Tro jë kowe la alien

Tro jë kowe la itre mekune ka co

Tro jë kowe la itre alien

Itretre Anyipici Iehova

Drehu

Ita Ne Thup  |  Na. 4 2017

Troa e qa ngöne la götrane maca kowe la götrane mi la itre mataitusi qene Heberu ne la Tétragramme, lo ëje ka hmitrötre i Akötresie, Iehova

Keukawahnine La Mataitusi Ka Co Catr Ne La Qene Heberu

Keukawahnine La Mataitusi Ka Co Catr Ne La Qene Heberu

Hapeu ka xecie kö koi së laka, troa eatr la itre hna thingehnaeane hnei Akötresie? Ame koi Iesu ke, tro itre ej a eatr. Kola acatrene la lapaune ne la itre ka drenge la itre ini hnei nyidrëti hna hamën. Hanawange la ketre ceitun. Ame ngöne lo cainöje i nyidrëti hune la wetr, öni nyidrë ngöne Mataio 5:18, ka hape: “Ke nyipici ini a qaja koi nyipunie, ka hape, Tro ha pate la hnengödrai memine la fen, ngo tha tro kö a pate la kete iota, maine kete hnepe ka co hi qa hnine la wathebo, pane eate asë jë.”

Ame la mataitusi ka co ngöne qene Heberu, ke, י (yod). Celë hi lo pane mataitusi ne la Tétragramme, ne la ëje i Iehova Akötresie ka hmitrötr. * Ketre tune la itre hnaewekë me itre tusi ne la Wathebo i Akötresie, laka ame la itre ka cinyanyi tus, me itre Faresaio, ke angatr a goeëne la “kete hnepe ka co hi”, ngo ka tru aliene pe.

Hnei Iesu hna qaja ka hape, maine ijije hi troa patre la hnengödrai memine la ihnadro, ngo ame la itre hnepe ka co hi qa hnine la Wathebo, tro kö itre eje a eatr. Ngo kola qaja hnyawa koi së hnene la Itre Hna Cinyihan, ka hape, troa eje epine palua la hnengödrai me ihnadro. (Salamo 78:69) Kolo hi a amamane e celë laka, ame la itre hnepe ka co hi ne la Wathebo, tre, tro kö itre eje a eatr.

Hapeu ka nyipiewekë kö koi Iehova Akötresie, la itre hnepe ka co hi qa hnine la Wathebo? Eje hi. Hanawange la ketre ceitun. Ame la angetre Isaraela ekö, tre, hna amekötine koi angatr ka hape, tha tro kö a xecie la ketre june ne la neköi mamoe ne la Paseka. (Esodo 12:46) Maine jë ketre hnepe ka co hi lai. Hapeu trotrohnine kö angatr la kepin, matre tha tro kö a axeciëne la ketre jun? Ohea. Ngo ame la Iehova Akötresie a amë la itre hnepe ka co cili, ke, kolo hi a perofetane la Mesia. Kola perofetane ka hape, tha tro kö a axeciëne la ketre june i nyidrë, ngöne la kola humuthi nyidrë me athipi nyidrë hune la sinöe.—Salamo 34:20; Ioane 19:31-33, 36.

Nemene la ini hne së hna xome qa ngöne la hna qaja hnei Iesu? Ijije hi tro sa mejiune ka hape, troa eatr asë la itre hna thingehnaeane hnei Iehova Akötresie, uti fe hë la itre hnepe ka co hi. Hapeu tha kolo kö a akeukawane la hni së hnene la mataitusi ka co catre ne la qene Heberu?

^ par. 3 Ame la mataitus ka co ne la itre mataitus qene Heleni tre, iota, nge ka ihmeku hi memine la qene Heberu י (yod). Ame la Wathebo i Mose tre, hna pane cinyihan me hna hamëne qene Heberu. Celë hi matre hnei Iesu pala hi hna amexeje la tusi qene Heberu.