Tro jë kowe la alien

Tro jë kowe la itre mekune ka co

Tro jë kowe la itre alien

Itretre Anyipici Iehova

Drehu

Nemene La Nyipi Ini Hna Hamën Hnei Tusi Hmitrötr?

MEKENE SEVEN

Nyipi Mejiun Ka Nyipici Göne Lo Itre Atr Hne Së Hna Hnim Ka Meci Hë

Nyipi Mejiun Ka Nyipici Göne Lo Itre Atr Hne Së Hna Hnim Ka Meci Hë

Tro së a atre tune kaa ka hape troa melehmaca la itre ka mec?

Tune kaa la mekuna i Iehova göne la melehmaca ne la itre ka mec?

Drei la hna troa amelene hmaca?

PANE mekune jë ka hape ma eö a kötren la ketre ithupëjia ka pi iakötrë, ka weje huzu eö. Ame angeic, tre, ka tru trenge catr, nge ka nyinyape catre kö angeic hui eö. Atre hi eö laka paatre fe kö thei angeice la hni ne atr, pine laka, angeice hi lo ka humuthe lo itre xaa sinee i eö. Ngacama köte catre eö, ngo easenyi catre hë matre ee eö pi hnei angeic. Kösë pë hmaca kö hnei eö hna atreine troa kuca. Ene pe, nyinyape jë hi ezi eö la ketre atr, a kola troa amele eö. Ka catre kö angeic hune lo lai ithupëjia me eö, nge angeic a thingehnaean koi eö me itre xaa atre fe ka hape, tro angeic a xatua epun. Hane hi lai kola uqa me tingetinge la mekune i epun!

2 Ketre tune mina fe, hna weje huzu së asë hi hnene la ketre ithupëjia. Tune la hne së hna ce wange hë, kola hën hnei Tusi Hmitrötr la mec ka hape ithupëjia. Pëkö ka atreine troa thepe së qaathene la ithupëjia cili. Öhne asë hi së la aqane thupa tëne hnene la ithupëjia cili, la mele ne la itre atr hne së hna hnim. Ngo eloine pe laka, ka catre kö Iehova hune la mec. Nyidrëti la Atre Iamele nge ka ihnim, atre amamane hë la atrein ka eje thei Nyidrë troa ngaan la ithupëjia cili. Nge ase hë Nyidrë thingehnaeane laka, tro Nyidrëti a apaatren epine palua la mec. Öni Tusi Hmitrötr: “Meci la ithupëjia hnapine hna troa apaten.” (1 Korinito 15:26) Celë hi ketre maca ka loi!

3 Pane ce wange ju la ijine easë a hleuhleu hnene la meci ne la ketre atr hne së hna hnim. Ixatua ka tru ju hi la easë a wangatrune hnyawa la ketre ewekë ka troa hamë madrine koi së. Ene lo Iehova a thingehnaean laka troa mele hmaca la itre ka mec. (Isaia 26:19) Tro hmaca angatr a mele qa hna mec. Celë hi nyine tro sa mejiune kow, ene la melehmaca.

E MECI HË LA KETRE ATR HNE SË HNA HNIM

4 Hapeu, hetre sinee i epuni fe kö ka meci hë? Ketre akötre ka jole catre tro sa xomihnin, nge kösë lo ka hape, easë pe hi a cile menu a thatre hmaca kö la nyine kuca. Ame ngöne la ijine cili, manathithi caasi hi angetre thele ixatua e hnine la Wesi Ula i Akötresie. (2 Korinito 1:3, 4) Tro la Tusi Hmitrötr a xome trongë së, troa trotrohnine la mekune i Iehova me Iesu göi mec. Atre hnyawa hi Iesu la akötr ka eje thene la atr ka hnëmecin la sinee i angeic, nge caasi hi la mekuna i nyidrë memine la Tretretro i nyidrë. (Ioane 14:9) Ame ngöne lo nyidrëti a tro Ierusalema, hnei nyidrë hna majemine troa wai Lazaro memine la lue ifaxa i angeic ene Maria me Maretha, angatr a mele ezine la traon e Bethania. Haawe imajemikeu hnyawa ha angatr, matre itre treme sineen ka easenyi catr angatr koi Iesu. Tusi Hmitrötr a qaja ka hape: “Iesu a hnimi Maretha, me tejine me nyido, me Lazaro fe.” (Ioane 11:5) Tune la hne së hna inin ngöne la mekene hnapan, meci pi hi Lazaro.

