Tro jë kowe la alien

Tro jë kowe la itre mekune ka co

Tro jë kowe la itre alien

Itretre Anyipici Iehova

Drehu

Ita Ne Thup (Nyine Inin)  |  Maac 2015

Ce Huliwa Nyipici Jë Memine La Itre Trejin

Ce Huliwa Nyipici Jë Memine La Itre Trejin

“Ame hi lo kuca hnei nyipunie kowe la kete e angate la ka co cate ka lue tejine me ini, te, nyipunieti hi a kuca koi ni.”MATAIO 25:40.

1, 2. (a) Nemene la itre ceitun hna qaja hnei Iesu kowe la itre sinee i nyidrë? (Wange ju la pane iatr.) (b) Nemene la nyine tro sa atre göne la ceitune ne la itre mamoe me gootr?

HETRE ewekë ka tru aliene hnei Iesu hna ithanatane memine la itre sinee i nyidrë, Peteru, Anederea, Iakobo, me Ioane. Ase jë hi Iesu qaja la itre ceitun göi hlue ka nyipici me ka inamacan, me itre jajinyi ka ala treen, me itre talan, nyidrëti a qaja jë la ketre ijine tro “la Nekö i ate” a amekötine “la nöjei nöj’ asëjëihë.” Thupene lai, Iesu a qaja fe kowe la itre sinee i nyidrë la ketre ceitun. Öni nyidrë, tro “la Nekö i ate” a thawaluëne la itre atr, ene la itre mamoe me itre gootr. Nge nyidrëti a qaja la pengöne la hnaakönine lapa, ene la itre “tejine” me Joxu.—E jë la Mataio 25:31-46.

2 Tune la itre aposetolo, hna pi atre la aliene la ceitune celë ngöne la hneijine së hnene la itre hlue i Iehova, ke, emelene hi lai kowe la itre atr. Öni Iesu, hetre itre atr ka troa kapa la mele ka pë pun, nge ame itre xan, troa apatrene triji angatr. Celë hi kepine matre nyipi ewekë catre tro sa atre la aliene la ceitune  celë, me nyine tro sa kuca matre hane fe së kapa la mele ka pë pun. Haawe, tro sa ce wange ngöne la tane mekune celë la itre hnyinge celë: Nemene la aqane xatua së hnei Iehova troa trotrohnine la ceitune celë? Easa atre tune kaa ka hape, huliwa ne cainöj la hna amamane hnyawa hnene la ceitun? Drei la ka troa cainöj? Nge, pine nemene matre nyipi ewekë catre troa ce huliwa nyipici enehila memine la “Joxu” me itre “tejine” me nyidrë?

AQANE XATUA SË HNEI IEHOVA TROA TROTROHNINE LA CEITUN

3, 4. (a) Nemene la nyine tro sa atre matre troa trotrohnine la ceitune celë? (b) Nemene la aqane qejepengöne la ceitune celë hnene la Ita Ne Thup lo 1881?

3 Ame göi troa trotrohnine la aliene la ceitun göi itre mamoe me gootr, nyipi ewekë tro sa atre ka hape, (1) drei la “Nekö i ate,” maine “Joxu,” drei la itre mamoe me itre gootr, nge drei la itre “tejine” me Joxu? (2) eue la “Nekö i ate” a thawaluëne maine amekötine la itre mamoe me gootr? nge (3) pine nemene matre hë itre xane jë ka hape, mamoe nge gootr itre xan?

4 Ame lo 1881, hnene la Ita Ne Thup hna qaja ka hape, Iesu hi la “Nekö i ate” maine “Joxu.” Ketre, eje fe a qaja ka hape, ame lo itre “tejine” me Joxu, tre tha kolo hmekuje kö lo itre ka troa ce mus me Iesu e hnengödrai, ngo memine fe la itre atr asë ka troa mele e celë fen, itre ka troa pexeje elany. Önine la Ita Ne Thup, troa thawaluëne la itre atr ngöne la Itre Macatre Ka Ca Thauzan Ne Musi Keriso, nge ame la itre ka nyitipune la ihnimi Akötresie ngöne la nöjei götrane la mele i angatr, troa hën ka hape, itre mamoe.

