Tro jë kowe la alien

Tro jë kowe la itre mekune ka co

Tro jë kowe la itre alien

Itretre Anyipici Iehova

Drehu

Trenge Edomë Qa Hnine La Tusi Hmitrötr

Edromë 116: Mele Ka Epine Palua Koi Së!

Edromë 116: Mele Ka Epine Palua Koi Së!

NYIPUNIETI a öhne cahu itus hna e hnene la nekö jajiny memine la lue sine tronge i nyën? Angatre hi lai a e la itusi celë, ka tune la hnei epuni hna e, ene la Trenge Edromë Qa Hnin La Tusi Hmitrötr. Nge angatr cahu a e la meken tixenuë ne la itus hna hape, “Mele Ka Epine Palua Koi Së.”

Ketre nekö trahmany a e tus

Atre hi nyipunie la hnei angatr hna inin? Ame la ewekë hnapan, tre, nyipi ewekë troa atre la pengö i Iehova memine la hupuna i Nyidrë, ene Iesu, maine easë ajan troa hane mele epine palua. Önine la Tusi Hmitrötr: ‘Hanawange la jëne troa hetrenyi la mele ka thaa ase palua kö. Inine jë troa atre la Akötresieti ka caas memine la hupuna hnei Nyidrëti hna upe kowe la fen, ene Iesu Keriso.’

Ngo tro sa atre Iehova Akötresieti tune kaa memine la Hupuna i Nyidrë, ene Iesu? Ame la ketre jëne tro sa atre nyidroti hnyawa, tre ene la troa e la itus, Trenge Edromë Qa Hnin La Tusi Hmitrötr, qaane ju hi ngöne la qaan, uti hë ngöne la pun. Nyimutre la itre ithuemacany hne së hna troa kapa göi Iehova me Iesu? Nge kolo mina fe a qaja la itre ewekë hnei nyidroti hna kuca ha, me itre ewekë hnei nyidroti hna troa kuca. Ngo thaa eje hmekuje kö la troa e la itus, hetrenyi pala kö la nyine troa kuca ka nyipi ewekë catr.

Tusi Hmitrötr

Epuni a öhne cahu ketre itus ka meköl? Tusi Hmitrötre hi lai. Tro la ketre atr a e koi nyipunie la itre götran ne la Tusi Hmitrötr, ka nyitrepen la itre hna edromën ngöne la itusi celë. Tusi Hmitrötr a hamë së la itre ithuemacanyi ka nyimutre hne së hna ajan, matre tro së a atreine troa nyihlue i Iehova hnyawa, nge matre tro fe së a hane hetrenyi la mele ka thaa ase palua kö. Haawe, loi e tro sa majemin troa inin la Tusi Hmitrötr.

Ngo thaa tro hmekuje kö a atre Iehova Akötresie me Iesu. Atreine hi tro sa atre la itre ithuemacanyi ka nyimutre göi nyidro, ngo maine tro hi së a hmaca e cili, thatreine jë kö tro sa hetrenyi la mele ka thaa ase palua kö. Atre fe hi nyipunie la ketre nyine tro sa kuca ka nyipi ewekë catr?

Ene la tro sa melën thenge la itre ewekë hne së hna inin. Meku Iuda Isakariota hi lo hnei nyipunie? Angeice fe hi e hnine lo ala 12 lao aposetolo hna iën hnei Iesu. Hetrenyi thei Iuda la atrehmekun göi Iehova me Iesu. Ngo nemene hë la ewekë ka traqa pe koi angeic? Kola tro la itre drai, nge kola cia e kuhu hni angeice la pi hetre mo, ene pe, angeic a wanaxoeë Iesu pi me salemë nyidrë kowe la itre ka methinë nyidrë, nge 30 lao mani sileva hna kapa hnei angeic qaathene la itre ka nyithupei angeic. Haawe, thaa tro fe kö Iuda a hane kapa la mele ka thaa ase palua kö.

