Tro jë kowe la alien

Tro jë kowe la itre mekune ka co

Tro jë kowe la itre alien

Itretre Anyipici Iehova

Drehu

Ita Ne Thup (Nyine Inin)  |  Ogas 2014

Itre Hnyinge Ne La Itre Ka e

Itre Hnyinge Ne La Itre Ka e

Öni Iesu kowe la angetre Sadukaio ka hape, “tha tro kö [la itre hna amelene hmaca]’ a hete föe me ihamë föe.” (Luka 20:34-36) Hapeu, nyidrëti kö lai a qaja la melehmaca e celë fen?

Ketre hnyinge la ka nyipi ewekë catre kowe lo itre ka meci föen. Eje hi laka, angatre a ajane catrëne troa ce mele trefëne hmaca ngöne la fene ka hnyipixe. Önine la ketre ka mele sine trahmany: “Tha ase pi kö ni me föeng mekune troa umuthe la ce mele trefëne i nyiho. Ame koi nyiho, tro pala hi nyiho a ce nyihlue i Iehova uti hë epine palua. Tha saze pi kö la itre mekuna ne la hning.” Hetre sipu kepine kö matre troa mejiune ka hape, tro hmaca kö elanyi a faipoipo la itre hna amelene hmaca? Eje hi laka, thatreine kö së troa sa la mekune celë.

Ame ngöne la itre macatre ka ase hë, hnene la itre itusi së hna qaja ka hape, ame lo itre trenge ithanata i Iesu göi melehmaca me faipoipo, tre kola qaja la melehmaca e celë fen. Nge ame koi itre hna amelene hmaca, tre, tha tro hmaca kö angatre elanyi a faipoipo ngöne la fene ka hnyipixe. * (Mat. 22:29, 30; Mar. 12:24, 25; Luka 20:34-36) Hapeu, ijije kö troa mekune ka hape ame la itre trenge ithanata i Iesu, tre kola qaja la melehmaca e hnegnödrai? Tro sa ce wange la hna qaja hnei Iesu.

Tro sa pane ce wange la itre hnei Iesu hna ithanata kow. (E jë la Luka 20:27-33.) Hnene la itre Sadukaio ka tha mejiune kö kowe la melehmaca hna thele troa tra thethi Iesu jëne la ketre hnyinge göi melehmaca me hna amekötine göi faipoipo me sine föe ne la trejine ka meci hë. * Öni Iesu e sa ka hape: “Ite ate e celë fene a faipoipo, me ihamë föeë ; ngo angat’ ite ka ijije troa hetenyi la nöje cili me troa mele qa hna mec, tha tro kö angat’ a hete föe me ihamë föeë ; kete tha ’teine kö angate troa meci hmaca, qa ngöne laka cei tui angate me ite angela ; nge ite nekö i Akotesie angat, nge ite ate ka troa mele hmaca.”—Luka 20:34-36.

Pine nemene matre qaja hnene la itre itusi së ka hape, Iesu la a qaja la melehmaca e celë fen? Ame laka qaja jë tun, tre, hnene laka hetrenyi la lue aqane mekun. Ame la hnapan, tre kola mekune ka hape, ame koi ange Sadukaio, tre, angatre a mekune la melehmaca e celë fen, nge Iesu a sa thenge la mekuna i angatr. Ame la hnaaluen, tre, Iesu a nyipune hnene la hna qeje Aberahama me Isaaka me Iakobo, kolo itre hlue i Akötresie ekö ka mele nyipici, nge itre ka troa mele hmaca elanyi e celë fen.—Luka 20:37, 38.

Ngo, ma Iesu jë la a mekune la melehmaca e hnengödrai. Pine nemene matre mekune jë së tune lai? Tro sa ce wange la lue trenge ithanata ka tru.

“Angat’ ite ka ijije troa . . . mele qa hna mec.” Ame la itre ka mele nyipici, tre “ka ijije [angatr] kowe la Baselaia i Akötesie.” (2 Thes. 1:5, 11) Hna jele meköti angatre matre troa mel jëne la thupene mel qaathei Keriso, haawe, tha angatre kö a mec ceitu me itre hna ëjin. (Rom. 5:1, 18; 8:1) Hna qeje angatre ka hape, “Manathithi hë me hmitröte,” nge hna aijijë angatre troa mele hmaca e hnengödrai. (Hna ama. 20:5, 6) Tha ceitu fe kö memine la itre ka troa mele hmaca e celë fen, ke; ame itre xan e angatr, tre hna qaja ka hape, itre “ka tha meköti kö.” (Ite hu. 24:15) Hapeu, ijije kö tro sa qaja ka hape, itre ka ijije angatre kowe la melehmaca?

“Kete tha ’teine kö angate troa meci hmaca.” Tha hnei Iesu kö hna qaja ka hape: “Tha tro hmaca kö angatre elanyi a mec.” Öni nyidrëti  pe: “Kete tha ’teine kö angate troa meci hmaca.” Hnene la itre xa Tusi Hmitrötr hna qaja ka hape, “tha en hmaca kö la meci koi angatr,” me “tha ie hmaca kö la mec hui angatr.” Ame la itre hna iën ka mele nyipici uti hë la mec, tre hna amele angatre hmaca e hnengödrai, me kapa la mele ka tha tro hmaca kö hane mec, nge tha tro hmaca kö angatre a öhne la hnyiqetr. (1 Kor. 15:53, 54) Pë hë menene la mec thene la itre atr hna troa amelene hmaca kowe la mel e hnengödrai. *

Qa ngöne la hne së hna ce wange hë, nemene la mekune hne së hna traqa kow? Maine jë, ame la hnei Iesu hna qaja göi faipoipo me melehmaca, tre kola qaja melehmaca e hnengödrai. Maine celë lai hna mekune hnei Iesu, haawe, ka hetre aliene catre kowe la itre ka troa mele e hnengödrai: Tha tro kö angatr a hane xomi föe, nge tha tro hmaca kö angatre a hane mec, nge ceitu i angatre me itre angela, itre u ka mele hna thatreine öhne hnei atr. Ngo hetre itre xa mekune nyine troa wange qa ngöne la mekune celë.