5. Nemene la aqane trotrohnine la ceitun hnene la itre hlue i Iehova lo 1923?

5 Ame hë e thupen, Iehova a xatuane la itre hlue i Nyidrë troa trotrohnine hnyawa la ceitune celë. Ame lo 1923, hnene la Ita Ne Thup ne 15 Okotropa hna qaja ka hape, Iesu hi la “Nekö i ate.” Ame e cili, ej a xome la itre xötre ne la Tusi Hmitrötr ka amamane ka hape, ame lo itre “tejine” hna qaja e hnine la ceitun, tre kolo hmekuje hi lo itre ka troa ce musi me Iesu, nge angatr asë e hnengödrai elanyi ngöne la Itre Macatre Ka Ca Thauzan. Eje fe a qaja ka hape, ame lo itre mamoe, tre kola qaja la itre atr ka tro pe hi a mele e celë fen, fene la musi Iesu me itre trejine me nyidrë. Nge pine laka kola qaja hnene la ceitun ka hape, itre mamoe a xatuane la itre trejine me Joxu, haawe, ame la kola thawaluëne maine amekötine, tre, kolo ijine itre trejine hna iën petre kö e celë fen, qëmekene la Itre Macatre Ka Ca Thauzan. Ketre, eje fe a qaja ka hape, ame la itre mamoe, tre kolo itre ka lapaune koi Iesu, nge ka mejiune kowe la Baselaia, atre troa axulune la mele ka sisitria.

6. Nemene la ka saze ngöne la aqane trotrohnine së la ceitun lo 1995?

6 Ame ngöne la itre macatre ka nyimutre, hne së lo hna mekune ka hape, kola amekötine la itre atr thenge la huliwa ne cainöj hna kuca enehila ngöne la hneijine la pun. E tro angatr a kapa la maca hne së hna tro fë, kola hape, itre mamoe angatr, nge e thipetrije hë la maca, tre, itre gootre lai. Ngo ame hë lo 1995, saze hë la aqane trotrohnine së. Hnene lo Ita Ne Thup hna ce xome la Mataio 24:29-31 (e jë) me Mataio 25:31, 32 (e jë), me qejepengöne ka hape, tro Iesu a amekötine elanyi la itre atr ngöne la ijine akötre atraqatr, la kola ‘traqa la Nekö i ate ngöne la lolo i nyidrë.’ *—Wange ju la ithuemacany.

Easa olene koi Iehova la hna xatua së ngöne la itre macatre troa trotrohnine la ceitune celë

7. Nemene la aliene la ceitun?

 7 Trotrohnine nge lualai hë koi së enehila la ceitun göi itre mamoe me gootr. Atre hë së ka hape, ame “la Nekö i ate” maine “Joxu,” tre kola qeje Iesu. Ame la itre “tejine” me Joxu, tre kolo itre trejin hna iën hnene la uati hmitrötr angetre troa ce mus me Iesu e hnengödrai. (Roma 8:16, 17) Ame la “ite mamoe” me “ite got,” tre kolo itre atr qa ngöne la nöjei nöj asë. Troa ameköti angatr elany ngöne la pune la akötre atraqatr laka tha hmitre pe kö matre nyiqaane jë. Ketre, atre hi së ka hape, tro Iesu a amekötine la itre atr thenge la aqane ujë i angatr kowe la itre hna iën itre ka mele petre kö e celë fen. Easa olene koi Iehova la hnei Nyidrëti hna xatua së ngöne la itre macatre ka ase hë, troa trotrohnine la ceitune celë me itre xa ceitune ju kö, hnine la tusi Mataio mekene 24 me 25!

