“Maine ej’ e cili . . . Noa, me Daniela, me Iobu, tro angat a isa amele angate kö hnene la thina ka meköti angat.”​—EZEKIELA 14:14.

NYIMA: 89, 119

1, 2. (a) Pine nemene matre tro la tulu i Noa, me Daniela, me Iobu a thuecatre së? (b) Nemene la ewekë ka traqa ngöne la kola cinyihane hnei Ezekiela la trengewekë ka mama ngöne Ezekiela 14:14?

HAPEU, hna traqa kö koi epun la itre ijine jol ke, hna tithi epun hnei mec, maine hna traqa koi epun la itre jol göi mani, maine hna axösisi epuni pena? Nge, ame ngöne la itre ijine cili, tha madrine hë epun ngöne la huliwa i Iehova. Maine celë hi lai ka traqa koi epun, tro la tulu i Noa, me Daniela, me Iobu a thuecatre koi epun. Itre atr ka tha pexeje kö angatr, nge hna hane traqa fe koi angatr la itre jol hne së hna qëmeke kow enehila. Hetrenyi la itre trejin enehila ka mel ngöne la itre götran gaa jol. Ngo, angatr a mele nyipici koi Iehova, nge ame koi Nyidrë, itre tulu ka lolo ke, itre ka lapaune me idrengethenge.—E jë la Ezekiela 14:12-14.

2 Hnei Ezekiela hna cinyihane la trengewekë ka nyitrepene la  tane mekune celë e Babulona, ngöne lo macatre 612 qëmeke i Keriso. * (Wange ju la ithuemacany.) (Ezekiela 1:1; 8:1) Tha ekö catre kö, qëmekene troa lepe Ierusalema lo macatre 607 la kola cinyihane lai. Ala xalaithe hi la itre atr e Ierusalema ka mele nyipici, nge ka idrengethenge tui Noa ekö, me Iobu, me Daniela. (Ezekiela 9:1-5) Kola qeje Ieremia, me Baruka, me Ebede-melek, memine la lapa i angetre Rekaba. Itre hna amelene pe ngöne la ijine cili.

3. Nemene la hne së hna troa ce ithanatane ngöne la tane mekune celë?

3 Ketre tune mina fe enehila, ame la itre atr ka troa mele pe ngöne la ijine kola lep apatrene elanyi la fene ka ngazo celë tre, ceitu angatr me Noa, me Daniela, me Iobu, itre atr hna jelemekötine hnei Iehova. (Hna Amamane 7:9, 14) Tro sa ce wang la kepin matre Iehova a iëne la köni atre celë nyine itre tulu ka meköt. Tro sa ce ithanatane la (1) itre jol ka traqa koi angatr isa ala cas, me (2) aqane tro sa xötrethenge la lapaun, me aqane idrengethenge i angatr.

NAENE HADREDRE LAO MACATRE NE LAPAUNE NOA ME IDRENGETHENGE!

4, 5. Nemene la itre jol hna cile kow hnei Noa, nge nemene la hne së hna atre göi angeic?

4 Nemene la itre jol hnei Noa hna cile kow? Ame ngöne la ijine i Enoka, lo hnaaluene qaaqa i Noa, ngazo catre hë la fen. Angatr a qaja “la nöjei tenge ewekë ka calogit [maine ka iakötrë]” göi Iehova. (Iuda 14, 15) Kola tro la itre macatre, nge kola ngazo catre la fen. Ame ngöne la ijine i Noa, “tiqa ha la fene hnei iangazo.” Hnene la itre angela ka ngazo hna uti kowe la fen, me xome la ngönetrei atr matre troa faipoipo memine la itre föe. Nge, ame la itre nekö i angatr tre, ka iakötrë me ka isi catr. (Genese 6:2-4, 11, 12) Ngo, mama cile hnyawa la eisapengöi Noa me angatr. Öni Tusi Hmitrötr, “hna hnimi Noa hnei Iehova.” Hnei angeice palahi hna kuca la meköt. “Hnei Noa hna ce trotro me Akötesie.”—Genese 6:8, 9.

5 Nemene la hne së hna atre göi Noa? Pane mekune jë la itre macatre ne nyihlue i Iehova hnei Noa qëmekene troa lepe la fen hnene la Iwë Atraqatr. Tha 70 maine 80 kö lao macatre ne nyihlue i Iehova, ngo 600 pe! (Genese 7:11) Ketre, ame ngöne la ijine cili, pëkö ekalesia hnë tro angeic a thele ixatua then, me trengecatr tune enehila. Nge pëkö trejin ka troa xatua angeic. *—Wange ju la ithuemacany.