Ame la hnapan, pine nemene matre Iesu a qaja la melehmaca e hnengödrai la kola sa la hnyingene la ange Sadukaio, itre ka mekune kowe la melehmaca e celë fen? Ame itre xa ijin, tha hnei Iesu kö hna sa thenge la aqane mekunene la itre ithupëjia me nyidrë. Drei la ketre ceitun, ame la angetre Iudra a hnyingëne la ketre hatrene qaathei nyidrë, öni nyidrë: “Kenithepi la uma celë, nge tro ni a acile hmaca eje ngöne la köni drai.” Atre hnyawa hi Iesu ka hape, angatre a mekune la ēnē hna xup, “ngo ame la ēnē hnei nyidëti hna ulatin, te, ngönale [ngönetrei] i nyidë.” (Ioane 2:18-21) Maine jë, ame koi Iesu, tha nyipi ewekë kö troa sa kowe la ange Sadukaio ka hnyinge thoi, nge itre ka tha mejiune kö kowe la melehmaca me ka mekune ka hape, pë fe kö angela. (Ite edomë 23:9; Mat. 7:6; hu. 23:8) Ngo ame la aja i nyidrë, tre, ene la troa fe amamane la itre nyipici göne la melehmaca e hnengödrai nyine troa kapa hnene la itretre drei nyidrë ka mele nyipici.

Ame la hnaaluen, pine nemene matre nyipune jë Iesu hnene la hna qeje Aberahama, me Isaaka, me Iakobo, itre hna troa amelene hmaca e celë fen? (E jë la Mataio 22:31, 32.) Pane mekune ju la itre pane ithanata i Iesu lo kola qeje angatr, lo nyidrët a qaja ka hape, “ame ngöne la troa mele hmaca qa hna mec.” Nyidrëti a qaja la hna ithanata cili, ke nyidrëti hmaca pena ha a troa ithanatane la ketre mekun. Haawe, hnei nyidrëti hna amexeje hmaca la itre hna cinyihane hnei Mose, ke hna kapa itre eje hnene la ange Sadukaio. Kolo itre ithanata i Iehova lai koi Mose lo angeic a öhne la sinöe a mel. Iesu hi lai a qaja tun göi troa anyipicine ka hape, ame la mele hmaca e celë fen, tre ketre mekune ka troa eatre qaathei Akötresie.—Eso. 3:1-6.

Ame la hnaakönin, maine ame la itre ithanata i Iesu göi melehmaca me faipoipo, tre kola qaja la melehmaca e hnengödrai, kolo kö lai a hape, ijije hmaca kö kowe la itre hna troa amelene hmaca e celë fen troa faipoipo? Pëkö hna sa mekötine hnene la Wesi Ula i Akötresie kowe la hnyinge celë. Maine Iesu la a ithanatane la melehmaca e hnengödrai, haawe, ame la itre ithanata i nyidrë, tre tha kolo kö a amamane ka hape, ijije tro la itre hna amelene hmaca a faipoipo ngöne la fene ka hnyipixe.

Qëmekene tro sa traqa elanyi e cili, önine la Wesi Ula i Akötresie, ame la mec, tre kola apëne lo hna iothekeune hnene la faipoipo. Haawe, ame la ka lapa sine trahmany maine sine föe, pëkö engazone e tro nyidro a faipoipo hmaca. Isa qanyi së mekun, tha tro kö sa qeje engazone la itre trejine ka thele troa faipoipo hmaca.—Rom. 7:2, 3; 1 Kor. 7:39.

Pëkö engazone e tro sa pi atre la pengöne la mele elanyi ngöne la fene ka hnyipixe. Tha nyipi ewekë kö tro sa mekune menune la itre ewekë ka troa traqa elany, ngo lo e tro pe hi sa atreine itreqe. Ngo ame la ka xecie koi së, tre, ene la tro la itre atr ka idrengethenge a mele madrine elany, ke, tro Iehova a aejëne la itre aja i angatr me itre hnei angatre hna mekune ka ijije kowe la mele i angatr.—Sal. 145:16.

^ par. 4 Wange ju la 1 Juun 1987, götrane 30-31 qene Wiwi.

^ par. 5 Ame la ketre hna majemine ngöne la drai ekö, e meci hë la trahmany nge pëkö nekö i angeic memine la föi angeic, tro la ketre trejine me angeic a faipoipo hmaca memine la sine föi angeic, göi troa nyi matra i angeic.—Gen. 38:8; Deut. 25:5, 6.

^ par. 9 Ame la itre hna troa amelene hmaca e celë fen, tre tro angatre elanyi a kapa la mele ka tha ase palua kö, ngo ngo hetre menene pala hi la mec. Maine epuni aja ithuemacanyi göi mele ka tha ase palua kö me mele ka tha tro hmaca kö hane mec, tre wange ju la Ita Ne Thup ne 1 Eiperem 1984, götrane 30-31, qene Wiwi.