Tro jë kowe la alien

Tro jë kowe la itre mekune ka co

Tro jë kowe la itre alien

Itretre Anyipici Iehova

Drehu

Nemene La Nyipi Ini Hna Hamën Hnei Tusi Hmitrötr?

ITRE XAA MEKUN

Drai Ne Amekötin—Nemene La Aliene La Hna Ithanata Celë?

Drai Ne Amekötin—Nemene La Aliene La Hna Ithanata Celë?

TUNE kaa la aqane tro sa hane lapa mekune la Drai Ne Amekötin? Nyimutre la itre ka mekune ka hape, tro la itre atr itre miliar la etrun a isa tro kowe la therone i Akötresie. Ame e cili, hetre ihnyingë, nge kola troa isa amekötin la itre atr. Tro ha amanathithi itre xan, ene la troa hamë angatre la mele ngöne la paradraiso e hnengödrai, nge ame itre xan, tre troa tro kowe la hnëjin, nge tro angatr a akötre e cili uti hë epine palua. Ngo isapengöne catr la hna qaja ngöne la Tusi Hmitrötr. Kola qejepengöne la drai cili hnene la Wesi Ula i Akötresie ka hape, thaa ketre ijine nyine xouene kö, ke, ketre ijine hna mejiune kow me ijine tro hmaca ha acile la itre ewekë ka kei.

Ame ngöne Hna Amamane 20:11, 12, easë a e la aqane qejepengöne Ioane aposetolo la Drai Ne Amekötin, kola hape: “Hnenge hna goeëne la therone atraqate ka wië, me nyidëti ate tuenietin, nge kola köte ene la xajawa i nyidë hnene la fene memine la hnengödrai ; nge tha mama kö la kete göhnë thatraqane lu’ ej. Nge hnenge hna goeëne la nöjei ka mec, ite ka tru me kaco a icilenyi qëmeke ne la theron ; ame hna sheluthe la ite itus ; nge hna sheluthe la kete tus, celë hi tusi ne mel ; ame hna hnyingëne la nöjei ka meci la nöjei ewekë hna cinyihane ngöne la ite tusi thenge la nöjei huliwa i angat.” Drei la Atre Amekötin la hna qaja e celë?

Iehova la Akötresie Atre Amekötin ka sisitria kowe la itre atr asë. Ngo Nyidrëti a nue troa cilën enehila la huliwa ne Amekötin. Thenge la hna cinyihan ngöne Ite Huliwa 17:31, hna qaja hnei Paulo aposetolo ka hape, hnei Akötresie “hna sa la drai ne troa hnyingën’ amekötine la fene hnene la ate hnei nyidëti hna acil.” Ame la Atre Amekötine celë, tre Iesu Keriso lo hna amelene hmaca. (Ioane 5:22) Eue la kola nyiqaan la Drai Ne Amekötin? Nemene la eqean la drai cili?

Kola amamane hnene la tusi Hna Amamane ka hape, ame la Drai Ne Amekötin, tre kola troa nyiqaan thupene la isi e Amagedo, lo ijine kola troa apaatren la fene ka ngazo i Satana e celë ngöne ihnadro.* (Hna Amamane 16:14, 16; 19:19-20:3) Thupene e Amagedo, troa akalabusi Satana me itre demoni i angeic e hnine la ketre ihnaop koi itre macatre ka caa thauzan. Ame ngöne la ijine cili, troa caas lo itre matran, ala 144 000, matre troa itretre amekötine me “ce musi me Keriso uti hë la ite macate ka ca thausan.” (Hna Amamane 14:1-3; 20:1-4; Roma 8:17) Ame la Drai Ne Amekötin, tre, thaa kolo kö lo drai ka 24 lao hawan. Ame la eqean, tre caa thauzane lao macatre.

Ame ngöne la hneijine cili, ene lo caa thauzane lao macatre, tro Iesu Keriso a “ameköti ange ka mele me ange ka mec.” (2 Timoteo 4:1) Ame lai itre “ka mel” tre kolo hi lo “ka ala nyimu atraqat” ka troa mele pe e Amagedo. (Hna Amamane 7:9-17) Hna öhne mina fe hnei Ioane aposetolo la “ite ka mec…kola cile qëmeke ne la theron” ne iameköti. Tune lo hna thingehnaeane hë hnei Iesu, “Tro la nöjei ate ngöne la ite hua [“nyine amekunën,” MN] a denge la aqane ewekë i [Keriso], me tropi” jëne la melehmaca. (Ioane 5:28, 29; Ite Huliwa 24:15) Ngo hna nyi trepene ngöne nemene la kola troa amekötin la itre atr asë?

