Tro jë kowe la alien

Tro jë kowe la itre alien

Itretre Anyipici Iehova

Iëne jë la qene hlapa Drehu

Ini Qaathene La Itre Hlue i Iehova Ka Nyipici Ekö

Ini Qaathene La Itre Hlue i Iehova Ka Nyipici Ekö

“Nemene la ewekë hnei Iehova hna ajane koi eö? Ene hi la troa kuca la meköt, me hnine la thiina ka nyipici, me ce tro me Akötresi eö memine la hni ka ipië!”MIKA 6:8

NYIMA: 6343

1, 2. Nemene la ka amamane ka hape, ka nyipici Davita koi Iehova? (Wange ju la pane iatr.)

SAULO me ala 3 000 lao soce i nyidrë a thele Davita ngöne la hnapapa e Iudra göi troa humuthi angeic. Ngo ame la ketre jidr, öhne ju hi Davita me itre atre i angeic la hnë mano i angatr. Angatre a imeköleny, ame hna tro metrötr hnei Davita me Abisai ezi angatr me öhnyi Saulo. Abisai a uliline jë koi Davita me hape: “Nue ni pi matre tro ni a aca tro xale angeic e cahu hnadro, nge tha tro ju kö a alu.” Ngo öni Davita koi Abisai: “The humuthi nyidrëti kö, ke drei la atre troa li ime kowe la siana i Iehova a troa pë hulö ?” Öni Davita hmaca jë: “Iehova a sewe ni matre tha tro kö ni a li ime kowe la siana i Iehova!”1 Samuela 26:8-12, MN.

2 Atre hnyawa hi Davita la nyine tro angeic a kuca matre troa nyipici koi  Iehova. Hnei angeice hna metrötrë Saulo, nge goi tha traqa fe koi angeic la mekun troa akötrë nyidrë. Pine nemen? Pine laka hnei Akötresieti hna acili Saulo troa joxu i angetre Isaraela. Aja i Iehova enehila tro së itre hlue i Nyidrë asë, a nyipici koi Nyidrë, me metrötrëne la itre hnei Nyidrëti hna aijijën troa mus.E jë la Mika 6:8, MN. [1](Wange ju la ithuemacanyi e kuhu pun.)

3. Nemene la ka amamane laka, ka nyipici Abisai koi Davita?

3 Abisai a metrötrë Davita, ke, atre hnyawa hi angeic laka, hnei Akötresieti hna ië Davita troa joxu. Ngo ame hë la Davita a joxu, hnei angeic hna kei kowe la ngazo. Hnei angeice hna ce meköle me Batheseba, nge thupene lai, angeic a upi Ioaba jë troa thele jëne matre tro Uria, föi Batheseba a mec ngöne la hna isi. (2 Samuela 11:2-4, 14, 15; 1 Aqane lapa ite Joxu 2:16) Ioaba la trejine me Abisai, matre ngacama drenge hë Abisai la hna kuca hnei Davita, ngo hnei angeice pala hi hna metrötrë Davita. Ketre, Abisai la ketre tane isi, matre maine ju ijiji angeice hi troa ketre sipu acili joxu angeice kö, ngo tha hnei angeice pi kö hna ujë tune lai. Hnei angeice pe hna ce huliwa me Davita me amele Davita qaathene la itre ithupëjia.2 Samuela 10:10; 20:6; 21:15-17.

4. (a) Nemene la ka amamane ka hape, ka nyipici pala hi Davita koi Iehova ngöne la mele i angeic? (b) Nemene la hne së hna troa ce wange ngöne la tane mekune celë?

