Tro jë kowe la alien

Tro jë kowe la itre mekune ka co

Tro jë kowe la itre alien

Itretre Anyipici Iehova

Drehu

Ita Ne Thup (Nyine Inin)  |  Maac 2015

“Meköti Hi Lai Koi Enëtilai”

“Meköti Hi Lai Koi Enëtilai”

“Hnei cilieti hna juetëne la nöjei ewekë celë ene la ite ka inamacan, me ite macamek, ngo hna amamane kowe la nöjei medeng.”LUKA 10:21.

1. Pine nemene matre “madine [Iesu] ngöne la [u]ati [h]mitöt”? (Wange ju la pane iatr.)

PANE mekune jë la Iesu a pane “madine ngöne la [u]ati [h]mitöt.” Maine jë, nyidrëti a hnyimahnyima nge madrine la qëmeke i nyidrë, me lue meke i nyidrë. Pine nemen? Hnei nyidrëti hi lo hna upe la ala 70 lao itretre drei nyidrë, troa cainöjëne la maca ka loi ne la Baselaia. Nge nyidrëti a ajane troa atre la aqane tro angatr a eatrëne la hnëqa i angatr, ngacama tru la itre ithupëjia memine la maca ka loi. Kola qaja la itre ka cinyanyi tus, me itre Faresaio, lo itre ka qa hna ini ka tru, nge itre ka inamacan. Angatr a ajane tro la itre atr a goeë Iesu ceitu me atre tratrau sinöe, me goeë itretre drei nyidrëti fe ceitu me itre “tha’ te tus, me tha hna inin.” (Ite Huliwa 4:13; Mareko 6:3) Ngo, ame la kola bëeke hnene la itretre drei nyidrë qa hna kuca la huliwa i angatr, tru catre la madrine i angatr. Hnei angatre hna cainöj ngacama tru la icilekeu, qaathene fe la itre dremoni! Pine nemene matre angatr a madrin, nge catre angatr ngöne la huliwa cili?—E jë la Luka 10:1, 17-21.

Maca trootro la nöje i Akötresie ngöne la kola hamë ini

2. (a) Hnauëne laka aceitunëne jë la itretre drei Iesu me itre nekönatr? (b) Nemene la ka xatuane la itretre drei Iesu troa trotrohnine la itre ini ka jui ne la Tusi Hmitrötr?

2 Öni Iesu koi Iehova: “Ini a ole koi Enëtilai, Angakaka, Joxu  ne hnengödrai memine la fen, qa ngöne la hnei Cilieti hna juetrëne la nöjei ewekë celë ene la nöjei ka inamacane me nöjei macamek, ngo ase hë amamane kowe la nöjei nekönatr ; eje hi, Angakaka, ke meköti hi lai koi Enëtilai.” (Mataio 11:25, 26, MN) Pine nemene matre Iesu a hëne la itretre drei nyidrë ka hape, itre nekönatr? Pine laka tha ceitu i angatre kö memine la itre ka cinyanyi tus me itre Faresaio ka qa ngöne la itre ini ka tru, nge ka mekune ka hape, itre ka inamacane angatr. Ame pena la itretre drei Iesu, tre aja i angatre troa ini angatr tune lo itre nekönatr. Angatr a inine la ipië, nge tha thele kö troa pi draië. (Mataio 18:1-4) Pine laka itre ka ipië angatr, Iehova a huliwane la uati hmitrötr matre troa xatua angatre troa trotrohnine la itre ini ka jui ne la Tusi Hmitrötr. Nge, ame itre tane hmi angetre Iudra, tre itre hna atimekëne hnei Satana, me hnene la pi draië ka eje thei angatr.

3. Nemene la hne së hna troa ce ithanatane ngöne la tane mekune celë?

3 Haawe, tha sesëkötre kö së la Iesu a madrin! Tru la madrine i nyidrë la aqane amamane Iehova la itre nyipici qa hnine la Tusi Hmitrötr, kowe la itre atr ka ipië ngacama tha qa i angatre kö ngöne la itre ini ka tru. Celë hi tulu ne ini lai hna hamën hnei Akötresie, nge tha ka saze kö Nyidrë. Nemene la aqane amamane Nyidrë ka hape, Nyidrëti pala hi a kapa la aqane ini cili? Ame ngöne la tane mekune celë, tro sa atrepengöne la aqane amamane Iehova la itre ini ka jui ne la Tusi Hmitrötr, kowe la itre atr ka ipië enehila.

