Tro jë kowe la alien

Tro jë kowe la itre mekune ka co

Tro jë kowe la itre alien

Itretre Anyipici Iehova

Drehu

Trenge Edomë Qa Hnine La Tusi Hmitrötr

Edromë 93: Iesu a Ithuan La Itre Atr Ka Ala Nyim

Edromë 93: Iesu a Ithuan La Itre Atr Ka Ala Nyim

HETRE hace atraqatr ka traqa. Hna humuthi Ioane Bapataiso. Hna methinë angeice hnei Herodia, föe ne la joxu. Nge hnei nyidroti hna kuca matre tro la joxu a thupa trije la he i Ioane.

Ame la kola atre lai hnei Iesu, tru catr la hace i nyidrë. Ame hnei nyidrëti hna tro hmekuje kowe la ketre götran ka pë atren. Ngo kola xötrethenge nyidrëti hnene mina la itre atr. Ame ngöne la Iesu a goeën la itre atr ka ala nyim, ene pe nyidrëti a utipi angatr. Haawe, nyidrëti a qaja jë koi angatr la pengöne la baselaia i Akötresie, me aloin la meci ne la itre ka wezipo.

Heji hë, ame hna tro hnene la itretre drei nyidrë me qaja ka hape: ‘Hejiheji hë, nge hnapapa la. Upe jë la ka ala nyimu matre tro angatr a tro kowe la itre lapa gaa easeny, troa isa itö a i angatr.’

Iesu a ithue ane la ka ala nyim

Iesu a sa ka hape: ‘Thaa nyipi ewekë kö tro angatr a tro. Tro nyipunie a thue a i angatr.’ Kola ujë hnei Iesu koi Filipo me hnyingë angeic ka hape: ‘Tro sa itö xeni ekaa matre ithuan la itre atr ka ala nyimu celë?’

Öni Filipo e sa ka hape: ‘Thaa ijije kö la manie troa itö ane asë la itre atr, tro hi a isa atrën la göxeni ka co hi.’ Kola qaja hnei Anederea ka hape: ‘Hanawang la nekönatr trahmanyi celë, ka xomi kemej, hetrenyi angeic la faifi lao falawa nge lue ie. Ngo thaa ijije kö la troa ithuan asë la nöjei atr celë.’

Iesu a qaja ka hape: ‘Qaja jë kowe la itre atr troa lapa hune la ihaö.’ Thupene lai, nyidrëti a olene jë la xeni koi Akötresie, me nyiqaan troa thupathupa la falawa me ie. Ase hë lai, kola thawa hnene la itretre dreng kowe la itre atr asë, la itre sine falawa hna nyi wetrën hnei sine ie. Hetrenyi la 5 000 lao trahmany, nge itre thauzan la etrun la itre föe memine la itre nekönatr. Angatr asë hi a xen, meji ju kö angatr. Nge ame la kola icasinekeun hnene la itretre dreng la itre munën, lapa pe kö la 12 lao trenge falawa ka tiqa!

Iesu hë enehila a upe la itretre drei nyidrë troa të hune he, matre tro angatr kowe la ketre götran la Hneopegejë Ne Galilaia. Ame ngöne la jidr, hna hnahna la ketre enyi ka catr, nge kola tha tran la he hnene la itre oke ne gejë. Atraqatr la xou kowe la itretre dreng. Thupene lai, ame hë ngöne la nyipine la jidr, angatr a öhne la ketre atr e tro hune la hnagejë, me easenyi kowe la he. Ene pe angatr a hokötr hnei xou, pine laka, angatre petre hi a öhn la ketre atr e tro hune la tim.

Öni Iesu ka hape: ‘The xou kö. Eni hi!’ Thatreine kö angatr troa jele nyipicin la ewekë cili. Haawe kola qaja hnei Peteru ka hape: ‘Maine nyipëti hi, Joxu, epi nue koi ni hnei nyipë troa itronyi me nyipë.’ Iesu a sa ka hape: ‘Trohemi!’ Ame hnei Peteru hna uti pi qa hune he, me tro hune la hnagejë! Ngo hna traqa koi angeic la xou, ene pe angeic a nyiqaan troa lö, ngo eloine hi, hna canga xolouthi angeic hnei Iesu.

Thupene lai, Iesu hmaca a ithue an la itre atr, itre thauzane la etrun. Hnei nyidrë hna ithue ai angatr hnene la sevene lao falawa, me itre nene ie. Meji asë hi la itre atr. Hapeu, thaa madrine kö së la aqane thupën hnyawa la itre atr hnei Iesu? E traqa ha la musi Iesu, pë hmaca kö ketre ewekë ka troa pë thatraqane la mele së!

Mataio 14:1-32; 15:29-38; Ioane 6:1-21.



Itre Hnying

  • Nemene la ewekë ka ngazo ka traqa koi Ioane Bapataiso, nge nemene la mekune i Iesu?
  • Hnei Iesu hna ithuane tune kaa la itre atr ka xötrethenge nyidrë, nge ijetre pe kö la itre munëne xen?
  • Pine nemen matre kola xou hnene la itretre dreng ngöne la jidr, nge nemene la ewekë ka traqa koi Peteru?
  • Tune kaa la aqane hnaaluene ithuane Iesu la itre atr itre thauzane la etrun?
  • Pine nemen matre lolo catr elanyi la Iesu a troa musi hune la ihnadro ngöne lo nyidrëti a troa ketre Joxu hna acile hnei Akötresie?

Itre xaa hnying

  • E jë la Mataio 14:1-32.

    Nemene la aqane troa trotrohnine hnyawa la thiina i Peteru, a kola mama ngöne la Mataio 14:23-32?

    Nemene la aqane amamane hnyawa hnei Tusi Hmitrötr laka ka macaje hë Peteru, nge atreine hë angeic xomihnine la aqane ujë i angeic, ene la troa canga kuca la ketre ewekë ngo thaa pane mekune kö la itre thangane lai? (Mat. 14:27-30; Ioane 18:10; 21:7; Ite hu. 2:14, 37-40; 1 Pet. 5:6, 10)

  • E jë la Mataio 15:29-38.

    Tune kaa la aqane amamane Iesu la metrötre i nyidrë kowe la xeni hna hamën hnene la Tretretro i nyidrë? (Mat. 15:37; Ioane 6:12; Kol. 3:15)

  • E jë la Ioane 6:1-21.

    Tune kaa la aqane tro la itre Keresiano enehila a xome la tulu i Iesu, ene la troa metrötrëne la itre mus? (Ioane 6:15; Mat. 22:21; Rom. 12:2; 13:1-4)