4 Ka nyipici pala hi Davita koi Iehova ngöne la mele i angeic ka pexej. Ame lo angeic a thöth, hnei angeic hna isigöli Iehova, me angetre Isaraela ngöne la angeic a humuthi Goliatha, atre qea hmae me atre catr. (1 Samuela 17:23, 26, 48-51) Ame lo Davita a joxu me kei kowe la ngazo, hnei Nathana perofeta hna ameköti angeic, ene pe canga kapa ju hi Davita la ihaji, me ietra. (2 Samuela 12:1-5, 13) Ame hë e thupen, lo qatre hë Davita, hnei angeic hna hamëne la itre mo ka tru thupen, göi troa xupe la ēnē i Iehova. (1 Aqane lapa ite Joxu 29:1-5) Mama hnyawa hi laka, ngacama hna kei hnei Davita kowe la ngazo ngöne la mele i angeic, ngo tha hmaca pi kö angeic nyipici koi Akötresie. (Salamo 51:4, 10; 86:2) Ame ngöne la tane mekune celë, tro sa ce wange la tulu i Davita me itre xa atr ka mele ngöne la hneijine cili. Nge tro fe sa wange la nyine tro sa kuca me itre xa thiina ka lolo nyine tro sa melëne matre tro sa nyipici koi Iehova, ngo tha koi ketre kö.

TRO KÖ EPUNI A NYIPICI KOI IEHOVA?

5. Nemene la ini koi së qa ngöne la mekune ka tria i Abisai?

5 Ame lo Abisai a thele troa humuthi Saulo, angeice hi lai a amamane la aqane nyipici angeic koi Davita. Ngo, hnene laka, ame koi Davita, ngazo e troa akötrëne la “siana i Iehova,” ene pe sewe angeice pi hnei Davita troa humuthe la joxu. (1 Samuela 26:8-11) Hetre ini ka tru koi së qa ngön: Maine easa thele ngöne la ketre ijin ka hape: “Drei la atr nyine tro ni a pane nyipici kow?” nyipi ewekë tro sa pane thele la itre trepene meköt ka troa xatua së.

Iehova hi la nyine tro sa pane nyipici kow, ngo tha ketre atr kö

6. Nemene la nyine tro sa thupëne hnyawa?

6 Eje hi laka, tha ngazo kö troa nyipici kowe la atr hne së hna hnim, tune la ketre sinee maine ketre atrene la hnepe lapa së. Ngo, itre atr ka tha pexeje kö së, matre canga tro hi lai a amenune la itre hni së. (Ieremia 17:9) Haawe, e kei pi kowe la ngazo hnene  la ketre atr hne së hna hnim me upetrön eë, mekune pala kö së laka, Iehova hi la nyine tro sa pane nyipici kow, ngo tha ketre atre kö.E jë la Mataio 22:37.

7. Nemene la aqane nyipici ne la ketre trejine föe koi Akötresie?

7 E upetrön eëne jë la ketre atrene la hnepe lapa së, loi e tro sa amamane laka, Iehova la nyine tro sa nyipici kow. Ame la ketre ijin, hna hë Ana hnei thine i angeic hna upetrön eëne matre tro nyidroti a pane iöhny. [2](Wange ju la ithuemacanyi e kuhu pun.) Hnei thin hna qaja ka hape, tha madrine kö eahlo, ke xele kö la itre xa atrene la hnalapa i eahlo ma ithanata me eahlo. Tru la hnei Ana hna meku eahlo, matre hnei angeic hna qaja amë ka hape, tro pë hë angeic a sa jëne tus. Qëmekene tro angeic a cinyany, hnei angeice hna pane mekune hnyawa la itre trepene meköt. (1 Korinito 5:11; 2 Ioane 9-11) Thupene lai, angeice pë hë a qejepengöne jë ngöne la menyik, ka hape, eahlo kö la ka trotrije la hnepe lapa la kola kei kowe la ngazo me xele ma ietra. Nge öni angeice fe, casi hi la jëne tro hmaca eahlo a hetre madrin, ene la troa bëeke koi Iehova.Iakobo 4:8.

8Ka ipië mina fe la itre xa hlue i Akötresie ngöne la hneijine i Davita, nge itre ka menyik, me catr. Tro sa ce wange la itre thiina celë ka troa xatua së troa nyipici koi Iehova.

