Tro jë kowe la alien

Tro jë kowe la itre mekune ka co

Tro jë kowe la itre alien

Itretre Anyipici Iehova

Drehu

Ita Ne Thup (Nyine Inin)  |  Eiperem 2016

Nyipici Jë Koi Iehova Jëne Manathith

Nyipici Jë Koi Iehova Jëne Manathith

“Loi e xöte thenge angat angete hetenyi la nöjei hna thinge hnaean, thenge la lapaune me xomi hnin.”HEBERU 6:12.

NYIMA: 8654

1, 2. Nemene la jole ka traqa koi Iefetha me nekö i nyidrë?

KOLA nyenyap hnene la ketre jajinyi kowe la keme i angeic. Angeic a madrine ke bëeke hmaca ha la keme i angeic qa hna isi. Angeic a nyima me fiafia, ke hune hë la trongene isi ne la keme i angeic. Ngo tro ha asesëkötrë angeic hnene la hna troa qaja hnei kem. Nyidrëti a treij me kuie zezene la iheetre i nyidrë me hape: “Ekölö hi ni neköng, hace hë ni göi ’ö, nge hnei ’ö hna akötë ni.” Nyidrëti a qaja jë la trenge ewekë ka troa saze la mele i angeic, ene lo hnei nyidrë hna sisinyi koi Iehova. Matre ame kowe la nekö i nyidrë jajinyi tre, tha tro pë hë angeic a hane faipoipo me hnaho. Ngo mingöminge catre la aqane sa i jajinyi koi kem, ke celë hi lai ka thuecatre i nyidrë troa eatrëne lo hna sisinyi koi Iehova. Kola mama jëne la aqane sa ne lai jajinyi ka hape, ame asë hi la itre hna amekötin hnei Iehova thatraqai angeic, tre, nyine loi lai koi angeic. (Angete Amekötin 11:34-37) Ame la keme a öhne la etrune la lapaune i angeic, madrine catre jë hi nyidrë ke, atre hi nyidrëti laka, troa amadrinëne catrëne la hni Iehova hnene la aqane ujë ne la nekö i nyidrë.

 2 Ka catre mejiune Iefetha me nekö i nyidrë kowe la aqane ameköti ewekë i Iehova. Nge tha ujë pi kö la mekuna i nyidro, ngacama hace pi hë. Ame koi nyidro, pëkö ketre ewekë ka sisitria hune la troa amadrinëne la hni Iehova.

3. Troa xatua së tune kaa hnene la tulu i Iefetha me nekö i nyidrë?

3 Eje hi laka, tha ka hmaloi kö e itre xa ijine troa mele nyipici koi Iehova. Celë hi matre kola qaja hnei Tusi Hmitrötr, ka hape: “Catepi nyipunie kowe la lapaune.” (Iuda 3) Maine aja së troa trongëne la hna qaja hnei Tusi Hmitrötr, loi e tro sa xomi ini qa ngöne la aqane cile catre i Iefetha me nekö i nyidrë. Matre nemene la ka amamane laka, ka mele nyipici nyidroti koi Iehova?

MELE NYIPICI JË NGACAMA TRU LA IAJOJEZI

4, 5. (a) Nemene la hna amekötine hnei Iehova kowe la angetre Isaraela lo angatre a lö kowe la Nöje Hna Thingehnaean? (b) Tune la hna amamane ngöne Salamo 106, nemene la itre ethanyine kowe la nöje Isaraela pine la hna tha idrei?

4 E nöjei drai, hnei Iefetha me nekö i nyidrë hna majemine ithanatane me mekune la itre ethanyine la hna tha idrei hnei angetre Isaraela. Hnei Iehova lo hna amekötine kowe la angetre Isaraela troa lepe apatrene qa ngöne la Nöje Hna Thingehnaean la itre ka thili koi itre haze. Ngazo pe, tha trongëne kö angatr. (Deuteronomi 7:1-4) Matre, ala nyimu pi hë la angetre Isaraela ka xome la thiina ne la angetre Kanana, ene la troa thili kowe la itre haze me kuci ngazo.—E jë la Salamo 106:34-39.

