Tro jë kowe la alien

Tro jë kowe la itre alien

Itretre Anyipici Iehova

Iëne jë la qene hlapa Drehu

Öhne Kö Epuni La Enyipiewekëne Troa Inin Me Hnëkë Angatr?

Öhne Kö Epuni La Enyipiewekëne Troa Inin Me Hnëkë Angatr?

“Ke ini a inine aloinyi nyipunie.”—ITE EDOMË 4:2.

NYIMA: 9396

1, 2. Pine nemene matre nyipi ewekë troa inin me hnëkëne la itre xan?

HNEI Iesu ekö hna catre cainöjëne la maca ne la Baselaia. Nge hnei nyidrëti mina fe hna xomi ijine troa inin me hnëkëne la itretre drei nyidrë. Hnei nyidrë hna amamai angatr la aqane troa inine la itre atr, me thupëne hnyawane la itre hlue i Akötresie. Matre, hnene la itretre dreng hna inine troa ujë tune la atre thupën aloine la itre mamoe. (Mataio 10:5-7) Hnei Filipo mina fe hna catre cainöj, ngo hnei angeice fe hna xomi ijine troa inine me hnëkëne la itre nekö i angeic jajinyi troa hane huliwa tui angeic. (Ite Huliwa 21:8, 9) Enehila mina fe, nyipi ewekë pala hi tro së a inin me hnëkë itre xan. Pine nemen?

2 Ame ngöne la itre ekalesia e cailo fen, ala nyimu la itre atr ka tha hane petre kö xomi bapataiso. Matre, nyipi ewekë troa inin me hnëkë angatr. Loi e tro sa xatua angatr troa trotrohnine la enyipiewekëne la troa e me inine la Tusi Hmitrötr cas. Nge loi e tro fe sa hnëkë angatr göne la huliwa ne cainöj, me göi troa inine la itre atr. Ketre, loi e tro mina fe sa inin me hnëkëne la itre trejine trahmanyi ka xötrei xomi bapataiso, matre tro fe angatr elanyi a hane xome la hnëqa ne drikona me  qatre thup. Nge ame lai, tre hnëqa ne la ekalesia asë troa inin me hnëkëne la itre atren ej.—Ite Edomë 4:2.

INI ANGATRE JË TROA ISA INI TUSI HMITRÖTR

3, 4. (a) Paulo a amamane tune kaa laka, ka ce tro la ini Tusi memine la troa hetre thangane ngöne la hna cainöj? (b) Nemene la nyine tro sa pane kuca qëmekene troa thuecatrene la ketre göi e Tusi Hmitrötr?

3 Ka nyipi ewekë kowe la nöjei hlue i Iehova troa e me inine la Tusi Hmitrötr, matre troa atre la aja i Akötresie. Hnei Paulo hna qejepengöne lai kowe la itre trejin ne Kolose, me hape: “Tha mano kö nyiho thithi me sipo thatraqai nyipunie qane ngöne la drai hnei nyiho hna deng, mate tiqa nyipunie hnene la trotrohnine la aja i nyidë.” Pine nemene matre ka nyipi ewekë lai koi angatr? Pine laka, celë hi ka troa ainamacanë angatr, me xatua angatr matre ‘tro pala hi angatr a thiina ka ijiji koi Joxu, kolo pala hi a amadrinë nyidrë.’ Tro fe lai a upi angatr troa kuca “la nöjei huliwa ka loi asë,” tune la huliwa ne cainöj, ke celë hi aja i Iehova. (Kolose 1:9, 10) Haawe, maine easë a ini Tusi memine la ketre atr, nge aja së tro angeic a nyihlue i Iehova, nyipi ewekë tro sa hane xatua angeic troa trotrohnine la enyipiewekëne troa e me inine la Tusi Hmitrötr.