6. Nemene la aqane amamane Noa la trengecatre i angeic?

6 Tha hnei Noa hmekuje kö hna kuca la meköt. Hnei angeic hna qaja amamane la lapaune i angeic kowe la itre atr. Öni Tusi Hmitrötr göi angeic ka hape, “ate cainöjëne la thina ka meköt.” (2 Peteru 2:5) Ketre, öni Paulo: “Hnei angeice hna ahnëjinëne la fene hnengödrai hnene [la lapaune i angeic].” (Heberu 11:7) Eje hi laka, hna hnyimasai Noa, me icilekeu me angeic, me akötrë angeic. Ngo, patre fe kö la “qoue ate” thei angeic. (Ite Edomë 29:25) Hetre lapaune i angeic, matre hnei Iehova hna hamë trengecatre koi angeic. Thiina lai hnei Nyidrëti hna hamëne fe kowe la itre hlue i Nyidrë enehila.

7. Nemene la itre jol hnei Noa hna cile kow ngöne la angeic a cane la aka?

7 Faifi hadredre hë lao macatre ne lapaune  Noa koi Iehova la Nyidrëti a upi angeic troa cane la aka. Troa mel la itre atr, memine la itre öni qa ngöne la Iwë, e angatr e hnine la aka. (Genese 5:32; 6:14) Ketre huliwa ka jole catre pi hë koi Noa la troa cane la aka ka tru. Nge, atre hnyawa hi Noa laka, tro la itre atr a hnyimasai angeic, me akötrë angeic. Ngo, hnei Noa hna lapaune koi Iehova, me drengethenge Nyidrë. Öni Tusi Hmitrötr, “Tune hi lai hnei angeice hna kuca.”—Genese 6:22.

8. Nemene la aqane amamane Noa la mejiune i angeic koi Iehova?

8 Hetre itre xa jol hna cile kow hnei Noa. Hnëqa i angeic troa thupëne la föi angeic, me itre nekö i angeic. Qëmekene troa traqa la Iwë, nyipiewekë ekö troa catr eëny hnene la itre atr. Celë fe hi hna kuca hnei Noa. (Genese 5:28, 29) Ngo, tha hnei angeice kö hna wangatrune menune palaha la itre aja ne la hnepe lapa i angeic. Ka tru koi angeic la troa nyihlue i Iehova. Ngacama 40 maine 50 lao macatre ne nue trengecatre Noa troa cane la aka, ngo ame la ka tru koi angeic tre, ene la aqane imelekeu i angeic me Iehova. Nge, 350 lao macatre thupene la Iwë, tha saze kö la pengöi Noa. (Genese 9:28) Noa la ketre tulu ne lapaun, me idrengethenge!

9, 10. (a) Nemene la aqane tro sa lapaun me idrengethenge tui Noa? (b) Nemene la ka xecie hnyawa koi epun, e hnei epuni hna catre drengethenge Akötresie?

9 Nemene la aqane tro sa lapaun me idrengethenge tui Noa? Easa nyitipu Noa la easa sajuëne la thiina ka meköti Iehova, me iananyi memine la fene i Satana, me amë panë Iehova ngöne la mele së. (Mataio 6:33; Ioane 15:19) Celë hi kepine matre kola methinë së hnene la fen. Hnene laka, easa catr drengethenge la itre wathebo i Iehova göi faipoipo, me pë ethan la thiina së, haawe, kola qeje gele së ngöne la itre nuvel. (E jë la Malaki 3:17, 18.) Ngo, tha ka xoue atre kö së. Easë pe a xoue Iehova tui Noa. Pine laka easa metrötrë Nyidrë, tha aja së kö troa akötrë Nyidrë. Nyidrëti hi la ka ijije troa hamë së la mele ka tha ase palua kö.—Luka 12:4, 5.

10 Isa hnyinge jë së ka hape: ‘Eni kö a kuca la meköt, ngacama kola hnyimasai ni, maine qeje geleng hnei itre xan? Eni kö a mejiun koi Iehova troa thupëne la hnepe lapang, ngacama tru hnei ejolene göi mani?’ Maine tro epuni a lapaun koi Iehova, me idrengethenge tui Noa, tro ha xecie koi epuni laka, tro Iehova a thupëne la mele i epun.—Filipi 4:6, 7.