TRO SA IPIË

9. Pine nemene matre thele jë Abinera troa humuthi Davita?

9 Hnei Ionathana, nekö i Saulo, me Abinera, tane isi Isaraela hna ce öhnyi Davita e tro fë la he i Goliatha koi Saulo Joxu. Ionathana la ka thele troa ce sinee me Davita me nyipici koi angeic. (1 Samuela 17:57–18:3) Ngo tha celë kö lai hna kuca hnei Abinera. Hnei angeice pe hna xatua Saulo troa humuthi Davita. (1 Samuela 26:1-5; Salamo 54:3) Pëkö ka thatre e Ionathana me Abinera ka hape, Davita la hnei Iehova hna iën troa joxu i angetre Isaraela. Ngo ame hë la kola meci hnei Saulo, tha hnei Abinera kö hna sajuë Davita. Hnei angeice pe hna thele jëne matre troa joxu hnei Iseboseth, nekö i Saulo. Ame hë e thupen, hnei Abinera hna thele  troa joxu, ke, hnei angeice hna ce meköle memine la ketre föi Saulo Joxu. (2 Samuela 3:6-11) Pine nemene matre tha ceitu kö la aqane waipengöi Davita hnei Ionathana me Abinera? Pine laka, Iehova la hnei Ionathana hna nyipici kow, nge ka ipië angeic, ngo tha hna tune kö hnei Abinera.

10. Pine nemene matre tha nyipici kö Abasaloma koi Akötresie?

10 Abasaloma, nekö i Davita Joxu, la ketre atr ka tha nyipici kö koi Akötresie, ka pëkö ca ipië i angeic. Hnei angeice hna thele troa joxu, matre hnëkëne jë angeic thatraqai angeice kö la ca “ikariota me ite hos me [50] la ite ate troa nyenyape pa qëmeke i angeic.” (2 Samuela 15:1) Hnei angeice fe hna iaöne la angetre Isaraela troa nyipici koi angeic. Nge goi thele fe angeice troa humuthe la keme i angeic, ngacama atre hnyawa hi angeic ka hape, Davita la hna acili joxun hnei Iehova.2 Samuela 15:13, 14; 17:1-4.

11. Nemene la ini koi së qa ngöne la aqane ujë i Abinera, Abasaloma, me Baruka?

11 E tha ka ipië kö la ketre atr, nge ka pi mus, tro lai a jole catre koi angeic troa nyipici koi Akötresie. Eje hi laka, tha aja së kö troa tui Abinera me Abasaloma, ene la troa ketre sipu meku së kö, me ngazo thiina. Ngo, loi e tro sa thupëne hnyawa wanga cia jë e kuhu hni së la aja mani, maine ajane la ketre huliwa hna wangatrun. Tro lai a angazone la aqane imelekeu së me Iehova. Ame ngöne la ketre ijine la mele i Baruka, seketere i Ieremia, hnei angeic hna piine la ketre ewekë, nge tha madrine hë angeic ngöne la huliwa i Iehova. Ame e cili öni Iehova koi angeic: “Hana wang, ame la hnenge hna xup, te, tro ni a kenithe pi, nge ame la hnenge hna tran, te, tro ni a feje hmaca ; ene la nöj asë ce. Nge hape u, eö a thele la ite ewekë ka tru thatraqai ’ö kö? The thele kö.” (Ieremia 45:4, 5) Hnei Baruka hna drei Iehova me kapa. Haawe, nyipi ewekë tro fe sa hane drei Nyidrë, ke, easenyi catre hë matre lepe apatrene pi la fene ka ngazo celë.

E tro epuni a upe la ketre trejin troa thele ­ixatua thene la itre qatre thup, epuni hi lai a thiina ka menyik koi angeic me nyipici koi Iehova

12. Qaja jë la ketre hna melën ka amamane la enyipiewekëne troa nyipici koi Iehova, ngo tha tro pe a ketre sipu meku së kö.

