Tro jë kowe la alien

Tro jë kowe la itre mekune ka co

Tro jë kowe la itre alien

Itretre Anyipici Iehova

Drehu

Ita Ne Thup (Nyine Inin)  |  Maac 2016

Iehova a Ea La Nöj Kowe La Gojenyi Ne Mel

Iehova a Ea La Nöj Kowe La Gojenyi Ne Mel

“Dei la gojeny, tro nyipunie a trongën’ ej.”ISAIA 30:21.

NYIMA: 6548

1, 2. (a) Nemene la ithuemacanyi hna hamën nge ka amelene la ka ala nyim? (Wange ju la pane iatr.) (b) Nemene la aqane tro xome trongëne Iehova la nöje i Nyidrë kowe la mel?

“CILE JU, GOEËNE JË, DRENGE JU.” Hna cinyianyi la itre hnaewekë celë ngöne la ketre pano ezine la ketre gojenyi train ngöne la ketre götrane ailopi ne Etazini, nge 100 hë lao macatre enehila ne cile lai pano. Hna acile ej matre nyine hmekëne la itre loto qëmekene tro itre ej a thupa la gojenyi train. Ala nyimu la itre atr hna amelen hnene la hna nyipi ewekëne lai pano celë.

2 Hetre ketre ewekë ka sisitria hnei Iehova hna hamë së thatraqane la mele së. Nyidrëti a tro xome trongëne la itre hlue i Nyidrë matre tro angatr a kapa la mele ka tha ase palua kö, me ananyi angatr qa ngöne la itre gaa ngazo. Ceitu i Iehova hi me atre thupë mamoe ka tru ihnimin, kola engëne trongëne la itre mamoe i Nyidrë, me hmekë nyudren matre tha tro kö nyudreni a xötrëne la gojenyi ka menu.—E jë la Isaia 30:20, 21, MN [1] (Wange ju la ithuemacanyi e kuhu pun.)

HNEI IEHOVA PALA HI HNA EATRONGËNE LA ITRE ATRE I NYIDRË

3. Hnei nemene matre xötrën asë jë la itre atr la gojenyi hna mecin?

3 Hnei Iehova pala hi hna hamëne la itre hna amekötine kowe la atr  qaane lo kola xupi angeic. Ame ekö e Edena, hetre ithuemacanyi hnei Iehova hna hamëne matre aijijëne la itre atr troa mele madrin, me mele palua e celë fen. (Genese 2:15-17) Ngo hnei Adamu me Eva hna ujë trije la itre hna amekötine hnene la Keme i nyidro. Hnei Eva hna drengethenge la hna qaja hnei un, nge thupene lai Adamu a drengethenge la föi angeic. Nemene hë la thangane lai? Akötre me meci la pune koi nyidro, nge pë hmaca kö mele ka ijij. Hnene la tha idrei i nyidro, ene pe, xötrën asë jë hë la itre atr la gojenyi hna mecin.

4. (a) Pine nemene matre nyipi ewekë troa hamë itre xa ithuemacanyi thupene la Iwë Atraqatr? (b) Nemene la mekuna i Akötresie ka mama e cili?

4 Hetre itre ithuemacanyi hnei Akötresie hna hamë Noa matre tro angeic a mel memine la hnepe lapa i angeic. Thupene lo Iwë Atraqatr, hnei Iehova hna amekötine kowe la itre atr ka hape, tha tro kö angatr a öni madra. Pine nemen? Pine laka, ame hë lo ijine cili, Iehova ha nue la itre atr troa öni mitr. Celë hi matre, hetre ithuemacanyi ka hnyipixe nyine tro angatr a xötrethenge. Kola qaja ka hape: “Ame la ijöne memine la mele ne ej, ene la madra ne ej’, te, the tro kö nyipunie a öni.” (Genese 9:1-4) Easa atre e cili la mekuna i Akötresie göne la mel, ke, ewekë i Nyidrëti lai. Iehova hi la Atre Xup nge qaathei Nyidrëti la mel, matre meköt koi Nyidrë troa hamëne la itre wathebo göi mel. Hnei Iehova lo hna amekötine kowe la itre atr ka hape, tha tro kö a ihumuth. Haawe, ame la mel me madra koi Akötresie, tre, ka hmitrötre nge tro kö Nyidrëti a nyithupene kowe la atr ka huliwane menun.—Genese 9:5, 6.

