Tro jë kowe la alien

Tro jë kowe la itre mekune ka co

Tro jë kowe la itre alien

Itretre Anyipici Iehova

Drehu

Ita Ne Thup (Nyine Inin)  |  Febuare 2015

Xötrethenge Jë La Aqane Ipië Me Hni Ka Menyike i Iesu

Xötrethenge Jë La Aqane Ipië Me Hni Ka Menyike i Iesu

“Hnei Keriso hna xomi aköte thatraqai nyipunie, kola hamë tulu thatraqai nyipunie, mate tro nyipunie a xöte thenge la ite thupa ca i nyidë.”1 PETERU 2:21.

1. Pine nemene matre ame la easa xötrethenge Iesu, easë hi lai a easenyi catre koi Iehova?

HNA majemine hnene la itre atr troa nyitipune la itre atr hne së hna piin. Ngo qaane la mele ne la atr, pëkö ketre atr ka sisitria nyine troa nyitipun hui Iesu. Pine nemen? Ame la ketre ijin, hnei Iesu hna qaja ka hape: “Ame la ate goeë ni, angeice fe a goeëne la Tetetro.” (Ioane 14:9) Kolo hi ke, Iesu a xötrethenge hnyawa la pengöi Tretretro i nyidrë. Haawe, ame ju hi la easa atre Iesu, ketre easë fe hi a atrepengöi Iehova. Ame mina fe la easa xötrethenge Iesu, easë fe hi a easenyi catre koi Iehova, Akötresie ka draië catr e koho hnengödrai me e celë fen. Drei la manathithi ka tru!

2, 3. (a) Pine nemene matre hnei Iehova hna qeje pengöne hnyawa la aqane mele i Iesu, nge nemene la hnei Akötresie hna ajane tro sa kuca? (b) Nemene la hne së hna troa ce ithanatane ngöne la tane mekune celë memine la ka troa xulu?

2 Hnei Iehova hna qaja hnyawa la aqane mele i Iesu e hnine la Tusi Hmitrötr. Pine nemen? Pine laka aja i Akötresie tro sa atre la Hupuna i Nyidrë matre ijije mina fe tro sa  xötrethenge Nyidrë. (E jë la 1 Peteru 2:21.) Ame hnine la Tusi Hmitrötr, hna aceitunën me itre thupaca la tulu hnei Iesu hna amë pe koi së. Nemene la aliene lai? Iehova a ajane tro sa xötrethenge la itre thupaca ne la Hupuna i Nyidrë, ene la troa kuca asë la hnei nyidrëti hna kuca. Eje hi laka, ka pexeje Iesu, matre tha Iehova kö a thele tro sa pexej tune la Hupuna i Nyidrë. Ngo tro pe sa kuca la hne së hna atrein matre troa xötrethenge Iesu.

3 Tro sa pane ce wange la itre thiina ka lolo i Iesu. Ame ngöne la tane mekune celë, easa troa ce ithanatane la aqane ipië memine la hni ka menyike i Iesu. Ame ngöne la tane mekune ka troa xulu, tre, easë pena a troa ce ithanatane la aqane catre i nyidrë memine la aqane waiewekë i nyidrë. Tro sa sa la köni hnyinge ka troa qeje pengöne la itre thiina cili: Nemene la aliene la thiina cili? Nemene la aqane mama thei Iesu la thiina cili? Tune kaa la aqane tro sa xötrethenge nyidrë?

KA HNI KA IPIË IESU

4. Nemene la aliene la troa hape hni ka ipië?

4 Nemene la aliene la hna hape, troa hni ka ipië? Nyimutre la itre atr ka mekune menune ka hape, ame la troa hni ka ipië, tre aqane ujë ne föe maine ka hni ka xou pena. Ngo hapeu, nyipici kö lai? Maine easa ajane troa hni ka ipië, nyipi ewekë tro sa catr. Isa pengöne kö la troa hni ka ipië memine la troa pi draië me pi tru. Hna nyiqaane the së la troa hni ka ipië. Hna qaja hnene la ketre itus ka hape: “Ame la troa hni ka ipië, tre troa pane atrehmekune la pengö së xajawa i Akötresie.” Maine ka hni ka ipië së xajawa i Akötresie, tro hë sa hnöthe troa pi draië hune la itre xa atr. (Roma 12:3; Filipi 2:3) Tha ka hmaloi kö kowe la itre atr ka ngazo troa hni ka ipië, ngo ijije hi tro sa hane hni ka ipië e hne së hna mekune hnyawa la pengöi Iehova laka, ka draië catre Nyidrë, nge hne së fe hna hane xötrethenge la tulu i Iesu.