12 Hetre mekune nyine troa xome hnei Daniel, ketre trejine qaa Mexique me amamane la nyine tro angeice a nyipici kow. Hetre aja i angeice troa faipoipo memine la ketre jajiny ka tha nyihlue i Iehova kö. Öni Daniel: “Ngacama eni hë ngöne la huliwa ne pionie, ngo hnenge pala hi hna cinyianyi koi angeic.” Ngo hnei  Daniel pë hë hna trotrohnin e thupen ­laka, angeice a thele la sipu aja i angeice kö; nge tha angeice kö lai a nyipici koi Iehova. Matre nyipi ewekë e cili tro angeic a ipië, ame hnei angeice hna thele ixatua thene la ketre qatre thup. Öni Daniel: “Hnei nyidrëti hna xatua ni troa trotrohnine laka, e ajane ni troa nyipici koi Akötresie, tha tro hmaca kö ni a ­cinyianyi koi angeic. Ngacama tru la hnenge hna meku angeic, ngo hnenge hna catre thith, me trongëne la eamo. Tha qea ju kö, nge kökötre hmaca jë hi la madrineng ngöne la huliwa i Iehova .” Faipoipo hë Daniel enehila memine la ketre trejine föe ka hnimi Iehova, nge nyidroti a wange trongëne la itre ekalesia.

THIINA KA MENYIK KE HNA NYIPICI KOI IEHOVA

hë epuni ka hape, hna kei kowe la ngazo hnene la ketre sinee i epun, tro kö epuni a ithanata me angeic me upi angeic koi itre qatre thup?(Wange ju la paragarafe 14)

13. Nemene la aqane nyipici Nathana koi Akötresie me koi Davita?

13 E tro sa nyipici koi Iehova, tro fe së lai a nyipici koi itre atr, me xatua angatre hnyawa. Hnei Nathana perofeta hna nyipici pala hi koi Iehova, me koi Davita fe. Thupene la hnei Davita hna xome la ifekë föen, me humuthe la trahmanyi nyiidro, hnei Iehova hna upi Nathana troa haji Davita. Hnei Nathana hna catr me drengethenge Iehova. Ngo, ka inamacane fe la aqane ujë i nyidrë koi Davita, me ithanata amenyikeny koi angeic. Tru la aja i Nathana tro Davita a trotrohnine la etrune la ngazo hnei angeice hna kuca. Matre nyidrëti a qaja jë la ketre edromë, ene la ketre trenamo ka thapa la neköi mamoe ne la ketre atre puafala. Ame hë la Davita a drenge lai, elëhni jë hi angeic kowe lai trenamo. Öni Nathana jë hi koi angeic: “Nyipëti hi la atr!” Trotrohnine ju hi Davita e cili la etrune la ngazo i angeice qëmeke i Iehova.2 Samuela 12:1-7, 13.

14. Nemene la aqane tro sa nyipici koi Iehova me kowe la itre hne së hna hnim?

14 Loi e tro fe sa pane nyipici koi Iehova, me menyik kowe la itre trejin. Maine jë, atre hë epuni laka, hna kei hnene la ketre trejin kowe la ngazo. Epuni a ajane troa nyipici koi angeic, ke, ketre sinee i epun maine ketre atrene la hnepe lapa i epun. Ngo atre hnyawa fe hi epuni laka, Iehova la nyine tro epuni a pane nyipici kow. Haawe, tui Nathana, drengethenge Iehova jë, me thiina ka menyik kowe lai trejin. Upi angeice jë kowe la itre qatre thup göi troa thele ixatua, nge tha tro kö a hmitr. E tha tro kö angeic, haawe, tro hë epuni lai a ketre qaja kowe la itre qatre thup. E tro epuni a ujë tune lai, epuni lai a nyipici koi Iehova. Nge epuni fe hi a thiina ka menyik kowe lai trejin, ke, tro la itre qatre thupe lai a xatua angeice tro hmaca a imelekeu hnyawa me Iehova. Tro angatre lai a ameköti angeic ngöne la menyik.E jë la Levitiko 5:1; Galatia 6:1.

