Tro jë kowe la alien

Tro jë kowe la itre mekune ka co

Tro jë kowe la itre alien

Itretre Anyipici Iehova

Drehu

Ita Ne Thup (Nyine Inin)  |  Ogas 2016

Öhne Kö Epuni La Eloine Troa Huliwa Catre Koi Akötresie?

Öhne Kö Epuni La Eloine Troa Huliwa Catre Koi Akötresie?

“Qâ i ’ö troa cate e tus, me eamo, me ini.” —1 TIMOTEO 4:13.

NYIMA: 4570

1, 2. (a) Hna eatre tune kaa la Isaia 60:22 ngöne la hneijine la pun? (b) Nemene la ka mama enehila thene la organizasio i Iehova?

“TRO ha ala thausane la ala xalaith, nge tro ha nöje ka cate la ka co.” (Isaia 60:22) Kola eatre hnyawa la itre hna perofetane celë ngöne la hneijine la pun. Matre ame lo macatre 2015, ala 8 220 105 lao hlue i Iehova ka cainöjëne la maca ka loi ne la Baselaia e cailo fen! Hnei Iehova hna qaja göne la aqane kökötre la nöje i Nyidrë ka hape: “Tro ni Iehova a asaqen’ eje ngöne la ijin’ ej.” Celë hi matre, kola kökötre fe la etrune la huliwa së isa ala cas. Ngo hapeu, easë kö a kuca asë la hne së hna atreine matre troa sine la huliwa ne cainöj? Ala nyimu la itre trejin ka xome la huliwa ne pionie ka ixatua me pionie lapa. Nge itre xane pena a feke kowe la itre xa nöj gaa aja ixatua, nge itre xane fe a catre huliwa matre troa xupe la itre Uma Ne Baselaia.

2 E nöjei macatre kola acile la 2 000 lao ekalesia ka hnyipixe, matre kola aja atr ka ixatua, tune la itre qatre thup me itre drikona. Ketre, kola ajane matre tro la itre thauzane lao drikona a hane qatre thup, nge tro la itre xa thauzane lao trejine trahmanyi a xome la hnëqa ne drikona. Haawe, kola mama hnyawa  laka, tru catre la ‘huliwa së thei Joxu,’ ngo tha göi itre trahmanyi hmekuje kö, ngo itre föe mina fe.—1 Korinito 15:58.

HULIWA CATRE JË

3, 4. Nemene la aliene la kola hape, troa akökötrene la huliwa së koi Iehova?

3 E jë la 1 Timoteo 3:1, MN. Hnei Paulo hna qaja aloine la itre ka “ajan” troa hane xome la hnëqa ne atre thup. Maine ketre atr a ajane la ketre ewekë hna amë ngöne la gaa draië, tro hë angeice lai a isine troa xolouth. Matre, pane mekune jë la hna troa kuca hnene la ketre trejine ka ajane la hnëqa ne drikona. Tro angeice lai a isine troa melëne la itre thiina i Akötresie. Nge ngacama hna acili drikona angeic, ngo tro pala hi angeice lai a catre huliwane la itre thiina cili, matre troa hamë angeic hmaca la itre xa hnëqa e hnine la ekalesia.

4 Ala nyimu la itre trejin ka ahmaloeëne la mele i angatr göi troa akökötrene la huliwa i angatre koi Iehova. Hetre itre xan ka ajane la huliwa ne pionie, maine huliwa ngöne la Bethela, maine ngöne la hna xupi Uma Ne Baselaia. Tro sa pane ce wange la aqane tro la Tusi Hmitrötr a xatua së troa huliwa atrune koi Iehova.

ACATRENE JË LA LAPAUNE I NYIPUNIE

5. Nemene la aqane huliwane la itre thöthi la trengecatre i angatr?

5 Nyimutre catre la itre huliwa i Iehova ka ijiji kowe la itre thöth troa kuca, ke itre ka egöcatr. (E jë la Ite Edomë 20:29.) Ala nyimu la itre thöthi ka huliwa ngöne la Bethela, angatr a feja itus me cane la itre itusi me Tusi Hmitrötr. Nge itre xane mina fe a huliwa ngöne la hnë xup me nyidrawane la itre Uma Ne Baselaia. Hetre itre xane ka ixatua thupene la itre hulö. Nge itre xa thöth ka pionie a inine la itre xa qene lapa, matre troa fek kowe la itre nöje gaa aja ixatua.

6-8. (a) Nemene la ka xatua Aaron troa saze mekun, nge nemene la thangane lai? (b) Tro sa atre tune kaa laka, “ate ihnimi Iehova”?

