Tro jë kowe la alien

Tro jë kowe la itre mekune ka co

Tro jë kowe la itre alien

Itretre Anyipici Iehova

Drehu

Ita Ne Thup  |  Januare 2015

 KA QA NGÖNE ICETRÖN | EASENYI JË KOI AKÖTRESIE

Epuni Kö a Hane Hën La Ëje i Akötresie?

Epuni Kö a Hane Hën La Ëje i Akötresie?

Thatreine kö tro sa qaja ka hape, sipu sinee së la ketre atr nge thatre kö së la ëje i angeic. Nga öni Irina, ketre föe ne Bulgarie ka hape, “Thatreine kö tro sa easenyi Akötresie e thatre kö së la ëje i Nyidrë.” Eloine pe, ijije hi tro sa easenyi Nyidrë, tune lo hne së hna wange hë. Ke Akötresieti a qeje Nyidrë jëne la Tusi Hmitrötr ka hape: “Iehova ni, celë hi ëjeng.”—Isaia 42:8.

Akötresieti a qeje Nyidrë jëne la Tusi Hmitrötr ka hape: “Iehova ni, celë hi ëjeng.” —Isaia 42:8

Aja i Iehova kö tro sa atre me qaja la ëje i Nyidrë? Pane mekune ju la: ame la ëje i Akötresie qene Heberu, tre a 7 000 jë kö lao mama ej e hnine la Isisinyikeu Ka Hekö. Celë hi ëje lai hna a nyimu a cinyanyin e hnine la Tusi Hmitrötr. Kolo hi lai a amamane ka hape, aja i Iehova tro sa atre me qaja la ëje i Nyidrë. *

Lue treme sineen a iatre hnene la hna isa pane atre la lue ëje i nyidro. Atre fe hi epun la ëje i Akötresie?

Ngo kola mekune hnene la itre xa atr ka hape, pine laka ka draië me hmitrötre lae Akötresie, haawe, tha tro kö a qaja la ëje i Nyidrë. Nyipici laka tha tro kö a qaja gufane la ëje i Akötresie, ke tha hne së kö hna hane huliwane menun la ëjen la sinee së. Ngo aja i Iehova la troa atrune me qaja la ëje i Nyidrë hnene la itre sinee i Nyidrë. (Salamo 69:30, 31; 96:2, 8) Öni Iesu lo e inine la itretre drei nyidrë troa thith: “Tetetro huni fe e koho hnengödrai, epi hmitöte la atesiwa i Cilie.” Tro së lai a xatua Nyidrë troa ahmitrötrën la ëje i Nyidrë, e tro sa qaja la ëje cili. Nge celë hi lai ka troa aeasenyi së catre koi Nyidrë.—Mataio 6:9, Traduction du monde nouveau.

Tusi Hmitrötr a amamane ka hape Akötresieti a wang atrune la atr ka “mekune la atesiwa i nyidë.” (Malaki 3:16) Öni Iehova: “Tro ni a acilë angeice draië ke ate hë angeice la ëjeng. Tro angeic’ a hë ni, nge tro ni a sedi angeic ; ce ini me angeice ngöne la aköt.” (Salamo 91:14, 15) Haawe, maine easa ajane troa imelekeu hnyawa me Iehova, ke loi e troa atre me qaja la ëje i Nyidrë.

^ par. 4 Ngazo pe, ngacama a nyimu a mama la ëje i Akötresie e hnine la Isisinyikeu Ka Hekö, ngo patre pë hë la ëje i Nyidrë ngöne la itre xa Tusi Hmitrötr. Hna nyi hnan la ëje i Nyidrë hnei “Joxu” maine “Akötresie.” Wange ju la itre xa mekune ngöne la götrane 195-197 ne la itus Nemene La Nyipi Ini Hna Hamën Hnei Tusi Hmitrötr?, hna kuca hnene la Itretre Anyipici Iehova.