“Ngaca ma hmit’ ej, teqene kö ej!”HABAKUKA 2:3.

NYIMA: 128, 45

1, 2. Nemene la aqane ujë ne la itre hlue i Iehova qaane ekö?

QAANE ekö catr, hnene la itre hlue i Iehova hna treqene matre eatre pi la itre hna perofetan. Ka tui Ieremia, hnei angeice hna treqene hnyawane la ijine tro la angetre babulona a lepe apatrenyi Iudra, nge celë hi ewekë ka traqa lo macatre 607 qëmeke i Iesu. (Ieremia 25:8-11) Isaia fe la ketre atr ka treqene hnyawa, ke, hnei angeic hna perofetane ka hape, tro Iehova abëekëne Iudra eë lo angetre Isaraela ka qa hna po. Öni angeic: “Manathithi angate asëjëihë angete teqe anganyidë.” (Isaia 30:18) Hnei Mika fe hna treqene hnyawane la troa eatre la itre hna thingehnaeane hnei Iehova, öni angeic: “Ame ni, tro ni a teqe Iehova.” (Mika 7:7) Nge ngöne la itre hadredre lao macatre, ka xecie hnyawa kowe la itre hlue i Akötresie ka hape, troa traqa la Mesia hna thingehnaean, ene Keriso.—Luka 3:15; 1 Peteru 1:10-12. * (Wange ju la ithuemacany.)

2 Ame enehila, easë fe a treqene troa eatre la itre hna  perofetane göne la Baselaia i Iehova. Easenyi catre hë matre amelene jë la itre hlue i Akötresie qa ngöne la fene ka ngazo celë hnei Iesu, Joxu ne la Baselaia. Tro nyidrëti a apatrene la itre atr ka ngazo, me nöjei akötr. (1 Ioane 5:19) Celë hi matre nyipiewekë tro sa treqene hnyawane la drai Iehova, me kuca asë la hne së hna atreine matre tro sa lapa hmek.

3. Maine nyimu macatre ne lapa treqene hë së la pun, nemene la mekune ka troa cia the së?

3 Easa lapa treqene la drai ne troa eatre la aja i Iehova kowe la fen. (Mataio 6:10) Ngo, maine nyimu macatre ne lapa treqene hë së la pun, tro la itre xa trejine lai a nyiqaane mekune ka hape, ‘Pine nemene matre tro pala kö sa lapa treqene la pun?’

KEPINE MATRE TRO SA LAPA TREQENE LA PUN

4. Pine nemene matre nyipiewekë tro sa ‘hmek’?

4 Hnei Iesu hna upe la itretre drei nyidrë troa ‘hmek’. Celë hi matre nyipiewekë tro sa lapa treqene hnyawane la pun, ke calemi hë. (Mataio 24:42; Luka 21:34-36) Ketre, organizasio i Iehova a qaja lapane koi së ka hape, tro sa “teqene me ajane troa traqa la drai [Iehova]” matre tha tro kö a patre e kuhu hni së la fene ka hnyipixe, lo hna thingehnaeane hnei Iehova.—E jë la 2 Peteru 3:11-13.

5. Nemene la ketre kepine matre tro sa lapa treqene la drai Iehova?

5 Maine ka nyipiewekë ekö kowe la itretre drei Iesu troa lapa treqene hnyawa la drai Iehova, haawe tro pala kö a nyipiewekë catre koi së enehila. Pine nemen? Pine laka mama ha jëne la hatrene hna qaja hnei Iesu ka hape, Joxu hë nyidrë ngöne la Baselaia i Akötresie qaane lo 1914. Ketre, easë hë enehila ngöne la itre drai tixenuë, ene lo “hneijin ne kola troa nyipune la fen.” Ame enehila, kolo pala hi a ngazo catre la fen, nge kola cainöjëne la maca ka loi e cailo fen. Itre ewekë lai hna perofetane hnei Iesu. (Mataio 24:3, MN, 7-14) Tha hnei Iesu kö hna qaja la etrune la itre drai ne la pun, celë hi matre nyipiewekë tro sa lapa itreqe.