5. Nemene la hne së hna troa ce wang enehila, nge pine nemen?

5 Thupene lo hneijine i Noa, tha mano kö Akötresie troa eatrongëne la itre hlue i Nyidrë. Ame ngöne la tane mekune celë tro sa ce wange la itre xa aqane eatrongë angatre hnei Nyidrë. Tro la itre mekune celë a acatrene catrëne la aja së troa xötrethenge la itre hna amekötine hnei Iehova, ka troa tro xomi së kowe la fen ka hnyipixe.

NÖJE ME ITRE HNA AMEKÖTINE KA HNYIPIXE

6. Pine nemene matre nyipi ewekë tro la nöje i Akötresie a drengethenge la itre hna amekötine hna hamëne jëne Mose? Nemene la aqane tro angatr a ujë?

6 Ame lo hneijine i Mose, hnei Iehova hna hamëne kowe la nöje i Nyidrë la itre hna amekötine göi thiina, me aqane troa hmi koi Nyidrë. Pine nemen? Pine laka, ketre aqane mele hmaca pena ha ka hnyipixe. Kola sasaithe la 200 lao macatre ne thahluëne la angetre Isaraela e Aigupito, nge ame e cili, angatr a mel e nyipine la hmi koi itre ka mec me koi itre idrola, nge nyimutre ju kö la itre xa ewekë ka hajihajine la ehmitrötre i Akötresie. Matre, ame la angatre a lö qa ngöne la nöje Aigupito, nyipi ewekë tro hmaca angatre a kapa la itre hna amekötine ka hnyipixe. Haawe, angatre hë e cili lo nöje ka xötrethenge la Wathebo i Iehova. Hnene la itre xa itusi ka hlemu hna qaja ka hape, ame la hnaewekë “wathebo” qene Heberu, tre, kola hape, “xomiujin, eatrongën, inin.” Hnene la Wathebo hna thupëne la angetre Isaraela qa ngöne la kuci ngazo me hmi ka thoi, ka ej thene la itre nöje ka lapa xötreithi angatr. E tro la angetre Isaraela a drengethenge Akötresie, tro angatre lai a kapa la itre manathith. Nge e tha trongëne kö, akötre la mele i angatr.—E jë la Deuteronomi 28:1, 2, 15.

7. (a) Qaja jë la kepine matre hamëne jë Iehova la itre hna amekötine kowe la nöje i Nyidrë. (b) Hnene la Wathebo hna thupëne tune kaa la angetre Isaraela?

7 Hetre ketre kepine fe matre hamëne jë Iehova la itre hna amekötine ka hnyipixe. Jëne la Wathebo, hna hnëkëne la angetre Isaraela troa kapa la Mesia, ene Iesu Keriso. Ej a amekunë angatre pala hi ka hape, itre atr ka ngazo angatr. Eje fe a xatua angatre troa trotrohnine la enyipiewekëne koi angatre troa hetre thupene mel, ene la ketre huuj ka pexej ka troa apatrene palua la itre ngazo i angatr. (Galatia 3:19; Heberu 10:1-10) Ketre, tro la Wathebo a thupëne la  xötre lapa hna troa fetra la Mesia qa ngön, me aijijëne la angetre Isaraela troa atrehmekunyi nyidrë. Matre, hna aceitunëne la Wathebo memine la ketre atr ka amamai gojeny, me ka ‘ithupë’ ngöne hi la hnepe ijin, matre troa eatrongë angatre koi Keriso.—Galatia 3:23, 24.

