Tro jë kowe la alien

Tro jë kowe la itre mekune ka co

Tro jë kowe la itre alien

Itretre Anyipici Iehova

Drehu

Nemene La Nyipi Ini Hna Hamën Hnei Tusi Hmitrötr?

MEKENE EITRIIN

Bapataiso Me Aqane Tro Epuni a Imelekeu Me Akötresie

Bapataiso Me Aqane Tro Epuni a Imelekeu Me Akötresie

Tune kaa la aqane trongen la Bapataiso ne la Keresiano?

Nemene la itre nyine troa kuca matre ijije troa hane xome la bapataiso?

Nemene la aqane tro la ketre atr a sa xepu koi Akötresie?

Nemene la kepine ka tru matre xome jë la bapataiso?

“HANE lola tim ; hape u, ngazo troa bapataiso ni ?” Kolo hnyinge ne la ketre atr ka tru ne Aithiope ekö ngöne lo hneijine i Iesu. Hnei Filipo ketre Keresiano hna anyipicine koi angeic ka hape, Iesu hi lo Mesia hna thingehnaean. Hna ketr la hni ne lai atre Aithiope hnene la ini hnei angeic hna kapa qa hnine la Tusi Hmitrötr, ene pe angeic a trongëne ju la hnei angeic hna inin. Hnei angeic hna amamane ka hape, angeic a ajan troa xome la bapataiso! —Ite Huliwa 8:26-36.

Ketre atr ka tru ne Aithiope ngöne lo hneijine i ange aposetolo

2 Thupene hë la hna ce wange memine la ketre Atre Anyipici Iehova lo itre pane mekene la itusi celë, maine jë ijije fe hë tro epuni a hnyingëne ka hape, ‘Nemene pe kö la ka sewe ni troa xome la bapataiso?’ Atre hë epuni enehila la hna thingehnaean hnei Tusi Hmitrötr, ene la mele ka thaa ase palua kö ngöne la Paradraiso. (Luka 23:43; Hna Amamane 21:3, 4) Ketre atre fe hë epuni la pengöne la itre ka mec, memine la mejiun kowe la mele hmaca. (Ate Cainöj 9:5; Ioane 5:28, 29) Maine jë epuni fe a hane caas memine la Itretre Anyipici Iehova ngöne la itre icasikeu ne la ekalesia i angatr, nge ketre öhne fe hë epuni la aqane melëne angatr la nyipi hmi. (Ioane 13:35) Nge ame la ka nyipi ewekë, tre epuni fe hë a hane nyiqaane troa akökötrene la aqane imelekeu i epun me Iehova Akötresie.

3 Tune kaa la aqane tro epuni a amamane ka hape, epuni a ajan troa nyihlue i Akötresie? Hnei Iesu hna qaja kowe la itretre drei nyidrë ka hape: “Tro jë nyipunie…a inine la nöjei nöj’ asëjëihë, me bapataiso angat.” (Mataio 28:19) Hnei Iesu hna ketre sipu amamane la tulu, ene laka hna bapataiso nyidrë hnine la tim. Thaa hna fi nyidrëti kö hnei tim, me xölaxölane la he i nyidrë. (Mataio 3:16) Ame la hnëewekë hna hape “bapataiso,” tre ka xulu qa ngöne la qene Heleni, ame la alien tre kola hape “lö hnin.” Qa ngöne lai, ame la alien la bapataiso thatraqane la itre keresiano, tre kola hape, troa lö asë la ngönetrei hnine la tim.

4 Ame asë hi la itre atr ka ajan troa imelekeu me Iehova Akötresie, nyipi ewekë tro angatr a trongëne la hna amekötine celë, ene la troa bapataiso hnine la tim. Kola amamane hnene la kola xome la bapataiso qëmekene la ka ala nyimu laka, hetre ajane i epuni troa nyihlue i Akötresie. Kola amamane mina fe laka hetre madrine i epun troa kuca la aja i Iehova. (Salamo 40:7, 8) Ngo, hetrenyi la itre nyine kuca, maine epuni a ajan troa xome la bapataiso.