5 Tune kaa la aqane ketri Iesu hnene la meci ne la sinee i nyidrë? Kola qaja hnei Tusi Hmitrötr ka hape, hnei Iesu hna traqa kowe la itre sinee me itre enehmu i Lazaro, a kola hace me latresi. Ene pe nyidrëti a utipi angatr. Hnei nyidrëti hna “simano e kuhu hnin, me manomano cat.” Thupene lai, “Iesu a sheitë.” (Ioane 11:33, 35) Ame la aqane hace me hleuhleu i Iesu tre, kola amamane ka hape, pëkö mejiune i nyidrë? Ohea. Atre hnyawa hi Iesu laka, hetre ketre ewekë ka lolo ka troa traqa. (Ioane 11:3, 4) Ngo nyidrë a hace pine la mec ka traqa kowe la atr hna hnim, celë hi matre nyidrë a akötr me hlehleu.

6 Qa ngöne lai, hetre ithuecatre koi së qa ngöne la hace i Iesu. Kola ini së ka hape ame la mec, tre, ewekë lai hna methinën hnei Iesu memine la Tretretro i nyidrë. Ngo atreine hi troa lepetrij me ngaan la ithupëjia cili hnei Iehova Akötresie! Tro sa ce wang la hnei Akötresie hna aijijë Iesu troa kuca.

“LAZARO FE ! LÖPI”

7 Hna ami Lazaro hnine la ketre ngöne menyi, ene pe Iesu a iupi jë troa kötrën la ietë ka nyi ithingen la ulan la hua. Hnei Maretha hna pane qeje jol ke, foa hë lao drai thupene la hna meci hnei Lazaro nge ijijë hë troa piipi la ngönetrei i angeic. (Ioane 11:39) Celë hi matre, thenge la aqane wai ewekë së atr, hapeu ijije pala kö troa hetre göhnen la mejiun?

8 Ase hë uligötrën la ietë, Iesu a hë jë draië me hape: “Lazaro fe ! löpi.” Nemene la ewekë ka traqa? “Ame hna löpi angeice lo ka mec.” (Ioane 11:43, 44) Drei jë kö la madrinen la itre atr e cili! Maine ame Lazaro tre, ketre thöth trejine me angatr, maine sinee, maine enehmu maine atre lapa ezi angatr pena, atre hnyawa hi angatr ka hape, meci hë angeic. Ngo enehila, kolo hmaca ha a hane ce cile me angatr lo atr hnei angatr hna hnim, nge thaa saze kö angeic. Thatreine kö troa qejepengöne la etrun la ewekë celë, celë hi matre, thatreine kö troa jele nyipicin. Nyimutre la itre ka madrin troa canga nyinyape me idremi me Lazaro. Kolo, hi a ngaan e cili la mec!

Atraqatr la madrin ngöne la kola amele Lazaro hmaca.—Ioane 11:38-44

Kola amele Lazaro hmaca hnei Iesu

9 Thaa hnei Iesu kö hna selën ka hape, qaathei nyidrëti lai iamamanyikeu cili. Ame ngöne la thithi nyidrë qëmekene troa hë Lazaro qa hnine la hua, hnei nyidrëti hna amamane hnyawa laka Iehova la Qaane la melehmaca. (Ioane 11:41, 42) Thaa hnei Iehova kö hna hamëne la mene i Nyidrë, matre troa amelene hmekuje ju hi la caa ka mec. Eje hi laka, naene lao iamamanyikeu ka tune lai hna qaja e hnine la Wesi Ula i Akötresie, a melehmaca i Lazaro fe e hnin.* Ketre madrine ka tru koi së la kola e me inine itre ej. Itre eje a ini së la pengö i Akötresie, paatre fe kö thei Nyidrë la iwangatrehmekunyi atr, hnei Nyidrëti hna amelene hmaca la itre thöth me itre qatr trahmanyi me föe, itretre Isaraela me itre trehnyiwa. Nge drei jë kö la madrin thene lai nöjei hna amelene hmaca cili! Hanawang la ketre ceitun, ame ngöne lo Iesu a amelene hmaca la nekö jajinyi ka meci hë, “hna canga haine atraqat” hnene la keme me thin. (Mareko 5:42) Nyipici hnei Iehova hna hamëne koi angatr la ketre madrine ka tru, ketre ewekë lai hnei angatr hna thatrein troa thëthëhmin.