Thenge la hna meköle goeën hnei Ioane aposetolo, “hna sheluthe la ite itus,” nge “hna hnyingëne la nöjei ka meci la nöjei ewekë hna cinyihane ngöne la ite tusi thenge la nöjei huliwa i angat.” Hapeu hna cinyihan hnine la itre itusi cili la itre hna kuca ha ekö hnene la itre atr? Ohea, thaa kolo kö a troa amekötin la itre atr ngöne la itre hnei angatr hna kuca qëmekene tro angatr a mec. Easë a atre tune kaa lai? Kola qaja hnei Tusi Hmitrötr ka hape: “Gufa la ate ka meci hë ene la ngazo.” (Roma 6:7) Haawe, ame koi itre hna amelene hmaca, tre, ase hë apën lo itre ngazo hnei angatr hna kuca ekö, kösë pepa ka pë pala kö hna cinyihane ngön. Qa ngöne lai, ame hi lai itre itus, tre celë hi itre hna amekötine lai hnei Akötresie. Maine angatr a pi hane mel epine palua, nyipi ewekë tro la itre ka mele pe e Amagedo me itre hna amelene hmaca a drengethenge la itre hna amekötin hnei Akötresie, ene mina fe la itre hna amekötin ka hnyipixe hnei Iehova hna troa hamën ngöne la caa thauzane macatre. Haawe, tro ha amekötin la itre atr thenge la itre hnei angatr hna troa kuca ngöne la Drai Ne Amekötine cili.

Ame la Drai Ne Amekötin, tre kola troa pane aijijën la itre atr, itre miliar la etrun tro angatr a hane atre la aja i Akötresie me trongëne ej. Kolo lai a hape, troa eköth elanyi la ketre huliwa ne ini ka tru. Eje hi laka, “tro itete lapane la fen’ a inine la thina ka meköt.” (Isaia 26:9) Ngo thaa angatr asë kö elanyi la itre ka ajane troa kuca la aja i Akötresie. Kola qaja ngöne Isaia 26:10 ka hape: “Maine hna hnim la ka ngazo, thaa tro jë kö angeic’ a inine la meköt, ngöne la nöjei ka meköti tro angeic’ a thiina ka qali, nge tha mekune kö la lolo i Iehova.” Ame koi itre atr ka thiina ka ngazo ngöne la Drai Ne Amekötin, tro pë hë a meci palua.—Isaia 65:20.

Ame hë ngöne la pune la Drai Ne Amekötin, tro la itre atr ka mele pe a “mele hmaca” ene laka itre atr ka pexeje hë angatr. (Hna Amamane 20:5) Haawe, tro ha öhne ngöne la Drai Ne Amekötin la kola ahnyipixene hmaca la itre atr matre troa pexeje tune ekö lo ngöne la qaan. (1 Korinito 15:24-28) Thupene lai troa traqa lo itupathi tixenuë. Tro ha nue Satana hmaca qaa kalabus, nge tro hmaca angeic a amenun la itre atr asë, nge celë hi itupath tixenuë i angeice lai. (Hna Amamane 20:3, 7-10) Ame koi itre ka cile hut ngöne la itupath, tro hë angatr elanyi a kapa la hna thingehnaean hnei Tusi Hmitrötr, kola hape: “Tro ha la ange ka meköti a hetenyi la nöj, me lapa palua kö ngön’ ej.” (Salamo 37:29) Nyipici, ame la Drai Ne Amekötin, tre, tro ha ketre manathithi atraqatr elany kowe la itre atr asë ka lapaune koi Iehova!


*  Ame göi Amagedo, tre goeëne ju la itus Étude perspicace des Écritures, Volime 1, götrane 63-4, Volime 2, götrane 1073-1074, me mekene 20 ne la itus Thili Jë Kowe La Nyipi Akötresie Ka Caas, lue itus hna amamane hnene la Itretre Anyipici Iehova.

← Goeëne ju la mekene tus