Tro jë kowe la alien

Tro jë kowe la itre mekune ka co

Tro jë kowe la itre alien

Itretre Anyipici Iehova

Drehu

Ita Ne Thup  |  Na. 2 2016

 KA QA NGÖNE ICETRÖN | HAPEUE LA THIINA KA LOI ENEHILA?

Ka Nyipiewekë Pala Kö La Troa Thiina Ka Loi Enehila?

Ka Nyipiewekë Pala Kö La Troa Thiina Ka Loi Enehila?

Hitoshi la ketre trahmanyi ka huliwa ngöne la ketre biero ne e mani e Zapo. Ame la ketre drai ne angeic a ce huliwa memine la Maseta i angeic, hna upi angeice hnei maseta troa huliwa qene atrekënö. Hitoshi pë hë a qejepengöne hnyawa jë kowe la maseta i angeic ka hape, kola huliwa la mekuthethew i angeic e tro angeice a huliwa tun. Ame hë la thangane lai, hnene la maseta hna köja angeic me qaja ka hape, maine xele pala kö angeic, tro ha upi angeic qa lai.

Ame la itre treu thupen, kola ngazo me hace la hni Hitoshi, ke tha mano kö angeice thele huliwa. Ketre, ame la angeic a wange la ketre atre ka ihë göi huliwa, hnei angeice hna canga qaja kowe la atre cili ka hape, tha tro fe kö angeic a huliwa qene atrekënö. Nemene la hna sa hnene lai atr? Öni angeic, “Ka ketre pengöne kö eö!” Nge, ngacama hnene pala hi la hnepe lapa i Hitoshi, me itre sinee i angeic hna thuecatre koi angeic troa thiina ka loi, ngo kola ha nyiqane traqa koi angeice la luelu. Eloine pe, öni angeic, “Xecie hnyawa koi ni laka, nyipi mekune la troa thiina ka loi.”

Kola amekunë së hnene la hna melën hnei Hitoshi ka hape, ala nyimu la itre atr enehila ka wange acone la atre thiina ka loi. Nge ame koi itre ka thele mani, tre, Hitoshi a sewe angatr troa huliwa qene atrekënö. Önine fe la ketre föe ka huliwa e Afrique du Sud ka hape, “Pine laka kola xötreithi ni hnene la itre atr ka huliwa qene atrekënö, tha ka hmaloi kö e itre xa ijin, troa thiina ka loi.”

Ame la ketre aqane huliwa qene atrekënö ka haöthe la fen enehila, tre ene la troa ithoikeu. Hnene la ketre psychologue qaa Massachusetts, Robert Feldman, hna thele troa atre hnyawa la aqane ujë ne la itre atr ngöne la angatr a ithanata. Kola mama e cili laka, ame ngöne hi la 10 lao neköi menetr, kola e la 60 lao atr qa thene la ala 100, ka ithoikeu. Öni Feldman pë hë ka hape, “Catre pi hë la aqane thoi ne la itre atr enehila!” Matre ngacama, methi ne la itre atr asë troa thoi koi angatr, ngo ame pe, ka thoi pala hi angatr!

Pine nemene matre kola haöthe la fen hnene la itre aqane huliwa qene atrekënö? Nemene la thangane la aqane ujë cili? Nge tune kaa la aqane tro sa ananyine la thiina ka ngazo cili?