“Nuepi la nöjei huliwa i ’ö koi Iehova ; nge troa acatene la nöjei mekune i ’ö.”​—ITE EDOMË 16:3.

NYIMA: 135144

1-3. (a) Nemene la ewekë hna cile kow hnene la itre thöth, nge hna aceitunëne lai me nemen? (Wange ju la pane iatr.) (b) Nemene la ka troa xatuan la itre thöth ka nyihlue Iehova troa axeciën la itre mekun ka loi?

PANE mekune jë laka, eö a hnëkë troa tro kowe la ketre traon gaa nany matre troa hane sine la ketre icasikeu ka tru. Tro eö lai a xomi kar, matre traqa e cili. Ngo ame ngöne la hnë xomi kar, tru hnei atr nge nyimutre fe hnei kar matre kösë eö a pane luelu. Eloine pe, atre hnyawa hi eö la hnei eö hna ajan troa tro kow memine la kar hnei eö hna troa xom. Tha tro jë kö eö lai a xom menune la ketre kar, wanga troa nyinyape sai eö menu.

2 Hna aceitunëne la mel memine la troa ngenu, nge kösë epun itre thöth la itre atr ngöne la hnë xomi kar. Ame itre xa ijine, tha mama hnyawa kö koi eö la nyine troa axeciën ke, nyimutre palaha hnei mekun ngöne la mel. Ngo, maine atre hnyawa hi eö la hnei eö hna ajan troa traqa kow, tha jole hë lai koi eö troa iën la itre mekun ka loi. Haawe, nemene hë la gojeny hnei eö hna troa xom?

3 Tro la tane mekune celë a sa lai hnying me xatua eö troa amë panën la itre ewekë ka troa amadrinë Iehova ngöne la mele i eö. Kolo lai a hape, troa trongëne la itre eamo i Iehova ngöne la itre  mekun hnei eö hna troa xom, tune la troa ini maine huliwa, maine troa faipoipo me hetre nekönatr pena. Ketre, troa catr huliwa matre eatrëne la itre hna mekune troa kuca ngöne la huliwa i Akötresie. Itre huliwa lai ka troa aeasenyi eö koi Iehova. Maine tro eö a amë panën la huliwa i Iehova ngöne la mele i eö, tro hë Iehova lai a amanathithi eö me xatua eö troa hetre mele ka loi.—E jë la Ite Edomë 16:3.

KEPIN MATRE LOI E TROA EKÖTH AMË LA ITRE MEKUN

4. Nemene la nyine tro sa ce wang ngöne la tane mekun celë?

4 Nyipiewekë troa hetre mekune nyine eatrën ngöne la huliwa i Akötresie. Pine nemen? Tro sa ce wang la köni kepin. Tro la lue pane kepin a xatua eö troa trotrohnin laka, tro ha catr la aqane imelekeu i eö me Iehova, e tro eö a thel troa eatrëne la itre hna mekune troa kuca ngöne la huliwa i Akötresie. Nge, tro la hnaakönin kepin a amamane la enyipiewekëne troa eköth la itre mekune nyine eatrën, e thöth petre kö.

5. Nemene la pane kepin matre easa eköth la itre mekun nyine eatrën ngöne la huliwa i Iehova?

5 Ame la easa eköth amë la itre mekun nyine troa eatrën, tre, easë hi lai a olene koi Iehova la aqane hnimi së hnei Nyidrë, memine la itre hnei Nyidrëti hna kuca thatraqai së. Hane hi lai pane kepin. Önine la atre cinyihane la Salamo ka hape: “Loi la troa ole koi Iehova, . . . Ke hnei cilieti Iehova hna amadi ni hnene la huliwa i cilie ; tro ni a madine la ite huliwa ne la lue ime i cilie.” (Salamo 92:1, 4) Pane mekune jë la nöjei ewekë ka lolo hnei Nyidrëti hna hamë eö. Hnei Nyidrëti hna hamë eö la mel, me aijijë eö troa atre la nyipici göi Nyidrë, me hamëne la Tusi Hmitrötr, memine la ekalesia, memine la mejiune troa mel epine palua ngöne la Paradraiso. Ame la eö a eköth la ketre mekun nyine eatrën, tre, eö hi lai a amamane la hni ne ole i eö kowe la itre ewekë cili, nge celë hi ka troa aeasenyi eö lai koi Nyidrë.

