Tro jë kowe la alien

Tro jë kowe la itre mekune ka co

Tro jë kowe la itre alien

Itretre Anyipici Iehova

Drehu

Itre Drei La Ka Kuca La Aja i Iehova Enehila?

 Mekene 25

Kepine Me Aqane Xupe La Itre Uma Ne Baselaia Hun

Kepine Me Aqane Xupe La Itre Uma Ne Baselaia Hun

Bolivie

Nigeria, qëmekene me thupen

Tahiti

Uma Ne Baselaia! Tune la hna amamane hnene lai aqane ati ëje ne ej, celë hi uma lai hnë troa hamëne la itre ini ne la Tusi Hmitrötr ka qaja la Baselaia. Celë hi lo tane la cainöje i Iesu ekö.—Luka 8:1.

Itre hnë traqa itronyi ne troa atrune la nyipi hmi. Hna hnëkëne la huliwa ne cainöje trootro ngöne la itre uma cili. (Mataio 24:14) Ngacama isapengöne kö me isa etrune kö la itre Uma Ne Baselaia, ngo hna xupe ijije hi thatraqane la huliwa ne ej. Ame ngöne la itre xa götran, tre kola icasikeu hnene la nyimu ekalesia hnine la ca Uma Ne Baselaia. Qaane hi lo itre macatre ka ase hë, pine laka tru catre la itre atr ka lö kowe la hmi, eahuni pë hë a xupe jë la nyimu Uma Ne Baselaia, traqa pala hi koi faifi o drai. Hne huni hna atreine tune kaa?—Mataio 19:26.

Hna xup la itre uma jëne la itre ahnahna hna isa up kowe kö la watreng ne la huliwa cili. Hetrenyi hnine la itre Uma Ne Baselaia la itrengene mani thatraqane la itre ahnahna hna hamëne mekötine göi Xupi Uma Ne Baselaia e Cailo Fen. Nge thupene lai, iupi fë jë hë la itre ahnahna cili troa huliwane hnene la Hnalapa Ne Thewe Huliwa göi troa xup, maine kuca alolone hmaca pena ha la ketre Uma Ne Baselaia.

Hna xup itre eje hnene la nöjei pengöne atr ka saene kowe la huliwa cili ka traqa qa ngöne la nöjei nöj. Ame ngöne la itre nöje ka nyimutre, hetrenyi la itre Ekip Ne Xupi Uma Ne Baselaia. Kola huliwa e cili la itre hna acil troa kuca la huliwa ne xupi uma, me itre ka saen. Angatr a xupe trongëne la itre Uma Ne Baselaia, ase jë ketre matre ketre. Angatre mina fe a tro kowe la itre götrane gaa jole gojeny, göi troa cilë mekene la huliwa ngöne la götrane cili, me amamai aqane huliwa kowe la itre atrene la nöje cili. Ame ngöne la itre xa götran, hna acile la itre Kometr Ne Xup Uma Ne La Nöje göi troa hnëkëne la aqane troa xup, maine troa kuca alolone pena hi la itre Uma Ne Baselaia. Hnene la itre qatre thup ka atreine xup uma me itre xa Atre Anyipicin ka atrein hna ce huliwa memine la ekalesia, qaa ju hi ngöne la qaan, uti hë ngöne la pune la kola xup la ketre Uma Ne Baselaia. Ame ngöne la ijine kola xup uma, kolo Itretre Anyipicin ka mele ngöne lai götrane cili la ka kuca la götrane gaa tru ne la huliwa. Hnene la uati Iehova memine la trenge catre ne la itre atrene la lapa i Nyidrë, matre ie jë la itre huliwa cili. —Salamo 127:1; Kolose 3:23.

  • Pine nemene matre hëne jë la itre hnë hmi ka hape, Uma Ne Baselaia?

  • Qa ngöne nemene matre ie jë la huliwa ne la Itretre Anyipici Iehova troa xupe la itre Uma Ne Baselaia ngöne la fene hnengödrai?