Meku Gehazi hi lo hnei nyipunie, kolo trahmanyi hna qaja ngöne la Mekene 69? Hnei angeic hna piin la itre ifekë ewekën, ene la itre iheetr, me mani. Haawe, hnei angeic hna thoi matre troa kapa la itre ewekë cili. Ngo hnei Iehova hna nyithupene koi angeic la ngazo i angeic. Nge tro mina fe Nyidrëti a nyithupene koi së, e thaa drengethenge kö së la itre trenge wathebo i Nyidrë.

Ngo hetrenyi pala hi ngöne la itre hneijin la itre atr ka lolo thiina, ka catre nyihlue i Iehova hnene la hni ka nyipici. Hapeu, easë kö a ajan troa hane tui angatr? Ka lolo catr nge nyine troa xötrethenge la tulu i Samuela, lo nekönatr. Mekune ju së lo hne së hna ce wange hë ngöne la Mekene 55, kolo petre hi a foa maine faifi lao macatre i nyën, nge nyëne hë a hane nyihlue i Iehova hnine la uma ne hetra. Haawe, thaa hnene kö laka, nekönatre nyipunie, matre thatreine kö tro nyipunie a hane nyiqaane nyihlue i Iehova, ijije hi tro nyipunie a hane tui Samuela.

Eje hi lai laka, Iesu Keriso hmekuje hi la tulu nyine tro së asë a xötrethenge. Ngöne lo nyidrëti a nekönatr, tune la hna amamane ngöne la Mekene 87, hnei nyidrëti hna ithanata memine la itre xaa atr hnine la ēnē, kola qaja la Tretretro i nyidrë e koho hnengödrai. Loi e tro së a xome la tulu i nyidrë. Catre pi së troa qaja kowe la itre atr ka ala nyim, la elolon la Akötresi së ene Iehova, memine la Hupuna i Nyidrë Iesu Keriso. Maine tro së a kuca la itre ewekë cili, eje hi lai laka, atreine hi tro fe së a hane mele epine palua, ngöne la paradraiso i Akötresie ka hnyipixe e celë fen.

Ioane 17:3; Salamo 145:1-21.



Itre Hnying

  • Nemene la nyine tro sa atrepengöne hnyawa maine easë a ajan troa mele epine palua?
  • Tune kaa la aqane tro sa atre Iehova Akötresie me Iesu, tune la hna amamane hnene cahu nekö jajiny memine la itre sine ce elo i nyën ngöne lai iatr?
  • Nemen la ketre itusi hnei nyipunieti hna öhne ngöne cahu iatr, nge pine nemen matre loi e tro pala hi sa e ej?
  • Ngöne la easë a thele troa atre Iehova me Iesu, nemene mina fe la nyine tro sa kuca matre troa hetrenyi la mele ka thaa ase palua kö?
  • Nemene la ini hne së hna xome qa ngöne la Edromë 69?
  • Nemene la tulu ka loi hna amamane hnene la nekönatr, Samuela la ëjen ngöne la Edromë 55?
  • Tune kaa la aqane tro sa xötrethenge la tulu i Iesu Keriso, nge maine troa kuca tui nyidrë, nemene hë la hne së hna atreine troa kuca elany?

Itre xaa hnying

  • E jë la Ioane 17:3.

    Tune kaa la aqane amamane hnene la Tusi Hmitrötr, ka hape, ame la troa atrehmekua Iehova Akötresie me Iesu Keriso, tre thaa ene hmekuje kö la troa hnehene la itre nyine troa kuca nge eje hë lai? (Mat. 7:21; Iako. 2:18-20; 1 Ioane 2:17)

  • E jë la Salamo 145:1-21.

    Nemene la itre xaa kepin matre easë a atrunyi Iehova? (Sal. 145:8-11; Hna ama. 4:11)

    Nemene la aliene la kola qaja, ka hape, “jiniati Iehova kowe la nöjei ewekë asë,” nge tune kaa la aqane troa aeasenyi së catre koi Nyidrë hnene la ewekë cili? (Sal. 145:9; Mat. 5:43-45)

    Maine atraqatre Iehova ngöne la mele së, haawe, nemene hë la nyine tro sa kuca? (Sal. 119:171, 172, 175; 145:11, 12, 21)