10 Eje hi lai laka, ame asë hi lo itre hna amelene hmaca hnei Iesu, tre meci asë hmaca ha angatr. Hapeu, nyine tro lai a amamane ka hape gufa ju kö lo hna amele angatre hmaca hnei Iesu? Ohea. Nyine tro pe lai a amamane hnyawa la esisitriane la itre trenge nyipici e hnine la Tusi Hmitrötr; itre eje pe a hamë mejiune koi së.

INI HNA KAPA QA NGÖNE LO ITRE HNA AMELENE HMACA NGE HNA QEJEPENGÖN

Elia, memine la sine föe memine la nekö i nyiidro hna amelene hmaca

Hna amelene hmaca la neköne la sine föe hnei Elia.—1 Ite Joxu 17:17-24

11 Kola ini së hnei Tusi Hmitrötr ka hape, ame la itre ka mec, tre “tha ’te kö la kete ewekë” hnei angatr. Thaa ka mele kö angatr ngöne la ketre götran, nge thatre kö angatr la ketre ewekë. Kola anyipicine la trenge nyipici cili hnene la melehmaca i Lazaro. Pane mekune jë së lo thupene kola ase amele Lazaro hmaca. Hnei angeice kö hna haine kowe la itre atr la itre ewekë ka lolo hnei angeice hna öhne e koho hnengödrai? Maine itre nyine tro pena a xouen tune la idreuthin la ifereno? Ohea. Thaa celë kö la pengö i Lazaro hnei Tusi Hmitrötre hna qaja. Ame ngöne lo lai foa lao drai ne angeic e hnatrapaimen la mec, “tha ’te kö la kete ewekë” hnei angeic. (Ate Cainöj 9:5) Kösë ame la angeic a mec, ceitune hi memine la angeic a hmulizië.—Ioane 11:11.

12 Kola ini së hnene la ewekë ka traqa koi Lazaro, laka, nyipici la melehmaca, thaa kolo kö a ifejicatre. Hna amele Lazaro hmaca hnei Iesu qëmekene la itre atr ka ala nyim ka ijije troa anyipicine lai. Ame mina fe la itre hene ne hmi ka methinë Iesu, tre thaa hnei angatre kö hna jelethoine la iamamanyikeu cili. Hnei angatre pe hna qaja ka hape: “Hape ue shë ? Ke kösaue la nöjei iamamanyikeu hna kuca hnene la ate cili.” (Ioane 11:47) Nyimutre la itre atr ka traqa troa hane wai Lazaro, lo atr hna amelene hmaca. Haawe, ala nyimu fe la angetre lapaune koi Iesu. Angatr a öhne jëne Lazaro la enyipicine laka, hna upi Iesu hnei Akötresie. Pine laka thatreine kö troa isenyin, ene pe thele jëne jë hnene la itre xaa hene hmi ne Iudra ka catre hni troa ce humuthi Iesu me Lazaro.—Ioane 11:53; 12:9-11.

Kola amele Doreka hnei Peteru

Hnei aposetolo Peteru hna amelene hmaca la Keresiano föe, Doreka la ëjen.—Ite Huliwa 9:36-42

13 Hapeu, nyine isenyine laka hetre melehmaca? Ohea, pine laka, hnei Iesu lo hna inine ka hape, troa traqa la ketre ijin troa amelene hmaca “la nöjei ate ngöne la ite hua [“nyine amekunën,” MN].” (Ioane 5:28) Iehova la Atre xupe la nöjei hna xupe asë ka mel. Matre tune kaa, ka jole kö e troa jelenyipicine laka, atreine hi tro Iehova a xupe me amelene hmaca la atr? Ngo qanyi Iehova kö, ke Nyidrëti a troa amekötin thenge la itre huliwa hna isa kuca hnene la itre atr. Ijije kö tro Nyidrëti a mekune hmaca la itre atr hnei Nyidrëti hna hnim ka meci hë? Itre miliar la etrune la itre wëtresij e koho hnengödrai, ngo isa hetre ëjen itre ej hna atë hnei Akötresie! (Isaia 40:26) Haawe, ketre ijije hi troa mekune hmaca hnei Iehova Akötresie la nöjei pengöne ka eje thene la itre atr hne së hna hnim ka meci hë; nge atreine hi tro Nyidrëti a amele angatre hmaca.