KA LAPAUNE DANIELA ME IDRENGETHENGE NGACAMA TRU LA ITRE ATR KA NGAZO

11. Nemene la itre jol hna cile kow hnei Daniela me köni sinee i angeic e Babulona? (Wange ju la pane iatr.)

11 Nemene la itre jol hnei Daniela hna cile kow? Hna upi Daniela troa mel e Babulona, ketre traone trenyiwa ka kuci haze, me ka kuci iöni. Ame la itre atr ka mel e cili, ka xele angatr ma wang la angetre Iudra. Kola thaipië angatr me Iehova, Akötresi angatr. (Salamo 137:1, 3) Celë hi ka akötrë Daniela, me itre xa angetre Iudra, itre ka hnimi Iehova! Ketre, ame Daniela me Hanania, me Misaela, me Azaria, köni sinee i angeic, ka mama nyudren pine laka, hna acili nyudren troa huliwa i joxu. Matre, kola goeëne hnyawa la nöjei huliwa hnei nyudren hna kuca. Hna hnëkëne fe la xen thatraqai nyudren. Nge, hetrenyi la itre xen hna wathebon hnei Iehova. Ngo, ame koi Daniela, “tha tro kö a angazo angeice hnene la a i joxu.”—Daniela 1:5-8, 14-17.

12. (a) Nemene la itre thiina hna melën hnei Daniela? (b) Nemene la aqane goeë Daniela hnei Iehova?

12 Hetre ketre jol hnei Daniela hna cile kow, ngo ka tha canga mama kö. Hnene laka, ketre  atr ka atreine huliwa Daniela, haawe, hnene la joxu ne Babulona hna acili angeic troa kuca la itre hnëqa ka tru. (Daniela 1:19, 20) Tha hnei Daniela kö hna pi draië me pi mama, me nyi ka meköt. Ngo, hnei angeice palahi hna hni ka ipië, me atrehmekune laka, hetre ifego ngöne la mele i angeic. Nge, ame koi angeic, Iehova la hnei angeic hna troa atrun ke, hnei Nyidrëti palahi hna xatua angeic. (Daniela 2:30) Pane mekune jë! Ame la Iehova a ce qeje Noa me Iobu ke, hna qeje Daniela fe. Celë hi itre atre lai hne së hna troa nyitipun. Ngöne la ijine cili, meci hë Noa me Iobu, nge hnei nyidroti hna mele nyipici koi Iehova ngöne la mele i nyidro ka pexej. Ame Daniela, thöthi petre kö angeic ngöne la ijine cili. Ngo, ka mejiune catre Iehova koi Daniela! Hnei Daniela hna lapaun, me drengethenge Iehova ngöne la nöjei drai ne mele angeic. Ame la Daniela a traqa kowe la 100 lao macatre, hnene la angela i Akötresie hna qaja koi angeic ka hape: “We, Daniela, ate hna hanyin.”—Daniela 10:11.

13. Nemene la kepin matre Iehova a nue Daniela ngöne la ketre hnëqa ka tru?

13 Hnei Iehova hna nyi jëne matre tro Daniela a cilëne la ketre hnëqa ka tru ngöne la hnanyijoxu e Babulona, nge thupene lai, ngöne la hnanyijoxu i Madai me Peresi. (Daniela 1:21; 6:1, 2) Maine jë, hnei Iehova hna nyijëne tune lai, matre tro angeic a xatuane la nöje i Nyidrë, tune lo aqane kuca i Iosefa e Aigupito, me Esetera me Modikai fene la musi Peresi. * (Wange ju la ithuemacany.) (Daniela 2:48) Eje hi laka, ketre ixatua ka tru koi Ezekiela me itre xa angetre Iudra ka po e cili la kola mama la ime i Iehova jëne Daniela.

Ka tru së koi Iehova la easa mele nyipici koi Nyidrë (Wange ju la paragarafe 14, 15)

14, 15. (a) Pine nemene matre ka ceitune hi la pengö së me Daniela? (b) Nemene la ini hna kapa hnene la itre keme me thine qa ngöne la tulu ne la keme me thine i Daniela?

14 Nemene la aqane tro sa lapaun me idrengethenge tui Daniela? Ka tiqa la fen enehila hnei kuci ngazo, me hmi thoi. Kola ajojezine la itre atr hnei Babulona Atraqatr, ene la itre hmi ka thoi asë e cailo fen. Nge, hna qeje ej hnei Tusi Hmitrötr ka hape “hnalapa ne la nöjei demoni.” (Hna Amamane 18:2) Ngo, isapengö së memine la itre atrene fen, matre angatr a thaipië së. (Mareko 13:13) Haawe, loi e tro sa easenyi catr koi Iehova, Akötresi së, tui Daniela. Ame la easa mejiun  koi Iehova, me idrengethenge, me hetre thiina ka ipië tre, Nyidrëti a wangatrunyi së.—Hagai 2:7.