8. Pine nemene matre loi e tro pala hi sa trongëne la itre trepene meköt ka nyi trepene la Wathebo i Mose?

8 Nemene la aqane tro fe së, itre keresiano, a öhnyi eloine qa ngöne la itre hna amekötine hnei Iehova hna hamëne koi angetre Isaraela? Loi e tro sa pane cile me goeëne la itre trepene meköti ka nyi trepene la Wathebo i Mose. Maine nyipici laka, tha easë hmaca kö a mele fene la Wathebo cili, ngo easë pala hi a mejiune kowe la itre trepene meköti ka mama qa ngön ej, ka köja gojenyi së ngöne la nöjei götrane la mele së, me aqane tro sa hmi koi Iehova. Hnei Nyidrëti hna thele jëne matre tro itre ej a mama e hnine la Tusi Hmitrötr, nge matre tro sa atrepengöne hnyawa itre ej. Ketre, tro la itre trepene meköti ka ej e cili a köja gojenyi së, nge tro fe sa madrine laka, hetre ketre ewekë hna ini së hnei Iesu ka sisitria kö hune la Wathebo. Drenge ju la hnei Iesu hna qaja, kola hape: “Ase hë nyipunieti denge lo hna qaja, ka hape, the tro kö eö a kuci ngazo ; ngo ini pe a qaja koi nyipunie, ame la ate goeëne la fö’ i ket’ ate me meciu nyido, ase hë angeice kuci ngazo me nyido e kuhu hni.” Tha tro hmekuje kö së a kötrene la kuci ngazo, ngo nyipi ewekë fe tro sa thipetrije la itre mekune me aja ka sis.—Mataio 5:27, 28.

9. Nemene la ewekë ka traqa matre hamëne jë Iehova la itre xa ithuemacanyi ka hnyipixe?

9 Ame hë e thupen, xulu pi hi Iesu ene lo Mesia, matre hnei Iehova hna hamëne la itre hna amekötine ka hnyipixe, me amamane la itre xa ithuemacanyi göne la aja i Nyidrë. Hnei Iehova hna ujë tune lai ke, ame lo macatre 33, hnei Nyidrëti hna nuetrije la nöje Isaraela me iëne la ekalesia i keresiano, matre tro pena ha a nöje i Nyidrë. Haawe, ewekë ka hnyipixe pena ha la hna melëne hnene la nöje i Akötresie.

ITRE HNA AMEKÖTINE THATRAQANE LA ISARAELA I AKÖTRESIE

10. Pine nemene matre kapa jë la itre xa ithuemacanyi hnene la ekalesia i keresiano? Nemene la eisapengöne itre ej memine la Wathebo i Mose?

10 Hnene la angetre Isaraela hna kapa la Wathebo i Mose qaathei Iehova, matre troa amamane koi angatre la aqane troa mel, me aqane troa hmi koi Nyidrë. Ame ngöne la hneijine ne la itre pane keresiano, kola mama laka, tha xulu hmaca kö angatre qa ngöne la ca lapa. Ngo angatre a traqa qa ngöne la itre nöje ka nyimutre, nge isa pengöne kö la aqane mele i angatr, nge hna hë angatre ka hape, Isaraela i Akötresie. Angatre hi la ka nyi atrene la ekalesia i keresiano, nge angatre hë a mel fene la isisinyikeu ka hnyipixe. Matre, hetre itre ithuemacanyi ka hnyipixe hnei angatre hna kapa qaathei Iehova göi aqane troa mel, me hmi koi Nyidrë. Nyipici laka, “tha hnei Akötesieti hna iwangate hmekunyine ite ate, ngo hna kapa hnei anganyidëti la ate qoue nyidë me kuca la thina ka meköt, ngöne la nöjei nöj’ asë.” (Ite Huliwa 10:34, 35) Angatre hë a xötrethenge “la wathebo i Keriso” laka, tha ceitune kö memine la Wathebo i Mose, ke ame la itre trepene meköti ne la wathebo i Keriso tre, hna cinyihane ngöne la itre hni angatr, ngo tha hune ietë kö. Haawe, tro la wathebo celë a köja gojenyine la itre keresiano, matre tro angatre fe a öhnyi loi ngöne la nöjei götrane hnei angatre hna mele ngön.—Galatia 6:2.

