Tro jë kowe la alien

Tro jë kowe la itre mekune ka co

Tro jë kowe la itre alien

Itretre Anyipici Iehova

Drehu

Ita Ne Thup  |  Na. 2 2017

Hetre Eloine La Troa Ham

Hetre Eloine La Troa Ham

“IJIJE hë troa tro la car, ngo tro pe kö a lapa hnene lai chinois!” Celë hi hna drenge hnei Alexandra e hnine la car, ngöne la angeic a fek a tro kowe la ketre nöj e Amerique du Sud. Hnei angeice hna uti qa ngöne la car, ke, hetre ewekë.

Traqa ju hi angeice a öhne la ketre chinois a kola tupathe troa qene Espagnol kowe la ketre sooc. Qane ju hi lai, hnei Alexandra hna sine la ekalesia ne la Itretre Anyipici Iehova ka qene sinoa matre troa hane atreine ujën.

Hnene la trahmanyi hna qaja ka hape, ka mele angeic e cili ngo pëkö pepa thei angeic matre troa anyipicine lai. Ame ngöne lo xötrei, tha kapa kö hnene lai sooc la itre hna qaja hnei Alexandra ke, nyidrë a mekun ka hape, ka salemë atr angeic. Thupene lai hnene lai sooc hna kapa la itre hna qaja hnene lai chinois, ngo hnei angeic pe hna nyithupene la ketre amende, ke patre kö la itre pepa. Pine laka pëkö mani angeic, hnei Alexandra hna të la gufa i angeic, $20 la etrun. Tru la hni ne ole ne la trahmanyi koi Alexandra, matre qaja jë hi angeic koi eahlo ka hape, tro pë angeic a të la mani, ngo tro pe angeic a hamëne atrun. Hnei Alexandra hna qaja koi nyidrëti ka hape, tha eahlo kö a treqene tro lai trahmany a të la mani, ke, madrine catre eahlo troa xatua nyidrë, pine laka madrine catre eahlo troa kuca la loi. Eahlo a hamëne pi koi nyidrëti la itre zonal ka qeje Tusi Hmitrötr me upi nyidrëti troa hane inine la Tusi Hmitrötr memine la Itretre Anyipici Iehova.

Madrine catre së la easa drenge la kola ham kowe la itre trenyiwa, me goeëne la itre xa aqane ham thene la itre atr ngöne la nöjei hmi me itre atr ka pë hmin. Hapeu, tro kö epuni a ham me hnime la itre xaa atr? Ka nyipiewekë catre la hnyinge celë pine laka öni Iesu: “Sisitia la manathithi e troa hame hune la troa kapa.” (Ite Huliwa 20:35) Ketre hna qaja aloine la troa ham hnene la itre ka inamacan. Öni angatr, ka hape, ame la troa ham tre, ka loi koi epun. Tro sa pane ce wange lai.

“ATE HAMËNE MADIN”

Kola mama ngöne la hna melën, ka hape, ka ce tro la troa ham memine la madrin. Hnei Paulo aposetolo hna cinyihan, ka hape, “aja i Akötesie la ate hamëne madin.” Angeic e celë a qaja lo itre Keresiano ka ham, matre troa xatuane me akeukawane la hni ne la itre xa trejine ka akötr. (2 Korinito 8:4; 9:7) Tha Paulo kö e celë a qaja ka hape, angatr a ham, pine laka angatr a madrin. Ngo angatr a madrin, pine laka ijiji angatr hi troa hamën.

Nge thenge la hna qaja hnene la itre ka inamacan, ame la troa ham “tre, kola enijëne la itre xa götranene la atuat matre easa madrin, me atreine ce mel, me mejiun, nge kola akeukawanyi së.” Angatre mina fe a qaja ka hape, “ame la troa hamë manie kowe la ketre atr, tre, kola akökötrene thei nyidro la madrin, ngo tha hnene kö la hna huliwane lai manie.”

Maine jë epuni a öhne e itre xa ijine laka, epuni a pi kuca la ketre ewekë ngo thatreine kö epun? Eje hi laka, ijije hi tro sa madrin e ka “hamëne madine” fe easë. Ame la easa ham cememine la hni ka pexej, tha easë kö a goeën la etrun. Hna iupi fë la maca celë hnene la ketre Atre Anyipici Iehova kowe la itre ka fejane la zonale celë. Hnei angeic hna hamë manie  fe me qaja ka hape: “Thase kö ni kuië manie ngöne la itre macatre ka ase hë, ngo hane pe la hnepe manie thatraqane la Uma Ne Baselaia.” Öni angeice fe: “Tru catre kö la hnei Iehova hna hamën hung. . . . Oleti la hna aijijë ni troa hane hamëne la ahnahna cili, kola akeukawane la hning.”