5 Hnene laka hna tha idrei hnene la angetre Isaraela, haawe, hnei Iehova hna nue angatr kowe la ithupëjia. (Angete Amekötin 2:1-3, 11-15; Salamo 106:40-43) Matre, jole catre kowe la itre hnepe lapa ka hni koi Iehova troa mele nyipici koi Nyidrë ngöne la itre macatre cili. Ngo, Tusi Hmitrötr a qaja la itre atr ka mele nyipici tui Iefetha me nekö i nyidrë, me Elekana, me Hana, me Samuela. Ka xecie hnyawa e kuhu hni angatre troa amadrinë Iehova.—1 Samuela 1:20-28; 2:26.

6. Nemene la itre ewekë ka iajojezi enehila, nge tune kaa la aqane tro sa ujë göne lai?

6 Ame ngöne la hneijine së, itre atr a mekune me ujë tune la angetre Kanana. Kola wang atrune la kuci ngazo, me iakötrë, me mani. Ngo, aja i Iehova troa hmekë së tune lo aqane hmekëne Nyidrë la angetre Isaraela ekö qa ngöne la itre ewekë cili. Hetre itre ithuemacanyi hne së hna kapa qaathei Nyidrë. Ngo nemene la itre ini nyine tro sa xome qa ngöne la itre tria i angatr? (1 Korinito 10:6-11) Loi e tro sa catre thipetrije la aqane mekuna i fen. (Roma 12:2) Hapeu, nyipi ewekë kö tro sa isine troa ujë tune lai?

AQANE MELE NYIPICI IEFETHA NGACAMA HNA AKÖTRË ANGEIC

7. (a) Nemene la aqane akötrë Iefetha hnene la itre atrene la nöj? (b) Nemene la aqane ujë i Iefetha?

7 Ame ngöne la hneijine i Iefetha, hna akötrëne la angetre Isaraela hnene la angetre Filisiti me angetre Amona pine la hna tha drei Iehova. (Angete Amekötin 10: 7, 8) Ketre, hetre itre xa jole hna troa cile kow hnei Iefetha, nge ka xulu qaathene la itre sipu trejin me angeic memine fe la itre tane la nöj. Hnene laka, ka zalu angatr nge ka xele angatre ma wai angeic, ene pe, hnei angatre hna helë angeic qa ngöne la hnepadro, edrö i angeice ngöne la hnalapa ne la keme i angeic. (Angete Amekötin 11:1-3) Ngo tha saze pi kö la thiina i Iefetha koi angatr. Nemene la ka amamane lai? Ame lo kola sipo iele angeic hnene la itre qatr ne la nöj matre troa xatua angatr, hnei angeic hna kapa. (Angete Amekötin 11:4-8) Nemene la ka upi angeic troa ujë tune lai?

8, 9. (a) Nemene la itre hna amekötine ka ej e hnine la Wathebo i Mose ka xatua Iefetha troa xomi mekune hnyawa? (b) Nemene la ewekë ka tru koi Iefetha?

 8 Iefetha la ketre atre isi ka catr, nge atre hnyawa hi angeic la aqane trongene la nöje i Isaraela memine fe la Wathebo i Mose. Matre, mama hnyawa hi koi angeic la aqane ujë i Iehova kowe la nöje i Nyidrë. Celë hi ka aijijë angeic troa atrehmekune la loi me ngazo xajawa i Akötresie. (Angete Amekötin 11:12-27) Haawe, hnene la itre ithuemacanyi hnei angeic hna kapa hna xatua angeic ngöne la itre ijine angeic a axecië mekun. Mama cile hnyawa koi angeic la mekuna i Iehova göi elëhni me göi itëkeun, me göne fe lo aja i Iehova, ene la tro la itre hlue i Nyidrë a ihnimekeu. Ketre, Wathebo i Mose fe a amamane koi angeic la aqane troa ce mel memine la itre trejin me angeic, ngo memine fe la itre ka methinë angeic.—E jë la Esodo 23:5; Levitiko 19:17, 18.

