketre “ahnahna” lai, ngo tha hna kapa asë kö hnene la itretre drei nyidrë. Ame la Paulo a cinyihane kowe la “itre atr ka tha hane fe kö faipoipo,” öni angeic e qaja hnyawa, ka hape: “Pëkö wathebo i Joxu koi ni, ngo ini a amamane la mekuneng.”—Mataio 19:11; 1 Korinito 7:25.

Ketre kolo fe a amamane e hnine la Tusi Hmitrötr, ka hape, nyimutre thene la itre Keresiano ngöne lo hneijine i Iesu ka hane faipoipo, tui Peteru aposetolo. (Mataio 8:14; Mareko 1:29-31; 1 Korinito 9:5) Pine laka kola elë la kuci huliwa ka sis ngöne lo hneijine i angetre Roma, hnei Paulo hna cinyihane ka hape, maine ka faipoipo la qatre thup Keresiano, ke, loi e tro angeic a “ca fö” me hetre “nekö i angeice memine la metöte.”—1 Timoteo 3:2, 4.

Tha kolo kö e celë a qaja la itre ka pë föen, ke, Tusi Hmitrötr a qaja ka hape, tro la ‘trahmanyi a hamëne la ka ijije kowe la fö’ i angeic’, nge tha tro kö a “cipa kete hnei kete” hnene la lue trefën, ene la troa ce meköle trefën. (1 Korinito 7:3-5) Kola amamane hnyawa e celë laka ijije hi troa lapa cas la ketre atr, tha tro kö a hane faipoipo. Tha hna wathebone kö lai hnei Akötresie kowe la itre Keresiano.

PINE LA MACA KA LOI

Maine tha hna musinëne kö la troa lapa cas, pine nemene kö matre qaja aloine jë Iesu me Paulo la aqane mele cili? Pine laka tha ka faipoipo kö la ketre atr, tru hnei ijine i angeic troa hane cainöjëne la maca ka loi kowe la itre atr. Ke angatr a nue asë la mele i angatr, tha tune kö la itre ka faipoipo laka hetre itre ewekë hnei angatr hna hnehengazon.—1 Korinito 7:32-35.

Hanawange la tulu i David, hnei angeic hna mekune troa nue la huliwa i angeic e Mexico, ketre huliwa hna nyithupene hnyawa. Angeice a inine la Tusi Hmitrötr memine la itre atr ka mele ngöne la itre götran gaa aja ixatua e Costa Rica. Hapeu, hnei David kö hna mekune ka hape, pine laka ka tha faipoipo angeic, ke tro ha aijijë angeic troa hane ixatua? Öni angeic ka hape, “Eje hi, hna xatua ni.” Nge öni angeice hmaca jë hi, ka hape, “Ketre jole ka tru la troa mel ngöne la ketre nöj me saze la aqane mel, ngo pine laka eni cas, haawe ka hmaloi hi koi ni.”

Hnei Claudia ketre Keresiano föe ka tha hane kö faipoipo, hna feke kowe la itre götrane gaa aja ixatua ngöne la huliwa ne cainöj. Öni angeic: “Madrine catre ni ngöne la huliwange koi Akötresie. Ame la eni a goeëne la aqane thupë ni hnei Nyidrë, kola acatrene catrëne la lapauneng memine la aqane imelekeunge me Nyidrë.”

“Tha ka jole kö la troa lapa cas. Ka faipoipo ju hë maine tha ka faipoipo pena, ngo troa hetrenyi la madrine the së, e hne së hna hamëne la ka sisistria koi Iehova Akötresie.”—Claudia

Tha ka hace menu kö la troa lapa cas. Öni Claudia e qaja hmaca, ka hape: “Tha ka jole kö la troa lapa cas. Ka faipoipo ju hë maine tha ka faipoipo pena, ngo troa hetrenyi la madrine the së, e hne së hna hamëne la ka sisitria koi Iehova Akötresie.”Salamo 119:1, 2.