Tro jë kowe la alien

Tro jë kowe la itre mekune ka co

Tro jë kowe la itre alien

Itretre Anyipici Iehova

Drehu

Ita Ne Thup  |  Na. 6 2017

Nemene La Nyipi Pengöi Iesu?

Nemene La Nyipi Pengöi Iesu?

Pëkö e easë ka trene foto i Iesu. Ketre pë fe kö ka hane desën maine kuca la ketre sculpture i nyidrë. Ngo ame pe, nyimutre la itre itusi ekö ka qeje nyidrë.

Thatre hnyawa kö la itre ka desë ekö, la pengöi Iesu. Celë hi matre angatr a desë nyidrë thenge la itre hnei angatr hna mejiune kow, maine thenge la aqane mele i angatr. Maine pena hna qaja koi angatr hnene la ketre atr la aqane troa desë nyidrë. Ngo ame pe, ame la itre iatr hna desën me itre sculpture, tre, tha kolo kö a amamane hnyawa kowe la itre atr la nyipi pengöi Iesu memine la itre ini qaathei nyidrë.

Ame itre xan tre, hnei angatre hna desë Iesu, tune la ketre atr ka kucakuca me ka qea i hnaihe, me ka hna ienaj. Ame ngöne la itre xa iatr, ke ketre angela Iesu, nge kola mama hune la he i nyidrë la ketre korona gool hna hape, auréole. Ketre tha hna ami nyidrëti kö me itre xan, ke tha ceitu i nyidrëti kö me angatr. Hapeu kolo kö a amamane hnyawa hnene la itre iatre cili la nyipi pengöi Iesu? Tro sa atre tune kaa? Loi e tro sa sine thel e hnine la Tusi Hmitrötr, la itre ithuemacanyi ka troa xatua së troa trotrohnine me atre la nyipi pengöi nyidrë.

“HNEI CILIETI HNA HNËKËNE LA NGÖNETEI THATRAQAI NI”

Celë hi itre hna qaja hnei Iesu lo nyidrëti a thith, ngöne lo ijine kola bapataiso nyidrë. (Heberu 10:5; Mataio 3:13-17) Haawe ka tune kaa la ngönetrei Iesu? Qëmekene la kola hnaho Iesu, hnene la angela Gaberiela hna qaja amamane koi Maria, ka hape: “Tro ha eö a upune, me hnahone la nekö trahmany, . . . Hupuna i Akötesie.” (Luka 1:31, 35) Eje hi, ketre atr ka pexeje Iesu tui Adamu ekö ngöne lo qaan. (Luka 3:38; 1 Korinito 15:45) Maine jë, nyidrëti la ketre trahmanyi ka mingöminge tui Maria, thine i nyidrë.

Ame Iesu, tre, ka hna ienaj nyidrëti ekö tune lo angetre Iudra. Nge celë hi isapengönyi angatre memine lo angetre Roma. Ame la troa hna ienaj, tre, kolo lai a ka hape, ka inyipi me metrötr. Celë hi matre tha ka qea menu kö ej maine dro pena. Maine jë hnei Iesu hna nyihnyawane me xöje la ienaje i nyidrë memine fe la penehe i nyidrë. Ngo ame pe lo itre Nazeri, tui Samasona ke, hna wathebo angatre troa xötre ihe.—Numera 6:5; Angete Amekötin 13:5.

Ketre atr ka tratrau sinöe Iesu, uti hë lo nyidrëti a 30 lao macatre, nge kolo ijine pë pala kö masin. (Mareko 6:3) Nge ketre atr ka tru trengecatre Iesu. Ame ngöne lo nyidrëti a nyiqaane cainöj, hnei nyidrëti “hna longëtine [ce ele] la ite eno ka co nyine wameuc, me helë angat’ asë qa hnine la ēnē, me nöjei mamoe, me bolok ; me nenge tije la ite mani angete itö mani, me qene ipiëne la nöjei laulau .” (Ioane 2:14-17) Eje hi laka ketre atr ka tru trengecatre hmekuje hi la ka atreine kuca lai. Hnei Iesu hna thupëne me huliwane hnyawane la ngönetrei nyidrë, matre troa eatrëne la hnëqa i nyidrë qaathei Iehova. Öni nyidrëti ka hape: “Qânge troa cainöjëne la maca ka loi ne la baselaia i Akötesie kowe la ite xa lapa pena ; ke hna upi ni thatraqane lai.” (Luka 4:43) Celë hi matre, nyipiewekë troa hetre trengecatr, matre troa trongëne la itre gojenyi gaa nanyi ne Palestine, me cainöjëne la maca cili.

“TROHEMI KOI NI, . . . NGE TRO NI A AMANONYI NYIPUNIE”

Maine jë hnene la aqane ujë i Iesu ka lolo, matre canga saqe hi easenyi koi nyidrë la itre “ka huliwa me hace.” (Mataio 11:28-30) Kola amamane hnene la thiina i nyidrëti ka menyik laka, aja i nyidrëti troa xatuane la  itre ka pi drei nyidrë me amanonyi angatr. Ketre tune mina fe la itre ka co, aja i nyudreni troa hane easenyi koi Iesu. Öni Tusi Hmitrötr: “Nyidëti a xepe angat, me ati ime hui angat.”—Mareko 10:13-16.