9 Hnene fe la tulu i Iosefa hna xatua Iefetha. Hnei Iosefa lo hna hnim me utipine la itre trejin me angeic, ngacama hna methinë angeic. (Genese 37:4; 45:4, 5) Kola mekune laka, hnei Iefetha hna mekune hmaca lo hna melëne hnei Iosefa, matre celë hi lai ka xatua Iefetha troa ujë thenge la aja i Iehova. Ngacama akötre catre koi Iefetha la hna kuca koi angeic hnene la itre trejin me angeic, ngo ame la ka tru koi angeic, tre, ene la troa isigöline la ëje i Iehova me nöje i Nyidrë. Tha hnei angeice pi kö hna drenge la itre sipu mekuna ne la hni angeic. (Angete Amekötin 11:9) Hnene laka, ka ej e kuhu hni angeic la troa mele nyipici koi Iehova, ame hna amanathithi angeic me angete Isaraela hnei Iehova.—Heberu 11:32, 33.

Tha tro pi kö sa nue la itre sipu mekuna ne la hni së troa sewe së troa huliwa nyipici koi Iehova

10. Nemene la nyine tro sa kuca matre troa eatrongë së hnene la itre trepene meköti ne la Tusi Hmitrötr?

10 Nemene la ini nyine tro sa xome qa ngöne la tulu i Iefetha? E akötrë së ju hë hnene la ketre trejin, maine pena easa mekune laka, tha ka meköti kö la hna kuca koi së, nemene la nyine tro sa kuca e cili? Tha tro pi kö sa nue la itre sipu mekuna ne la hni së troa sewe së troa huliwa nyipici koi Iehova. The mano kö troa tro koi itre hna icasikeu me ce huliwa memine la itre atrene la ekalesia. Catre jë së nyitipu Iefetha me drengethenge Iehova. Tro lai a xatua së troa elë hune la itre jol ka traqa koi së, nge tro fe hë së a hane amamai tulu tui Iefetha.—Roma 12:20, 21; Efeso 4:32.

AQANE MAMA LA LAPAUN

11, 12. Nemene la hnei Iefetha hna sisinyi koi Iehova, nge nemene la aliene lai?

11 Tha sihngödri kö koi Iefetha laka, nyipi ewekë koi angeic la ixatua qaathei Iehova göi troa thapa la nöje i Isaraela qaathene la angetre Amona. Öni angeic e sisinyi koi Iehova ka hape: “Maine tro cilieti a nue la ite nekö i Amona kowe la imeng, nge e traqa hmaca ha ni memine la tingetinge qa thei ite nekö i Amona, ame la ka tro ha löpi qa ngöne la qëhnelö ne la umange troa ixelë me ini, celë hi thatraqai Iehova, nge tro ni a hujën’ eje nyine huje ne deuth.” (Angete Amekötin 11:30, 31) Nemene la aliene la “huje ne deuth”?

12 Methi Iehova troa dreuthe la itre neköne la itre atr göi troa huuje koi Nyidrë, matre trotrohnine hi së laka, tha Iefetha kö e celë a  mekune la aqane huuje cili. (Deuteronomi 18:9, 10) Ame la “huje ne deuth” ngöne la Wathebo i Mose, tre, ketre ahnahna lai hna nue apexejene koi Iehova. Haawe, ame koi Iefetha, tro lai atr a huliwa i Iehova ngöne la uma ne heta ngöne la mele i angeic ka pexej. Ame hnei Iehova hna drei Iefetha me xatua angeic troa hun ngöne la hna isi. (Angete Amekötin 11:32, 33) Matre drei la hnei Iefetha hna nue hnyawane koi Iehova?

13, 14. Kola mama tune kaa la lapaune i Iefetha ngöne Angete Amekötin 11:35?