NYIPI EWEKË LA ATREHMEKUN MEMINE LA LAPAUN

5 Ase hë epuni nyiqaane feke ca, ene laka caa ewekë hna pane kuca ha. Nemene la hna pane kuca ha? Hna kapa ha la atrehmekune i Iehova Akötresie me Iesu Keriso, maine jë jëne la hna inine la Tusi Hmitrötr. (Ioane 17:3) Ngo thaa tro hmekuje kö a ini. Loi e ajan hnene la itre Keresiano troa “tiqa hnene la trotrohnine la aja i [Akötresie].” (Kolose 1:9) Ame la troa sin la itre icasikeu ne la Itretre Anyipici Iehova, tre, celë hi ketre ewekë ka tru lai ka xatua angatr. Nyipi ewekë troa sine la itre icasikeu cili. (Heberu 10:24, 25) Maine tro epuni a sine pala hi itre ej, tro ha kökötre hnyawa thei epun la atrehmekune i Akötresie.

Loi e troa hetrenyi la nyipi atrehmekun ne la Wesi Ula i Akötresie, tre, ketre nyine kuca lai ka nyipi ewekë matre ijij troa hane xome la bapataiso

Kola ini Tusi Hmitrötr

6 Eje hi laka, thaa tro kö a treqen troa atre asë la hna qaja hnene la Tusi Hmitrötr, matre hane jë pë hë xome la bapataiso. Ame lo ketre atr ka tru ne Aithiope, tre hetrenyi angeic la itre xaa ithuemacany, ngo thaa pexeje pe, angeic pala hi a aja ixatua matre troa trotrohnine la itre xaa hna qaja hnene la Tusi Hmitrötr. (Ite Huliwa 8:30, 31) Ketre tune mina fe, tru catre pala kö la itre nyine tro epuni a atre. Eje hi laka, thaa tro jë kö së a traqa kowe la hna hmaca ngöne la easë a inine la pengö i Nyidrë. (Ate Cainöj 3:11) Ngo qëmekene tro epuni a xome la bapataiso, nyipi ewekë tro epuni a pane atre me kapa la itre trepene ini ne la Tusi Hmitrötr. (Heberu 5:12) Eje e hnine la itre trepene ini cili la trenge nyipici, ngöne la kola qeje pengöne la itre ka mec memine la enyipiewekën la ëje i Akötresie me Baselaia i Nyidrë.

7 The tro kö a mekune ka hape, e hetrenyi hë la atrehmekun, tre ijije hi lai, ke hna qaja fe lo ka hape, “tha ’teine kö troa amadi [Akötresie] e pëkö lapaun.” (Heberu 11:6) Kola qaja hnei Tusi Hmitrötr koi së ka hape, ame lo itre atr a drenge ekö ngöne la traon e Korinito la maca hna tro fë hnene la itretre drei Iesu, ene pe hna “lapaun, me bapataison” la itre atr cili. (Ite Huliwa 18:8) Ketre tune mina fe, jëne la hnei epuni hna inine la Tusi Hmitrötr, loi e tiqa nyipunie hnene la lapaun, ene la troa kapa ka hape, qaathene la ua i Akötresie la Wesi Ula i Nyidrë. Loi e troa xatua epuni hnene la ini tus troa lapaun kowe la itre hnei Akötresie hna thingehnaean, me mejiune fe kowe la mene ne la mele hna huujën hnei Iesu nyine iamele.—Iosua 23:14; Ite Huliwa 4:12; 2 Timoteo 3:16, 17.

CE THAWA JË MEMINE LA ITRE XAA ATR LA NYIPICI QA HNINE LA TUSI HMITRÖTR

8 Ame ngöne la kola kökötr la lapaun ngöne la itre hni nyipunie, ene pe tro hë epuni a öhne laka jol e troa lapa fë la hnei epuni hna inin. (Ieremia 20:9) Tro ha upi epuni troa qeje Akötresie memine la itre trepene mekuana i Nyidrë kowe la itre xaa atr.—2 Korinito 4:13.

