Tro jë kowe la alien

Tro jë kowe la itre mekune ka co

Tro jë kowe la itre alien

Itretre Anyipici Iehova

Drehu

Ita Ne Thup (Nyine Inin)  |  Ogas 2017

Itre Hnyinge Ne La Itre Ka e

Itre Hnyinge Ne La Itre Ka e

Pine nemene matre isapengöne kö la aqane qejepengöne Mataio me Luka la mele i Iesu lo kola nekönatr?

Isa pengöne kö la aqane qejepengöne Mataio me Luka lo ijine kola hnaho Iesu memine la nyidrëti a thöth. Ame la kepine lai, tre, hetre lue atr hnei nyidroti hna isa qaja atrune nge ka ketr la mele i Iesu.

Mataio a qaja atrune la itre ewekë ka traqa nge ka ketri Iosefa. Angeic a amamane la aqane ujë i Iosefa la kola atre ka hape, upune hë Maria, memine la pu i angeic, lo angela a qaja amamane koi angeic la ewekë ka troa traqa. Kolo fe a qaja la angeice a tongëne hnyawa la hna amekötine koi angeic. (Mataio 1:​19-​25) Mataio fe a amamane la kola thuemacanyi Iosefa ngöne la pu matre troa kötr Aigupito eë memine la hnepe lapa i angeic, me amamane la angeic a drengethenge. Angeice fe a qaja ka hape, hetre ketre pu i Iosefa, laka, hnene la ketre angela hna upi angeic troa bëek Isaraela eë, ame hnei angeic hna bëek, me lapa ha e Nazaretha me hnepe lapa i angeic. (Mataio 2:​13, 14, 19-​23) Ame ngöne la lue pane mekene tusi Mataio, a eitre lao amexeje la ëje i Iosefa, ngo a foa hi koi Maria.

Ngo ame kö la tusi Luka, kola qaja atrune la pengöi Maria. Kola qaja la kola wai Maria hnei Gaberiela, memine la angeic a wai Elisabethe, memine fe la itre ithanata i angeic nyine atrunyi Iehova. (Luka 1:​26-​56) Kolo fe a amamane la hna qaja hnei Simeona koi Maria göne la itre akötre i Iesu elany. Thupene lai, Luka a qejepengöne la ijine kola ce tro hnene la hnepe lapa i Iesu kowe la ēnē, nge 12 lao macatre i nyidrë. Luka fe a amexeje la itre ithanata i Maria, ngo tha itre ithanata i Iosefa kö. Angeice fe a qaja ka hape, hna ketri Maria catr hnene la itre ewekë cili. (Luka 2:​19, 34, 35, 48, 51) Ame ngöne la lue pane meken ne la tusi Luka, atruelof lao amexeje angeic la ëje i Maria, nge aköni hi koi Iosefa. Matre, nyimutre kö la itre ithuemacanyi hnei Mataio hna qaja göne la itre mekun me itre huliwa i Iosefa. Ngo, ame Luka, angeic a qaja atrune la itre mekun me itre hna melëne hnei Maria.

Ketre, isapengöne kö la aqane amë trongën ngöne la lue tus, la itre xötre lapa hna xulu qa ngön hnene la hnepe lapa i Iesu. Mataio a amë trongën la itre xötre lapa i Iosefa, me qaja ka hape, hna hetru Iesu hnei Iosefa, nge Iesu la ka ijij troa cilën la hnanyijoxu i Davita. Pine nemen? Pine laka, Iosefa la ketre matra i Davita Joxu jëne Solomona, nekö i Davita. (Mataio 1:​6, 16) Ngo ame Luka, angeic a amë trongëne la itre xötre lapa hna xulu qa ngön hnei Maria, me qaja ka hape, Iesu la ka ijij “thenge la ngönetei” troa cilën la hnanyijoxu i Davita. (Roma 1:3) Pine nemen? Pine laka, Maria la ketre matra i Davita Joxu jëne Nathana, nekö i Davita. (Luka 3:​31) Ngo, pine nemen matre tha qeje Maria kö hnei Luka ka hape, nekö i Heli jajiny? Pine laka, ame la itre hna siji ëj ngöne la mus, tre tro hmekuje hi a sija la ëje ne lo itre trahmanyi ne la hnepe lapa. Matre, ame la Luka a amë la ëje i Iosefa, me qeje angeic ka hape nekö i Heli, tre, trotrohnine hi la itre atr ka hape, tresi Heli.​—Luka 3:⁠23.

Kola anyipicine hnene la itre xötre lapa hna xulu qa ngön hnei Iesu, nge hna amë trongën hnei Mataio me Luka ka hape, Iesu hi la Mesia, lo hnei Iehova hna thingehnaean. Mama hnyawa hi kowe la itre atr ekö ka hape, Iesu la ketre matra i Davita Joxu, matre tha hna jelethoine kö lai hnene la itre Faresaio me itre Sadukaio. Kola acatrene la lapaune së hnene la aqane qejepengöne Mataio me Luka la itre xötre lapa hna xulu qa ngön hnei Iesu. Ketre, kola acatrene la mejiune së laka, tro la itre xa hna thingehnaean hnei Iehova a eatr elany.