15 Hetre ini hna kapa hnene la itre keme me thine qa ngöne la tulu ne la keme me thine i Daniela. Ame lo ijine nekönatr petre kö Daniela, ngazo catre la thiina ne la nöj. Ngo, hnei Daniela hna tru trootro, me hnimi Iehova. Hapeu, hna traqa xane la ihnimi cili? Ohea. Hnene la keme me thine i angeic hna ini angeic la pengöi Iehova. (Ite Edomë 22:6) Nge, kolo fe a mama laka, tru la ihnimi nyidro koi Iehova ke, ame la aliene la ëje i Daniela tre, kola hape, “Akötresie La Atre Ameköti Ni.” (Daniela 1:6) Matre keme me thine fe, loi e hetrenyi thei epon la xomihni ngöne la epon a xatuane la nekönatr troa atre Iehova. Nge, the hmaca kö. (Efeso 6:4) Ce thithi jë me nyën, nge thithi sai nyëne jë. Isine jë troa amë e kuhu hni nyëne la itre mekuna i Iehova, nge tro kö Iehova a amanathithi epon.—Salamo 37:5.

IOBU—TRENAMO JU HË MAINE PË NGO KA LAPAUN ME IDRENGETHENGE

16, 17. Nemene la itre jol hnei Iobu hna cile kow?

16 Nemene la itre jol hnei Iobu hna cile kow? Hna saze la pengöne la mele i Iobu. Ame ngöne la xötrei, kola qaja hnei Tusi Hmitrötr göi Iobu ka hape, “sisitia la ate cili hune la nöjei ate ne kohië asë.” (Iobu 1:3) Ketre atre ka trenamo, ka hlemu, nge hna atrun. (Iobu 29:7-16) Ngo, tha hnei Iobu pi kö hna mekun ka hape, sisitria kö angeic hui itre xan, maine pena tha nyipiewekë kö Akötresie ngöne la mele i angeic. Hnei Iehova hna hë Iobu ka hape, “hluenge.” Öni Nyidrë göi angeic: “Ate ka nyipi loi thina me meköt, nge ate qoue Akötesie me iananyi memine la ngazo.”—Iobu 1:8.

17 Hna a ca tro saze hi la pengöne la mele i Iobu. Hna patre la nöjei ewekë i angeic utihë hleuhleu la mele i angeic. Ame enehila, atre hë së laka, Satana la ka akötrë Iobu. Öni Satana, Iobu a nyihlue i Iehova göi thupen. (E jë la Iobu 1:9, 10.) Tha ewekë ka co kö koi Iehova la kola silitrengathoi Nyidrë. Nemene la hnei Iehova hna troa kuca matre troa amamane laka, ka thoi lae Satana? Hnei Nyidrëti hna nue Iobu troa amamane la lapaune i angeic koi Nyidrë, me amamane laka, angeic a nyihlue i Nyidrë cememine la ihnim.

18. (a) Nemene la ewekë ka ketri epun göi Iobu? (b) Nemene la ini hne së hna xom göi Iehova qa ngöne la aqane ujë Nyidrë koi Iobu?

18 Tha mano kö Satana akötrë Iobu. Hnei Satana hna nyijëne matre tro Iobu a mekun ka hape, qaathei Iehova la itre akötr. (Iobu 1:13-21) Nge, ame pena la köni sinee i angeic, hnei angatr hna qaja la itre trenge ithanata ka akötrë angeic. Öni angatr, Iehova a nyithupen koi Iobu pine la itre huliwa i angeic ka ngazo. (Iobu 2:11; 22:1, 5-10) Ngo, hnei Iobu hna mele nyipici koi Iehova. Nyipici laka, ame itre xa ijin, hnei Iobu hna ithanata menu. Ngo, trotrohnine hi Iehova laka, Iobu a ujë tun ke, tru la akötre i angeic me hleuhleu. (Iobu 6:1-3) Kolo pe a mama koi Nyidrë laka, tha hnei Iobu pi kö hna nuetriji Nyidrë, ngacama tha mano kö Satana akötrë angeic me inyizö. Thupene la itre hulö celë, hnei Iehova hna hamën hmaca koi Iobu la itre hnane la itre ewekë i angeic ka patr, nge hna nyixan, a alu. Nge, hnei angeic hna mele hmaca kö koi 140 lao macatre thupen. (Iakobo 5:11) Ame ngöne la ijine cili, hnei Iobu hna catre nyihlue i Iehova cememine la hni ka pexej. Easa atre lai ke, hna cinyihane la Ezekiela 14:14, ene la xötr ka nyitrepene la tane mekune celë, itre hadredr lao macatre thupene lo hna meci hnei Iobu.