4 Ngo eje hi laka, tha tro jë kö së lai a xatua angeic troa trotrohnine la enyipiewekëne la troa ini Tusi cas, e tha hne së kö hna pane majemine kuca lai. Ngo e tro pala hi sa e la Tusi Hmitrötr me lapa mekun ej, tro lai a xatua së ngöne la hna cainöj, me ngöne la mele së. Maine jë, ame ngöne la hna cainöj, tro la ketre atr a hnyingëne la ketre hnying ka jole pi hë troa sa, ngo tro hë së lai a atreine sa jëne la Tusi Hmitrötr. Nge ame la easa e la aqane catre cainöje i Iesu, me Paulo me itre xan, kolo fe hi lai a thuecatre koi së troa catre cainöj, ngacama jole pi hë. Ketre, maine tro sa ce thawa me itre xan la hne së hna inin, memine la aqane xatua së hnene ej, easë fe hi lai a thue aja i angatr troa hane inine casine la Tusi Hmitrötr. Nge tro fe hë angatre lai a hane kepe eloine qa ngön.

5. Qaja jë la itre xa aqane xatuane la atr hne së hna ini Tusi kow.

5 Maine jë, epuni a isa hnyinge ka hape, ‘Tro ni a xatua angeice tune kaa troa majemine inine casine la Tusi Hmitrötr?’ Ka loi e tro epuni a pane amamane koi angeice la aqane troa hnëkëne la ini Tusi angeic. Upi angeice jë troa e la itre xötre ka mama, me e la itre xa ithuemacanyi hna amë ngöne la, ‘Itre Xaa Mekun’ ne la itus, Nemene la nyipi Ini hna hamën hnei Tusi Hmitrötr. Thupene lai, xatua angeice jë troa  hnëkëne la itre icasikeu, matre hane jë fe angeice qeje mekun. Thuecatre i angeice jë troa e asë la nöjei Ita Ne Thup me Réveillez-vous! ka xötrei mama. Nge, loi e tro fe epuni a amamai angeice la aqane troa ithel ngöne la hna hape, Watchtower Library, maine ngöne la site së, HNË AMI ITUS. Haawe, ame hë la angeic a hane tupathe la itre aqane ini Tusi cili, tro hë angeice lai a madrin, nge tro fe a hetre aja i angeice troa kuca lai.

6. (a) Tro sa aciane tune kaa thene la atr hne së hna inin la aja troa ini Tusi Hmitrötr cas? (b) Nemene la mekuna ne la atr ka hnine la Tusi Hmitrötr?

6 Aja së asë hi tro la atr hne së hna ini Tusi kow, a atrehmekune la enyipiewekëne la Tusi Hmitrötr göi troa atrepengöi Iehova hnyawa. Ngo tha loi kö e tro sa musinë angeic troa inine la Tusi Hmitrötr, ngo loi pe tro sa amamane koi angeic la madrin hne së hna kapa qa ngön. Matre, ame ju hi la angeic a inine la itre xa ini ka hnyipixe, ketre tro fe lai a cia e kuhu hni angeic la mekune hna nyiman hnene la atre cinyihane la Salamo, kola hape: “Loi koi ni troa eashenyi Akötesie ; ase hë ni lapaune koi Joxu Iehova.” (Salamo 73:28) Nge eje hi laka, tro kö Iehova a hamëne la uati hmitrötr, matre troa xatuane la itre atr ka thele Nyidrë.

INI ANGATRE JË TROA CAINÖJE TROOTRO

7. Hnei Iesu hna inin me hnëkëne tune kaa la ange aposetolo göne la huliwa ne cainöj? (Wange ju la pane iatr.)

7 Nyimutre catre la itre ini nyine tro sa xome qa ngöne la aqane inin me hnëkëne Iesu la ange aposetolo. Hnei Iesu pala hi hna xomi angatr troa cainöj, matre tro angatr a hane goeëne la aqane kuca i nyidrë. Ketre, hnei nyidrëti fe hna hamëne la itre xa hna amekötine göne la huliwa ne cainöj. (Mataio, mekene 10) [1] (Wange ju la ithuemacanyi e kuhu pun.) Haawe, tha qea ju kö nge canga atreine jë hi angatr tro fë la maca ka loi. (Mataio 11:1) Tro sa pane ce wange la lue aqane troa xatuane la itre ka inin troa cainöje trootro.

8, 9. (a) Tune kaa la aqane isa ithanata i Iesu kowe la itre atr? (b) Tro sa xatuane tune kaa la hne së hna ini Tusi kow troa nyitipune la aqane ithanata i Iesu?