Ngacama hnei Iesu hna pane akötr qëmekene troa mec, ngo tha ka kucakuca fe kö nyidrë me hace. Hnei Iesu hna hane sine la itre feet tune la ketre nyikein e Kana, nge e cili mina fe hi lo ijine nyidrëti hna ujëne la tim matre troa nyi waina. (Ioane 2:1-11) Ame fe ngöne la itre xa icasikeu, hnei nyidrëti hna hamëne la itre ini ka cile hut.—Mataio 9:9-13; Ioane 12:1-8.

Ketre, hnei Iesu hna cainöj kowe la nöjei atr asë, me thue mejiune i angatr göne la mele ka tha ase palua kö. (Ioane 11:25, 26; 17:3) Ame ngöne la kola qaja hnene lo ala 70 lao itretre drei Iesu la itre hnei angatr hna melëne ngöne la hna cainöj, ke, “madine” catre nyidrë. Öni nyidrëti jë hi: “Madine jë qa ngöne la hna cinyihane la ite ëje i nyipunie e hnengödrai.”—Luka 10:20, 21.

“THE TRO KÖ NYIPUNIETI A TUNE LAI”

Ame ngöne lo hneijine i Iesu, hnene la itre hene ne hmi hna pi mama fë la pengöi angatr memine la hnëqa i angatr. (Numera 15:38-40; Mataio 23:5-7) Ngo hnei Iesu hna inine la itre aposetolo i nyidrë laka, tha tro kö angatr a “qene joxu” koi itre xan. (Luka 22:25, 26) Hnei nyidrëti hna hmekë angatr me hape: “Wange kö la angete cinyihany, itete ajane troa tro agö fë la ite ixete ka hoea, me troa ihehe ngöne la ite hnaitö.”—Mareko 12:38.

Hnei Iesu hna amamai tulu. Hnei nyidrëti hna ce memine la ka ala nyimu, nge kösë ceitu nyidrëti hi me angatr. (Ioane 7:10, 11) Ketre tune mina fe lo nyidrë memine lo ala 11 lao aposetolo i nyidrë, laka tha hnei nyidrëti kö hna pi mama. Hnei Iuda lo atre wanaxoeë Iesu, hna idreme me nyidrë, ke celë hi “haten” laka, Iesu hi lai.—Mareko 14:44, 45.

Nyipici laka tha tru kö hnei itre ithuemacanyi göi Iesu, ngo ame pe, tha ka ihmeku kö memine lo itre aqane desë nyidrë. Ame la ka nyipiewekë catr tre, ene la aqane goeë nyidrëti hne së enehila ngo tha eje kö la pengöi nyidrë.

“XOXOPA PE HI LA IJIN, AME HNA THA ÖHNYI NI HMACA KÖ”

Celë hi itre hnaewekë hnei Iesu hna qaja, qëmekene tro nyidrëti a mec. (Ioane 14:19) Hnei Iesu hna huujëne la mele i nyidrë, nyine “thupene mele ne la nöjei ate ka kösau.” (Mataio 20:28) Ame ngöne lo hnaakönine drai, hnei Akötresie hna amele Iesu hmaca a ketre “u”, me aijijë nyidrëti troa “nyipi amamai nyidëti” kö kowe la itretre drei nyidrë. (1 Peteru 3:18; Ite Huliwa 10:40) Nemene la pengöi Iesu ngöne lo nyidrëti a mama kowe la itretre drei nyidrë? Tha wangatrehmekunyi nyidrëti kö hnei angatr, ketre tune fe la itre sinee i nyidrë, ke, saze hë nyidrë. Hnei Maria Magadalena hna imenu Iesu pena memine la ketre atre nyihnyawa gatran. Ame pena kowe la luetre drei Iesu ka trongëne la gojenyi ne Emao, ke, ketre trenyiwa nyidrë koi nyidro.—Luka 24:13-18; Ioane 20:1, 14, 15.

Haawe, nemene hë la nyipi pengöi Iesu enehila? Ame ngöne la 60 lao macatre thupene lo meci Iesu, hetre itre hna meköle goeëne hnei Ioane aposetolo göi nyidrë. Tha hnei angeice kö hna öhnyi Iesu e meci hune la kuluse. Ngo hnei angeice pe hna öhnyi Iesu, a ketre “Tixene la nöjei tixen, nge Joxu ne la nöjei joxu,” ene la Joxu ne la Baselaia i Akötresie. Eje hi, Iesu hi elany la ka troa apatrene trije la nöjei ithupëjia me Akötresie, ene la itre dremoni me itre atr ka ngazo. Ketre nyidrëti fe la ka troa amanathithine la nöjei atr asë epine palua.—Hna Amamane 19:16; 21:3, 4.