14 Tune kaa la mekuna i Iehova ngöne la troa amelene hmaca la itre ka mec? Kola inine hnei Tusi Hmitrötr ka hape, hetre hni ne ajane i Nyidrë troa canga amejëne hmaca la itre ka mec. Hna hnyinge thel hnei Iobu ketre atr ka lapaun ka hape: “Maine meci hë la at, hape u, tro angeic’ a mele hmaca?” Iobu a qaja ka hape angeic a troa itreqe hnine la hua uti hë la ijine tro Akötresie a meku angeice hmaca. Öni angeic koi Iehova ka hape: “Tro cilieti a könieti, nge tro ni a gemie koi cilie ; tro cilieti a fetesietine la huliwa ne la lue themie i cilie.”—Iobu 14:13-15.

15 Pane mekune ju së! Ame la aja i Iehova enehila, tre ene la troa amelene hmaca la itre ka mec. Hapeue la aja cili, thaa eje kö a akeukawane la itre hni së? Ngo nemene la pengöne lai melehmaca elany? Drei la itre hna troa amelene hmaca, nge ekaa?

‘NÖJEI ATE NGÖNE LA ITE HUA NYINE AMEKUNËN’

16 Easë a kapa qaathene la itre hna amelene hmaca hnine la Tusi Hmitrötr, la pengöne la melehmaca ka troa traqa elany. Ame lo itre atr hna amelene hmaca e celë fen, tre hnei angatre hmaca hna iöhnyi memine lo itre sinee i angatr hna hnim. Tune fe la melehmaca elany, ngo ka tro kö eje a sisitria catr. Tune la hne së hna inin ngöne la Mekene 3, ame la aja i Akötresie tre, ene la troa paradraiso la fene hnengödrai asë. Haawe, thaa tro hmaca kö a amelene hmaca la itre atr ngöne la ketre fen ka tiqa hnei isi, me ihumuth, me itre sine kucakuca. Kola troa aijijë angatr troa mele tingeting epine palua ngöne la ihnadro celë, nge troa hetrenyi la tingeting me mele madrin.

17 Drei la hna troa amelene hmaca? Hnei Iesu hna qaja ka hape: “Tro la nöjei ate ngöne la ite hua [“nyine amekunën,” MN ] a denge la aqane ewekë i angeic [Iesu], me tropi.” (Ioane 5:28, 29) Ketre, kola qaja ngöne Hna Amamane 20:13 ka hape: “Hna hamëne hnei hnagejë la nöjei ka meci then’ ej ; nge meci me hedis a kete hamëne la nöjei ka meci thene lu’ ej.” Ame la hnëewekë hna hape, “Hedis,” tre, kola qaja lo göhnen la itre ka meci asë. (Wange ju la Itre Xaa Mekun) Tro ha pë aliene lai göhnë cili. Tro ha amelene hmaca la itre ka mec, itre miliar la etrun. Hna qaja hnei Paulo ka hape: “Tro ha mele hmaca la nöjei ka meköt, me ka tha meköti kö.” (Ite Huliwa 24:15) Nemene la aliene la trenge ewekë celë?

18 Ame la itre “ka meköt” tre, kola e lo itre atr hna qaja hnei Tusi Hmitrötr, ka mele qëmekene troa traqa hnei Iesu e celë fen. Tui Noa, me Aberahama, me Sara, me Mose, me Rutha, me Esetera, memine ju kö lo itre xan. Hna edromën la itre trahmanyi me föe cili ka catre lapaun, ngöne la mekene 11 ne la tusi koi angetre Heberu. Ngo ame la itre “ka meköti” tre, kola hane qaja fe la itre hlue i Iehova ngöne la hneijine së. Qa ngöne laka easa mejiune kowe la melehmaca, thaa xou së kö troa mec.—Heberu 2:15.