Maine ka hni ka ipië së, tro hë sa hnöthe troa pi draië hune la itre xa atr

5, 6. (a) Drei lae Mikaela tane la itre angela? (b) Tune kaa la aqane amamane Mikaela ka hape, ka hni ka ipië nyidrë?

5 Tune kaa la aqane amamane Iesu ka hape, ka hni ka ipië nyidrë? Ka hni ka ipië pala hi Iesu, ekö lo nyidrëti a ketre angela ka catr, memine fe lo nyidrëti e celë fen ceitu me atr ka pexej. Tro sa ce wange la itre xa hnepe ceitun.

6 Aqane ujë i nyidrë. Ame hnine la tusi Iuda, kola qeje pengöne la mele i Iesu ekö qëmekene tro nyidrëti a traqa e celë fen. (E jë la Iuda 9.) Nyidrëti la tane la itre angela ekö, Mikaela la ëje i nyidrë, nge “kola isa cate me diabolo” me “ikelikelëne la ngönetei Mose.” Ame la kola meci hnei Mose, hnei Iehova hna kelemi angeic ngöne la ketre götrane gaa sihngödr. (Deuteronomi 34:5, 6) Maine jë, hna thele hnei Diabolo troa tupathe la angetre Isaraela matre troa xome la ngönetrei i Mose nyine thili kow. Ngo hna catre sewe angeic hnei Mikaela. Kola qaja hnene la ketre itus la aliene la itre trenge ewekë hna hape, “kola isa cate” me “ikelikelë;” kösë kolo lai a “ikootrë,” nge maine jë “troa ‘isenyine’ hnei Mikaela me Diabolo la ngönetrei i Mose.” Ngo atre hnyawa hi la tane la itre angela laka, hna nyi ifegone hi  la musi angeic. Celë hi matre, angeice kö a nue koi Iehova Atre Amekötine Ka Tru, ke, Nyidrëti la ka ijije troa ameköti Satana. Hapeu, tha thiina kö lai nyine tro sa xötrethenge?

Hnei Iesu hna kuca pala hi cememine la hni ka ipië la aja i Iehova “uti hë la mec”

7. Nemene la aqane amamane Iesu la hni ka ipië i nyidrë hna jëne la aqane ithanata i nyidrë me itre huliwa i nyidrë?

7 Ame lo Iesu e celë fen, kola mama la hni ka ipië thei nyidrë ngöne la aqane ithanata me jëne la itre ewekë hnei nyidrëti hna kuca. Aqane ithanata i nyidrë. Tha hane fe kö Iesu thele matre troa atrunyi nyidrëti hnene la itre xa atr. Ngo, hnei nyidrëti pala hi hna atrune la Tretretro i Nyidrë. (Mareko 10:17, 18; Ioane 7:16) Tha hane kö së drenge la Iesu a jele xetihene la itretre drei nyidrë me thaipië angatr. Hnei Nyidrëti pe hna metrötrë angatr, me amamane ka hape, nyidrëti a nyipi angatr hnene la aqane qaja aloine nyidrë la itre thiina ka lolo i angatr. (Luka 22:31, 32; Ioane 1:47) Itre huiliwa i nyidrë. Hnei Iesu hna ahmaloeëne la mele i nyidrë matre tha tru menu kö hnei mo i nyidrë. (Mataio 8:20) Tha jole kö koi nyidrë troa kuca la itre ewekë hna xele ma kuca hnei itre xan. (Ioane 13:3-15) Kola mama fe la hni ka ipië thei nyidrë ngöne la aqane drengethenge nyidrë. (E jë la Filipi 2:5-8.) Tha ceitui Iesu kö memine la itre atr ka pi draië, ka xele ma hane drengethenge la itre xan; hnei Iesu pe hna kuca pala hi cememine la hni ka ipië la aja i Iehova “uti hë la mec.” Mama hnyawa pi hi laka, ka ‘ipië la hni’ ne lo Neköi atr, ene Iesu.—Mataio 11:29.