QAJA JË LA ITRE INI KA JUI KOWE LA NÖJEI ATR

4. Hnei nemene matre ketre ahnahna la Ita Ne Thup hna ahmaloeën?

4 Ame ngöne la itre macatre ka ase hë, hnene la organizasio i Iehova hna amamane hnyawa la enyipiewekëne la aqane hamë ini, ene la troa canga trotrohnine la itre ini me lualai. Tro sa ce ithanatane la köni ceitun. Ame la hnapan, tre kolo Ita Ne Thup hna ahmaloeën. * (Wange ju la ithuemacany.) Ketre ahnahna lai kowe la itre atr ka nyimutre, ene mina fe kowe la itre ka thatreine e hnyawa, maine ithanatane hnyawa la qene hlapa ne la Ita Ne Thup. Nyimutre la itre hnepe lapa ka qaja ka hape, hnene laka hetrenyi hë la Ita Ne Thup hna ahmaloeën, haawe, trotrohnine hnyawa ha la itre nekö i angatr. Tru hnei ka cinyanyi troa qaja la ole i angatr. Önine la ketre trejine föe, ka xou i eahlo pala hi ekö troa hamë mekune ngöne la kola ini Ita Ne Thup, ngo tha enehila hmaca kö. Ame hë la eahlo a huliwane la Ita Ne Thup hna ahmaloeën, öni eahlo jë: “Ame enehila, ka sa pala hi ni, nge patre hë theng la xou! Eni a olene koi Iehova me koi epuni fe.”

5. Nemene la itre eloine la hna ahnyipixen Les Saintes Écritures. Traduction du monde nouveau qene Papale?

5 Ame la hnaaluen, tre, kolo Tusi Hmitrötr,  Les Saintes Écritures. Traduction du monde nouveau qene Papale hna ahnyipixene hmaca, nge ka mama lo 5 Okotropa 2013, lo ijine icasikeu ka tru ne la macatre. * (Wange ju la ithuemacany.) Tru hnei xötre ne la Tusi Hmitrötr enehila hna ahopatrën, ngo tha saze kö la alien, nge tha jole kö e troa trotrohnin. Ame ngöne Iobu 10:1, kola e ekö la 27 lao hnaewekë, nge enehila 19 pe hi. Nge ame ngöne Ite Edomë 8:6, kola e ekö la 20, ame enehila, 13. Ka lualai hnyawa la lue xötre cili ngöne la Tusi Hmitrötr hna ahnyipixen. Hnene la ketre trejine hna iën, ka hekö catre hë nyihlue i Iehova hna qaja ka hape: “Eni hi a ase e la tusi Iobu ngöne la Tusi Hmitrötr hna ahnyipixen, nge kösë lo eni petre hi a xötrei trotrohnine hnyawa!” Tru hnei ka hane qaja tui nyidrë.

6. Nemene la hnei epuni hna dreng e kuhu hni epun la aqane trotrohnine enehila la Mataio 24:45-47?

6 Ame la hnaakönin, tre kolo itre xötre hna qejepengöne hnyipixen. Tune la aqane troa trotrohnine hnyawa lo “hlue ka nyipici me ka inamacan,” lo hna qejepengöne ngöne la Ita Ne Thup ne 15 Julai 2013. (Mataio 24:45-47) Kola qejepengöne hnene la tane mekune cili ka hape, ame la hlue ka nyipici, tre kolo Lapa Ne Xomi Meköt. Nge ame la itre atrene la “hnalapa,” tre, kolo itre hna iën me “ite xa mamoe,” hna ithuane hnene la hlue ka nyipici. (Ioane 10:16) Tru la madrine së troa atre la itre ini cili, me inine itre ej kowe la itre atr! Nemene la ketre aqane amamane Iehova ka hape, ka loi koi Nyidrë la aqane troa hamëne la ini ka tha jole troa trotrohnin me ka lualai?

AQANE QEJEPENGÖNE AHMALOEËNE LA ITRE EDROMË NE LA TUSI HMITRÖTR

7, 8. Nemene la itre xa edromë ne la Tusi Hmitrötr ka nyihatrene la ketre ewekë ka tru qëmekene tro eje a mama?