13 Pane mekune ju la ewekë ka traqa ngöne la qaane la tane mekune celë. Ame la kola bëeke hnei Iefetha qa hna isi, nekö i angeic jajinyi ka ala cas nge hna nekö hnimën, lo pane atr ka traqa troa kepe angeic. Hapeu, tro jë kö Iefetha a nyipici kowe la hnei angeice hna sisiny? Tro kö angeic a nue la nekö i angeic troa huliwa ngöne la uma ne heta ngöne la mele i angeic ka pexej?

14 Hnene mina fe la itre trepene meköti ka ej ngöne la Wathebo i Mose hna xatua Iefetha troa xomi mekune hnyawa. Maine jë, hnei angeic hna mekune hmaca la itre trenge ewekë ngöne Esodo 23:19, lo kola upe la nöje i Akötresie troa hetre hni ne aja troa hamëne koi Iehova la ka sisitria. Hnene fe la Wathebo i Mose hna qaja ka hape, e nyi xepu jë koi Iehova hnene la ketre atr maine sisinyi pena, “tha tro kö angeic’ a shashaithe la hna qaja hnei angeic, ngo tro angeic’ a kuca asë thenge la hna tropi qa ngöne la qe i angeic.” (Numera 30:2) Tui Hana ketre föe ka mele nyipici ngöne la ijine cili, hnei Iefetha fe hna nyipici kowe la hnei angeic hna sisinyi ngacama atre hë angeic la pengöne la mele i angeic elanyi me nekö i angeic. Hnene laka, tro pë hë la nekö i angeic a huliwa ngöne la uma ne heta, haawe, tha tro pë hë a hane faipoipo me hetre nekönatr. Matre tro lai a pë matra i Iefetha, nge pë pë hë ka troa xome pe la itre zi angeic. (Angete Amekötin 11:34) Ngo ame fe e cili, kola mama la aqane nyipici Iefetha, öni  angeic: “Hnenge hna ewekë koi Iehova, nge tha ’teine kö troa hmaca.” (Angete Amekötin 11:35) Hnei Iehova hna kapa madrine la aqane nue apexejene Iefetha la nekö i angeic, ame hnei Nyidrëti hna amanathithi angeic. Hapeu, tro kö epuni a hane nyipici tui Iefetha?

15. Nemene la hne së hna sisiny, nge nemene la ka troa amamane laka, ka lapaune së tui Iefetha?

15 Ame la easa nue la mele së koi Iehova, easë hi lai a sisinyi koi Nyidrëti ka hape, easë hë a kuca la aja i Nyidrë, ngacama traqa ju hë la itre jol. Tha sihngödri kö koi së laka, tro ha nango jol e itre xa ijine troa eatrëne la hne së hna sisiny. Ngo hapeu e upi së jë troa kuca la ketre ewekë ngo tha aja së pe? E tro sa elë hune la xou nge hetre aja së troa drengethenge Akötresie, easë hi lai a amamane laka, ka nyipici së kowe la hne së hna sisiny. Eje hi laka tha ka hmaloi kö, ngo atraqatre catre kö la itre manathithi hne së hna troa kapa qaathei Iehova. (Malaki 3:10) Ngo tune kaa fe la nekö i Iefetha jajiny? Nemene la aqane ujë i angeic kowe la hna sisiny hnei kem?

Nemene la aqane tro sa amamane la lapaune së tui Iefetha me nekö i angeic? (Wange ju la paragarafe 16, 17)