XÖTRETHENGE JË LA AQANE IPIË I IESU

8, 9. Tro sa amamane tune kaa laka ka hni ka ipië së?

8 Tro sa xötrethenge tune kaa la aqane ipië i Iesu? Aqane ujë së. Easa ipië, ke, atre hi së laka, hna nyifegone hi la hne së hna atrein troa kuca. Celë hi matre, tha qanyi së kö troa amekötine la itre atr. Tha tro kö sa ixöjetrije me imekuhni. (Luka 6:37; Iakobo 4:12) Hni ka ipië mina fe a xatua së matre tha tro kö sa “thina ka meköti cat.” Kolo lai a hape, tha tro kö sa mekune ka hape, ka sisitria catre kö së hune la itre xan ngöne la hna atreine kuca, me itre hnëqa pena hna cilën. (Ate Cainöj 7:16) Tha tro kö a mekune hnene la itre qatre thup ka hape, ka sisitria catre kö angatr hune la itre trejine trahmanyi me föe. Ngo loi e tro pe a “sisitia [la itre trejine] hui [angatr].”—Filipi 2:3; Luka 9:48.

9 Tro sa ce wange la tulu i W. Thorn. Hnei nyidrëti hna nyiqaane wange trongëne la itre ekalesia ngöne la macatre 1894. Thupene la itre macatre ka nyimutre, hna upi nyidrë troa thupëne la ume gutu ngöne la hna axö öni e Neweiok. Ngacama nyidrëti a mekune ka hape, hetre ketre ewekë ka nyipi ewekë kö nyine tro nyidrëti a kuca, ngo öni nyidrë: “Kola hane pi mama ngo so ne dro pe!” (E jë la Isaia 40:12-15.) Hane hi la ketre tulu ne ipië!

10. Tro sa amamane tune kaa laka ka hni ka ipië së hna jëne la aqane ithanata së memine la itre huliwa së?

10 Aqane ithanata së. Tro fe a mama  hnene la aqane ithanata së kowe la itre atr laka, itre ka hni ka ipië së. (Luka 6:45) Ame ngöne la easa ithanata koi angatr, tha tro kö sa qaja atrune pala ha la itre sipu hnëqa së, memine la itre ewekë hne së hna kuca ha. (Ite Edomë 27:2) Tro pe sa qaja aloine la hna kuca hnene la itre trejine trahmanyi me föe, me wangatrune la itre thiina ka lolo me itre hnei angatre hna atreine troa kuca. (Ite Edomë 15:23) Itre huliwa së. Tha ka thele kö troa hlemu maine draië pena la itre Keresiano ka hni ka ipië ngöne la fene celë. Ngo angatre pe a ahmaloeëne la mele i angatr, me kuca la ketre huliwa hna wangacone hnei itre xan, göne matre troa nyihlue i Iehova thenge la hnei angatre hna atrein. (1 Timoteo 6:6, 8) Ame la ka nyipi ewekë, tre, ene la tro sa amamane la ipië së hnene la hna drengethenge. Loi e tro sa hni ka ipië matre hmaloi tro sa ‘idei kowe la itre mekene së’ e hnine la ekalesia, me kapa me xötrethenge la hna amekötine hnene la organizasio i Iehova.—Heberu 13:17.

KA HNI KA MENYIKE IESU

11. Nemene la aliene la hna hape, hni ka menyik?

11 Nemene la aliene la hna hape, hni ka menyik? Ame la “nyipi ihnimi ka menyike,” tre kola qaja la ka lolo thiina. Ame la hni ka menyik, tre celë hi ketre hatrene ihnim nge ceitune hi lai memine la kola utipin. Tusi Hmitrötre fe a hane qaja la “ihnimi ka menyike,” me “ihnimi ka tru.” (Luka 1:78; Filipi 1:8) Kola qaja hnene la ketre itus ka hape, ame la troa hni ka menyik, tre, tha ene hmekuje kö la tro hi a ce akötre memine la itre ka akötr. Ngo kolo fe a hape, troa “akötrehnine me kuca la ketre ewekë nyine xatua.” Ketre ewekë ka troa saze aloine la mele ne la itre atr. Ame la hni ka menyik, tre ketre thiina lai ka troa upe la ketre atr troa saze aqane mel.