8 Troa ithanata memine la atr. Tha hnei Iesu hmekuje kö hna ithanata kowe la ka ala nyimu. Hnei nyidrëti mina fe hna majemine ithanata kowe la ala cas. Ame ngöne la ketre drai, hnei Iesu hna ithanata amenyikenyi kowe la ketre föe ka traqa troa jöe tim e Sikara. (Ioane 4:5-30) Hnei Iesu mina fe hna ithanata koi Mataio hna hëne ka hape, Levi. Ngacama ketre telona angeic, ngo hnei Iesu hna hë angeic matre troa hane ketre atre drei nyidrë. Kapa ju hi Mataio, ame hnei angeice hna könë Iesu me itre xan troa ce xeni me angeic ngöne la uma i angeic. Nge e cili, hnei Iesu hna ithanata kowe la ka ala nyimu.—Mataio 9:9; Luka 5:27-39.

Ame la easa ithanata amenyikenyi kowe la itre atr, tro hë angatre lai a hmala troa drei së

9 Hnei Iesu mina fe hna ithanata amenyikenyi koi Nathaniela, ngacama hnei angeic hna jele ngazone la itre atr ne Nazareta. Nge pine laka, hnei Iesu hna  ithanata amenyikenyi koi Nathaniela, haawe, saze pi hi la aqane goeë Iesu hnei angeic, ngacama atre Nazareta hi Iesu. Matre, hetre aja i Nathaniela hë troa atrepengöne hnyawa la hna qaja hnei Iesu. (Ioane 1:46-51) Jëne la tulu i Iesu, trotrohnine hë së laka, ame la easa ithanata amenyikenyi kowe la itre atr, tro hë angatre lai a hmala troa drei së. [2] [Wange ju la ithuemacanyi e kuhu pun.] Matre ame la easa inine la atr hne së hna ini Tusi kow troa ithanata amenyikeny, tro hë angeic lai a madrine trootro ngöne la hna cainöj.

10-12. (a) Hnei Iesu hna acatrene tune kaa la aja ne la itre atr kowe la maca ka loi? (b) Tro sa xatuane tune kaa la ka xötrei cainöje troa hane maca ngöne la huliwa cili?

10 Inine jë la itre ka pi drei epun. Ngacama tru catre la huliwa i Iesu, ngo, ame la kola pi drei nyidrë hnene la itre atr, nyidrëti a xomi ijine troa ini angatr la nöjei ewekë. Ame ngöne la ketre ijin, hnene la itre atr ka ala nyimu hna traqa koi Iesu ngöne la ngöne gejë. Matre, hnei Iesu me Peteru hna elë hune la he me nyiqaane ini angatr qa lai. Thupene lai, hnei nyidrëti hna mekune troa hamë ini koi Peteru cas. Matre Iesu a kuca jë la ketre iamamanyikeu, ene la troa aijiji Peteru troa nyi i atrun. Öni nyidrëti jë koi Peteru: “Qanehila tro eö a xölehuje it’ ate.” Ame hnei Peteru me itre xan hna abëekëne la lue he, nge “angat’ a nue pe la nöjei ewekë asë, me xöte thenge nyidë.”—Luka 5:1-11.

11 Nikodemo fe la ketre atr ka thele troa kapa la itre ini qaathei Iesu. Ngo pine laka, ketre Faresaio ka hlemu angeic, matre xou i angeic tro la ketre a öhnyi angeic e ce ithanata me Iesu. Celë hi kepin matre, angeic a traqa troa wai Iesu e jidr. Tha hnei Iesu kö hna helë angeic, ngo hnei nyidrëti pe hna xomi ijine troa qejepengöne koi angeice la itre ini ka tru. (Ioane 3:1, 2) Tha hnei Iesu pi kö hna cipane la traeme i nyidrë, ngo hnei nyidrë pala hi hna inine la itre atr, me acatrene la lapaune i angatr. Ketre tune mina fe, loi e tro sa wange la itre atr ngöne la itre ijine ka loi koi angatr, me nue la traeme së matre xatua angatr troa trotrohnine la Tusi Hmitrötr.