6. (a) Nemene la thangane la itre mekun hnei eö hna eköth kowe la aqane imelekeu i eö me Iehova? (b) Nemene la itre xa mekun nyine tro eö a eatrën e thöthi petre kö eö?

6 Ame la hnaaluene kepine tre, ame la eö a thel troa eatrën la itre mekun hnei eö hna eköth amë tre, eö hi lai a kuca la itre huliwa ka loi xajawa i Iehova. Nge celë hi ka troa aeasenyi eö koi Nyidrë. Öni Paulo aposetolo: “Tha thina ka tha meköti kö Akötesie mate troa thëthëhmine la huliwa i nyipunie, memine la ihnimi hnei nyipunie hna amamane kowe la [ëje] i nyidë.” (Heberu 6:10) Ijije fe kowe la itre nekönatr tro nyudreni a eköth amë la itre mekun nyine eatrën. Ame lo kola 10 lao macatre i Christine, hnei angeic hna axeciën troa e la itre hna melën enehila hnene la itre hlue i Iehova. Ame pena Toby, 12 lao macatre i angeic. Hnei angeic hna axeciën troa e apexejene la Tusi Hmitrötr qëmekene troa xomi bapataiso. Kola 11 lao macatre i Maksim, nge 10 lao macatre i Noemi, jini angeic, la nyidroti a xomi bapataiso. Aja i nyidroti asë hi troa huliwa ngöne la Bethela. Celë hi matre, hnei nyidroti hna athip ngöne la ngöne uma i nyidro la pepa ne lö koi Bethela. Nge, tune kaa fe eö? Maine hetre mekune nyine tro a eatrën, catre jë huliwa göi troa eatrëne ej!—E jë la Filipi 1:10, 11.

Troa hmaloi koi eö troa axecië mekun, e mama hnyawa koi eö la itre mekun nyine eatrën

7, 8. (a) Pine nemene matre tha jole kö troa axecië mekune hnyawa, e hne së hna canga eköth la itre mekun? (b) Pine nemene matre tha tro ju kö hnene la ketre thöth kowe la ketre uma ne ini ka tru?

7 Nemene la hnaakönine kepin matre loi e tro eö a eköth la itre mekun nyine eatrën e thöthi petre kö eö? Nyimutre catre la itre mekun nyine tro eö a axeciën ngöne la eö a thöth. Maine jë, troa axecië mekun göi ini, maine göi huliwa, me itre xa ewekë ju kö. Ceitune  hi lai memine la eö a traqa ngöne la hna ijejea. Maine ka mama hnyawa koi eö la götrane hnei eö hna tro kow, tha tro kö a jole koi eö troa iëne la gojenyi nyine troa xom. Maine mama hnyawa koi eö la itre mekun nyine tro eö a eatrën, haawe, canga tro hi eö lai a axecië mekune hnyawa. Öni Ite Edomë 21:5: “Ame la ite mekune ne la ate cate huliwa, te, kola atena mon.” Maine tro eö a canga eköth amë la itre mekune cili, ke, tro lai a hetre thangane ka loi kowe la mele i eö. Celë hi hna melën hnei Damaris, lo angeic a thöth, nge hetre mekun ka tru nyine tro angeic a axeciën.

8 Lolo catre la hna ini hnei Damaris, matre ijije hi tro angeic a lö hnine la ketre uma ne ini ka tru, nge pëkö nyine tro angeic a nyithupen. Ngo, hnei angeice pe hna iën troa huliwa e hnine la ketre baak. Pine nemen? Pine laka, ame lo angeic a thöth, tre, hnei angeic hna mekun troa xome la huliwa ne pionie. Öni angeic: “Ajang troa huliwa, ngo sine hi la drai. Maine hnenge ju hna iën troa tro kowe la hna ini ka tru me inine troa avocat, nyipici laka, tru catre la manie hnenge hna troa kapa, ngo tha ijijinge kö troa huliwa sine hi la drai.” Hnei Damaris hna pionie koi 20 lao macatre. Hapeu, hnei angeice kö hna axecië mekun hnyawa lo angeic a thöth? Eje hi. Ame ngöne la hnë huliwa i angeic enehila tre, angeic a iöhnyi memine la itre avocat. Maine hnei angeice ju hna sisedrëne la ini ka tru, tro hë angeice lai a hane xome la huliwa ne avocat. Öni angeic: “Alanyimu thei angatr ka pë madrin hnene la huliwa i angatr.” Ame koi Damaris, ame la itre macatre hnei angeic hna xome troa huliwa ne pionie, tre, celë hi ka thue madrine i angeic, me thupë angeic qa ngöne la itre akötre hna melën hnene la itre avocat.

