Tro jë kowe la alien

Tro jë kowe la itre mekune ka co

Tro jë kowe la itre alien

Itretre Anyipici Iehova

Drehu

Ini Nyudreni Jë

 INI 8

Ka Lolo La Itre Sine Ce Elo i Iosea

Ka Lolo La Itre Sine Ce Elo i Iosea

Ka hmaloi kö troa kuca la ewekë ka loi?— Ame koi itre xa atr, ka jol. Tusi Hmitrötr a qaja ka hape, ame koi Iosea ekö, tre ketre jole pi hë koi angeice troa kuca la loi. Ngo ame pe, hna xatua angeice hnene la itre sinee i angeic. Tro nyiso a ce wange la pengöne la itre sinee i Iosea.

Ame la keme i Iosea, tre Amona, kolo joxu ne Iuda. Ngazo catre la thiina i Amona, nge ka hmi koi idrola nyidrë. Ame hë la kola meci hnene la keme i Iosea, angeice pena ha la ka joxu hune la angetre Iuda. Ngo kolo petre hi a eitr lao macatre i angeic! Hnei Iosea kö hna tui keme i angeic, tune kaa la mekuna i hmunë?— Ohea!

Öni Zefania, hmitrötr troa hmi koi idrola

Ngacama nekönatre petre kö Iosea, ngo ka ajane angeice troa drengethenge Iehova. Celë hi kepine matre itre ka hnimi Iehova hmekuje hi la itre atr hnei angeice hna iën nyine sine tronge i angeic. Celë hi lai ka xatua Iosea tro kuca la itre ewekë ka loi. Drei la ëje ne la itre sine tronge i Iosea?

Zefania la ketre. Hnei Zefania hna qaja kowe la angetre Iuda ka hape, maine tro pala  kö angatr a hmi kowe la itre idrola, tro ha traqa koi angatre la itre ewekë ka ngazo. Hnei Iosea hna drei Zefania me nyihlue i Iehova, ngo tha hnei angeice kö hna thili kowe la itre idrola.

Ame la ketre sine tronge i Iosea, tre Ieremia. Ma ce xötre i nyidroti jë hi, nge hnei nyidroti fe hna ce tru. Ka ihnimi catre Ieremia me Iosea, celë hi kepine matre ame hë la Iosea a mec, hnei Ieremia hna sili nyima Iosea, ke tru catre la hnei Ieremia hna meku Iosea. Hnei Ieremia me Iosea hna itö ixatua, matre tro pala hi nyidroti a kuca la itre ewekë ka loi, me drengethenge Iehova pala hi.

Hnei Iosea me Ieremia hna itö ixatua matre troa kuca la loi

Nemene la hna ini hmunë hnene la tulu i Iosea?— Nekönatre Iosea ekö, ngo hetre aja i angeice hë troa kuca la itre ewekë ka loi. Atre hi angeice laka, nyipi ewekë troa iëne la itre sinatro ka hnimi Iehova. Haawe, nyipi ewekë fe tro hmunë a iëne hnyawane la itre sine ce elo i hmunë thene la itre ka hnimi Iehova, ke tro angatre lai a uku hmunë troa kuca la itre ewekë ka loi!

E JË HMUNË LA

  • 2 Aqane lapa ite Joxu 33:21-25; 34:1, 2; 35:25