12 Ame la epuni a ce cainöje trootro memine la ketre ka xötrei cainöj, ini angeice jë troa bëeke hmaca troa wange la itre atr ka drei epun. Ketre, ce tro jë me angeice troa iwai hmaca, maine sine la ketre ini Tusi epun. Tro hë angeice lai a öhne la aqane troa inine la itre atr, memine la elolone troa ini angatr la itre nyipici göi Iehova. Tro hë angeice lai a hetre aja troa wange hmaca la itre atr ngöne la hna cainöj, me ini Tusi koi angatr. Nge tro fe angeice lai a atreine xomihni me catre iwai hmaca, ngacama tha öhne hë angeic lo lai atr hna thel.—Galatia 5:22; Wange ju la mekune hna eköhagen “The Mano Kö Wai Angatr.”

HNËKË ANGATRE JË TROA XATUANE LA EKALESIA

13, 14. (a) Nemene la mekuna i epuni göne la tulu ne ihnim hna hamën hnene la itre hlue Akötresie ekö? (b) Tro epuni a inine tune kaa la itre nekönatr me itre ka xötrei bapataiso troa xatuane la itre trejin?

13 Aja i Iehova tro la itre hlue i Nyidrëti a ihnimikeu me ce huliwa, tune la itre atrene la ketre lapa ka cas. (E jë la Luka 22:24-27; 1 Peteru 1:22.) Tusi Hmitrötr a amamane ka hape, ase së hë Iesu nue asë matre troa xatuane la itre atr, nge goi nue fe nyidrë la mele i nyidrë. (Mataio 20:28) Kolo fe a qaja göi Doreka ka hape, “tiqa ha la föe celë hnene la nöjei huliwa ka loi me ihnimi hnei nyidoti hna kuca.” (Ite Huliwa 9:36, 39) Nge ame pena Maria, tre, ka  “huliwa atrune” angeic kowe la itre trejin e hnine la ekalesia ne Roma. (Roma 16:6) Ngo hapeue së, tro sa xatuane tune kaa la itre ka xötrei bapataiso troa kuca la loi kowe la itre atrene la ekalesia?

Amamai angatre jë la aqane troa hnime la itre trejin (Wange ju la paragarafe 13, 14)

14 Loi e tro sa ce tro me angatr troa wange la itre trejin ka qatre hë, me itre ka wezipo. Nge e ijij, loi e tro mina fe la itre keme me thiin a ce tro memine la itre nekö i angatr troa wange la itre trejine cili. Nge ame itre qatre thup, loi e tro fe angatr a ce tro memine la itre nekönatr, me itre ka xötrei xomi bapataiso göi troa komisio, maine troa nyihnyawane la itre uma ne la itre qatr me qatre föe. Matre, ame hë la angatr a öhne la aqane nyipi ewekëne së la itre trejin, ketre angatre fe hi lai a xomi tulu qaathe së. Celë hi hna kuca hnene la ketre qatre thup. Ame la angeic a cainöje ngöne la ketre götran, angeice fe hi lai a hane wange la itre trejin ka lapa e cili. Nge hnei angeic fe hna majemine ce tro memine la ketre thöth, matre jëne la tulu ka lolo i angeic, hnene hë la thöth hna atrehmekune la aqane troa xatuane la itre trejin.—Roma 12:10.

15. Pine nemene matre nyipi ewekë tro la itre qatre thup a xatuane la itre trejin trahmanyi troa macaj?

15 Hnei Iehova hna ahnithe kowe la itre trejin trahmanyi la hnëqa ne troa inine la Wesi Ula i Nyidrë kowe la ekalesia. Celë hi matre, nyipi ewekë tro la itre trejin a maca ngöne la troa cile fë cainöj. Haawe, maine ketre qatre thup epun, loi e tro epuni a xomi ijine troa drenge la ketre drikona a amacane la cainöje i angeic, me xatua angeic matre atreine hnyawa jë angeic. (Nehemia 8:8) [3]—Wange ju la ithuemacanyi e kuhu pun.

16, 17. (a) Nemene la ka amamane laka, hetre aja i Paulo troa inin me hnëkë Timoteo? (b) Tro la itre qatre thup a inine me hnëkëne tune kaa la itre trejin ka troa thupëne la ekalesia?