Ngöne la Paradraiso, troa amelene hmaca la itre ka mec nge tro angatr a ce mel memine la itre hnei angatr hna hnim

Itre atr hna amelene hmaca ngöne la paradraiso

19 Nge tune kaa kö kowe la itre atr asë ka thaa hane kö nyihlue i Iehova me drengethenge Nyidrë qa ngöne laka, thatre Nyidrëti kö hnei angatr? Thaa tro jë kö a thëthëhmine la itre “ka tha meköti” cili. Troa amele angatre hmaca fe me nue ijin tro angatr a hane atre la nyipi Akötresie me nyihlue i Nyidrë. Ame ngöne la hneijin ka caa thauzane lao macatre, tro ha amelene hmaca la itre ka mec me nue ijine koi angatr troa hane nyihlue i Iehova e celë fen cememine la itre atr ka mele nyipici. Ketre ijine lai ka troa mingöming. Ame la hneijine cili, tre kola qaja la Drai Ne Amekötin.#

20 Hapeu, kolo lai a qaja ka hape, tro asë hi a amelene hmaca la nöjei atr asë? Ohea. Tusi Hmitrötr a qaja ka hape, ame la itre xaa ka mec tre angatr e hnine la “gena.” (Luka 12:5) Ame la gena tre, celë hi ketre götrane ekö tröne e Ierusalema, e cili hi lo hnei angatr hna dreuth la nöjei ewekë hna trij. Hna dreuth la itre öni me atr ka mec, me itre nöjei ewekë ka ngazo nge hna triji salite mina fe. Ame la itre ka meci hna trije e cili, tre, hna xome ceitu angatr hnene la itretre Iudra, thaa ijije kö troa hane kelem, nge pë hmaca fe kö iamele ka ijije koi angatr. Haawe, kola xome la Gena nyine hatrene la meci ka epine palua. Maine nyipici laka tro Iesu a amekötin la itre ka mel me itre ka mec, ngo Iehova kö la Atre Amekötin tixenuë. (Ite Huliwa 10:42) Thaa tro jë kö Nyidrëti elanyi a amelene hmaca lo itre hnei Nyidrëti hna öhne ka thaa hane kö ujë qa hnine la ngazo, nge ka xele ma hane saze la aqane mel.

MELEHMACA E KOHO HNENGÖDRAI

21 Kola qaja fe hnei Tusi Hmitrötr la ketre pengöne melehmaca, ene la melehmaca ceitune me ketre ua e koho hnengödrai. Caasi hi la melehmaca ka tune lai hna qaja hnine la Tusi Hmitrötr, ene la melehmaca i Iesu.

22 Thupene la hna meci hnei Iesu ene la kola meci la ngönetrei nyidrë ne atr, thaa hnei Iehova kö hna nue la Hupuna i Nyidrë troa meköle palua hnine la hua. (Salamo 16:10; Ite Huliwa 13:34, 35) Hnei Akötresieti hna amele Iesu hmaca, ngo thaa atr hmaca kö. Kola qejepengöne hnei aposetolo Peteru ka hape, ame Keriso tre hna “humuthi nyidë ene la ngönetei, ngo…hna amelene ene la ua.” (1 Peteru 3:18) Celë hi iamamanyikeu ka tru lai. Hna amele Iesu hmaca ceitune me ketre ua! (1 Korinito 15:3-6) Iesu la ka pane kapa lai aqane iamele hmaca cili. (Ioane 3:13) Ngo thaa nyidrëti caasi kö.

23 Atre hi Iesu laka easenyi hë tro nyidrëti a bëeke hnengödrai eë, matre hnei nyidrëti hna qaja kowe la itretre drei nyidrë ka hape, nyidrëti a troa “nyihnyawane la hne i” angatr. (Ioane 14:2) Hnei Iesu hna qaja lo itre ka tro hnengödrai ceitune me “hnënge mamoe ka xalaith.” (Luka 12:32) Ala ije la itre ka troa sine la lapa ka co cili ne la itre Keresiano ka mele nyipici? Thenge la hna qaja ngöne Hna Amamane 14:1, öni Ioane aposetolo ka hape: “Hnenge hna goeën, nge hana wang, kola cile hune la wete Ziona la Arenio [Iesu Keriso], nge thei nyidëti la ala hadede nge luate nge ekete la o thauzan, lo hna cinyihane la atesiwa i nyidë me atesiwa i Tetetro i nyidë hune la ite göpadi angat.”

24 Ame lai 144 000 lao Keresiano, ene fe lo itre aposetolo i Iesu, angatre hi lo itre hna amelene hmaca hnengödrai eë. Eue la kola amele angatre hmaca? Hnei Paulo aposetolo hna cinyihane ka hape, troa eje ngöne lo ijine hlepëti hnei Keriso. (1 Korinito 15:23, MN ) Tune lo hne së hna troa ce wange ngöne Mekene 9, easë hë enehila a melëne la ijine cili. Haawe, ame la itre thelene pe lo lai ala 144 000 ka meci ngöne la hnedrai së, tre hna canga amele angatre hmaca hnengödrai eë. (1 Korinito 15:51-55) Ngo ame pë hë la itre atr ka nyimutre catr, tre angatr a mejiun troa melehmaca elanyi ngöne la Paradraiso e celë fen.