16. Nemene la aqane ujë ne la nekö i Iefetha kowe la huliwa ka hnyipixe? (Wange ju la pane iatr.)

16 Isa pengöne kö la hna sisinyi hnei Iefetha memine la hna sisinyi hnei Hana. Ame la hnei eahlo hna sisinyi koi Iehova, tre ene la troa nue la nekö i eahlo, Samuela, troa huliwa ngöne la uma ne heta ceitu me ketre Nazeri. (1 Samuela 1:11) Nge hna nue la itre Nazeri troa faipoipo me hetre nekönatr. Ngo ame la nekö i Iefetha tre, “huje ne deuth” hna nue apexejen, matre tha tro pë hë a hane faipoipo me hetre nekönatr. (Angete Amekötin 11:37-40) Pane mekune jë: Maine ju, tro angeic a faipoipo memine la ketre atr ka hlemu loi ngöne la nöj, ke ketre tane isi e Isaraela la keme i angeic. Ngo angeice enehila a troa huliwa ngöne la uma ne heta tune la ketre hlu. Nemene la aqane ujë i angeic kowe la aqane mele celë? Kola mama laka, huliwa i Iehova la ka tro pa ngöne la mele i angeic, öni angeic koi kem: “Kucajë koi ni tune lo hna xulu qa ngöne la qe i nyipë.” (Angete Amekötin 11:36) Hnei angeice pë hë hna nue la sipu aja i angeic troa faipoipo me hetre nekönatr, matre troa nyihlue i Iehova. Tro sa nyitipune tune kaa la aqane hujën angeic la mele i angeic koi Iehova?

Hnei angeice hna huujëne la mele i angeic koi Iehova, matre tha hane pë hë faipoipo me hetre nekönatr

17. (a) Nemene la aqane tro sa amamane la lapaune së tui Iefetha me nekö i angeic? (b) Tro la hna qaja ngöne Heberu 6:10-12 a xatua së tune kaa troa huujëne la mele së?

 17 Itre thauzan lao thöth keresiano a huujën la mele i angatr troa nyihlue i Iehova, matre tha mekune kö angatr troa faipoipo me troa hetre nekönatr enehila. Pine nemen? Pine laka, angatr a ajane troa huliwa catre hmaca kö koi Iehova. Ketre, nyimutre la itre keme me thin ka qatre hë, nge ka nue pe lo aja i angatr troa ce lapa memine la itre nekö i angatr me api angatr, matre troa nyihlue i Iehova hnyawa. Angatr e cili a nue la traem me trenge catre i angatr koi Iehova. Ame itre xan e angatr, kola huliwa ngöne la itre hna xupi Uma Ne Baselaia, maine itre xa hnë xupi uma ju kö thatraqane la huliwa i Akötresie. Itre xan a sine la Ini Koi Itre Ka Cainöj me feke kowe la ketre ekalesia ka aja ixatua. Ame itre xan, kola mekune troa cainöje atrunyi ngöne lo ijine Drai Ne Amekunën. Tha tro pi kö Nyidrëti a thëthëhmine la itre trenge catre hna kuca hnene la itre trejin celë. (E jë la Heberu 6:10-12.) Tune kaa fe epun? Tro kö epuni a hane huujëne la mele i epuni tune lai?

INI KOI SË

18, 19. Nemene la hne së hna inine qa ngöne la hna melëne hnei Iefetha me nekö i angeic jajiny, nge nemene la aqane tro sa nyitipu nyidro?

18 Nemene la ka xatua Iefetha troa elë hune la itre jole ka nyimutre? Hnei angeic pala hi hna nue Iehova troa e angeic ngöne la nöjei ijine angeic a axecië mekun. Tha hnei angeic kö hna nue la itre atr ka lapa xötreithi angeic troa saze la thiina i angeic. Hnei angeic hna mele nyipici, ngacama akötrë angeic ju hë hnei itre xan. Haawe, hnei Iehova hna amanathithi Iefetha me nekö i angeic hnene la aqane nue apexejene nyidro la mele i nyidro koi Nyidrë. Matre jëne Iehova, hnei nyidroti hna sajuëne la hmi ka wië. Ngacama tha nyihlue i Iehova hë hnene la itre xan, ngo hnei nyidroti pala hi hna nyipici koi Iehova.

19 Öni Tusi Hmitrötr: “Xöte thenge angat’ angete hetenyi la nöjei hna thinge hnaean, thenge la lapaune me xomi hnin.” (Heberu 6:12) Loi e tro sa nyitipu Iefetha memine la nekö i angeic jajinyi me lapa atre laka, e tro sa mele nyipici koi Iehova, tro kö Nyidrëti a amanathithi së.