9. Pine nemene matre easa madrin kowe la itre thöth?

9 Nyimutre la itre thöth e cailo fen ka ujë tui Damaris, nge loi e tro sa qaja aloinyi nyudren. Ka tru ngöne la mele i nyudren la aqane imelekeu i nyudreni me Iehova, nge tune mina fe la itre mekun nyine tro nyudreni a eatrën. Ka madrine nyudren ngöne la mele i nyudren, nge nyudreni fe a thel troa trongëne la itre hna amekötin hnei Iehova ngöne la hna ini, me hna huliwa, me e hnine la hnepe lapa. Öni Solomona: “Lapauneju koi Iehova hnene la hni ’ö ka pexej. Mekuneju koi nyidë ngöne la nöjei goje i ’ö asë, nge tro pena nyidëti a amekötine la ite jë i ö.” (Ite Edomë 3:5, 6) Itre thöthi fe, atraqatre la ihnimi Iehova koi epun! Ka tru epuni koi Nyidrë, nge tro Nyidrëti a thupë epun, me eatrongë epun, me amanathithi epun.

HNËKË HNYAWA JË TROA QEJE IEHOVA

10. (a) Pine nemene matre loi e tro sa amë panëne la huliwa ne cainöj ngöne la mele së? (b) Nemene la nyine tro eö a kuca matre troa qejepengöne hnyawa la itre ini?

10 Ame la eö a amë panën la itre ewekë ka troa amadrinë Iehova ngöne la mele i eö tre, kola cia thei eö la aja troa qeje Nyidrë koi itre xan. Öni Iesu Keriso, “troa pane cainöjëne la [maca ka loi].” (Mareko 13:10) Celë hi matre, nyipiewekë catr la huliwa ne cainöj, nge loi e tro sa amë panëne ej ngöne la mele së. Ijije kö tro eö a akökötrene la aqane tro eö a cainöj? Tro kö eö a hane pionie? Ngo, tune kaa e pëkö ajane thei eö troa catre cainöj? Nge, nemene  la aqane tro eö a qejepengöne hnyawa la itre ini? Lue ewekë ka troa xatua eö: Hnëkë hnyawa jë, nge the cile kö troa qeje Iehova kowe la itre atr. Tro kö eö a öhne elanyi la madrin hnei eö hna troa kapa qa ngöne la hna catre cainöj.

Nemene la aqane tro eö a hnëkë matre troa qeje Iehova kowe la itre atr? (Wange ju la paragarafe 11, 12)

11, 12. (a) Nemene la nyine tro eö a kuca matre troa atreine qeje Iehova koi itre xan? (b) Nemene la hna kuca hnene la ketre trejin thöth matre troa qeje Iehova ngöne la hna ini?

11 Pane hnëkëne jë la hnei eö hna troa qaja kowe la sine ce ini me eö. Maine tro angeic a hnying ka hape, “Hnauëne la eö a mejiune koi Akötresie?” Hetre tane mekun ka mama ngöne jw.org, nge ka troa xatua eö troa sa la hnyinge cili. Tro jë kowe la hna hape, LA BIBLE ET VOUS > ADOLESCENTS. Troa mama la ketre fiche hna hape, “Pine nemene matre eni a mejiune koi Akötresie?” Nyialien trongëne jë lai fiche matre tro eö a atreine sa hnyawa lai hnying. Tro fe a mama ngöne lai fiche la köni xötr nyine tro eö a huliwan: Heberu 3:4, Roma 1:20, me Salamo 139:14. Hetrenyi fe la itre xa fiche nyine tro eö a hnëkëne hnyawa göne la itre xa hnying.—E jë la 1 Peteru 3:15.