6 Atraqatre la ihnimi së koi Iehova matre aja së troa hamë Nyidrë la ka sisitria. Ngo maine jë, hna hane fe traqa koi epuni la mekuna i Aaron, ketre trejin. Aja i angeice hi troa nyihlue i Iehova, ngo pë kö madrine i angeic. Ngacama ekö hë angeice sine la itre icasikeu me cainöje trootro, ngo öni angeic, “Kösë eni a aluzi traem.” Matre nemene hë la hnei angeice hna kuca?

7 Hnei Aaron hna catre e la Tusi Hmitrötr o drai, me hnëkëne me qeje mekun ngöne la itre icasikeu. Hnei angeic mina fe hna thele troa catre thith. Hnene la nöjei ewekë cili, hna xatua angeic troa acatrene la lapaune i angeic. Angeic a atrepengöi Iehova hnyawa, nge celë fe hi ka acatrene la ihnimi angeic koi Nyidrë. Ame la thangane lai, hetre madrine i angeice hë. Matre, hnei angeic hna hane xome la huliwa ne pionie, me ixatua ngöne la ijine traqa la hulö, me feke kowe la itre götrane gaa aja ixatua. Enehila, ketre qatre thupe angeic, nge angeice fe hë a huliwa ngöne la Bethela. Matre nemene jë la aqane goeëne angeic la mele i angeic? Öni Aaron: “Hnenge hna ‘tupathe me atre laka atre ihnimi Iehova.’ Nge ihnimi Nyidrë la ka upi ni troa huliwa atrun, matre Nyidrëti a amanathithi ni.”

8 Önine la atre cinyihane la Salamo ka hape: “Demeju, nge atejë laka ate ihnimi Iehova.” Öni angeic hmaca jë: “Tha tro kö a pate la kete loi thei angete thele Iehova.” (E jë la Salamo 34:8-10.) Eje hi laka, ame la easa hamëne koi Iehova la ka  sisitria, atraqatre la madrine së qa ngöne la hna amadrinë Nyidrë. Nge tro Nyidrë a metrötrëne lo hnei Nyidrëti hna qaja ka hape, tro kö Nyidrëti a thupë së.

THE CILE KÖ

9, 10. Pine nemene matre ka nyipi ewekë troa itreqe?

9 Loi e tro pala hi sa thele troa akökötrene la huliwa së koi Iehova. Ngo maine jë, ekö hë epuni treqene matre hamë huliwa i epuni jë ngöne la ekalesia, maine pena tha ijiji epuni kö ke, hetre ewekë ka xome acone la mele i epun. Nemene la nyine tro epuni a kuca? Loi e troa atreine xomihni ahoean maine itreqe. (Mika 7:7) Nge ngacama Iehova pala kö a nue lai, ngo tro kö Nyidrëti a xatua epuni troa xomihnin. Hetre ini hna hamë së hnei Aberahama. Hnei Iehova hna thingehnaeane koi angeic ka hape, tro angeic a hetre nekönatr trahmany. Ngo eje hi laka, hnei angeic hna pane itreqe koi nyimu macatre qëmekene troa hnaho Isaaka. Ame ngöne la itre macatre cili, hnei Aberahama hna itreqe hnyawa, me catre lapaune koi Iehova.—Genese 15:3, 4; 21:5; Heberu 6:12-15.

10 Nyipici laka, tha ka hmaloi kö troa itreqe. (Ite Edomë 13:12) Nge maine tro pala hi sa lapa mekune la itre jole së me wangatrune catrëne la itre aliene hni së, tro hë së lai a kucakuca. Loi e tro pe sa xome la ijine cili, matre troa melëne la itre thiina i Akötresie, ke itre thiina lai ka nyipi ewekë göi troa thupëne la ekalesia.

E hne së hna e la Tusi Hmitrötr o drai me lapa mekun ej, tro hë sa inamacan, me atreine axecië mekune ka loi

11. Nemene la itre thiina nyine tro sa melën, nge pine nemene matre nyipi ewekë itre ej?

11 Thele jë troa melëne la itre thiina ka loi. Tro sa atreine traqa kow, e hne së hna e la Tusi Hmitrötr o drai me lapa mekun ej. Loi e tro fe sa thele troa inamacan, me pane mekune hnyawa qëmekene troa axecië mekun. Ka nyipi ewekë lai kowe la itre trejin trahmany, ke itre thiina lai ka troa aijijë angatr troa thupëne hnyawa la ekalesia. (Ite Edomë 1:1-4; Tito 1:7-9) Ketre, ame la easa inine la Tusi Hmitrötr, easë fe a atrehmekune la aqane wai ewekë i Iehova. Nge tro lai a xatua së troa axecië mekune hnyawa göi troa amadrinë Nyidrë. Tro hë sa atre la aqane troa ujë koi ketre, memine la aqane tro sa huliwane la mani, me aqane troa iëne la itre nyine iamadrinë me nyine heetrën.

