Ka hmaloi kö troa drei kakati me nenë ngöne la nöjei drai?— Ka jole pi hë e itre xa ijin. Atre hi hmunë laka, hnei Iesu hna drengethenge Iehova, memine la keme me thine i nyidrë?— Tro la tulu i nyidrë a xatua hmunë troa drei kakati me nenë, ngacama jole ngöne la itre xa ijin. Tro nyiso a pane ce ithanatan.

Qëmekene tro Iesu a uti a tro celë fen, hnei nyidrëti hna pane ce mele me Iehova Keme i nyidrë, e koho hnengödrai. Ngo hetre keme me thine i Iesu mina fe e celë fen. Iosefa me Maria la lue ëje i nyidro. Atre hi hmunë ka hape, hnauëne laka keme me thine i Iesu jë fe lae nyidro?—

Hnei Iehova hna xom la mele i Iesu me amë e kuhu hni Maria, ene pe, hnaho nyidrëti pi fe tune la itre xa nekönatr e celë fen. Ketre iamamanyikeu lai! Hnei Iesu hna kökötre e kuhu hni Maria, tune la nöjei nekönatr asë. Thupene hë la naene lao treu, Iesu ha mala. Hane hi la kepine matre kola qaja ka hape, Maria me Iosefa la keme me thine i Iesu e celë fen.

Ame hë la kola traqa koi 12 lao macatre i Iesu, mama pi hi laka, tru catre la ihnim i nyidrë koi Iehova Keme i nyidrë. Kola mama lo ijine Iesu me hnepe lapa i nyidrëti a trongëne la gojenyi gaa nanyi a tro Ierusalema, matre troa hane sine lo Paseka. Ame hë la angatr a troa bëeke kowe la hnalapa i angatr, patre pë hë Iesu. Atre hi hmunë ka hape, ekaa pë hë Iesu?—

Iesu a ue e hnine la ēnē?

Canga bëeke hmaca jë hi Iosefa me Maria a tro Ierusalema troa thele Iesu. Tha loi kö la hni nyidro, ke thatre kö nyidro la hmeku i Iesu. Ngo thupene hë la köni drai, traqa ju hi nyidroti a öhnyi Iesu e hnine la ēnē! Atre hi hmunë la kepine matre Iesu e cili hnine la ēnē?— Iesu e hnine la ēnē, ke, e cili hi la hnei nyidrëti hna drenge la kola qeje Iehova, Keme i nyidrë. Hnimi Iehova catre hnei nyidrë, nge nyidrëti a pi atre la nyine tro nyidrëti a kuca matre madrine jë Iehova. Tru hë Iesu, a ketre thupëtresiji hë, ngo hnei nyidrëti pala hi hna drengethenge Iehova, ngacama jole nge akötre koi nyidrë ngöne la itre xa ijin. Hnei Iesu kö hna drei Iosefa me Maria?— Öö, Tusi Hmitrötr a amamane ka hape, hnei nyidrëti pala hi hna drei nyidro.

Nemene la hna ini hmunë hnene la tulu i Iesu?— Qa i hmunë troa drei kakati me nenë, ngacama jole ngöne la itre xa ijin. Tro kö hmunë a hane kuca tun?—

E JË HMUNË LA

  • Luka 1:30-35; 2:45-52

  • Efeso 6:1

  • Heberu 5:8