7 Maine ka hekö hë epuni nyihlue i Iehova, tro hi epuni lai a öhne ka hape, saze hë la aqane qejepengöne la itre edromë ne la Tusi Hmitrötr ngöne la itre itusi së. Ame ekö, hna lapa qaja lo ka hape, ame la itre xa edromë ne la Tusi Hmitrötr, tre kola nyihatrene la itre xa ewekë ka tru, qëmekene tro itre ej a mama. Hapeu, hetre enyipicine kö matre qejepengöne jë tune lai la itre edromë ne la Tusi Hmitrötr? Eje hi. Ka tune hi lo “iamamanyikeu, ene Iona perofeta” hna qaja hnei Iesu. (E jë la Mataio 12:39, 40.) Hnei Iesu hna qaja ka hape, ame la itre drai ne lapa Iona e kuhu hni ne la i ka tru, tre kolo lai a nyihatrene la itre drai ne tro Iesu a lapa e hnine la hua.

Kola acatrene la lapaune së la easa inine la itre edromë ne la Tusi Hmitrötr me itre hnene eje hna nyihatren

8 Hetre itre xa edromë ne la Tusi Hmitrötr ka nyihatrene la itre xa ewekë ka tru. Nyimu ewekë ka tune lai hna qejepengöne hnei Paulo. Ame la ketre, tre kolo aqane imelekeu i Aberahama me Hagara me Sara, kola isa nyihatrene la aqane imelekeu i Iehova memine la nöje Isaraela, me aqane imelekeu i Nyidrë memine la götrane ka tha mama kö ne la organizasio i  Iehova. (Galatia 4:22-26) Ketre tune mina fe, ame la itre ewekë ne la Wathebo, tune la uma mano, me ēnē, me Drai Ne Nyithupene Mel, me atre huuje ka sisitria, me itre xa ewekë ju kö, tre “ahnue ne la nöjei ewekë ka loi [k]a troa traqa.” (Heberu 9:23-25; 10:1) Acatrene jë hi la lapaune së la easa inine la itre edromë celë, memine la hnene itre eje hna nyihatren. Ngo hapeu, kolo kö lai a hape, ame asë hi la nöjei atr, me nöjei ewekë ka traqa, me nöjei ewekë hna qaja hnei Tusi Hmitrötr, tre kola nyihatrene la ketre atr maine ketre ewekë pena?

9. Nemene la aqane qejepengöne ekö la hna melëne hnei Nabotha e hnine la Tusi Hmitrötr?

9 Ame ekö e hnine la itre itusi së, ame asë hi la nöjei atr, me nöjei ewekë ka traqa, maine nöjei ewekë hna qaja hnei Tusi Hmitrötr, tre hna nyihatrene la ketre atr maine ketre ewekë pena. Ka tune la Joxu Föe, Iezebela la ëjen, hnei eahlo hna humuthi Nabotha matre troa thapa qaathei angeic la hlapa vin göi troa hamë Ahaba föi eahlo. (1 Ite Joxu 21:1-16) Ame lo 1932, hna qejepengöi Ahaba me Iezebela hnene la Ita Ne Thup ka hape, nyidro a nyihatre i Satana memine la organizasio i angeic, nge Nabotha a nyihatre i Iesu, nge ame la meci Nabotha, tre kola nyihatrene la kola humuthi Iesu. Ngo, ame lo 1961, kola qaja hnene la itus, “Que ton nom soit sanctifié” ka hape, Nabotha a nyihatrene la itre hna iën, nge Iezebela a nyihatrene la itre Hmi Keresiano Göi Ëjen. Ketre, ame la kola axösisi Nabotha  hnei Iezebela, tre kola nyihatrene la kola axösisine la itre hna iëne ngöne la itre drai tixenuë. Nyimu macatre ne acatrene la lapaune ne la itre hlue i Akötresie hnene la itre aqane qejepengöne celë. Haawe, pine nemene kö matre ketre pengöne hë la aqane qejepengöne enehila?

10. (a) Nemene la aqane amamane la hlue ka nyipici ka hape, ka hmeke catre angeic ngöne la kola qejepengöne la itre xa hna melën e hnine la Tusi Hmitrötr? (b) Nemene la ka mama hnyawa hnine la itre itusi së enehila?