CEITUNE KA AMAMANE LA ENYIPIEWEKËNE LA HULIWA NE CAINÖJ

8, 9. Pine nemene matre hëne jë Iesu la itre mamoe ka hape, itre ka “thina ka meköt”?

8 Ame e hnine la ceitun göi itre mamoe me gootr, tha ase fe kö Iesu xome la hnaewekë hna hape, “cainöj” maine “huliwa ne cainöj.” Haawe, hne së hna atre tune kaa ka hape, kola mama jëne la ceitun la enyipiewekëne la huliwa ne cainöj?

9 Maine easa ajane troa atre la mekune ka sa la hnying, loi e tro sa pane mekune lo ini hnei Iesu hna hamën jëne lo ketre ceitun. Tha nyidrëti kö a qaja lo nyipi mamoe maine gootr. Ketre tune mina fe, tha nyidrëti kö a qaja ka hape, troa aceitunëne me mamoe la nöjei atr ka ithuane me ithue iheetren la itre hna iën, me nyinyine la meci angatr, maine wai angatre hnine la kalabus. Iesu pe a qejepengöne la itre mamoe, ka hape, itre ka “thina ka meköt,” ke angatr a xome la itre hna iën ceitu me itre trejine me angatr, me ce huliwa nyipici me angatr ngöne la itre drai tixenuë celë, itre ijine akötr.—Mataio 10:40-42; 25:40, 46; 2 Timoteo 3:1-5.

10. Nemene la aqane xatuane la itre trejine me Keriso hnene la itre mamoe?

10 Ame la Iesu a hamëne la ceitun göi itre mamoe me gootr, tre, nyidrëti a qaja la ewekë ka troa traqa ngöne la hneijine la pun. (Mataio 24:3) Ka tune la nyidrëti a qaja ka hape: “Tro ha cainöjëne la maca ka loi celë ne la baselaia e cailo fene.” (Mataio 24:14) Nge thupene lai, qëmekene troa qaja la ceitun göi itre mamoe me gootr, nyidrëti a pane qaja la ceitun göi itre talan. Iesu a hamëne la ceitune celë matre troa amamane kowe la itre hna iëne ka hape, tro angatr a catre kuca la huliwa ne cainöj. Ngo, ala xalaithe hi la itre hna iën ka mele pe e celë fen, matre tru catre hnei huliwa i angatr! Hna upe la itre hna iën troa cainöje kowe la “nöjei nöj” qëmekene troa traqa la pun. Tune la hne së hna atre qa ngöne la ceitun göi itre mamoe me gootr, kola xatuane la itre trejine me Iesu hnene la “nöjei mamoe.” Haawe, ame la ewekë ka sisitria nyine tro angatr a kuca, tre ene la troa xatuane la itre trejine me Iesu ngöne la huliwa ne cainöj. Ngo hapeu, manie hi la nyine tro angatr a hamën, maine troa ixatua ngöne la huliwa ne cainöj?

 DREI LA KA TROA CAINÖJ?

11. Nemene la hnyinge hna amejën hnei itre xan, nge pine nemen?

11 Traqa enehila koi eitre milio lao itretre drei Iesu, nge ala nyimu kö la itre xa mamoe. Pë fe kö talan hnei Iesu hna hamë angatr. Hnei nyidrëti hna hamëne hmekuje kowe la itre trejine me nyidrë, itre hna iën. (Mataio 25:14-18) Celë hi matre hnyinge jë itre xan ka hape, ‘Maine tha hnei Iesu kö hna hamë talan koi angatr, tre hapeu, nyipi ewekë fe kö tro angatr a hane cainöj?’ Eje hi. Tro sa ce wange la itre kepin.