12. Tro sa amamane tune kaa ka hape, ijije troa hane hamë hnëqa së?

12 Wange atrune jë la itre huliwa hna ahnithe koi epun. Ame ngöne lo ijine kola acile hmaca la ēnē, hnei Nehemia hna thele la itre trahmanyi göi troa ahni huliwa koi nyudren. Hnei angeic hna iëne la itre trahmanyi hna qaja aloin. Atre hnyawa hi angeic ka hape, ka hnimi Iehova catr angatr. Matre, e hamëne ju hë koi angatr la nöjei pengöne huliwa, ngo tro pala hi angatre lai a isine troa eatrën. (Nehemia 7:2; 13:12, 13) Ketre tune mina fe, ame la itre trejin enehila ka huliwa catre koi Iehova nge hna qaja aloin, tre, tro ha thue xa hnëqa i angatr. (1 Korinito 4:2) Matre, itre trejine trahmanyi ju hë maine föe, ngo loi e tro pala hi sa  isine troa eatrëne la itre hnëqa së.—E jë la 1 Timoteo 5:25

13. Nemene la ini hne së hna kapa qa ngöne la tulu i Iosefa?

13 Mejiune jë koi Iehova. Nemene la nyine tro epuni a kuca e traqa jë ketre akötrë epun? Loi e tro epuni a qaja la aliene hni epuni koi angeic. Ngo e tro epuni a nyiqaane catre fë mekun me pi hun, tro hë lai a jole catr. Hetre ini nyine tro sa xome qa ngöne la tulu i Iosefa. Ngazo pi hë la aqane ujë ne la itre trejine me angeic. Nge goi hane fe sili trengathoi angeic, matre akalabusi angeice menu jë hi. Ngo hnei Iosefa pala hi hna mejiune koi Iehova. Hnei angeice hna lapa mekune la itre hnei Iehova hna thingehnaean, nge celë hi ka aijijë angeic troa mele nyipici koi Nyidrë. (Salamo 105:19) Ketre, ame ngöne la itre ijine jole cili, hnei angeice hna huliwane hnyawane la itre thiina ka nyipi ewekë göne pë hë la huliwa i angeic elany. (Genese 41:37-44; 45:4-8) Haawe, e traqa jë ketre atr akötrë epun, sipo Iehova jë la inamacan. Tro kö Nyidrëti lai a kuca matre troa tingetinge la hni epun, nge tro lai a aijijë epuni troa ithanata hnyawa me angeic.—E jë la 1 Peteru 5:10.

 XOME AMACANE JË LA AQANE CAINÖJE I EPUN

14, 15. (a) Pine nemene matre nyipi ewekë tro sa xome amacane la aqane cainöje së? (b) Nemene la itre xa aqane tro sa ketr la itre atr? (Wange ju la pane iatr memine la mekune hna eköhagen, “Ijiji Epuni Kö Troa Tupathe La Ketre Aqane Cainöj?”)

14 Hnei Paulo hna thuecatre koi Timoteo troa xome amacane pala hi la aqane qejepengöne angeic la itre Hna Cinyihan. Öni Paulo: “Wai ’ö kö memine la aqane ini.” (1 Timoteo 4:13, 16) Ekö hë Timoteo cainöj, nga pine nemene kö matre Paulo a hmekë angeice göne lai? Atre hi Timoteo laka, kola saze la mele ne la atr, me itre thiina i angatr. Nge aja i angeic tro pala hi la itre atr a drei angeic, celë hi kepin matre, hnei angeic hna xome amacan, maine saze la aqane cainöje i angeic. Enehila mina fe, nyipi ewekë tro sa hane nyitipu Timoteo.

15 Ame ngöne la itre xa götran, xalaithe hi la itre atr hna öhne la kola cainöj ngöne la itre hnalapa trootro. Nge ame pena ngöne la itre xa götran, ala nyimu la itre atr ka lapa hnalapa. Ngazo pe, tha ijiji së kö troa fenafena la qëhnelö i angatr, ke thatreine kö së lö hnine la batima. Maine celë hi lai ka traqa koi epun, hapeu, ijiji epuni kö troa tupathe la ketre aqane cainöj pena?

16. Nemene la ka amamane ka hape, ka hetre thangane la troa cainöje ngöne la gaa tru atr?

16 Ala nyimu la itre trejine ka madrine troa cainöje ngöne la gaa tru atr. Angatr a cainöj ngöne la hnë treqe train me kar, me ngöne la hna maketr, me ngöne la itre park. Maine jë, tro angatr a nyiqaane ithanatane la itre nuvel memine la itre atr. Maine jë, angatr fe a qaja aloine la atr me nekö i angeic, maine pena, angatr a hnyingëne kowe la atr la pengöne la huliwa i angeic. Nge e mama ha laka, kola pi porotrike lai atr, tro hë la trejin a qaja la ketre mekun qa hnine la Tusi Hmitrötr, me hnyingëne la mekuna ne lai atr. Nge kola mama e cili laka, ala nyimu pi hë la itre atr ka kapa la hna qaja hnei Tusi Hmitrötr.

