Tro jë kowe la alien

Tro jë kowe la itre alien

Itretre Anyipici Iehova

Iëne jë la qene hlapa Drehu

Öhne Kö Epuni La Ime i Iehova Ngöne La Mele i Epun?

Öhne Kö Epuni La Ime i Iehova Ngöne La Mele i Epun?

“Tro la ite hlue i nyidë a ate la themie [maine ime] i Iehova.” ISAIA 66:14.

NYIMA: 65, 26

1, 2. Nemene la mekuna ne la itre atr göi Akötresie?

TRU catr enehila la itre atr ka mekune ka hape, tha semesinene kö Akötresie la itre huliwa i angatr. Ame koi angatr, tha hnehengazone kö Nyidrëti la itre ewekë ka traqa koi angatr. Ka tune lo wene ka lepe la itre götrane nöj e Philippines lo Nofeba 2013, önine la maire ne la ketre traone ka tru e cili ka hape: “Ma hetre xa jole i Akötresie e cili.”

2 Ame koi itre xa atr, tha öhne kö Akötresie la itre huliwa i angatr. (Isaia 26:10, 11; 3 Ioane 11) Ce mekune i angatre hi memine la itre atr ne lo hneijine i Paulo. Öni angeic, hnei angatre hi hna thë, matre troa wangesixa Akötresie. Matre, tiqa ha angatre hnene la nöjei thiina ka tha meköti kö, me thiina ka ngazo, me pi hetreny.—Roma 1:28, 29.

3. (a) Nemene la itre hnyinge göi tro sa isa waipengö së? (b) Nemene la aliene la “ime” i Akötresie hnine la Tusi Hmitrötr?

3 Nge tune kaa fe së? Atre hnyawa hi së laka, öhne asë hi Iehova la nöjei ewekë hne së hna kuca. Ngo, hapeu, ame koi së ke, Iehova kö a nyipiewekë së? Öhne kö së la ime i Iehova ngöne la mele së?  Ame la “ime” i Akötresie e hnine la Tusi Hmitrötr, tre, kola qaja la mene i Nyidrë ka mama ngöne la itre huliwa i Nyidrë. Nyidrëti a xatuane la itre hlue i Nyidrë me ngaane la itre ithupëjia jëne la mene i Nyidrë. (E jë la Deuteronomi 26:8.) Öni Iesu, tro la itre xa atr a “a goeë Akötesie.” (Mataio 5:8) Easë fe kö la ketre e angatr? Tro sa “goeë Akötesie” tune kaa? Tro sa ce wange la itre xa atr e hnine la Tusi Hmitrötr ka öhne la ime i Akötresie ngöne la mele i angatr, me itre ka tha öhn. Tro fe sa ce wange la aqane tro la lapaun a xatua së troa öhne la ime i Akötresie.

KOLA XELE MA GOEËNE LA IME I AKÖTRESIE

4. Pine nemene matre xele kö la itre ithupëjia me Isaraela ma goeëne la ime i Akötresie?

4 Ame ekö, nyimutre la itre atr ka hane öhne me drenge la aqane xatua angetre Isaraela hnei Akötresie. Hnei Iehova hna thepe angatr qaa Aigupito jëne la itre iamamanyikeu, me ngaane la itre joxu ithupëjia ngöne la Nöje Hna Thingehnaean. (Iosua 9:3, 9, 10) Ngacama hna drenge me öhne hnene la itre xa joxu la aqane isigöline Iehova la nöje i Nyidrë, ngo “hnei angate [kö] hna icasikeujë, troa ishi me Iosua me angete Isaraela.” (Iosua 9:1, 2) Ame hë la angatr a tro troa isi, ke maine ju tro hi angatr a öhne la ime i Akötresie. “Hnei jö hna cileju, nge kete cileju la teu, uti hë ase hë la nöje nyi thupene kowe la ite ithupëjia.” (Iosua 10:13) Ame hnei Iehova hna nue troa axetine la hni angatr, ene la tro angatr a catre fë mekun matre troa thele isi me Isaraela. (Iosua 11:20) Haawe, hna ngaane la itre ithupëjia me Isaraela, ke xele kö angatr ma kapa ka hape, Iehova hi la ka isigöline la nöje i Nyidrë.