12. Nemene la ka amamane ka hape, Iesu a utipine la itre atr, nge nemene la hna upi nyidrë troa kuca hnene la hni ka menyik?

12 Kola mama tune kaa thei Iesu la hni ka menyik? Itre aliene hni me itre huliwa i nyidrë. Hnei Iesu hna utipine la itre xa atr. Ame la nyidrëti a öhnyi Maria, la enehmu i nyidrë, me itre xan a treij pine laka meci hë lazaro, nyidrëti a ce treije me angatr. (E jë la Ioane 11:32-35.) Thupene lai, kola mama hmaca la utipine cili ngöne la nyidrëti amelene hmaca la neköne la ketre sine föe. (Luka 7:11-15; Ioane 11:38-44) Hnene la hni ka menyik thei Iesu hna aijijë Lazaro troa hane kapa elanyi la mele e hnengödrai. Qëmekene la ijine cili, hnei Iesu hna ‘utipine la ka ala nyim.’ Celë hi ka upi nyidrëti lai troa “ini angate la nöjei ewekë ka nyimute.” (Mareko 6:34) Celë mina fe thiina lai ka saze la mele ne la itre atr ka xötrethenge la itre ini qaathei Iesu! Haawe, tha ketre aliene hni menu kö la hni ka menyik thei Iesu. Eje pe a upi nyidrë troa xatuane la itre ka aja ixatua.—Mataio 15:32-38; 20:29-34; Mareko 1:40-42.

13. Hnei Iesu hna ithanata amenyikenyi tune kaa kowe la itre atr? (Wange ju la pane iatr.)

13 Itre trenge ewekë i nyidrë ka menyik. Hnene la utipine i Iesu matre nyidreti a ithanata amenyikenyi kowe la itre atr, tune la itre hna akötrën. Hnei Mataio hna amexeje la hna qaja hnei Isaia göi Iesu me hape: “Tha tro kö angeic’a hutra la hainyi ka pej, nge tha tro kö angeic’ a apineju la eunyine kola enuk [kola troa pi].” (Isaia 42:3; Mataio 12:20) Nemene la aliene lai? Tha hnei Iesu kö hna musinëne me qanangazone la itre atr. Ngo hnei nyidrëti pe hna akeukawane la itre hni angatr.  Hnei nyidrëti hna tro fë la ketre maca nyine eköthe la mejiunene la “itete thë fë hni.” (Isaia 61:1) Hnei nyidrëti hna könëne la itre “ka huliwa me hace” matre tro angatr a hane tro koi nyidrë, me “öhne la hna mano.” (Mataio 11:28-30) Ase hë nyidrëti qaja amë kowe la itretre drei nyidrë laka, ka hnime Akötresie la nöjei hlue i Nyidrë, ene mina fe lo itre “ka co,” maine itre hna jele ka pë hnënyengönën hnei fen.—Mataio 18:12-14; Luka 12:6, 7.

XÖTRETHENGE JË LA AQANE MENYIKE I IESU

14. Nemene la aqane troa mama the së la itre aliene hni ka menyik?

14 Tro sa xötrethenge tune kaa la aqane menyike i Iesu? Itre aliene hni së ka lolo. Tusi Hmitrötr a upi së troa huliwa me amamane la “utipin, me thina ka loi,” ngacama tha ketre aliene hni kö ka canga mama the së. Itre aliene hni lai ka eköthe la “ate ka hnyipixe” hnei Iehova hna thele thene la nöjei Keresiano asë. (E jë la Kolose 3:9, 10, 12.) Nemene la aqane troa mama thei epun la itre aliene hni cili? Tusi Hmitrötr a qaja ka hape: “Atrunepi” la itre hni epun. (2 Korinito 6:11-13) Drenge hnyawa ju la ketre atr a fe la hni angeic me qaja la itre hnei angeic hna hnehengazon. (Iakobo 1:19) Pane mekune ju me isa hnyinge ka hape: ‘Maine eni ju ke, tro ni a tune kaa? Nemene la ka nyipi ewekë koi ni?’—1 Peteru 3:8.