6. Hnei nemene matre qaja jë së ka hape, tro pala kö a ngazo catre la fen?

6 Kolo jë kö lai a hape, ame la hneijine la pun, tre, kola qaja la ketre hneijin elanyi laka troa ngazo menu la fen? Öni Tusi Hmitrötr ka hape, tro pala kö a ngazo catre trootro la itre atr ngöne la “ite drai hnapin.” (2 Timoteo 3:1, 13; Mataio 24:21; Hna Amamane 12:12) Eje hi laka, kola ngazo catre la nöjei ewekë enehila ngo tro pala kö a ngazo catr.

7. Nemene la hna ini së hnei Mataio 24:37-39 göne la pengöne la fen ngöne la itre drai tixenuë?

7 Hnei itre xan hna mekune ka hape, qëmekene la “aköte atraqat,” troa hetre isi ngöne la nöjei nöj, nge tro fe a lepe la itre atr hnei meci me jiin. (Hna Amamane 7:14) Ngo maine celë hi ewekë lai ka troa traqa, eje hi laka, troa mama koi nöjei atr ka hape, eatre hë lo hna perofetan. Nge goi tro fe lai a mama kowe la itre atr ka xelene la Tusi Hmitrötr. Ngo öni Iesu lo göi angatr ka hape, ame ngöne la itre drai tixenuë, “tha ’te kö angate,” kola hape, angatr a wange sixane la hnedrai angatr. Angatr a isa melëne la mele i angatr ngöne la nöjei drai, nge asesëkötrë angatre ju hi hnene la drai Iehova. (E jë la Mataio 24:37-39.) Haawe, mama pi hi ka hape, tha tro kö sa treqene troa ngazo menu la  fen matre traqa pi la “aköte atraqat.” —Luka 17:20; 2 Peteru 3:3, 4.

Xecie koi së ka hape easë hi la a melëne la “hneijin ne kola troa nyipune la fen”

8. Nemene la ka xecie koi së?

8 Tro la hatren hna hamën hnei Iesu a upe la itretre drei nyidrëti troa hmekëne la hneijine hnei angatre hna melën. Celë hi ewekë lai hnei angatre hna kuca. (Mataio 24:27, 42) Qaane lo 1914, eatre hë la itre götrane la hatrene hna qaja hnei Iesu. Xecie hnyawa koi së ka hape, easë hi la a melëne “la hneijin ne kola troa nyipune la fen.” Ase hë Iehova amekötine la ijine tro Nyidrëti a apatrene la fene ka ngazo i Satana.

9. Pine nemene matre loi e tro sa lapa treqene hnyawa la pun?

9 Haawe, pine nemene matre loi e tro sa lapa treqene hnyawa la pun? Pine laka easa drengethenge Iesu Keriso. Ketre, mama hnyawa ha ka hape, eatre hë lo hatrene hna qaja hnei Iesu. Xecie hnyawa koi së laka, calemi catre hë la pun, a tha hnene kö laka easa mejiune kowe la nöjei ewekë hne së hna dreng, ngo hnene pe laka xecie koi së ka hape, eatre hë la itre hna perofetan. Epi tro sa lapa hmek me treqene hnyawa la pun.

TRO SA ITREQE UTI HË EU?

10, 11. (a) Pine nemene matre hnei Iesu hna upe la itretre drei nyidrë troa ‘hmek’? (b) Nemene la hna qaja hnei Iesu kowe la itretre drei nyidrë e tha canga traqa kö la pun? (Wange ju la pane iatr.)

10 Ala nyimu the së la itre ka hekö hë nyihlue i Iehova nge ka lapa treqene hnyawane la drai i Nyidrë. Ngo eje hi laka, nyipi ewekë tro pala kö sa treqene hnyawane la drai cili, me lapa hmek ngöne la Iesu a traqa ne troa lepe apatrene la fene i Satana. The thëthëhmine kö lo aqane hmekëne Iesu la itretre drei nyidrë. Öni nyidrë: “Wange kö nyipunie, hmekënejë me thith ; ke tha ’te kö nyipunie la ijin. Kola tro la kete ate ga nanyi eë, me nue la uma i angeic, me hamëne la musi kowe la ite hlue i angeic, me isa thewe huliwa i angat, me ahnithe kowe la ate thupë qëhnelö troa hmekën. Kete tun, hmekënejë nyipunie, ke tha ’te kö nyipunie la ijine traqa la joxu ne uma, maine e hejihej, maine e hne nyipa jid, maine e kukahleke la trotro, maine e hmakany ; wanga canga traqa nyidë a öhnyi nyipunie a meköl. Ame la hnenge hna qaja koi nyipunie, ini fe a qaja kowe la nöjei ate asë, ka hape, Hmekënejë.”—Mareko 13:33-37.