Nyipiewekë tro sa thele la itre ijine kola mama koi së la ime i Akötresie

5. Nemene la hna xele ma kapa hnei Ahaba Joxu?

5 Ahaba la ketre Joxu ka ngazo, nge nyimu ijine koi angeic troa goeëne la ime i Akötresie. Öni Elia koi angeic: “Troa pë lepanyi me manie ngöne la ite macate, loi pe ngöne hi la tenge ewekëng!” (1 Ite Joxu 17:1) Hna eatre la trenge ewekë celë hnene hi la ime i Akötresie, ngo xele kö Ahaba ma kapa lai. Ame hë e thupen, Elia a thithi jë koi Iehova, ame hnei Nyidrëti hna upe la eë qaa hnengödrai matre troa sa koi angeic. Öhne hnyawa hi Ahaba la ewekë cili. Elia a qaja jë koi Ahaba ka hape, tro kö Iehova a nyipune la qaqacil, me axulune la mani ka tru. (1 Ite Joxu 18:22-45) Tha sihngödri kö koi Ahaba la itre iamamanyikeu cili, ngo xele pala hi angeice ma kapa ka hape, ime i Iehova hi lai. Nemene la ini koi së qa ngöne la itre tulu celë? Nyipiewekë tro sa thele la itre ijine mama la ime i Akötresie ngöne la mele së.

KOLA GOEËNE LA IME I IEHOVA

6, 7. Nemene la hna atrehmekune hnei angetre Gibeona me Rahaba?

6 Tha ceitu i angetre Gibeona kö me itre xa nöje ka lapa xötreithi angatr. Öhne hnyawa hi angatre la ime i Akötresie. Tha hnei angatre kö hna thele isi me angetre Isaraela, ngo hnei angatre pe hna thele la tingeting. Pine nemen? Öni angatr, pine laka hnei angatre hna drenge la nöjei ewekë hna kuca hnei Iehova. (Iosua 9:3, 9, 10) Ka inamacane la aqane ujë i angatr, ke angatr a atrehmekune laka, Iehova la ka isigöli Isaraela.

7 Hnei Rahaba fe hna öhne la ime i Iehova.  Tha atre Isaraela kö angeic, ngo hnei angeic hna drenge la aqane thapa Iehova la nöje i Nyidrë qaa Aigupito. Ame lo kola traqa koi angeic hnene la lue ka alamekëne la nöj, öni angeic koi nyidro: “Ate hë ni laka hnei Iehova hna hamëne koi nyipunie la nöj.” Xecie hnyawa fe koi Rahaba laka, ijije hi tro Iehova a amele angeic me hnepe lapa i angeic. Matre ngacama atre hnyawa hi angeic la pune hna hnëkëne kowe la atre thoi koi joxu, ngo ame pe, hnei angeic hna amamane la mejiune i angeic koi Iehova.—Iosua 2:9-13; 4:23, 24.

8. Nemene la ka amamane ka hape, wangatrehmekune hnyawa hi la itre xa atre Isaraela la ime i Akötresie?

8 Tha hna ujë tui Ahaba kö hnene la itre xa atre Isaraela. Ke hnei angatre hna atrehmekune ka hape, qaathei Iehova lo eë ka xulu qaa hnengödrai. Nge aqane sa i Nyidrëti hi lai kowe lo thithi Elia. Ame hnei angatr hna sue draië ka hape: “Iehova, anganyidëti la Akötesie.” (1 Joxu 18:39) Mama cile hnyawa hi koi angatr ka hape, ime i Akötresieti hi lai.