Loi e tro la lapaun a upi nyipunie troa ce thawa memine la itre xan la hnei epuni hna mejiune kow

Ketre trahmanyi a ce thawa me itre xan la itre mekune hnei nyidrëti hna mejiune kow

9 Maine jë tro epuni a nyiqaane ce thawa la nyipici qa hnine la Tusi Hmitrötr, me ithanata cememine la wanga atrehmekun kowe la itre sinee i epun, me itre enehmu, me itre ka lapa ezi epun, me itre sine huliwa i epun. Ame e ketre drai, tre tro hë epuni a ajan troa hane ce cainöj memine la Itretre Anyipici Iehova. Ame hë e cili, ce ithanatane ju la aja ka eje thei epun, memine la trejin ka inin la Tusi Hmitrötr me epun. Maine kola mama ka hape, ijiji epuni fe hë troa hane cainöje trootro, haawe, troa wange la ketre ijine matre tro la lue qatre thupe ne la ekalesia a ce ithanatane me epun, memine fe la ka ini epun la itre hna amekötine thatraqane lai.

10 Nyipi ewekë tro epuni a atre hnyawa la itre xaa qatre thup Keresiano, ka thupën la hna axö mamoe i Akötresie. (Ite Huliwa 20:28; 1 Peteru 5:2, 3) Ame ngöne la kola öhne hnene la itre qatre thup cili laka, epuni a trotrohnin me mejiun kowe la itre trepene ini qa hnine la Tusi Hmitrötr, nge epuni a melëne fe la itre trepene meköti Akötresie, nge hetre aja i epuni troa ketre atre Anyipici Iehova, tro hë angatr a kapa la mekune i epun troa hane cainöjën trongën la maca ka loi, ngacama thaa hna bapataiso epuni petre kö.

11 Ame ngöne ketre götran, maine jë nyipi ewekë tro epuni a saze la itre xaa aqane mele i epun, memine la itre hnei epuni hna majemine kuca, matre ijije tro epuni a hane cainöje trootro. Kolo fe lai a hape, trije pi fe lo itre xaa hna majemine ka thaa mama kö. Qa ngöne lai, qëmekene tro epuni a sipon troa hane cainöj, ngacama thaa hna bapataiso epuni petre kö, nyipi ewekë troa nuetrije la itre hna majemine kuca ka sis, tune la kuci ngazo, me iji menu la kahaitr, me kuci dorog.—1 Korinito 6:9, 10; Galatia 5:19-21.

IETRA ME UJË TRIJE LA NGAZO

12 Hetrenyi kö la itre xaa nyine troa kuca matre ijije troa hane xome la bapataiso. Hna qaja hnei aposetolo Peteru, ka hape: “Ietra ju…me ujëjë, mate troa köle tije la nöjei ngazo i nyipunie.” (Ite Huliwa 3:19) Ame la ietra, tre ene la troa hetrenyi la hleuhleu e kuhu hni ne la atr pine la ngazo hna kuca. Ka nyipi ewekë catr la troa ietra hnene la atr ka kuci ngazo, ngo nyipi ewekë mina fe troa hane ietra hnene la ketre atr ka pë gelen ngöne la aqane ujë i angeic. Pine nemen? Pine laka ka ngazo asë hi la itre atr, nge nyipi ewekë troa senge la itre ngazo së hnei Akötresie. (Roma 3:23; 5:12) Qëmekene tro epuni a inine la Tusi Hmitrötr, thatre kö epuni lo aja i Akötresie. Haawe, tro epuni lai a melën tune kaa la aja i Nyidrë, nge thatre pe epun? Qa ngöne lai, nyipi ewekë tro epuni a ietra.

13 Thupene la hna ietra, loi e troa ujë. Thaa tro hmekuje kö a atrehmekune ju hi lo ewekë ka ngazo hna kuca. Nyipi ewekë troa trije lo aqane ujë hnapan, nge troa xecie hnyawa laka qaane enehila, tro hë epuni a kuca la ewekë ka meköt. Ame la ietra memine la troa ujë qa ngöne la ngazo hna kuca, tre lue nyine tro lai a kuca qëmekene troa xome la bapataiso.

LOI E TROA SA XEPU

14 Hetrenyi la ketre ewekë ka tru nyine troa kuca qëmekene troa xome la bapataiso. Nyipi ewekë tro nyipunie a sa xepu koi Iehova Akötresie.