12 Upe jë la itre ka ce ini me eö troa isa goeëne la site së, jw.org. Celë hi hna kuca hnei Luka. Ame la kola qejepengöne la itre hmi ngöne la kalas i Luka tre, hnei angeic hna öhne laka, ka tria la hna qaja hnene la itus göne la Itretre Anyipici Iehova. Ngacama hetre hnepe xou thei Luka, ngo hnei angeic hna sipo porofesör tro angeic a qaja la kepin matre ka tria la hna cinyihan. Hnene la porofesör hna nue angeic troa qaja la hnei angeic hna mejiune kow, me amamane la site së qëmekene la kalas. Ame hnene la porofesör hna upe la itre nekönatr troa isa goeëne ngöne la hnalapa i angatr la video hna hape, Isi Jë Ngo The Hnaiwanakoime Kö. Pane mekune jë la madrine i Luka pine la hnei angeic hna qeje Iehova ngöne la hna ini!

13. Pine nemene matre tha tro pi kö sa cil qëmekene la itre jol?

 13 Maine eö a cile kowe la itre jol, the kucakuca kö. Catre jë pe eatrëne la itre hnei eö hna mekun. (2 Timoteo 4:2) Celë hi hna kuca hnei Katarina. Ame lo angeic a 17 lao macatre, hnei angeic hna mekun troa cainöj kowe la itre sine huliwa i angeic. Anyimua qaqa angeic hnene la ketre e angatr. Ngo, tha hnei angeice pi kö hna jea qa ngöne la itre hnei angeic hna mekun troa eatrën. Hnene la aqane ujë i angeic hna ketri Hans, ketre sine huliwa i angeic. Hnei Hans hna nyiqaane e la itre itusi së, me ini Tusi Hmitrötr, me hane xomi bapataiso. Pine laka, hna fek hnei Katarina kowe la ketre götran, thatre ju pë hë angeic la hna kuca hnei Hans. Ngo, 13 lao macatre thupen, hnei angeic me hnepe lapa i angeic hna sine la ketre icasikeu. Sesëkötre ju hi angeic laka, Hans la ka cile fë cainöj! Atraqatre la madrine i Katarina laka, tha hnei angeice kö hna cil troa cainöj kowe la itre sine huliwa i angeic.

THE JEA KÖ QA NGÖNE LA ITRE MEKUNE I EÖ

14, 15. (a) Nemene la nyine tro la thöth a mekune hnyawa e kola huli angeic kowe la ngazo? (b) Nemene la nyine tro eö a kuca e traqa ju la ewekë cili?

14 Hnene la tane mekune celë hna xatua eö troa amë panën la itre ewekë ka troa amadrinë Iehova ngöne la mele i eö, memine la itre mekun hnei eö hna mekun troa eatrën. Ngo, alanyimu la itre sine xötre i eö ka thel troa isa kuci aja. Nge, tro fe angatr a hane hë eö troa nyitipu angatr. Troa traqa la ijin laka, loi e tro eö a amamane hnyawa koi angatr laka, ame la ka tru koi eö tre, ene la troa eatrëne la itre hnei eö hna mekun. The nue kö la ketre troa sewe eö troa eatrën itre ej. Maine eö ngöne la hnë xomi kar, tro kö eö a xome menun la ketre kar hnene hi laka, ka madrin la itre atr e hnin? Ohea!

15 Haawe, nemene la nyine tro eö a kuca e kola huli eö hnene la itre atr troa ujë tui angatr? The easenyine kö la itre ewekë ka troa huli eö kowe la ngazo. (Ite Edomë 22:3) Pane mekune jë la itre ethanyine la itre huliwa ka ngazo. (Galatia 6:7) Loi e troa hetre hni ne ipië, me kapa laka, nyipiewekë la ihaji. Drenge ju la hna qaja hnei keme me thin, memine la itre trejin ka macaj ne la ekalesia.—E jë la 1 Peteru 5:5, 6.