TRO SA CATR MATRE NYIPICI KOI IEHOVA

15Husai la ketre sinee i Davita Joxu ka nyipici. Ame lo kola thele hnene la nöj troa acili joxu Abasaloma, nyipi ewekë tro Husai a catr matre tro pala hi angeic a nyipici koi Davita me  Akötresie. Drenge hë angeice laka, traqa ha Abasaloma e Ierusalema, nge kötre hë Davita. (2 Samuela 15:13; 16:15) Matre nemene jë la hnei angeice hna troa kuca? Tro kö angeic a nue Davita me sajuë Abasaloma? Ohea. Ngacama qatre hë Davita, nge ala nyimu la itre ka thele troa humuthi nyidrë, ngo hnei Husai hna nyipici pala hi koi Davita, ke Davita la hnei Iehova hna acile troa joxu. Celë hi matre, angeic a tro jë kowe la wetr Elaio troa itronyi me Davita.2 Samuela 15:30, 32.

15, 16. Pine nemene matre loi e troa catr hnei Husai matre nyipici koi Akötresie?

16 Hnei Davita e cili hna upi Husai troa bëeke Ierusalema eë, matre troa ce xöle me Abasaloma. Ame la aja i Davita, tre tro Abasaloma a drenge la mekuna i Husai, ngo tha tro kö a drenge la mekuna i Ahithofela. Hna catr me nue mele hnei Husai matre troa drengethenge Davita me nyipici koi Iehova. Nge hnei Davita fe hna catre thith matre tro Iehova a xatua Husai; nge celë hi ewekë lai ka traqa, ke hnei Abasaloma hna drei Husai.2 Samuela 15:31; 17:14.

17. Pine nemene matre nyipi ewekë troa catr?

17 Nyipi ewekë tro fe sa catr matre troa nyipici koi Iehova me drengethenge Nyidrë hune la troa kuca la aja ne la itre atrene la hnepe lapa së, maine itre sine huliwa së maine itre ka cilëne la mus. Ame Taro, ketre trejin qaa Zapo, hnei angeic pala hi hna drengethenge la keme me thine i angeic qaane lo kola co. Angeic a drei nyidro me nyipici koi nyidro, hnene laka atraqatre la ihnimi angeic koi nyidro, nge aja i angeic tro nyidroti a mele madrin. Ngo, ame hë la angeic a ini Tusi Hmitrötr memine la Itretre Anyipici Iehova, kola sewe angeic hnene la keme me thine i angeic. Tha lapa hnyawa ha angeic, nge jole koi angeic troa qaja koi nyidro la aja i angeic troa tro koi itre hna icasikeu. Öni Taro: “Tru la elëhni nyidroti koi ni, matre nyimu macatre ne wathebo ni troa weje la hnalapa. Hnenge pala hi hna sipo Iehova troa hetrenyi la catr, matre tro ni a fedre catre kowe la ajang. Ame hë enehila, puje hë la hni nyidro, nge eni ha wai nyidroti lapa.”E jë la Ite Edomë 29:25.

18. Hetre ini kö hnei epuni hna xom qa ngöne la ini celë?

18 Epi tro fe sa hetre madrin qa ngöne la hna nyipici koi Iehova, tui Davita, me Ionathana, me Nathana, me Husai. Tha tro pi kö sa tui Abinera, me Abasaloma, itre ka tha nyipici kö. Ngacama itre atr ka ngazo së, nge itre ka tria, ngo loi e tro pe sa catr amamane koi Iehova ka hape, ka tru koi së la troa nyipici koi Nyidrë.

^ [1](paragarafe 2) Mika 6:8, MN: “Nemene la ewekë hnei Iehova hna ajane koi eö ? Ene hi la troa kuca la meköt, me hnine la thiina ka nyipici, me ce tro me Akötresi eö memine la hni ka ipië!”

^ [2] (paragarafe 7) Hna saze la itre ëj.