Drei lae Gog atre Magog hna qaja ngöne la tusi Ezekiela?

Hne së lo hna lapa majemine qaja ka hape, ame lae Gog atre Magog, tre kola qeje Satana, ngöne lo kola upi angeice qaa hnengödrai. Pine nemen? Pine laka, hnene la tusi Hna Amamane hna qeje Satana ka hape, angeice hi la tane la itre ka icilekeu memine la nöje i Akötresie. (Hna Amamane 12:1-17) Matre hna mekune lo ka hape, ame lae Gog, tre, Satana hi.

Ame pe, kola öhne trongëne la itre xa xötre ka isazikeu memine la aqane trotrohnine celë. Pane mekune jë la: Hnei Iehova hë hna qaja amë la aqane troa lepe apatrenyi Gog, me hape, “Tro ni a nue eö [Gog] kowe la ite öni ka sheshë asë itete pi öni, me ite öni ne hnite troa önin.” (Ezekiela 39:4) Nge öni Iehova mina fe: “Ngöne la drai cili, tro ni a ami Gog ngöne hnë i angeic [hua] e Isaraela.” (Ezekiela 39:11, MN) Ijije hi troa hnyinge ka hape, pine laka ketre u lae Satana, troa öni angeic tune kaa hnene la itre waco me itre öni ka ses? Nge ketre, tro ha kelemi angeice tune kaa? Tusi Hmitrötre lo a qaja ka hape, troa kuië Satana kowe la hnaop ka thatre hmekune koi 1000 lao macatre. Haawe, mama hi e cili ka hape, tha tro kö a öni angeic me kelemi angeic.—Hna Amamane 20:1, 2.

Tusi Hmitrötre fe a qaja ka hape, thupene la 1000 lao macatre, troa nue Satana hmaca qa ngöne la hnaope ka thatre hmekun. Angeice lai a “tropi troa amenune la ite nöje ka eje ngöne la eke götrane la fene hnengödrai, ene Goge me Magog troa icasinekeu angate kowe la ishi.” (Hna Amamane 20:8) Maine Satana ju lae Gog, tro hë angeice lai a sipu amenu angeice kö. Haawe, mama cile hë ka hape, tha kolo kö a qeje Satana ngöne la tusi Ezekiela me Hna Amamane.

Matre, drei jë lae Gog atre Magog? Maine aja së troa sa la hnyinge celë, loi e tro sa pane thele hnyawa hnine la Tusi Hmitrötr ka hape, drei la atre icilekeu memine la nöje i Akötresie. Tusi Hmitrötr a qaja la itre ka icilekeu, ene Gog atre Magog, memine “la joxu ne kolopi,” memine la “joxu ne la nöjei joxu ne la fene hnengödrai.” (Ezekiela 38:2, 10-13; Daniela 11:40, 44, 45; Hna Amamane 17:14; 19:19) Hapeu, Isa ijine kö la tro angatr a lepe la nöje i Akötresie? Ohea. Kösë Tusi Hmitrötr a hamëne la itre ëje cili nyine qaja la ca ijine hi. Hnei nemene matre qaja jë së tune lai? Kolo ke Tusi Hmitrötr a qaja ka hape, troa acasine la nöjei atr e cailo fen, nge tro angatr a  lö hnine la isi cili. Ijine tro hi lai a nyiqaane la isi Amagedo.—Hna Amamane 16:14, 16.

Haawe, ame la easa ce xome la itre xötre ka qaja la drai ne lepe la nöje i Akötresie, tre, mama cile pi hi ka hape, ame la kola qeje Gog atre Magog, tre tha kolo kö a qeje Satana. Eje pe a qaja la itre nöj hna acasin. Hapeu, “joxu ne kolopi” kö la ka troa elemeken la itre nöje cili? Tha hna qaja kö hnei Tusi Hmitrötr. Ngo ame pe, ijije hi tro sa trotrohnine tune lai, ke, ka ihmeku hi memine la hnei Iehova hna qaja koi Gog, ka hape: “Tro eö a traqa qa ngöne la hne i ’ö, ite götrane kolopi, eö, me ite nöje ka nyimute ce me eö, itete ti hose angat’ asë, icasikeu atraqat, me gejë ka tru.”—Ezekiela 38:6, 15.

Ketre hnei Daniela perofeta, atre mele ngöne la hneijine i Ezekiela, hna qaja göne la joxu ne kolopi, ka hape: “Troa aqounyi nyëne hnene la ite maca qa kohië me kolopi, nge tro nyën’ a tro fë la elëhni atraqate me apaten, me humuthe la ka aIa nyimu. Nge tro nyën’ a acile la ite uma mano ne la hnalapa i nyën’ akawane la lue hnagejë ngöne la wete ka lolo ka hmitöt ; ngo troa traqa la pune koi nyën, nge pëkö ate troa xatua nyën.” (Daniela 11:44, 45) Casi hi la hna qaja hnei Ezekiela göi Gog.—Ezekiela 38:8-12, 16.

Nemene la ka troa traqa ngöne la pune la isi? Kola sa hnene la tusi Daniela, ka hape: “Ngöne la ijine cili [e Amagedo] tro Mikaela [Iesu Keriso] a cil, ene la joxu atraqat’ ate cile agöline la ite tejine me eö ; nge troa hete ijine aköt, pëkö ka tune qane hi la hna hape, nöj, uti hë la ijine cili ; nge ngöne la ijine cili troa amelene la ite tejine me eö, angate asë ite hna öhne hna cinyihane ngöne la tus.” (Daniela 12:1) Hna acatrene la mekune cili hnene la tusi Hna Amamane 19:11-21.

Haawe, nga drei jë hö lae “Goge me Magog” hna qaja ngöne Hna Amamane 20:8? Kola qaja la nöjei atr asë ka troa icilekeu memine la nöje i Iehova, thupene la 1000 lao macatre ne musi la Baselaia. Casi hi la aqane methinëne angatr la nöje i Iehova, memine lo aqane methinëne hnei Gog atre Magog la nöje i Akötresie qëmekene hi e Amagedo. Nge tune la aqane apatrene e Amagedo la itre nöje ka icilekeu memine la itre hlue i Iehova, tro fe a hane lepe apatrenyi Goge me Magog. (Hna Amamane 19:20, 21; 20:9) Haawe, ijije troa qaja ka hape, ame Goge me Magog, tre, kola qaja la itre ka troa icilekeu memine la nöje i Akötresie thupene la 1000 lao macatre ne musi la Baselaia.

Ame ngöne la easa inine trongëne la Tusi Hmitrötr, easë fe a trengeneune laka, tro hë së elanyi a hane atre ka hape, drei la “joxu ne kolopi.” Ngacama tha mama cile hnyawa kö koi së ka hape, drei la ka troa elemekene elanyi la itre nöj ka troa thele troa apatrene la nöje i Iehova, ngo lue ewekë ka xecie koi së: (1) Troa ngaan me lepe apatrenyi Gog atre Magog. (2) Tro la Joxu së Iesu Keriso a amele së qaathene la itre ithupëjia cili, nge tro nyidrëti elanyi a tro xometrongë së kowe la nöje hna thingehnaean, nöje ka tingeting nge hnë mele xetietë.—Hna Amamane 7:14-17.