16. Pine nemene matre nyipiewekë tro sa hetre hni ne ipië? Qaja jë la ketre hna melën.

16 Ka hetre hni ka ipië Christoph, nge celë hi ka xatua angeic troa kapa la ihaji. Tha qea ju kö thupene la hna bapataiso angeic, hnei angeic hna nyiqaane tro lapa kowe la hnë kuci elo. Ame e cili, hnene la itre xa thöth hna hane hë angeic troa lö hnine la ekip i angatr. Ame hnei angeic hna ce ithanatane memine la ketre qatre thup. Hnene la qatre thup hna thuecatre koi angeic troa mekune hnyawa la itre ethan la troa lö hnine la ketre ekip, tune la troa iwajahuj. Ngo, hnei Christoph kö hna iëne troa lö hnine la ekip ne kuci elo. Öhne ju hi angeic e cili laka, ka iakötrë la elo, nge ka hetre ethanyin. Hnei Christoph hna ithanata hmaca memine la itre qatre thup, matre hnei angatr hna haji angeic jëne la Tusi Hmitrötr. Öni Christoph, “Hnei Iehova hna upe koi ni la itre ka hamë eamo ka lolo. Ngacama tha hnenge kö hna canga kapa, ngo hnenge hna drei Nyidrë.” Hapeu, hetre hni ne ipië i eö kö troa kapa la ihaji?

17, 18. (a) Nemene la aja i Iehova kowe la itre thöth enehila? (b) Nemene la nyine tro eö a kuca matre tha tro kö eö a hace elany? Qaja jë la ketre hna melën.

17 Öni Tusi Hmitrötr: “Thupëtesiji [maine föe hmae] fe, madinejë eö e ija pete kö eö, nge aciacijë la hni ’ö ngöne la ite drai ne [thöthi] ’ö.” (Ate Cainöj 11:9) Iehova a ajane tro eö a madrin ngöne la ijine eö a thöth. Trotrohnine  hë eö jëne la tane mekune celë laka, tro eö a madrin, e tro eö a amë panëne la itre mekun nyine tro eö a eatrën ngöne la mele i eö. Ketre, tro fe eö a trongëne la itre hna amekötin hnei Iehova ngöne la eö a axecië mekun. Maine celë hi hnei eö hna kuca tre, canga tro hi eö lai a öhne la aqane thupë eö hnei Iehova, me eatrongë eö, me amanathithi eö. Pane mekune jë la itre eamo hnei Nyidrëti hna hamë eö ngöne la Wesi Ula i Nyidrë, nge trongëne jë la hna hape: “Mekuneju la ate xupi ’ö ngöne la ite drai e [thöthi] ’ö.”—Ate Cainöj 12:1.

18 Saqe hi la itre thöth tru, me nyipi atr. Ngazo pe, alanyimu la ka hace pine laka, tha nyipi loi kö la itre mekun hnei angatr hna thel troa eatrën ekö. Ame itre xan, tha hnei angatre kö hna thel troa hetre mekun nyine eatrën. Ngo, e tro eö a amë panën la itre mekun hnei eö hna ajan troa eatrën ngöne la huliwa i Iehova, haawe, tro eö a hetre madrine elanyi qa ngöne la hnei eö hna axeciën itre ej. Celë hi hna melën hnei Mirjana. Ame la angeic a thöth tre, ka atreine angeic kuci elo. Nge, hna hane hë angeic troa sine la Jeux olympiques d’hiver. Ngo, hnei angeice pe hna iën troa huliwa koi Iehova o drai. Traqa koi 30 lao macatre thupen, nge angeice palahi a huliwa koi Iehova memine la föi angeic. Öni angeic, “Ame la itre atr ka thel troa hlemu, me trenamo tre, tha nyipi madrin kö angatr. Nge, ame la mekun ka sisitria nyine tro sa thel troa eatrën tre, ene la troa nyihlue i Iehova, me xatuane la itre atr troa atrepengöi Nyidrë.

19. Pine nemene matre loi e troa amë panëne la huliwa i Iehova ngöne la kola thöth?

19 Loi e troa qaja aloine la itre thöth. Ngacama nyimutre la itre jol hnei nyudreni hna cile kow, ngo nyudreni palahi a amë panëne la huliwa i Iehova ngöne la mele i nyudren. Ketre, nyudreni a eköth la itre mekun nyine troa eatrën ngöne la huliwa i Iehova, nge ka tru koi nyudreni la huliwa ne cainöj. Nge, tha hnei nyudreni kö hna nue la fen troa thahe la itre mekuna i nyudren. Tha tro pi kö a gufa la trengecatre hnei epun hna kuca. Atraqatre la ihnimi ne la itre trejin koi epun, nge aja i angatr troa xatua epun. Haawe, “nuepi la nöjei huliwa i ’ö koi Iehova ; nge troa acatene la nöjei mekune i ’ö.”