15 Ame ngöne la epuni a sa xepu koi Iehova jëne la thith, epuni hi lai a sisinyi troa nue la mele epuni koi Nyidrëti hmekuj epine palua. (Deuteronomi 6:15) Pine nemen matre tro la ketre atr a ajan troa nyihlue i Akötresie? Hanawange la ketre ceitun, caa nekö trahmanyi a iaja memine la ketre nekö jajiny. Kola atre trootro la jajiny hnene la nekö trahmany me öhne la itre thiina ka lolo ne la jajiny, hane hi lai kola kökötre la ihnimi angeic koi nyiidro. Ame hë e cili, pë hmaca kö ejolen tro angeic a sipone troa faipoipo me nyiidro. Nyipici, ame la troa faipoipo, tre kola troa xome la itre xaa hnëqa. Ngo ihnimi la ka troa upi angeic troa traqa kowe la ewekë ka tru cili.

16 E atrepengöi Iehova ha epun me hnimi Nyidrë, epuni fe hë lai a thele troa nyihlue i Nyidrë hnene la hni epuni ka pexej, maine amë pena la itre xaa ifego matre troa nyihlue i Nyidrëti hnyawa. Ame la atr ka ajan troa xötrethenge Iesu Keriso lo Hupuna i Akötresie, tre loi e tro angeic a “xele angeice kö.” (Mareko 8:34) Tro sa xele së kö e troa xecie hnyawa koi së ka hape, ame la itre sipu aja së me itre mekuna së, tre thaa tro kö itre ej a sewe së troa drengethenge Akötresieti hnyawa. Qëmekene tro epuni a xome la bapataiso, mekune hnyawa kö laka aja i Iehova Akötresieti la nyine tro epuni a kuca panëne ngöne la mele i epun.—1 Peteru 4:2.

LOI E TROA ELË HUNE LA XOU TROA TRIA

17 Ame itre xan, tre angatr a luelue troa sa xepu koi Iehova pine laka, thaa ajane kö troa eatrën la itre hnëqa nyine kuca ka sisitria. angatr a xou troa sa xepu tune la Keresiano, ke wanga tro Akötresieti elanyi a hnyingë kepin la itre thiina i angatr. Hnene laka angatr a xou tro hmaca a kei kowe la ngazo me akötrën la hni Iehova, haawe, angatr a mekune ka hape, ma ka loi hi thaa tro kö angatr a hane sa xepu koi Nyidrë.

18 Ame ngöne la epuni a inin troa hnimi Iehova, ene pe, tro ha uku epuni troa sa xepu koi Nyidrë, me catre troa eatrën ngöne la mele i epun la aja cili. (Ate Cainöj 5:4) Thupene la hna sa xepu, loi e “tro pala hi nyipunie ijije koi Akötesie, kolo pala hi a amadi nyidë.” (Kolose 1:10) Pine la ihnimi epuni koi Akötresie, haawe thaa tro kö a hace koi epuni e troa kuca la aja i Nyidrë. Ma caasi jë hi la mekune i epuni me Ioane aposetolo, ngöne la nyidrë a cinyihane ka hape: “Dei lola aja koi Akötesie, laka eësha denge thenge la ite wathebo i nyidë ; nge tha hace kö la ite wathebo i nyidë.”—1 Ioane 5:3.

19 Thaa kolo kö a ajan tro epuni a pexej matre troa hane sa xepu koi Akötresie. Atre hi Iehova la hnei epuni hna atreine troa kuca, nge thaa Nyidrëti kö a thele thei epuni la ewekë hnei epuni hna thatreine troa kuca. (Salamo 103:14) Ame la aja i Nyidrë, tre tro epuni a traqa kowe la hna ajan, nge tro Nyidrëti a sajuë epun me xatua epun. (Isaia 41:10) Loi e troa xecie hnyawa koi epuni laka, maine tro epuni a mejiune koi Iehova hnene la hni epuni ka pexej, haawe, tro hë Nyidrëti a “amekötine la ite jë i [epun].”—Ite Edomë 3:5, 6.