10 Kola tro la itre macatre, nge Iehova fe a xatuane la “hlue ka nyipici me ka inamacan” troa inamacane hnyawa, kola hape troa hmek. Nemene la aliene lai? Kola hape, e qaja ha enehila hnene la hlue ka nyipici ka hape, hetre hna nyihatrene hnene la ketre edromë ne la Tusi Hmitrötr, ke hnene laka ka hetre enyipicine lai qa hnine la Tusi Hmitrötr. Ame la itre xa aqane qejepengöne ekö la itre hna nyihatrene hnene la itre hna melën e hnine la Tusi Hmitrötr, tre jole catre e troa trotrohnin, me troa xolouth, me troa trongën. Ame fe la engazon, tre, sisitria ha la hna nyihatren, nge co pë hë la itre nyipi ini. Celë hi matre, itre itusi së enehila a amamane hnyawa la itre ini ka hmaloi e troa trotrohnin, kola qaja la itre thiina ka lolo nyine tro sa hetreny, qa ngöne la itre hna melën e hnine la Tusi Hmitrötr ka tune la lapaun, me xomihni ahoeany, me aqane troa lapa qale koi Akötresie.

Ketre ini ka tru koi së la tulu i Nabotha (Wange ju la paragarafe 11)

11. (a) Nemene la aqane trotrohnine së enehila la hna melëne hnei Nabotha, nge nemene la aqane xatua së hnene la tulu i angeic? (b) Ame ngöne la itre macatre ka asë hë, pine nemene matre tha mama ha ngöne la itre itusi së la itre edromë ne la Tusi Hmitrötr me itre ka nyihatren? (Wange ju la “Itre Hnyinge Ne La Itre Ka e” ngöne la zonale celë.)

11 Ame la aqane trotrohnine së enehila la hna melëne hnei Nabotha, tre tha jole hë troa trotrohnin, nge ka lualai hnyawa. Tha meci kö Nabotha göi troa nyihatre i Iesu maine itre hna iëne pena. Ngo angeic a mec pine laka, eje e kuhu hni angeic la troa mele nyipici koi Akötresie. Hnei angeic hna catre nyipici kowe la Wathebo i Mose ngacama tru la icilekeu qaathene la ka cilëne la mus. (Numera 36:7; 1 Ite Joxu 21:3) Drei la ketre tulu ka lolo kowe la nöjei hlue i Akötresie enehila ka cile catr qëmekene la itre ka icilekeu ka tune lai. (E jë la 2 Timoteo 3:12.) Ijije hi tro la nöjei Keresiano asë a trotrohnin, me xolouth, me trongëne la ini cili, ini lai ka acatrene la lapaune i angatr.

12. (a) Nemene hë la mekune hne së hna traqa kow göne la itre edromë ne la Tusi Hmitrötr? (b) Pine nemene matre ijiji së troa trotrohnine hnyawa la itre ini ngacama itre ini ka jui? (Wange ju la ithuemacany.)

12 Hapeu, tro kö sa mekune qa ngöne lai ka hape, itre ini hmekuje hi la hne së hna kapa qa ngöne la itre edromë ne la Tusi Hmitrötr? Ohea. Ngo itre itusi së pe enehila a amamane hnyawa la aqane ce tro la ketre edromë ne la Tusi Hmitrötr memine la ketre. Ka tune la aqane mele nyipici Nabotha qëmekene la icilekeu, memine la mec  i angeic, kola amekunë së la aqane mele nyipici Keriso memine la itre hna iën. Ngo, kolo fe a amekunë së la aqane mele nyipici ne la ka ala nyim, ene la “ite xa mamoe.” Haawe, kola mama hnyawa la aqane ini së hnei Iehova laka, tha jole kö troa trotrohnin. *—Wange ju la ithuemacany.

AQANE QEJEPENGÖNE AHMALOEËNE LA ITRE CEITUNE I IESU

13. Nemene la ka amamane ka hape, easë hë a qejepengöne ahmaloeëne la itre xa ceitune i Iesu?

13 Iesu Keriso la Atre Hamë Ini Ka Tru ne la fen. Pi tro catre nyidrëti a xome la itre ceitun matre troa hamë ini. (Mataio 13:34) Hetre thangane catre la itre ceitun, ke, itre ej a qejepengöne hnyawa la itre mekune ka nango jole pi hë troa trotrohnin, nge ka upi së troa thele mekun, nge ka ketri së. Ame ngöne la itre macatre ka ase hë, hnene la itre itusi së hna qejepengöne ahmaloeëne la itre ceitune i Iesu, nge lualai. Ka tune la Ita Ne Thup ne 15 Diseba 2014, ej a xatua së troa trotrohnine hnyawa la itre ceitun göi leven, me itine sinapi, me eötr me itre xa ceitune ju kö. Trotrohnine hë së enehila laka, itre ceitune celë a qaja la Baselaia i Akötresie, celë hi ka xatuane la itre atr ka nyimutre troa thipetrije la fene ka ngazo celë, me troa nyihlue i Iehova.