Ame la troa ham, tre, tha kolo hmekuje kö a qeje mani. Nyimutre la itre aqane troa ham.

MAINE TROA HAM, THA TRO JË KÖ A TITHI SË HNEI MEC

Ka hetre eloine la troa ham, koi së me kowe la itre xan

Öni Tusi Hmitrötr, ka hape: “Ame la ate ka ihnim, te, kola thina ka loi koi angeice kö ; ngo ame la ate ka calogiti, te, kola akötëne la itei nyëne kö.” (Ite Edomë 11:17) Ame la itre atr ka menyik me ka ham, ke, aja i angatr troa ketre sipu nue la traeme i angatr, me trengecatre me ihnimi angatr me itre xane ju kö. Hetre eloine la aqane ujë cili ngöne la nöjei götrane la mele ne la atr, nge ketre hetre thangane ka loi kowe la ngönetrei ne la atr.

Kola mama hnyawa laka, ame la itre atr ka nuemele troa xatuane la itre xan, ke, tha hleuhleu menu kö angatr me akötr. Pëkö sine meci angatr, ka egöcatre angatr. Maine tro sa ham, ke, kola aloine la meci ne la itre hna tithi hnei mec, tune la meci hna hape, sclérose en plaques me VIH. Hna amamane mina fe ka hape, ame lo itre ka nue la kahaitr, ke tha hleuhleu hmaca kö angatr, pine laka angatr a xatuane la itre xan. Ketre kolo fe a xatua angatr matre tha tro hmaca kö angatr a ketri kahaitr.

Ame la kepine la aqane saze cili tre, hnene la “utipin, thiina ka loi me menyik me ihnim, itre thiina ka thipetrije la itre mekune ka ngazo.” Maine tro sa ham, tha tro pi kö sa hnehengazo menu nge tha tro pi kö sa tasio. Nge maine tro la itre atr hna meci trij a hane xatua itre xan, haawe tro hë lai a patre trootro la akötre i angatr.

Ka nyipici catre la hna qaja e celë. Ame la troa ham, tre, ka loi koi epun.

KA IXÖTREKEU LA TROA HAM

Hnei Iesu hna ithuecatre kowe la itretre drei nyidrë, ka hape: “Hamënejë, nge tro pena a hamë nyipunie ; nge tro hë la nöjei ate a hamëne kowe la imano i nyipunie la tulu ka loi, hna hujan, me ijumejumekeun, me kola malamala. Nge ame la aqane tuluthe hnei nyipunie, te, tro pena a tuluthe koi nypunie.” (Luka 6:38) Ame la epuni a ham, tre, kola ukune la itre xan troa kapa cememine la hni ne ole nge kolo fe a hane upi angatr troa hane ham e thupen. Ketre, ame la troa ham, ke, kola ithuecatre troa ce huliwa me acatrene la aqane imelekeu.

Ame la ka ham, tre angeic a acatrene la ce huliwa me ce mel

Hna qaja hnene lo itre ka inamacane ka thele la itre aqane ujë ne la itre atr ka hape, “ame la itre atr ka ham pala hi koi itre xan, tre, kola ithuecatre me upe la itre xan troa hane nyitipu angatr.” Ketre, “ame la kola e la itre itusi ka qaja la itre aqane ujë ka loi, tre, kola upe la itre atr troa ham.” Celë hi matre, hna qaja hnene la itre ka inamacan, ka hape, “Ijije hi tro la thiina ne la ala cas a xötr kowe la treen maine hadredre lao atr, itre atr hnei angatr hna thatre maine hna tha hane iöhnyi memin.” Kolo lai a hape, ame la troa ham tre, kola nyiqane thene la ala cas nge xötr uti hë la kola ketr asë la itre xa atr. Hapeu tha ajane kö epuni troa mele ngöne la götran cili? Nyipici, maine tro la itre atr a ham, ke, nyimutre la itre manathithi hna troa kapa qa ngöne lai.