NYIHATRENE JË LA SA XEPU I NYIPUNIE HNENE LA BAPATAISO

20 Maine tro epuni a wangatrune hnyawa la itre ewekë hne së hna ce ithanatane hë, tro hë itre eje a hamë ixatua koi epuni troa sa xepu koi Iehova jëne la thith. Nyipi ewekë tro asë fe la itre atr ka hnimi Akötresieti hnyawa, a hane ‘qaja anyipicine koi nöjei atr la pengöne la iamele.’ (Roma 10:10) Tune kaa la aqane tro epuni a kuca la ewekë cili?

Hane kö epuni isa pane sa xepu koi Akötresie ngöne la thith?

Kola thithi hnene la ketre trahmany

21 Loi e tro epuni a thuemacan la kordinatör ne la lapa ne la itre qatre thup ne la ekalesia i epun, ka hape, epuni a ajan troa hane xome la bapataiso. Tro pë hë nyidrë a ce wang memine la itre xaa qatre thup, matre troa ce ithanatane me epuni lo itre hnying göne la itre trepene ini qa hnine la Tusi Hmitrötr. Maine kola kepe epuni hnene la itre qatre thupe cili, haawe, tro hë angatr a qaja koi epuni ka hape, ijiji epuni fe hë troa hane xome la bapataiso ngöne la asabele hnapin.* Hetrenyi la ketre cainöj hna hnëkën ngöne la ijine cili, matre troa amexeje hmaca la aliene la bapataiso. Thupene lai, tro la ka cile fë lai cainöj a sipon kowe la itre ka troa xome la bapataiso, matre tro angatr a ce sa la lue hnying; angatre hi lai a troa hane “qaja” amamane kowe la ka ala nyim la lapaune i angatr.

22 Bapataiso la ka aijijën la ka ala nyim troa hane atrehmekune ka hape, epuni la ketre atr ka hane sa xepu koi Akötresie, nge ketre Atre Anyipici Iehova fe hë epuni enehila. Ame asë hi la itre ka xome la bapataiso, tre hna hetin asë la ngönetrei angatr hnine la tim, matre troa amamane kowe la nöjei atr ka hape, ase hë angatr hane sa xepu koi Iehova.

ALIENE LA BAPATAISO I EPUN

23 Hnei Iesu hna qaja ka hape, troa bapataison la itretre drei nyidrë “kowe la atesiwa i Tetetro, me Hupuna, me Uati Hmitöt.” (Mataio 28:19) Kola hape, kola atrehmekun hnene la ka xome la bapataiso la musi Iehova Akötresie me Iesu Keriso. (Salamo 83:18; Mataio 28:18) Angeice fe a atrehmekune la hnëqa memine la huliwa ne la uati hmitrötre i Akötresie, ene la trenge catre i Nyidrë.—Galatia 5:22, 23; 2 Peteru 1:21.

Ame la alien la bapataiso tre ene la kola meci ngöne lo itre aqane ujë hnapan, nge kola mele hmaca matre troa kuca la aja i Akötresie

Kola bapataisone la ketre trahmany

24 Ngo eje hi laka, ame la bapataiso tre, thaa ene caasi kö la troa hetin hnine la tim. Hatrene pe la ketre ewekë ka sisitria catr. Ame la kola lö hnine tim, kola nyihatren la epuni a meci ngöne la aqane ujë i epuni hnapan. Ame la epuni a mejë hmaca qa hnine la tim, kolo hi lai a amamane ka hape, epuni hë enehila a mele hmaca matre troa kuca la aja i Akötresie. Mekune ju fe laka, hnei epuni lo hna sa xepu koi Iehova, ngo thaa kowe kö la ketre huliwa, me kowe la ketre kepin, maine kowe la itre atr, maine kowe la ketre organizasio. Ame la epuni a sa xepu me xome la bapataiso, tre lue aqane epuni hi lai a nyiqaane mele ka loi koi Akötresie, ene laka, lolo la aqane imelekeu i epun me Nyidrë.—Salamo 25:14.

25 Thaa hnene kö laka ase hë xome la bapataiso tre mele hë së. Hna cinyihan hnei Paulo aposetolo ka hape: “Huliwane jë la mele i nyipunie ngöne la qou me hmengömengön.” (Filipi 2:12) Ame la bapataiso, tre kolo petre hi lai a nyiqaan. Matre ame la nyine troa hnyingëne thel, tre, Tune kaa la aqane troa lapa catr ngöne la ihnimi Akötresie? Tro pë hë la mekene tixenuë a sa la hnyinge celë.