12. Nemene la ini koi së qa ngöne la itre ithanata i Iesu ngöne Mataio 28:19, 20?

12 Hnei Iesu hna ahnithe kowe la itretre drei nyidrë asë troa cainöj. Thupene la hna amele Iesu hmaca, hnei nyidrëti hna upe la itretre drei nyidrë troa “inine” la itre atr troa trotrohnine la “nöjei ewekë asëjëihë” hnei nyidrëti hna amekötin, matre tro fe angatr a hane nyihlue i Iehova. Haawe, tro fe la hlue i Iehova celë a hane trongëne la hna amekötine hnei Iesu, ene la troa cainöj. (E jë la Mataio 28:19, 20.) Matre kola mama hnyawa laka tro asë hi së a cainöj, ceitune hi la itre ka troa mele hnengödrai me e celë fen.—Ite Huliwa 10:42.

Tro asë hi sa cainöj, itre ka troa mele e hnengödrai me e celë fen.

13. Nemene la hne së hna inin qa ngöne la hna meköle goeën hnei Ioane?

13 Qa ngöne la itusi Hna Amamane, easa atre ka hape, troa kuca la huliwa ne cainöj hnene la itre hna iën me hnei itre xane fe. Hnei Iesu hna aijijë Ioane aposetolo troa meköle goeëne la “tepu [jajinyi ka troa faipoipo]” kola könëne la itre atr troa iji la timi ne mel. Ame la jajinyi ka troa faipoipo, tre kola qaja la ala 144 000 lao hna iën ka troa ce mus me Iesu e hnengödrai. (Hna Amamane 14:1, 3; 22:17) Nge ame la tim, kola qaja la thupene mel, ene la mel hna huujën hnei Iesu, ka troa aijijëne la itre atr troa hetrenyi la mel, ka pë sine wezipo me mec. (Mataio 20:28; Ioane 3:16; 1 Ioane 4:9, 10) Catre la itre hna iën amamane kowe la itre atr la pengöne la thupene mel, memine la aqane tro angatr a kepe thangane qa ngön. (1 Korinito 1:23) Ngo, kola mama ngöne lai hna meköle goeën la ketre lapa ne la itre atr, a tha itre hna iëne kö, ngo itre ka mejiune pe troa mel e celë fen. Hna upi angatre fe troa hane qaja koi itre atr ka hape, “Trohemi.” Angatre lai a trongëne la hna amekötine celë la angatr ce thawa la maca ka loi memine la itre atr. Haawe, kola amamane hnene la hna meköle goeëne celë ka hape, ame asë hi la itre atr ka kapa la maca ka loi, tre, nyipi ewekë tro fe angatr a hane cainöje kowe la itre xa atr.

14. Nemene la aqane tro sa drengethenge “la wathebo i Keriso”?

14 Tro asë hi la nöjei ka drengethenge “la wathebo i Keriso” a cainöj. (Galatia 6:2) Aja i Iehova tro asë hi la itre ka nyihlue i Nyidrë a drengethenge la itre wathebo ka cas. Ame ekö, aja i Nyidrë tro la angetre Isaraela me itre trenyiwa a mele thenge la itre wathebo i Nyidrë. (Esodo 12:49; Levitiko 24:22) Ame enehila, tha easë hmaca kö a drengethenge la itre wathebo hna hamëne kowe lo angetre Isaraela ekö. Ngo, nyipi  ewekë pe tro sa drengethenge “la wathebo i Keriso,” ceitune hi la itre hna iëne me itre tha hna iën. Ame la ketre ewekë ka sisitria hnei Iesu hna ini së, tre ene la troa ihnim. (Ioane 13:35; Iakobo 2:8) Nyipi ewekë tro sa hnimi Iehova, me Iesu me itre atr. Ketre, ame la ketre aqane ka sisitria göi troa amamane la ihnimi cili, tre ene la troa qaja la maca ka loi ne la Baselaia kowe la itre atr.—Ioane 15:10; Ite Huliwa 1:8.