25 Eje hi laka, tro Iehova a ngaan la ithupëjia me easë ene la mec, nge troa apaatren ej epine palua! (Isaia 25:8) Ngo, maine jë tro pala kö nyipunieti a isa thele ka hape, ‘Nemene la hna troa kuca hnene lai itre hna troa amelene hnengödrai eë?’ Angatr a troa sin la ketre Baselaia ka mingöming e koho hnengödrai. Tro pë hë së a ithanatane hnyawa la pengöne lai Baselaia cili ngöne la mekene thupen.

NEMENE LA HNA ININ HNEI TUSI HMITRÖTR

  • Kola hamën koi së hnene la itre melehmaca e hnine la Tusi Hmitrötr, la mejiune ka catr.—Ioane 11:39-44.
  • Aja i Iehova catr troa amelene hmaca la itre atr ka mec.—Iobu 14:13-15.
  • Troa amelene hmaca la itre atr asë ka meköle hnine la hua.—Ioane 5:28, 29.

*  Itre xaa hna edromën hnei Tusi Hmitrötr ngöne 1 Ite Joxu 17:17-24; 2 Joxu 4:32-37; 13:20, 21; Mataio 28:5-7; Luka 7:11-17; 8:40-56; Ite Huliwa 9:36-42; me 20:7-12.

#   Maine kola aja ithuemacany ngöne la Drai Ne Amekötin me itre pengöne ej, wange ju la Itre Xaa Mekun.


Itre hnying thatraqane la ini tus

1-3. Drei la ithupëjia ka weje huzu së asë, nge pine nemen matre loi e tro sa wange la ini qa hnine la Tusi Hmitrötr ka troa hamë mejiune koi së?

4. (a) Pine nemen matre ame la aqane ketri Iesu hnene la meci ne la sinee i nyidrë, tre, nyine amamane fe koi së la aqane drenge Iehova e kuhu hni Nyidrë la ewekë cili? (b) Nemene la pengöne la aqane ce mele i Iesu memine la itre xaa sinee i Nyidrë?

5, 6. (a) Tune kaa la aqane ketri Iesu hnene la hace ne la hnepe lapa memine la itre enehmu i Lazaro? (b) Pine nemen matre nyine ixatua fe koi së la aqane hace i Iesu?

7, 8. Pine nemen matre ijije troa pë mejiunen la itre atr göne la pengö i Lazaro, ngo nemene la hna kuca hnei Iesu?

9, 10. (a) Tune kaa la aqane amamane Iesu la Qaan la men ka eje thei nyidrëti troa amele Lazaro hmaca? (b) Nemene la itre xaa manathith hne së hna kapa, e tro sa e hnine la Tusi Hmitrötr la itre aqane amelene hmaca la itre atr?

11. Tune kaa la aqane sajuën la trenge nyipici hna cinyihan ngöne Ate Cainöj 9:5, hnene la melehmaca i Lazaro?

12. Pine nemen matre ijije tro sa qaja ka hape, thaa trenga thoi kö lo kola amele Lazaro hmaca qa hna mec?

13. Nemene la itre mekun ka aijijë së troa mejiune ka hape, ijiji Iehova hi troa amelene hmaca la itre ka mec?

14, 15. Tune la hna qaja hnei Iobu, nemene la mekuna i Iehova ngöne la troa amelene hmaca la itre ka mec?

16. Nemene la pengöne la mele elanyi ngöne la kola troa amelene hmaca la itre ka mec?

17. Nemene la etrune la melehmaca elany?

18. Drei la itre “ka meköt” hna troa amelene hmaca, nge troa ketri së tune kaa hnene lai mejiune cili?

19. Drei la itre “ka tha meköti kö,” nge nemene la hna hane aijijë angatr hnei Iehova?

20. Nemene la Gena, nge hnë ue lai?

21, 22. (a) Nemene la ketre pengöne melehmaca? (b) Drei la Atr hna pane amelene hmaca matre troa mele ngöne la götrane la ua?

23, 24. Drei la itre ka sin la “hnënge mamoe ka xalaith,” nge ala ije angatr?

25. Nemene la hna troa ithanatan ngöne la mekene thupen?