Hetre eloine la itre ceitun, ke, itre ej a qejepengöne hnyawa la itre mekune ka nango jole pi hë troa trotrohnin, nge ka upi së troa thele mekun, nge ka ketri së

14. (a) Nemene la aqane qejepengöne së ekö la ceitune göi atre Samaria ka lolo thiina? (b) Nemene la aqane trotrohnine së enehila la ceitune cili?

14 Nemene la aqane tro sa trotrohnine la itre ceitune i Iesu ka nyimu pengön? Ame itre xan e itre ej, tre ka hetre hna nyihatren. Ame itre xan, tre nyine ini koi së. Ngo, tro sa atre tune kaa ka hape, itre ceitune lai ka hetre hna nyihatren maine nyine ini hi? Ame ngöne la itre macatre ka ase hë, kola ha mama hnyawa koi së. Pane mekune jë la aqane qejepengöne së ekö la ceitune i Iesu göi atre Samaria ka lolo thiina. (Luka 10:30-37) Ame lo 1924, hnene la Ita Ne Thup hna qaja ka hape, kola nyihatre i Iesu hnene la atre Samaria, nge ame la gojenyi hna trongëne hnei angeic qaa Ierusalema a tro Ieriko, tre kola nyihatrene la aqane ngazo ne la mele ne la itre atr qaane lo icilekeu e Edena. Ketre, ame la itre ka atrekënö ngöne lo gojenyi, tre kola nyihatrene la itre organizasio ka tru me itre atr ka thele mani, nge ame la atre huuj, me atre Levi, tre kola nyihatrene la itre Hmi Kerisiano Göi Ëjen. Ngo ame enehila, itre itusi së a xome la ceitune celë göi troa amekunëne la nöjei Keresiano ka hape, tha tro kö sa ië hna hnim. Tro pe sa xatuane la nöjei atr ka aja ixatua, me hane fe xatua angatre troa atre la nyipici göi Akötresie. Haawe, tru la madrine së la aqane amamane hnyawa koi së hnei Iehova la nyipici.

15. Nemene la hne së hna troa ce ithanatan ngöne la tane mekune ka troa xulu?

15 Ame ngöne la tane mekune ka troa xulu, tro sa ce ithanatane la ceitune i Iesu göi itre jajiny ka ala treen. (Mataio 25:1-13) Hetre aja i Iesu göne la aqane troa trotrohnine la ceitune celë. Haawe, nemene la aqane tro sa trotrohnine lai ngöne la itre drai ne la pun? Hapeu, ame asë hi la nöjei atr, maine nöjei ewekë ka traqa, maine nöjei ewekë e hnine lai ceitun, tre kolo kö lai a nyihatrene la ketre atr maine ketre ewekë ka tru? Maine pena, aja i nyidrëti kö tro sa xomi ini qa ngön matre xatua së ngöne la itre drai ne la pun? Tro sa ce wang.

^ par. 4 Kola xötrei mama la Ita Ne Thup hna ahmaloeëne qene Papale lo Julai 2011. Qaane ju hi lai, kolo fe ha mama ngöne la itre xa qene hlapa.

^ par. 5 Tro fe a hetrenyi la Tusi Hmitrötr hna ahnyipixen ngöne la itre xa qene hlapa.

^ par. 12 Hetrenyi e hnine la Tusi Hmitrötr la itre ewekë ka nango jole pi hë troa trotrohnin, ka tune la itre hna cinyihane hnei Paulo. Ngo, hna cinyihane la Tusi Hmitrötr hnene la itre atr jëne la uati hmitrötr. Haawe, uati hmitrötre i Akötresie a xatuane la itre Keresiano enehila troa trotrohnine la Tusi Hmitrötr, ene mina fe “la nöjei ewekë asë ga jui Akötesie.”—2 Peteru 3:16, 17; 1 Korinito 2:10.