11. Nemene la lue götrane la mele ne la keresiano hna troa ketr hnene “la wathebo i Keriso”?

11 Hetre itre hna amekötin hna hamëne hnei Iehova jëne Iesu kowe la Isaraela i Akötresie. Lue ewekë ka tru hnei Iesu hna ahnithe kowe la itretre dreng, ame la ketre, ene la troa cainöje trootro. Nge ame la ketre, kola amamane hnyawane la aqane tro la itre keresiano a ujë, memine fe la aqane troa ce mel. Thatraqan asë hi la itre keresiano la lue hna amekötine celë, matre thatraqai së fe enehila ngacama isa mejiune së  kö, ene la troa mele palua e koho hnengödrai maine e celë fen.

12. Nemene la ewekë ka hnyipixe göne la huliwa ne cainöj?

12 Ame ekö, kola traqa e Isaraela hnene la itre atr qa ngöne la itre xa nöje göi troa nyihlue i Iehova. (1 Ite Joxu 8:41-43) Ngo, ame hë e thupen, hnei Iesu hna ahnith la ketre ewekë nyine troa kuca, ka mama ngöne Mataio 28:19, 20MN (E jë.) [2] (Wange ju la ithuemacanyi e kuhu pun.) Hnei Iesu hna upe la itretre drei nyidrë troa ‘tro’ kowe la itre atrene la nöjei nöj asë. Ame lo Penetekos macatre 33, hnei Iehova hna amamane la aja i Nyidrë troa cainöjëne la maca ka loi e cailo fen. Ame ngöne la ijine cili, hna kapa hnene la ala 120 lao itretre dreng la uati hmitrötr, ame hnei angatre hna ithanata ngöne la itre xa qene lapa kowe la angetre Iudra, me itre ka lö kowe la hmi Iudra. (Ite Huliwa 2:4-11) Thupene jë hi lai, kola kökötre trootro la teritoare i angatre uti fe hë la ketr angatre la angetre Samaria. Nge, ame hë lo macatre 36, kolo fe hë a ketr la angetre ethen. Kolo lai a amamane laka, hnene la itre keresiano hna cainöje kowe la nöjei atr ne la ijine cili!

13, 14. (a) Nemene la aliene la ‘wathebo ka hnyipixe’ hna hamëne hnei Iesu? (b) Nemene la hne së hna inine qa ngöne la tulu i Iesu?

13 Hetre ketre ‘wathebo ka hnyipixe’ hna hamëne hnei Iesu göi aqane tro sa ujë kowe la itre trejin me easë. (E jë la Ioane 13:34, 35.) Loi e tro sa amamane la ihnimi së koi angatre e nöjei drai, nge uti fe hë la tro sa nue la mele së koi angatr. Ketre wathebo lai ka tha mama kö ngöne lo Wathebo i Mose.—Mataio 22:39; 1 Ioane 3:16.

14 Iesu la tulu ka sisitria ne la atr ka ihnim, nge ka pëkö thoi ngön. Atraqatre la ihnimi nyidrë kowe la itretre drei nyidrë, ame hnei nyidrëti hna mec thatraqai angatr. Matre, nyidrëti a ajane tro la itretre drei nyidrë asë a ujë tune lai. Haawe, loi e tro sa cile catre ngöne la itre itupath, nge uti fe hë la tro sa meci thatraqane la itre trejin me easë.—1 Thesalonika 2:8.

ITRE ITHUEMACANYI HNA KAPA ENEHILA ME ELANYI FE

15, 16. Nemene la aqane eatrongëne Iehova la itre hlue i Nyidrë enehila, nge nemene la itre ewekë ka ketri angatr?

15 “Hlue ka nyipici me ka inamacan” la hna acile hnei Iesu matre troa thawa kowe la itretre drei nyidrë la “xeni . . . ngöne la nyipi ijin.” (Mataio 24:45-47) Kolo fe a qaja la itre ithuemacanyi ka tru thatraqane la nöje i Iehova, thenge la itre ewekë ka traqa. Nemene la itre ewekë cili?