9. Nemene la nyine tro sa kuca matre tro sa goeë Iehova me ime i Nyidrë enehila?

9 Hne së hë hna ce wange la itre tulu ka loi me ka ngazo göi tro sa atre la aliene la kola hape, troa “goeë Akötesie,” ene la troa goeëne la ime i Nyidrë. E tro sa thele troa atre Iehova pala hi me itre thiina i Nyidrë, ketre tro fe së lai a öhne la ime i Nyidrë hnene la “ite lue meke ne ite hni” së. (Efeso 1:18) Celë hi ka troa upi së lai troa nyitipune la itre tulu ka loi ekö me enehila, itre ka öhne la aqane xatuane Iehova la itre hlue i Nyidrë. Ngo, hapeu, hetre hatrene kö nyine amamane ka hape, Akötresieti a xatuane la itre hlue i Nyidrë enehila?

 HATRENE LA IME I AKÖTRESIE ENEHILA

10. Nemene la ka amamane ka hape, Iehova a xatuane la itre atr enehila? (Wange ju la pane iatr.)

10 Nyimu hatrene la aqane xatuane Iehova la itre atr enehila. Hne së hna majemine drenge la itre hna melëne hnene la itre atr ka thele ixatua thei Akötresie jëne la thith, ame hna kapa hnei Iehova. (Salamo 53:2) Ame ngöne la ketre neköi hnapet e Philippines, hnei Allan hna öhne la ketre föe, nge treije jë hi eahlo. Öni Allan: “Ame lai hmakanyi cili, hnei eahlo hna thithi koi Iehova me sipo Nyidrëti matre troa öhnyi eahlo hnene la Itretre Anyipici Nyidrë.” Ame ekö lo eahlo a thöth, hnei eahlo hna ini Tusi Hmitrötr, ngo ame hë la kola faipoipo, feke pi hi eahlo kowe la ketre hnapet, ame hna hmaca ju hi la ini Tusi eahlo. Hnei Akötresieti hna canga sa la thithi eahlo, ame hna ketr hnyawa la hni eahlo. Tha ca macatre ju kö, nge hnei eahlo hna nue la mele i eahlo koi Iehova.

Öhne fe kö epuni la ime i Iehova ngöne la mele i epun? (Wange ju la paragarafe 11-13)

11, 12. (a) Nemene la aqane xatuane Iehova la itre hlue i Nyidrë? (b) Qejepengöne jë la aqane xatuane Iehova la ketre trejine föe.

11 Nyimutre la itre hlue i Iehova ka öhne la aqane xatua angatre hnei Nyidrë. Kola mama lai ngöne la angatre a nuetrije la itre hnei angatre hna majemine kuca ekö, tune la ufi sixa, maine kuci dorog, maine goeë iatr ka sis. Öni itre xan, hnei angatre hna thele troa ketre sipu nue, ngo thatreine kö angatr. Ame pe la angatr sipo Iehova la ixatua i Nyidrë, hnei Nyidrëti hna nue koi angatr “la etrune la men,” matre ijiji angatre pi troa nuetrije la itre huliwa i angatr ka ngazo.—2 Korinito 4:7; Salamo 37:23, 24.