19, 20. (a) Nemene la aqane tro sa lapaun me idrengethenge tui Iobu? (b) Nemene la aqane tro sa amamane la utipine së tui Iehova?

 19 Nemene la aqane tro sa lapaun me idrengethenge tui Iobu? Ngacama isa pengöne kö la mele së, ngo loi e tro palahi sa amë panë Iehova ngöne la mele së. Loi e tro sa qale koi Nyidrë, me drengethenge Nyidrë cememine la hni së ka pexej. Ka nyipiewekë catre hmaca kö koi së troa ujë tune lai, hui Iobu ekö. Ame enehila, tha sihngödri hë koi së la pengöi Satana, memine la itre nyinyithiina i angeic. (2 Korinito 2:11) Jëne la Tusi Hmitrötr, ene mina fe la tusi Iobu, easa atre la kepin matre Akötresie a nue la akötr. Nge, jëne la hna perofetan hnei Daniela, atre hë së laka, ketre musi la Baselaia i Akötresie, nge Iesu Keriso la ka cilëne la Baselaia cili. (Daniela 7:13, 14) Nge, easenyi hë tro la Baselaia cili a musi kowe la fen asë, me apatrene la itre akötr.

20 Kolo fe a amamane hnene la hna melëne hnei Iobu laka, loi e tro sa amamane la utipine së kowe la itre trejin ka akötr. Tui Iobu, tro fe angatr a ithanata menu. (Ate Cainöj 7:7) Ngo, tha tro pi kö sa mekuhnine menu angatr, me qaja ka hape, hetre ngazo hnei angatr hna kuca. Loi e tro pe sa thele troa trotrohnine la akötre i angatr. E hne së hna ujë tune lai, easë hi lai a nyitipu Iehova Keme së, ka ihnim me ka menyik.—Salamo 103:8.

TRO IEHOVA A “AEGÖCATRENYI NYIPUNIE”

21. Pine nemene matre qaja jë së ka hape, itre hna melëne hnei Noa, me Daniela, me Iobu a jelenyipicine la hna qaja ngöne 1 Peteru 5:10, MN?

21 Isa hneijine kö ne mele Noa, me Daniela, me Iobu, nge isapengöne kö la aqane mele i angatr. Ngo, hnei angatr hna isa cile catre kowe la itre jol ka traqa koi angatr. Kola jelenyipicine lo ithanata i Peteru aposetolo lo kola hape: “E ase hë la akötre ka xoxopatre hi, tro Akötresieti ine la ihnimi gufa asë, . . . a apexejene la ini nyipunie, me acile hutin, me aegöcatrenyi nyipunie.”—1 Peteru 5:10, MN.

22. Nemene la hne së hna troa ce wang ngöne la tane mekun ka troa xulu?

22 Thatraqane fe la itre hlue i Akötresie enehila la hna qaja ngöne 1 Peteru 5:10, MN. Iehova a thuecatre koi së laka, tro Nyidrëti a hamë trengecatre kowe la itre hlue i Nyidrë ngöne la itre itupath. Aja së asë hi tro Iehova a aegöcatrenyi së, me mele nyipici koi Nyidrë. Celë hi kepin matre easa thel troa xötrethenge la lapaun, me aqane idrengethenge i Noa, me Daniela me Iobu. Ame ngöne la tane mekun ka troa xulu, tro sa ce wang laka, hnei angatr hna mele nyipici koi Iehova ke, atre Nyidrëti hnyawa hi hnei angatr. Angatr a “trotrohnin’ asë” la aja i Nyidrë thatraqai angatr. (Ite Edomë 28:5) Nge, tro fe sa thel troa nyitipu angatr.

^ par. 2 Hna xomi Ezekiela troa po e Babulona lo macatre 617 qëmeke i Keriso. Hnei angeic hna cinyihane la Ezekiela 8:1–19:14 “ngöne la macate ka cangemene (hnaasikisine macatre)” thupene la hna xomi angeic troa po, lo macatre 612.

^ par. 5 Ame Lameka, keme i Noa, ka mejiune nyidrë koi Akötresie, ngo faif lao macatre qëmekene troa traqa la Iwë, meci pi hi nyidrë. Maine ka mel la thine i Noa, memine la itre trejine me angeic la kola traqa la Iwë, ke, tro fe hi angatr a hane mec ngöne la ijine cili.

^ par. 13 Hnei Iehova hna kuca tune koi Hanania, Misaela, me Azaria matre tro fe angatr a hane xatuane la angetre Iudra.—Daniela 2:49.