16 Kola mama enehila laka, nyipi ewekë troa inine me hnëkëne la itre trejine trahmanyi göi troa thupëne la itre ekalesia. Nge celë hi hna kuca hnei Paulo koi Timoteo. Matre hnei angeic pë hë hna upi Timoteo troa hane kuca tun koi itre xan. Öni Paulo: “Catejë eö, neköng, ngöne la ihnimi gufa ka eje thei Keriso lesu. Nge ame la nöjei ewekë hnei ’ö hna denge qathenge hnene la angete anyipicine ka ala nyimu, hamënepi pena lai kowe la nöjei ate ka nyipici, angete ateine troa ini ite xane fe.” (2 Timoteo 2:1, 2) Tru catre la itre ini hnei Timoteo hna kapa qaathei Paulo, ketre qatre thup me aposetolo. Hnei Timoteo hna inine la aqane troa maca ngöne la hna cainöj, me aqane tro angeic a xatuane la ekalesia.—2 Timoteo 3:10-12.

 17 Nyimutre catre la itre hawa hnei Paulo hna ini Timoteo, ke aja i angeic tro Timoteo a maca hnyawa. (Ite Huliwa 16:1-5) Ketre tune mina fe, loi e tro la itre qatre thup a nyitipu Paulo me ce tro me itre drikona ngöne la angatr a wange trongëne la itre trejin. Tro hë la itre drikona a atrehmekune la aqane troa inine la itre xan, me aqane troa ihnim me xomihni, me aqane troa mejiune koi Iehova göi troa thupëne la “ite mamoe.”—1 Peteru 5:2.

THA HULIWA KÖ NYINE TROA WANGE SIXAN

18. Pine nemene matre nyipi ewekë catre tro sa inine me hnëkëne la itre xan?

18 Pine laka, easa melëne la itre drai ne la pun, nyipi ewekë troa inine me hnëkëne la itre ka tha maca pala kö ngöne la huliwa ne cainöj. Ketre, nyipi ewekë fe troa inine me hnëkëne la itre trejin trahmanyi göi troa thupëne la ekalesia. Nge aja i Iehova tro asë hi la itre hlue i Nyidrëti a kapa la ixatua cili, nge ketre manathithi koi së la Iehova a upi së troa inin me hnëkë angatr. Celë hi kepine matre, loi e tro sa catre huliwa, tune la aqane kuca i Iesu me Paulo. Nge nyipi ewekë tro sa catre inine me hnëkëne la itre xan, ke tru catre pala kö la huliwa së qëmekene troa traqa la pun.

19. Pine nemene matre xecie koi së laka, troa hetre thangane la hne së hna inine me hnëkëne la itre xan?

19 Tru catre la traem me trenge catre hne së hna nue matre troa hnëkëne me inine la itre xan. Ngo, xecie koi së laka, tro pala kö Iehova me Iesu a hamëne koi së la ixatua, matre atreine së troa inine me hnëkëne hnyawane la itre xan. Nge ketre, tro fe së a madrine elanyi troa öhne la itre hne së hna inine a “huliwa, me cat” ngöne la ekalesia, me ngöne la huliwa ne cainöj. (1 Timoteo 4:10) Ngo enehila, loi e tro sa kuca asë la hne së hna atrein, matre troa akökötrene la lapaune së, me melëne la itre thiina ka lolo, me acatrene catrëne la aqane imelekeu së me Iehova.

^ [1] (paragarafe 7) Hnei Iesu hna amekötine kowe la itretre drei nyidrë troa (1) cainöjëne la baselaia; (2) mejiune koi Akötresie göi xeni me iheetr; (3) ananyine la itre ka isi pi mekun; (4) lapaune koi Akötresie ngöne la kola axösisi angatr; nge (5) tha tro kö angatr a xoue atr.

^ [2] (paragarafe 9) Tirez profit de l’École du ministère théocratique, götrane 62-64, a hamëne la itre ithuemacanyi ka lolo kowe la aqane troa ithanata kowe la itre atr ngöne la hna cainöj.

^ [3] (paragarafe 15) Kola mama ngöne la itus, Tirez profit de l’École du ministère théocratique, götrane 52-61, la aqane tro la itre trejine trahmanyi a maca ngöne la kola cile fë cainöj.