17, 18. (a) Nemene la nyine tro epuni a kuca matre troa thipetrije la xou troa cainöje ngöne la gaa tru atr? (b) Nemene la tulu hna hamëne hnei Davita?

17 Maine jë, ka nango jole koi epuni troa cainöj e cahu gojenyi kowe la itre atr hnei epuni hna thatre. Celë hi hna melëne hnei Eddie, ketre pionie e New York. Ngo hnei angeice hna öhne la ketre aqane troa elë hune la xou i angeic. Öni angeic: “Ame ngöne la eni me föeng a kuca la Hmi Hnepe Lapa, hnei nyiho hna pane ithele göi aqane troa sa kowe la itre atr ngöne la hna cainöj. Ketre, hnei nyiho fe hna majemine hnyingëne kowe la itre xa trejin la aqane kuca i angatr.” Ame hë la thangane lai, tru catre hë la aja i Eddie kowe la aqane cainöje cili.

18 Ame la easa madrine troa cainöj, me thele troa xome amacane la aqane tro fë së la maca ka loi, tro lai a mama koi itre xane laka, easa macaje trootro. (E jë la 1 Timoteo 4:15, MN) Nge aqane tro fe hi së lai a xatuane la itre atr troa hane nyihlue i Iehova. Öni Davita: “Tro pala kö ni a ole koi Iehova o ijin ; tro pala kö la qeng’ a atrunyi nyidë. Tro ha la ung’ a selë Iehova ; tro ha denge me madine hnei angete ipië.”—Salamo 34:1, 2.

AMADRINË IEHOVA JË

19. Pine nemene matre ka madrine pala hi la itre hlue i Iehova, ngacama angatr a ixelë memine la itre jol?

19 Öni Davita mina fe: “Iehova fe, kola atrunyi cilie hnene la nöjei huliwa asë i cilie ; nge ange ka hmitöte i cilie a qaja aloinyi cilie. Angat’ a qaja la lolo ne la baselaia i cilie, me ithanatane la cate i cilie ; mate troa amamane kowe la ite nekö i ate la ite huliwa ka mene i nyidë, memine la  lolo ne la baselaia i nyidë ka mingeming.” (Salamo 145:10-12) Ame kowe la itre hlue i Iehova, aja i angatr asë hi troa hane qeje Nyidrë kowe la itre atr. Ngo eje hi laka, hetre itre xan hna tithi hnei meci maine kola uti ipië trootro, matre tha ijiji angatre hë troa cainöj ngöne la itre hnalapa trootro. Tha tro jë pi kö angatr a thëthëhmine laka, angatr a amadrinë Iehova ngöne la angatr a qeje Nyidrë kowe la itre atr ka lapa ezi angatr, tune la itre infirmier me itre droketre. Nge maine hna akalabusi epuni pi hmi, ijiji epuni pala hi troa qeje Nyidrë koi itre xan, nge celë hi ka amadrinëne la hni Nyidrë. (Ite Edomë 27:11) Nyidrëti fe a madrine kowe la itre hlue i Nyidrëti ka lapa casi ngöne la nyipici. (1 Peteru 3:1-4) Haawe, kolo hi lai a hape, melëne ju hë së la nöjei pengöne jol, ngo ijiji së asë hi troa thithi koi Iehova, me easenyi Nyidrë, me acatrene la lapaune së.

20, 21. Maine hna athipi hnëqa i epun, nemene la aqane tro epuni a ketre ixatua kowe la ekalesia?

20 Tro kö Iehova lai a amanathithi epun, e hnei epuni hna qale catre koi Nyidrë, me hamëne koi Nyidrëti la ka sisitria. Maine jë, tro hë epuni lai a pane saze la porogarame i epun, maine aqane mele i epuni pena. Celë hi lai ka aijiji epuni troa xatuane hnyawane la itre atr troa atrepengöne la itre hnei Iehova hna thingehnaean. Ketre, tro fe lai a aijijë epuni troa xatuane hnyawane la itre trejin. Nge pane mekune jë la etrune la ihnimi angatr koi epun, ngöne la angatr a öhnyi epun e huliwa catr thatraqane la ekalesia.

21 Ngacama ekö hë së nyihlue i Iehova, ngo loi e tro pala hi së a acatrene la lapaune së, memine la aqane imelekeu së me Iehova. Ame ngöne la tane mekune ka troa xulu, tro sa ce wange la aqane troa xatuane la itre atre troa acatrene la lapaune i angatr.