Iehova a xatua së troa isa elë hune la itre jole së

12 Iehova mina fe a xatuane la itre hlue i Nyidrë troa isa elë hune la itre jole ka traqa koi angatr. Ka tune la ewekë ka traqa koi Amy; hna upi angeic troa hane ixatua xupi Uma Ne Baselaia, me uma ne mesinare ngöne la ketre neköi hnapet ne la Pacifique. Angeic a lapane la ketre neköi hnahage ka co ne la ketre hôtel. Ketrepengöne kö la qenenöj e cili, nge pëkö tirisite e itre xa ijin, me tim, nge ka di lapa la itre gojenyi, nge tru la hnei angeic hna mekune la hnepe lapa i angeic. Ame la ketre drai, hnei angeic hna ewekë catre kowe la ketre trejin ka ce huliwa me angeic. Matre tha lapa hnyawa ha angeic. Ame hë la angeic bëeke, ka miti hnyawa la hnahage i angeic; angeice hi lai a thithi jë koi Iehova me sipo Nyidrë troa xatua angeic. Ame hë la kola bëeke hmaca la tirisite, angeic a e jë la ketre tane ne la Ita Ne Thup ka qaja la Ini Ne Gileada. Kola qaja e cili la itre jole hnei angeic hna melën. Öni angeic: “Kösë Iehova hi lai a ithanata koi eni lai heji cili. Celë hi lai ka upi ni troa catre huliwa pala hi ngöne la hna upi ni ngön.”—Salamo 44:25, 26; Isaia 41:10, 13.

13. Nemene la ka amamane ka hape, Iehova a xatuane la itre hlue i Nyidrë troa isigöline la meköti angatr troa cainöj?

13 Hnei Iehova fe hna xatuane la itre hlue i Nyidrë troa isigöline la meköti angatr troa cainöj. (Filipi 1:7) Ame la kola thele troa wathebone la huliwa ne cainöj hnene la itre mus, easa tro koi gaa tru. Matre hna jelemeköti së ngöne la 268 lao hnakootre ka tru e cailo, nge kolo fe a e la 24 lao etrune ngöne la hnakootr ne Erop ngöne lo macatre 2000. Haawe kola mama hnyawa laka, pëkö ketre ewekë ka troa  sawa la ime i Akötresie!—Isaia 54:17; e jë la Isaia 59:1.

14. Nemene la ketre ewekë ka amamane ka hape, ce Akötresieti memine la itre hlue i Nyidrë?

14 Ame la ketre hatrene la ime i Akötresie, tre ene la huliwa ne cainöjëne la maca ka loi e cailo fen. (Mataio 24:14; Ite Huliwa 1:8) Ketre, kola casi la itre hlue i Iehova ka traqa qa ngöne la nöjei nöj, hnene hi la ixatua i Iehova. Ka ketrepengöne kö la casi cili! Kolo fe hane qaja hnene la itre ka tha ce hmi kö me easë ka hape: “thei nyipunieti la Akötesie.” (1 Korinito 14:25) Nyimu ewekë ka amamane ka hape, ce Akötresie memine la itre hlue i Nyidrë. (E jë la Isaia 66:14.) Ame epuni ke, öhne fe kö epuni la ime i Iehova ngöne la mele i epun?

ÖHNE KÖ EPUNI LA IME I IEHOVA NGÖNE LA MELE I EPUN?

15. Pine nemene matre tha öhne kö së e itre xa ijin la ime i Iehova?

15 Maine jë tha öhne kö së e itre xa ijin, la ime i Akötresie! Ma hnene laka, hna traqa koi së la itre jol ka tru matre thëthëhmine hë së lo itre aqane xatua së ekö hnei Iehova. Celë hi ewekë lai ka traqa koi Elia. Ketre atr ka catr angeic, ngo ame la kola thele troa humuthi angeic hnei Iezebela, traqa ju hi la xou koi angeic. Hnei angeic hna pane thëthëhmine lo aqane xatua angeic hnei Iehova. Matre öni Tusi Hmitrötr, nge goi pi meci fe angeic. (1 Ite Joxu 19:1-4) Nemene la ka troa xatua Elia? Loi e tro angeic a mejiune koi Iehova!—1 Ite Joxu 19:14-18.