Troa lepe la hmi ka thoi, nge tro lai a canga traqa nge thatre kö së la ijin

11 Ame hë la kola atre hnene la itretre drei Iesu ka hape, Joxu hë nyidrëti lo 1914, angatre fe hi lai a trotrohnine laka, easenyi hë la pun. Celë hi matre, angatr a lapa hmek, me cainöje catr. Tha hnei Iesu kö hna qaja hnyawa la ijine tro nyidrëti a traqa, maine jë e hnenyipajidri catr, maine “e kukahleke la trotro, maine e hmakany.” Haawe, nemene la nyine tro la itretre drei nyidrë a kuca? Öni Iesu: “Hmekënejë.” Maine eje hi laka, ekö hë së itreqe, ngo tha tro kö sa mekune ka hape, nanyi pala kö la pun, maine pena tha tro kö ej a traqa ngöne la ijine mele së.

12. Nemene la hnei Habakuka hna treije fë koi Iehova, nge nemene la hna sa hnei Akötresie koi angeic?

 12 Hnei Habakuka perofeta hna itreqe hnyawa me catre ithuemacanyine laka, troa lepe apatrene Ierusalema. Hnene la itre xa perofeta ka tro pa hui angeic hna hane cainöjëne la maca cili, nge nyimu macatre ne cainöj angatr. Ngo, öhne hi Habakuka ka hape, kolo pala hi a elë catre la iangazo me thiina ka tha meköti kö. Matre angeic a treije koi Iehova me hape: “Iehova fe, tro ni a xëwe koi enëtilai uti hë eu?” Ngacama tha hnei Iehova kö hna qaja la drai ne troa traqa la pun, ngo hnei Nyidrëti pe hna qaja xeci koi Habakuka ka hape: “Tha tro kö a hmit!” Öni Nyidrëti hmaca ju: “Teqene kö ej.”—E jë la Habakuka 1:1-4; 2:3.

13. Nemene la mekune ka tha traqa koi Habakuka, nge pine nemene matre tro lai a hetre ethanyin?

13 Maine hnei Habakuka ju hna kucakuca, me sixele ma treqene la pun me qaja ka hape: ‘Nyimu macatre hë enehila hnenge hna lapa treqene la troa lepe apatrene Ierusalema, nge hmitre pala kö. Nyine ue la tro ni a cainöj? Cainöje ju hi itre xan.’ Nemene ju hë la ewekë ka troa traqa e mekune ju angeic tune lai? Tha tro ha kepe angeic hnei Iehova. Ketre, maine tha hmekëne ju angeic la pun, tro fe a luzi la mele i angeic.

14. Pine nemene matre tro sa olene elanyi la hnei Iehova hna thuemacanyi së troa lapa treqene hnyawa la pun?

14 Pane mekune jë ka hape, epuni hë ngöne la fene ka hnyipixe. Nge ame asë hë la nöjei hna perofetane göne la itre drai tixenuë, tre eatre asë hë tune lo hna qaja hnei Iehova. Eje hi lai laka, tro hmaca kö lai a acatrene catrëne la mejiune i epuni koi Iehova. Ketre, xecie hnyawa ha koi epun ka hape, tro hmaca kö Nyidrëti a eatrëne la itre xa ewekë ju kö hnei Nyidrëti hna thingehnaean. (E jë la Iosua 23:14.) Tru catre la ole së elanyi koi Iehova laka, hnei Nyidrëti hna sa hnyawa la drai ne la pun, me hane thuemacane la itre atr troa lapa treqene ej.—Ite Huliwa 1:7; 1 Peteru 4:7.

CATRE JË CAINÖJE NGÖNE LA KOLA ITREQE!

Epuni kö a catre cainöjëne la maca ka loi? (Wange ju la paragarafe 15)

15, 16. Pine nemene matre tro sa catre cainöje trootro ngöne la itre drai ne la pune celë?