16 Easë a melëne la “ite drai hnapin,” ene la itre drai tixenuë, matre easenyi catre hë tro sa qëmeke kowe la akötre atraqatre laka, pëkö hna tun ekö. (2 Timoteo 3:1; Mareko 13:19) Nge, hna helëne triji Satana me itre dremoni angeic kowe la fen matre atraqatr la akötr thene la itre atr. (Hna Amamane 12:9, 12) Ketre, easë mina fe a trongëne la hna ahnithe hnei Iesu, ene la troa cainöjëne la maca ka loi e cailo fen, kowe la itre atr me itre qene hlapa ka nyimutre catre hmaca kö!

17, 18. Nemene la aqane tro sa ujë kowe la itre hna amekötine hne së hna kapa?

17 Nyimutre la itre jia ne huliwa hne së hna kapa qaathene la organizasio i Iehova matre troa xatua së ngöne la huliwa ne cainöj. Epuni kö a huliwane itre ej? Ame ngöne la itre icasikeu së, easa kapa la itre ithuemacanyi göi aqane troa huliwane hnyawane la itre jia ne huliwa. Epuni kö a goeëne la itre ithuemacanyi cili ceitu me itre ewekë ka xulu qaathei Iehova?

18 Maine easa ajane troa kapa la itre manathithi qaathei Iehova, tro sa pane cil, me goeën, me drenge hnyawa la itre hna amekötine hna hamëne hnene la ekalesia. E tro sa drengethenge enehila, tha tro kö a jole koi së elanyi troa trongëne la itre hna amekötine ngöne la ijine “aköte atraqate,” ijine troa lepe apatrene asë la fene i Satana. (Mataio 24:21) Nge ame hë elanyi ngöne la fene ka hnyipixe, patre hë la iajojezi, nge tro hmaca së e cili a kapa la itre xa hna amekötin.

Tro së elanyi a kapa la itre hna amekötine ka hnyipixe jëne la itre tusi ngöne la Paradraiso(Wange ju la paragarafe 19, 20)

19, 20. Nemene la itre tusi ka troa mama elany, nge nemene la itre manathithi hna troa kapa qa ngön?

 19 Ame ngöne la hneijine i Mose, hetre itre hna amekötine hna kapa hnene la nöjei Isaraela, kolo Wathebo hna hamëne koi angatre hnei Iehova. Ame hë e thupen, ekalesia i keresiano pena ha a trongëne la “wathebo i Keriso.” Ketre tune mina fe, öni Tusi Hmitrötr, tro së elanyi a kapa la itre xa hna amekötine ka hnyipixe jëne la itre tusi hna seluth. (E jë la Hna Amamane 20:12.) Tro la itre tusi cili a amamane hnyawane kowe la nöjei atr ngöne la ijine cili, la aja i Iehova koi angatr. Hnene laka, hna waipengöne hnyawa hnene la nöjei atr memine fe la itre hna amelene hmaca la itre tusi cili, haawe tro hë angatre a atre la aja i Iehova. Tro itre ej a xatua së troa atre la mekuna i Nyidrë. Tro fe së elanyi a trotrohnine hnyawa la Tusi Hmitrötr matre ame hë ngöne la Paradraiso, tro hë la nöjei atr a ihnimikeu, me imetrötrë. (Isaia 26:9) Drei jë la etrune la itre ewekë hne së hna troa atre elanyi me inine la itre xa atr fene la musi Iesu Keriso Joxu së!

20 Maine tro sa trongëne elanyi la itre hna amekötine “hna cinyihane ngöne la ite tusi,” me mele nyipici koi Iehova ngöne la itupath tixenuë, tro ha cile huti la ëje së ngöne la “tusi ne mel.” Tro hë së e cili a mele epine palua! Celë hi matre nyipi ewekë tro sa pane CIL matre tro sa e la hna qaja e hnine la Tusi Hmitrötr. Nge loi e tro sa GOEËN, ene la troa thele troa trotrohnine la aliene lai, me DRENG hnyawa, ene la troa trongëne enehila la itre hna amekötine qaathei Akötresie. Maine tro sa kuca la itre ewekë celë, tro hë së a mele pe qa ngöne la akötre atraqatr. Nge, tha tro kö së a mano troa atrepengöi Iehova, Akötresie ka inamacane me ka ihnim.—Ate Cainöj 3:11; Roma 11:33.