Tro jë kowe la alien

Tro jë kowe la itre mekune ka co

Tro jë kowe la itre alien

Itretre Anyipici Iehova

Drehu

Trenge Edomë Qa Hnine La Tusi Hmitrötr

Edromë 109: Peteru Thei Konelio

Edromë 109: Peteru Thei Konelio

HANAWANG cahu kola cile hnei Peteru, nge itre xaa sinee i angeic e hutrö i angeic. Ngo pine nemen matre kola sa iwatingöne ca la ketre trahmany qëmeke i Peteru? Hapeu, ka loi kö e troa ujë tune lai? Atre fe hi nyipunieti la ëje ne lai atr?

Kola iöhnyi hnei Peteru me Konelio

Ame la trahmanyi cili, tre, Konelio. Angeic la ketre tane isi angetre Roma. Thatre Peteru kö hnei Konelio, ngo hna upi angeic troa thei Peteru kowe la hnalapa i angeic. Tro sa ce wang la kepin, matre traqa pi kowe la mekune cili.

Ame la itre atr ka pane xötrethenge Iesu, tre, angetre Iudra ngo thaa atre Iudra fe kö Konelio. Ngo, ka hni fe angeic koi Akötresie me thithi koi Nyidrë, nge ka kuca fe la ite ewekë ka lolo ka nyimutre catr kowe la itre atr. Haawe, ame ngöne la ketre hnaipajö mama pi hi koi angeic la ketre angela kola qaja ka hape: ‘Madrine catre Akötresie koi eö, nge Nyidrëti a troa aejën la itre thithi eö. Upe jë la itre xaa atr troa theng la ketre trahmany, Peteru la ëje i nyidrë. Ka lapa nyidrë e Iopa, ngöne la hnalapa i Simona, ketre atr ka mele ezine la hnagejë.’

Haawe, Konelio a canga upe pi la itre atr troa thei Peteru. Elanyi hë, traqa ha angatr easenyine e Iopa, Peteru e hune la uma i Simona. E cili, Akötresieti a kuca jë matre tro Peteru a mekune laka, angeic a öhne la ketre imaano atraqatr hna eune kowe la fen qaa hnengödrai. Eje hnine la imaano cili, la nöjei pengöne öni. Ame lo ngöne la wathebo i Akötresie, ka sisi la itre öni cili nge thaa tro kö a öni itre ej, nge kola traqa la nine ula kola hape: ‘Peteru, cile jë. Humuthe ju nge öni jë.’

Kola sa hnei Peteru ka hape: ‘Ohea! Thaa ka öni kö ni la itre ewekë ka sis.’ Ngo kola qaja koi Peteru hnene la nine ula ka hape: ‘Ea mano ju eö jele ngazon me qaja ka hape, ka sis la itre ewekë hnei Akötresie hna qaja enehila ka hape, ka pui loi.’ Akönia qaja tune lai koi Peteru. Peteru petre kö a hnyingëne thel la aliene la itre ewekë cili, ene pe traqa pi hi lo itretre tro fë maca i Konelio me hnyingë Peteru.

Haawe, kola uti pi hnei Peteru me qaja ka hape: ‘Ini hi la atr hnei nyipunieti hna thel. Nemene la kepin matre nyipunie a traqa troa wai ni?’ Ame ngöne la kola qejepengöne hnei angatr, laka, hna upi Konelio hnene la angela troa thei Peteru kowe la hnalapa i angeic; haawe Peteru hi lai a kapa ju la tronge i angatr. Elanyi hë, kola tro pi hnei Peteru memine la itre sinee i angeic troa wai Konelio e Kaisaria.

Hnei Konelio hna hën asë la itre atrene la lapa i nyidrë, memine la itre sinee i nyidrë. Ame ngöne la kola traqa hnei Peteru, kola itronyi me angeic hnei Konelio. Ene pe angeic a kei hnadro eë me sa iwatingöne ca qëmeke i Peteru, tune cahu ngöne la iatr. Ngo kola qaja hnei Peteru ka hape: ‘Mejë jë; ketre atre hi ni la.’ Nyipici, kola amaman hnene la Tusi Hmitrötr laka, thaa meköti kö e troa sa iwatingöne ca me thili me hmi kowe la ketre atr. Loi e tro sa thili me hmi koi Iehova hmekuje hi.

Peteru hi lai a cainöje jë pe kowe la itre atr ka traqa. Öni Peteru ka hape: ‘Eni a öhne hnyawa laka, Akötresieti a kapa asë la nöjei atr ka ajan troa nyihlue i Nyidrë.’ Nge angeic pala hi a ithanata, Akötresieti a upe pi la uati hmitrötre i Nyidrë, nge kola nyiqaan hnene la itre atr troa qaja la itre xaa qene hlapa kö. Kola hai hnene la itretre dreng, angetre Iudra ka ce traqa me Peteru, pine laka hnei angatr pala hi hna mekun ka hape, itretre Iudra hmekuje hi la hna kapa hnei Akötresie. Haawe, ini hi lai koi angatr ka hape, thaa ka isa pengöne kö la itre atr xajawa i Akötresie, ceitune asë hi la itre atr ngacama isa pengöne la hane ikupein. Epi troa ej pala hi ngöne la isa hni së la mekun celë!

Ite Huliwa 10:1-48; 11:1-18; Hna Amamane 19:10.



Itre Hnying

  • Drei la trahmany ka sa iwatingöne ca ngöne cahu iatr?
  • Nemene la hna qaja hnene la ketre angela koi Konelio?
  • Nemene la hnei Akötresie hna amamane koi Peteru ngöne la angeic e hune uma i Simona e Iopa?
  • Pine nemen matre kola qaja hnei Peteru koi Konelio, ka hape, thaa tro kö angeic a sa iwatingöne ca me thili koi angeic?
  • Pine nemene matre kola hai hnei Peteru memine la itretre dreng ne Iudra?
  • Nemene la ini ka nyipi ewekë catr nyine troa xom qa ngöne la kola pane wai Konelio hnei Peteru?

Itre xaa hnying

  • E jë la Ite Huliwa 10:1-48.

    Nemene la hna amaman hnene la itre trenge ewekë i Peteru ngöne Ite Huliwa 10:42, göne la huliwa ne cainöjëne la maca ka loi ne la Baselaia? (Mat. 28:19; Mar. 13:10; Ite hu. 1:8)

  • E jë la Ite Huliwa 11:1-18.

    Nemene la aqane mekune ka eje thei Peteru ngöne lo Iehova a amekötine la aqane troa ujë kowe la itretre Ethen, nge tune kaa la aqane tro sa xötrethenge la tulu i angeic? (Ite hu. 11:17, 18; 2 Kor. 10:5; Efe. 5:17)