NEMENE LA HNA ININ HNEI TUSI HMITRÖTR

  • Ame la bapataiso ne la Keresiano tre, ene la troa hetine asë la ngönetrei hnine la tim, ngo thaa ene kö la troa xölan la he hnei hnepe tim.—Mataio 3:16.
  • Ame la itre nyine kuca matre troa hane xome la bapataiso, tre, ene la troa pane hetrenyi la atrehmekun, me lapaun, me ietra, me ujë, me ketre sa xepu koi Akötresie.—Ioane 17:3; Ite Huliwa 3:19; 18:8.
  • Ame la atr ka ajan troa sa xepu koi Iehova, tre loi e tro angeic a xele angeice kö, tune lo itre atr ekö ka xele angatre kö matre troa xötrethenge Iesu.—Mareko 8:34.
  • Ame la Bapataiso tre kola nyihatren la kola meci ngöne lo itre aqane ujë hnapan, nge kola mele hmaca matre troa kuca la aja i Akötresie.—1 Peteru 4:2.

*  Hna xome pala hi hnene la itre atr la bapataiso ngöne lo itre ijine asabele me kovasio ne la Itretre Anyipici Iehova, hna kuca ngöne la nöjei macatre.


Itre hnying thatraqane la ini tus

1. Pine nemen matre kola ajan hnene la ketre atr ka tru ne Aithiope troa xome la bapataiso?

2. Pine nemen matre loi e tro epuni a mekune hnyawa troa hane xome la bapataiso?

3. (a) Nemene la hnei Iesu hna amekötin kowe la itretre drei nyidrë? (b) Nemene la aqane troa bapataiso ngöne la tim?

4. Nemene la hna amamane hnene la bapataiso hnine la tim?

5. (a) Nemene la pane nyine troa kuca matre xome jë pë hë epuni la bapataiso? (b) Pine nemen matre nyipi ewekë catr la itre icasikeu i Keresiano?

6. Nemene la etrun la atrehmekune qa hnine la Tusi Hmitrötr nyine tro epuni a kapa, matre ijiji epuni jë troa hane xome la bapataiso?

7. Nemene la thangane kowe la mele i epun, e tro epuni a inine la Tusi Hmitrötr?

8. Nemene la ka troa upi epuni troa ce thawa memine la itre xaa atr la hnei epuni hna inin?

9, 10. (a) Drei la hnei epuni hna troa nyiqaane ce thawa memin, la nyipici qa hnine la Tusi Hmitrötr? (b) Nemene la hnei epuni hna troa kuca maine epuni a ajan troa ce cainöje trootro memine la Itretre Anyipici Iehova?

11. Nemene la itre nyine troa saze hnene la itre xan, qëmekene troa aijijë angatr troa hane nyiqaane cainöje trootro?

12. Pine nemen matre nyipi ewekë troa ietra?

13. Nemene la aliene la hna hape, troa ujë?

14. Nemene la ketre ewekë ka tru nyine troa kuca qëmekene troa xome la bapataiso?

15, 16. Nemene la aliene la hna hape troa sipu sa xepu koi Akötresie, nge nemene la ka upe la ketre atr troa sa xepu?

17. Pine nemen matre itre xan a uthi he troa hane sa xepu koi Akötresie?

18. Nemene la ka upi epuni troa sa xepu koi Iehova?

19. Pine nemen matre thaa tro kö epuni a xou troa sa xepu koi Akötresie?

20. Pine nemen matre ame la troa sa xepu koi Iehova, tre, thaa koi easë hmekuje kö me Nyidrë?

21, 22. Tune kaa la aqane tro epuni a “qaja” amamane la lapaune i epun kowe la ka ala nyim?

23. Nemene la aliene la hna hape troa bapataison “kowe la atesiwa i Tetetro, me Hupuna, me Uati Hmitöt”?

24, 25. (a) Nemene la hna nyihatren hnene la bapataiso? (b) Nemene la hnying nyine troa sa pë hë thupen?