16. Nemene la nyine tro sa kuca matre tro sa goeë Akötresie ngöne la kola traqa la itre jol?

16 Hnei Iobu hna wangatrune menune pala ha la itre jol ka traqa koi angeic. Matre tha goeëne hë angeic la itre ewekë, tune la aqane goeëne Iehova. Celë hi matre, Iehova a amekötine jë la aqane waiewekë i angeic. (Iobu 38:2) Ame itre xa ijin, hnene laka tru la itre jol ka traqa koi së, matre nango jole pi hë koi  së troa goeë Akötresie. Nemene la ka troa xatua së? Loi e tro sa lapa mekune hnyawa la hna qaja hnei Tusi Hmitrötr göne la itre jol ka traqa koi së. Ame hë e cili, tro ha mama cile hnei Iehova koi së, nge tro fe hë së a hane qaja ka hape: “Hnenge hna drenge la kola qeje Cilie, ngo ame hë enehila, öhnyi Cilieti hë ni.” (Iobu 42:5, MN)

Iehova a xatuane la itre atr troa goeë Nyidrë e tro sa kuca la qa së (Wange ju la paragarafe 17, 18)

17, 18. (a) Nemene la nyine tro epuni a kuca matre troa goeëne la ime i Iehova? (b) Qaja jë la ketre hna melëne ka amamane la aqane xatua së enehila hnei Akötresie.

17 Nemene la nyine tro sa kuca matre tro sa öhne la ime i Iehova ngöne la mele së? Tro sa ce wange la faifi lao ewekë. Ame la hnapan, mekune hnyawa ju së laka, hnei Iehova hna xatua së troa öhne la nyipici. Ame la hnaaluen, mekune ju së lo ijine easa tro koi icasikeu, me drenge la ketre cainöj, nge epuni a qaja ka hape, “Hane hi lo la hnenge hna ajane troa dreng!” Ame la hnaakönin, ma öhne jë së la aqane sa Iehova la ketre thithi së. Ame la hnaafoan, maine jë hne së hna mekune troa huliwa catre hmaca kö koi Iehova, nge easa öhne e cili la aqane xatua së hnei Nyidrë troa eatrëne la aja së. Ame la hnaafaifin, hne së hna trotrije la huliwa së, ke tha huliwa i Iehova hnyawa ha së; nge ame hë e thupen, easë hë a öhne la aqane eatre lo hna thingehnaeane hnei Akötresie: “Tha trojë kö ni a tiji ’ö.” (Heberu 13:5) E catrecatre la aqane imelekeu së me Iehova, tro hi së lai a canga öhne la ime i Nyidrë ngöne la mele së.

18 Öni Sara, ketre trejine föe qaa Kenya: “Hnenge hna thithi sane la ketre ka ini Tus, ke kösë xele hë angeic. Eni a hnyingë Iehova jë ka hape, tro jë kö ni a nue. Thupene ju hi la eni a ‘Amen,’ ho jë hi la telefon. Kola sipo ni hnene la ka ini Tus troa hane ce tro me eni kowe la hna icasikeu! Sesëkötre pi kö ni!” E mama cile hnyawa koi së la itre ijine xatua së hnei Akötresie, ijine easë hi lai a öhne la ime i Nyidrë. Öni Rhonna, ketre trejine föe ka mele e Asia, ka hape, loi e tro sa xomi ijine troa goeëne la aqane xatua së hnei Iehova ngöne la mele së. Öni angeic hmaca jë: “Nge e öhne hë së, easa haine la aqane nyipiewekë së hnei Nyidrë!”

19. Nemene la ketre ewekë nyine tro sa kuca matre troa goeë Akötresie?

19 Öni Iesu, troa “hni ka wië” hnene la itre ka “goeë Akötesie.” (Mataio 5:8) Nemene la aliene lai? Nyipiewekë tro sa thupëne matre tro pala hi a wië la itre mekune së, nge matre tro fe sa hane hmaca troa kuca la ngazo. (E jë la 2 Korinito 4:2.) Hne së hna ce wange ngöne la tane mekune celë, ka hape, e aja së troa goeë Akötresie, nyipiewekë tro sa acatrene la aqane imelekeu së me Nyidrë. Ame ngöne la tane mekune ka troa xulu, tro sa ce wange la aqane tro sa öhne hnyawa la ime i Iehova ngöne la mele së jëne la lapaun.