KA MELE la keme i John ngöne la neköi traon ne Gujarat (Inde), nge hna bapataiso nyidrë ngöne la itre macatre 1950. Ngo, ame John, tre, faif lao trejin me angeic, nge ca xa i angeic. Itre ka catr angatr me thine i angatr ngöne la hmi katolik. Celë hi kepin matre, ka icilekeu angatr memine la hmi ne la keme i angatr.

Ame la ketre drai, hnene la keme i John hna upi angeic troa tro fë la ketre tus kowe la ketre trejin ne la ekalesia. Ngo, ame lai hmakanyi cili, hnei angeic hna fe la ituk, nge xöje pi hi la hene wanakoime i angeic, nge ka tru pi hë la hna thupa. Ame hnei angeic hna atuthe la eatre i angeic hnene la sine mano, me tro fë lo tus. Angeic a isine troa kuca la huliwa hna upi angeic hnei kem.

Ame hë la John a traqa kowe la hnalapa ne la trejin, angeic a hamëne pi la tus kowe la föi nyidrë. Ketre Atre Anyipici Iehova fe eahlo. Öhne ju hi eahlo laka, ka eatr la hene wanakoime i John. Eahlo a canga thele jë troa paseman. Eahlo a traqa fë pi la itre drösinöe, me nyinyine la eatre i angeic, me atuthe hë la hene wanakoime i angeic. Thupene lai, nyidroti ha ce iji tri me porotrik. Nge, ame ngöne la ijine cili, eahlo a qeje Tusi Hmitrötr koi angeic.

Hnene la hna loihni koi John, haawe, nyiqaane saze pi hi la aqane mekuna i John kowe la Itretre Anyipici Iehova. Lue hnying hnei angeic hna hnyingën koi eahlo göne la hna lapaune kow hnene la Itretre Anyipici Iehova ke, ka isazikeu memine la hna inin hnene la hmi katolik. Hnei angeic hna hnying ka hape, ‘Iesu kö la Akötresie? Tro kö la keresiano a thithi koi Maria?’ Pine laka, hnene la trejin föe hna inin la qene Gujarati, haawe, eahlo a sa koi John ngöne la sipu qene hlapa i angeic. Hnei eahlo hna amamane la itre mekune ka sa la itre hnyinge i angeic jëne la Tusi Hmitrötr, me hamë angeic lo sine boroshür qene Papale hna hape, “Maca Ka Loi Ne La Baselaia.”

Ame hë e thupen, hnei John hna e la sine boroshür, nge xecie hnyawa ha koi angeic e cili laka, nyipici hi la hnei angeic hna e. Angeic a tro jë kowe la peenë, me qaja lo lue hnyinge i angeic. Elë catre jë hi la hni ne la peenë, me hna la Tusi Hmitrötr koi angeic, me sue ka hape: “Satana ha eö! Pane amamane jë eö koi ni e hnine la Tusi Hmitrötr la hna qaja ka hape, tha Akötresieti kö Iesu, me hna qaja ka hape, tha tro kö eö a thil koi Maria. Öi! Amamane jë koi ni!” Kola sesëkötr ngazo hnei John la aqane ujë ne la peenë. Öni John jë hi koi nyidrë, “Tha tro hmaca kö la iwacang a waja la uma ne hmi katolik.” Nge, celë hi la hnei angeic hna kuca!

John a nyiqaane ini Tusi Hmitrötre jë memine la Itretre Anyipici Iehova, me xomi bapataiso e thupen. Hnene fe hë la itre xa atrene la hnepe lapa i angeic hna xötrethenge angeic. Sikisitre lao macatre thupen, e goeën mina John lo hadrë ne la wanakoime i angeic, tre, mekune mina jë hi angeic lo hatrene la hna loihni koi angeic ekö. Kolo hi lo ewekë lai ka upi angeic troa nyihlue i Iehova ngöne la mele i angeic ka pexej.—2 Korinito 6:4, 6.