Hna melëne lai e Florida e Etazini. Hnene la ketre gurup ne Itretre  Anyipici Iehova hna hane xatuane lo itre atr thupene la hna lepe la nöj e cili hnene la ketre wene ka tru. Pine laka angatr a treqene la itre ewekë hna upi fë matre troa nyihnyawane hmaca la itre uma hna angazon, hnei angatr hna öhne la ketre ihag hna fej ngöne la hnalapa ezi angatr. Sipone jë hi angatr kowe lai atr troa nyihnyawane lai hag. Thupene lai, hnene lai atr hna cinyihane kowe la sasaitri ne la itre temoë i Iehova, ka hape, “Tru la hni ne oleng. Pë fe kö atr ka lolo e celë fen ka ceitu me angatr.” Hnene la hni ne ole i nyidrë, matre hnei nyidrëti hna iupi fë ahnahna kowe la huliwa ka lolo hna kuca hnene la Itretre Anyipici Iehova.

NYITIPUNE JË LA TULU NE HAM KA TRU

Kola atrehmekune hnene la itre ka inamacane ka hape, “hetre ka upe la itre atr troa xatuane la itre xan.” Hna qaja mina fe göne la itre nekönatr, ka hape, “qëmekene tro nyudreni a nyiqane ithanata, kola mama laka, ka meku itre xane nyudren.” Pine nemen? Tusi Hmitrötr a sa la hnyinge cili, me qaja ka hape, hna xupe la itre atr “hnaiji Akötesie,” matre ceitune hi la itre thiina i angatr me Akötresie.—Genese 1:27.

Ka hame mina fe Iehova Akötresie lo Atre Xupi së. Hnei Nyidrëti hna hamëne koi së la mel me itre ewekë ka troa amadrinë së. (Ite Huliwa 14:17; 17:26-28) Ijije hi tro sa atrepengöne hnyawa la Tretretro së ekoho hnengödrai, me itre hnei Nyidrëti hna hnëkëne thatraqai së. Ka loi troa inine la Wesi Ula i Nyidrë, ene la Tusi Hmitrötr, matre troa atre la itre ewekë cili. Kola amamane hnene la Tusi Hmitrötr, laka, ase hë Iehova hnëkëne la itre ewekë matre tro sa mele madrin elany. * (1 Ioane 4:9, 10) Pine laka, ka hame Iehova Akötresie, nge hna xupi së hnaiji Nyidrë, tha sesëkötre kö së laka, maine tro sa ham tui Nyidrë, tre, troa hetre thangane ka loi koi së, nge tro sa amadrinëne la hni Nyidrë.—Heberu 13:16.

Mekune hi së lo ewekë ka traqa koi Alexandra, föe hne së ithanatane ngöne lo xötrei? Nemene hë la ewekë ka traqa koi eahlo? Ngacama hna qaja koi eahlo hnene la ketre ka ce ti kar me eahlo ka hape, eahlo a aluzine la manie i eahlo. Ngo hnene lo lai atr hnei eahlo hna xatuan, hna hë kowe la itre sinee i angeic ngöne la ketre traon hna troa cili thenge hnene lai kar, me iupi troa canga të lai gufa. Ketre, hnene lo lai trahmany hna trongëne lo hna qaja hnei Alexandra me hane nyiqane inine la Tusi Hmitrötr. Thupene la köni treu, nyio a madrine la nyio a iöhnyi ngöne la ketre ijine Asabele ka tru ne la Itretre Anyipici Iehova qene sinoa e Peru. Hnene lai trahmanyi hna olene koi Alexandra me hë angeic me itre sinetrongei angeic kowe la restaurant i nyidrë.

Atraqatr la madrinene la atr ka ham me ka xatuane la itre xan. Tro kö a tru catre la thangane kowe la itre atr, ngöne la epuni a xatua angatr troa hane atrepengöi Iehova hnyawa, ke, Nyidrëti lo Atre Hamën la nöjei ahnahna ka loi asë! (Iakobo 1:17) Ase hë epuni hane kapa la itre manathithi qa ngöne la hna ham?

^ par. 22 Maine epuni a aja itre xa ithuemacany, wange ju la itusi hna hape, Nemene La Nyipi Ini Hna Hamën Hnei Tusi Hmitrötr? hna kuca hnene la Itretre Anyipici Iehova nge ijije fe troa xome ngöne www.jw.org. Tro jë kowe la sit jw.org, PUBLICATIONS > BROCHURES.