Tro jë kowe la alien

Tro jë kowe la itre mekune ka co

Tro jë kowe la itre alien

Itretre Anyipici Iehova

Drehu

Ita Ne Thup  |  Na. 1 2017

 KA QA NGÖNE ICETRÖN | HETRE THANGANE CATR LA TROA E TUSI HMITRÖTR

Nemene La Aqane Tro Ni a Nyiqane e La Tusi Hmitrötr?

Nemene La Aqane Tro Ni a Nyiqane e La Tusi Hmitrötr?

Nemene la aqane tro epuni a kuca matre hetre aja troa e la Tusi Hmitrötr me kepe thangane qa ngön? Hane hi la faifi lao aqane troa kuca ka hetre thangan.

Troa thele gaa tingeting. Pane thele jë la ketre götrane gaa pë mejen. Tha tro pi kö a hetre ketre ewekë ka troa ajolë epun, ngöne la epuni a e la Tusi Hmitrötr. Nyipiewekë troa thele la ketre götrane ka lualai nge gaa uqa, matre hetre thangane hnyawa la hnei epuni hna e.

Troa hnëkëne la hni epun. Pine laka ame la Tusi Hmitrötr tre, qaathene la Keme së e koho hnengödrai, haawe, tro hë së lai a kepe thangan qa ngön, e hne së hna ujë tune la ketre nekönatr ka treqene la ini qaathene la kem maine thine i angeic ka ihnim. Maine hetre mekun ka ajolë epun göi Tusi Hmitrötr, loi e tro epuni a pane amë e cili trön, matre troa nue Akötresie troa ini epun.—Salamo 25:4.

Troa pane thithi qëmekene troa e la Tusi Hmitrötr. Ame e hnine la Tusi Hmitrötr, tre, itre mekuna i Akötresie, celë hi matre nyipiewekë tro sa sipo Nyidrë troa xatua së, matre troa trotrohnine ej. Hnei Akötresieti hna thingehnaeane koi së, ka hape, tro Nyidrëti a hamëne la “Uati Hmitöte koi angete sipo anganyidë.” (Luka 11:13) Tro la uati hmitrötr a xatua epuni troa trotrohnine la mekuna i Akötresie. Tro kö ej a fe la hni epun ngöne la nyipi ijin, matre troa xolouthe la “nöjei ewekë asë ga jui Akötesie.”—1 Korinito 2:10.

Troa e göi troa trotrohnin. Tha tro kö a e gufane la Tusi Hmitrötr. Ngo huliwane jë la mekuna i epun ngöne la epuni a e. Isa pane hnyingëne jë ka hape: ‘Nemene la itre thiina ne la atr ka mama koi ni, ngöne la eni a e la mele i angeic e hnine la Tusi Hmitrötr? Nemene la aqane tro ni a xomi tulu qa ngön?’

Troa isa wai tulu ne mel. Maine aja i epuni troa kepe thangane qa ngöne la hnei epuni hna e la Tusi Hmitrötr, thele jë troa inine la ketre ewekë, nyine asisitriane la mele i epun. Isa wai tulu ne mele jë, tune la troa mekun, ka hape: ‘Ajange troa atre Akötresieti hnyawa.’ ‘Ajange troa ketre atr ka loi, föe ka loi maine trahmanyi ka loi.’ Thupene lai, iëne jë la itre xötr ka troa xatua epun troa traqa kowe la hnei epuni hna axecië mekun. *

Tro la faifi lao aqane troa kuca celë a xatua epun troa nyiqan. Ngo nemene la hnei epuni hna troa kuca, matre troa thue aja koi epun tro pala hi a e la Tusi Hmitrötr? Tro la tane mekune ka troa xulu a amamane koi së la itre xa aqane kuca.

^ par. 8 Maine tha ihmeku kö la itre xötr ne la Tusi Hmitrötr memine la mekuna i epun, madrine catr la Itretre Anyipici Iehova troa hane xatua epun.