15. Pine nemene matre qaja jë së ka hape, hna amekötine asë hi kowe la itretre drei Iesu troa cainöj?

15 Ame la ewekë hna qaja hnei Iesu kowe la itretre drei nyidrë ka ala xalaith, tre thatraqane fe la itretre dreng ka ala nyim. Ame la enyipicin, tre, hnei Iesu lo hna isisinyikeu memine lo itretre drei nyidrë ka ala levin, me thingehnaeane koi angatr ka hape, tro angatr ce mus me nyidrë ngöne la Baselaia. Ngo, ala 144 000 angatr lo ka troa ce mus me nyidrë. (Luka 22:29, 30; Hna Amamane 5:10; 7:4-8) Ketre, thupene la hna amele Iesu hmaca, ala xalaithe hi la itretre dreng, angetre drenge la hna amekötine kow troa cainöj. (Ite Huliwa 10:40-42; 1 Korinito 15:6) Ngo hnene la itretre drei Iesu asë ngöne lo hneijine ne la itre pane Keresiano hna trongëne la hna amekötine cili. (Ite Huliwa 8:4; 1 Peteru 1:8) Ame enehila fe, atre hnyawa hi së ka hape, nyipi ewekë tro sa cainöj, ngacama tha hne së kö hna drenge mekötine la aqane ewekë i Iesu e upi së troa kuca la huliwa cili. Traqa ha enehila kowe la eitre milio lao trejine ka cainöje trootro. Ketre, atre fe hi së ka hape, ame la easa cainöj,  easë hi lai a amamane la lapaune së koi Iesu.—Iakobo 2:18.

ENEHILA HI LA IJINE TROA HULIWA NYIPICI

16-18. Nemene la aqane tro sa xatuane la itre trejine me Keriso, nge pine nemene matre tro sa ujë tune lai enehila?

16 Catrehnine catre hmaca kö la isi Satana enehila kowe la itre trejine me Keriso hna iën ka mele petre kö e celë fen, nge atre hi angeic ka hape, “xoxopate pe hi la ijine i [angeic].” (Hna Amamane 12:9, 12, 17) Ngacama catre ju hë la icilekeu i Satana, ngo itre hna iën pala hi a elemekene la huliwa ne cainöj, nge itre atr ka ala nyimu catre hmaca kö a drenge la maca ka loi, a tha hna tune kö ekö. Haawe, mama hnyawa hi ka hape, ce Iesu memine la itre hna iën, nge nyidrëti a tro xome trongë angatr.—Mataio 28:20.

Manathithi ka tru troa xatuane la itre trejine me Keriso

17 Ame koi së, ketre manathithi ka tru troa xatuane la itre trejine me Keriso ngöne la hna cainöj. Easë fe a hamë ahnahna nyine ixatua, me huliwa catr troa xupe la itre Uma Ne Baselaia, me Uma Ne Asabele, me itre Bethela. Ame la easa drengethenge la itre qatre thup me itre xa trejin hna acile hnene la “hlue ka nyipici me ka inamacan,” easë hi lai a amamane la aja së troa xatuane la itre trejine me Keriso.—Mataio 24:45-47; Heberu 13:17.

18 Easenyi hë matre pelehatrene tixenuëne jë la thelene la itre hna iën. Ame hë e cili, tro la itre angela a nue “la ek’ enyi ne la fene hnengödrai,” ame hna nyiqaane ju la akötre atraqatr. (Hna Amamane 7:1-3) Qëmekene troa nyiqaane la isi Amagedo, tro Iesu a aelëne la itre hna iën hnengödrai eë. (Mataio 13:41-43) Haawe, maine easa ajane troa aceitunë së me itre mamoe ngöne la ijine traqa i Iesu, enehila hi la ijine tro sa ce huliwa nyipici memine la itre hna iën, ene lo trejine me Keriso.

Nyimu aqane xatuane së la itre trejine me Keriso

(Wange ju la paragarafe 17)

^ par. 6 Maine epuni a aja itre xa ithuemacany göne la ceitune celë, wange ju la lue tane mekune hna hape, “Aqane Troa Ameköti Së Elany Ngöne La Hnakotr,” me “Thupene Kowe La Itre Mamoe Me Gootr,” ngöne la Ita Ne Thup ne 15 Okotropa 1995 qene Wiwi.