15. Nemene la nyine tro sa kuca matre troa xatuane la itre ka treij me akötr?

15 Itre huliwa së. Tro la hni ka menyik a upi së troa xatuane la itre xan, ene lo itre ka treij me akötr. Tro sa xatua angatre tune kaa? Öni Roma 12:15: “Ce teijejë me angete teij.” Hna pane thele keukawa pala hi hnene la itre atr, ngo pine pë hë la itre nyin ne la itre jol. Ka loi koi angatr la sinee ka wangatrunyi angatr nge ka drei angatre hnyawa. Hnene la ketre trejine föe hna ithuecatre kow hnene la itre trejin thupene la hna meci la nekö i eahlo jajiny, hna qaja ka hape: “Eni a madrine la kola traqa hnene la itre sinee me hane ce treije me eni.” Ijije mina fe tro sa hane hni ka menyik hnene la hne së hna kuca la itre ewekë thatraqane la itre xan. Maine jë hetrenyi la ketre sine föe ka aja ixatua matre troa nyihnyawane la uma i eahlo. Maine pena ketre Keresiano ka qatre hë ka aja ixatua göi troa sine la itre icasikeu, maine  göi cainöje trootro, maine troa tro koi droketre. Ngacama ka co hi la hne së hna troa kuca, ngo ka tru catre hë lai kowe lai atr. (1 Ioane 3:17, 18) Ame la ewekë ka tru, tre, ene la tro sa hni ka menyik kowe la itre atr hnene la hne së hna catre cainöjëne la maca ka loi. Celë hi ewekë la ka sisitria, nge ka troa hetre thangane catr kowe la mele ne la itre atr ka hni ka ajan!

Easë kö a hane ce akötre memine la itre trejine me easë? (Wange ju la paragarafe 15)

16. Nemene la nyine tro sa qaja matre troa xatuane la itre atr ka hni ka ewë?

16 Itre trenge ewekë së. Tro la hni ka menyik a upi së troa ‘xatuane la itre ka kucakuca.’ (1 Thesalonika 5:14) Nemene la nyine tro sa qaja matre troa xatua angatr? Tro sa qaja la etrune la ihnimi së koi angatr. Tro sa qaja aloinyi angatr me xatua angatr troa atrehmekune la itre thiina ka lolo me itre hnei angatre hna atreine troa kuca. Tro sa amekunë angatre la aqane xatua angatre hnei Iehova troa kappa la nyipici, ene pe sisitria fe hë angatr xajawa i Nyidrë. (Ioane 6:44) Tro fe sa ithuecatre koi angatr ka hape, tha thëthëhmine kö Iehova la itre hlue i Nyidrë “angete thë fë hni” maine “ or “angete hni ka ewë.” (Salamo 34:18) Tro la itre trenge ewekë së ka menyik a akeukawane la hni ne la itre ka aja ixatua.—Ite Edomë 16:24.

17, 18. (a) Nemene la hnei Iehova hna thele thene la itre qatre thup göne la aqane ujë i angatre kowe la itre mamoe? (b) Nemene la hne së hna troa ce ithanatane ngöne la tane mekune ka troa xulu?

17 Itre qatre thupe fe, Iehova a ajane tro nyipunie a hni ka menyik kowe la itre mamoe i Nyidrë. (Ite Huliwa 20:28, 29) Mekune hnyawa kö laka, ame la hnëqa i nyipunie, tre ene la troa inin, me ithuecatr me akeukawane la hni ne la itre mamoe. (Isaia 32:1, 2; 1 Peteru 5:2-4) Haawe, tha tro pi kö la ketre qatre thup a imusinë, hnene la troa eköth la itre wathebo maine ukune menune la itre trejin troa kuca la hnei angatre hna thatrein. Tro pe angeic a thele matre tro la itre trejine me angeic, trahmanyi me föe a madrine atraqatr. Tro mina fe angeic a mejiune laka, hnene la etrune la ihnimi angatr koi Iehova, haawe tro hë angatr a ketre isa hamën la hnei angatr hna atreine koi Akötresie.—Mataio 22:37.

18 Pine laka, ase hë së pane mekune hnyawa la aqane ipië i Iesu memine la aqane menyike i nyidrë, haawe, kolo ha upi së troa hane xötrethenge nyidrë. Tro pë hë la tane mekune ka troa xulu a amamane la ketre tulu i Iesu nyine tro sa xötrethenge, ene la aqane catre i nyidrë me aqane waiewekë i nyidrë.