15 Organizasio i Iehova a ithuecatre lapa koi së troa catre nyihlue i Iehova.  Celë hi ka xatua së troa nyipiewekëne la huliwa i Iehova, ene la troa cainöje trootro. Xecie hnyawa koi së ka hape, eatre hë enehila lo hatren hna qaja hnei Iesu, nge easenyi catre hë matre traqa pi la pun. Celë hi matre, easa amë panë Iehova ngöne la mele së, me catre cainöjëne la maca ka loi ne la Baselaia.—Mataio 6:33; Mareko 13:10.

16 Ame la easa cainöjëne la maca ka loi kowe la itre atr, easë hi lai a amele angatr qa ngöne la fene i Satana ka troa patr. Hna traqa la ketre hulö ka tru lo 1945, ngöne la kola lö la ketre he (Wilhelm Gustloff). Itre thauzane lao atr ka mec. Qaathene la itre ka mel, hetrenyi la ketre trejine föe me föi angeic. Mekune pala kö eahlo la kola sue hnene la ketre föe ka hape: “Ekölö hi ni lo hnënge valising! Valising! Me itre fini ceineng me itre iane hnangenyëng! Itre ej pë hë ngöne la hnahageng. Luzi hë!” Ngo hnene pe kö la itre xa atrene la he hna catre amelene la itre xa atr, ke celë hi lai ka nyipiewekë ngöne la ijine cili. Ame enehila itre ka tro ha mec la itre atr. Easë fe a pi tune lo itre xa atrene lo he laka, easa sipu nue la mele së troa huliwa catre ngöne la hna cainöje trootro. Nyipiewekë tro sa catre xatuane la itre atr troa hane mele pe ngöne la pune la fene celë.

Xomi mekune hnyawa jë me catre kuca la huliwa ka nyipiewekë catr (Wange ju la paragarafe 17)

17. Hnei nemene matre xecie pi koi së ka hape, troa traqa la pun?

 17 Mama hnyawa ha koi së ka hape, eatre hë la itre hna perofetane hnei Tusi Hmitrötr, nge easenyi catre hë matre traqa pi la pune la fene celë. Easa treqene troa ujë hnene la “ite jone ka luepi [maine treen]” me “öni ka sheshe” kowe la hmi ka thoi, ene Babulona Atraqatr. (Hna Amamane 17:16) Atre hnyawa hi së, laka, tro Akötresieti a “amë e kuhu ite hni angate” la mekune troa lepe la hmi ka thoi, nge tro lai a canga traqa nge, thatre kö së la ijin! (Hna Amamane 17:17) Tha tro pi kö sa mekune ka hape, hmitre pala kö matre traqa pi la ijine cili. Easenyi catre hë matre traqa pi la pune la fene i Satana. Haawe, loi e tro sa trongëne la eamo i Iesu lo kola hape: “Wange kö nyipunie, wanga hacepi la ite hni nyipunie hnene la hna xeni atrun, me hna iji atrun, me kuke hnine kowe la mele celë, ame hna traqa la drai cili a asheshëkötë nyipunie.” (Luka 21:34, 35; Hna Amamane 16:15) Epi tro sa lapa hmek, me catre huliwa i Iehova, me mejiune ka hape, Nyidrëti la “ate huliwa i angat’ angete teqe [N]yidë.”—Isaia 64:4.

18. Nemene hnyinge hne së hna troa ce wange ngöne la tane mekune ka troa xulu?

18 Ame ngöne la easa treqene la pune la fene celë, loi e tro sa drengethenge la eamo hna hamë së hnei Iuda, kola hape: “Nyipunie, ange hnimina, xup’ adraië nyipunieti jë ngöne la lapaune i nyipunie ka nyipi hmitöt, kola thithi ngöne la uati hmitöt. Nge thupë nyipunieti ju kö ngöne la ihnimi Akötesie nge teqeneju la ihnimi gufa i Joxu shë Iesu Keriso uti hë la mele ka tha ase palua kö.” (Iuda 20, 21) Ngo tro sa amamane tune kaa ka hape, easa treqene hnyawane la fene ka hnyipixe i Akötresie? Tro sa ce ithanatane lai ngöne la tane mekune ka troa xulu.

^ par. 1 Ame göi itre hna perofetane göi Mesia me aqane eatre itre ej, wange ju la götrane 200 ne la itus Nemene La Nyipi Ini Hna Hamën Hnei Tusi Hmitrötr?