Tro jë kowe la alien

Tro jë kowe la itre mekune ka co

Tro jë kowe la itre alien

Itretre Anyipici Iehova

Drehu

Trenge Edomë Qa Hnine La Tusi Hmitrötr

Edromë 92: Mele Hmaca Ha La Ka Meci Hë

Edromë 92: Mele Hmaca Ha La Ka Meci Hë

AME cahu jajiny, tre ka 12 lao macatre i nyën. Kola ea hnei Iesu la wanakoime i nyën, nge keme me thine i nyën a cile easenyi nyën. Atraqatr la madrine i nyidro, atre fe hi nyipunie la kepin? Tro hö sa ce wang.

Iesu a amelene hmaca la neköi Iairo jajiny

Ame la keme ne la jajiny, tre, Iairo, ketre trahmanyi ka cilën la ketre hnëqa ka tru ngöne la nöj. Ame ngöne la ketre drai hna wezipo la nekö i nyidrë jajiny, matre hna ameköle nyën hune la ibeetr. Kola inyië nyën, nge thaa ka loi hmaca kö. Hace catre hë la meci nyën. Jolë hë koi Iairo me föi nyidrë, pine laka, kösë kolo ha troa meci la jajiny ka caas. Ame hnei Iairo hna thele troa canga öhnyi Iesu. Drengë hë angeic la kola hain la itre iamamanyikeu hnei Iesu hna kuca.

Öhnyi Iesu hë hnei Iairo, nge kola cile xötreithi nyidrë hnene la ka ala nyim. Iairo hi lai a ketre utra gojenyi pi. Traqa ju hi angeic thei Iesu, me kei ngöne la lue ca i nyidrë me xëwe koi nyidrë, me hape: ‘Thaa ka loi hmaca kö la neköng jajiny. Epi amele nyën hnei nyipë.’ Haawe Iesu a ce tro pi me angeic.

Nyidroti hë e kuhu gojeny, nge ixötrethenge jë fe hi la ka ala nyimu. Nyidro e kuhu nyipin nge kola pepetrenyi nyidro qa ngöne la lue götran. Ene pe pane cile ju hi Iesu. Nyidrëti a hnyinge ka hape: ‘Drei la ka ketri ni?’ Hetre hnei Iesu hna dreng, kola lö pi qaathei nyidrë la men matre atre hi nyidrëti laka, hna ketri nyidrëti hnene la ketre atr. A drei jë? Ketre föe ka wezipo, 12 hë lao macatre ne akötre fë nyidroti la ketre mec. Hnei nyiidro hna easenyi Iesu me ketr la iheetre i nyidrë, ene pe loi pi hi nyiidro!

Kösë hnepe ixatua koi Iairo la angeic a öhne la aqane aloine Iesu la meci ne lai föe. Ngo, thupene jë pe hi lai, traqa pi la ketre atre tro fë maca. Öni angeic koi Iairo ka hape: ‘The une iele Iesu hmaca kö. Meci hë la jajiny.’ Ngo thaa semesinene kö Iesu, nge nyidrëti pe a qaja koi Iairo ka hape: ‘The hnehengazo kö, tro nyëne a mel.’

Traqa ha angatr ngöne la hnalapa i Iairo, kola itreijenyi la itre atr, me latresi pi nyën. Ngo kola qaja hnei Iesu ka hape: ‘The treije kö. Thaa meci kö la nekönatr. Nyëne hi a meköl.’ Ngo angatr a hnyimasai Iesu, pine laka, atre hi angatr laka, meci hë la jajiny.

Thupene lai, Iesu a alöne jë lai keme me thine ne la nekönatr, memine la köni aposetolo kowe la hnahag hna meköle hnene la nekönatr. Nyidrëti a xolouth la wanakoime ne la jajiny, me qaja ka hape: ‘Cile jë!’ Ene pe mele hmaca jë hi la jajiny, tune la hna amamane hnene cahu iatr. Nge nyën a cil me tro! Celë hi matre kola madrine atraqatr hnene lo keme me thine i nyën.

Thaa celë kö la pane atr ka mec, hnei Iesu hna amelene hmaca. Ame la atr hna pane amelen hmaca hna qaja hnei Tusi Hmitrötr, tre kolo nekönatre trahmany, neköne la ketre sine föe ne Naina. Thupene lai, Iesu fe a amele Lazaro hmaca qa hna mec, ene lo xa i Maria me Maretha. E traqa pi la musi Iesu jëne la baselaia i Akötresie, tro nyidrëti a amelene hmaca la itre atr ka nyimutre ka meci hë. Drei la ketre madrin ka tru koi së?

Luka 8:40-56; 7:11-17; Ioane 11:17-44.



Itre Hnying

  • Drei la keme ne cahu jajinyi ngöne la iatr, nge pine nemene matre jole la mele i nyidrë memine la ifënekö i nyidrë?
  • Nemene la hna kuca hnei Iairo ngöne la angeic a öhnyi Iesu?
  • Nemene la ewekë ka traqa ngöne la Iesu a tro kowe la hnalapa i Iairo, nge nemene la maca hna kapa hnei Iairo ngöne la gojeny?
  • Pine nemen matre kola hnyimasai Iesu hnene la itre atr ngöne la hnalapa i Iairo?
  • Thupene la hna ce tro hnei Iesu memine la köni aposetolo me keme me thine ne la jajiny kowe la hnahage i nyën, nemene hë la hnei Iesu hna kuca?
  • Drei la ketre hnei Iesu hna amelene qa hna mec, nge nemene la ewekë hna amamane hnene lai?

Itre xaa hnying

  • E jë la Luka 8:40-56.

    Tune kaa la aqane amamane Iesu la ihnimi nyidrë memine la eloine la aqane waiewekë i nyidrë kowe la föe ka meci ne neni hni, nge nemene la ini hnene la itre qatre thup Keresiano hna troa xome qa ngöne lai? (Luka 8:43, 44, 47, 48; Lev. 15:25-27; Mat. 9:12, 13; Kol. 3:12-14)

  • E jë la Luka 7:11-17.

    Pine nemen matre troa akeukawan la hni ne la itre atr ka meci sinen, hnene la aqane ujë i Iesu kowe la sine föe ne Naina? (Luka 7:13; 2 Kor. 1:3, 4; Heb. 4:15)

  • E jë la Ioane 11:17-44.

    Tune kaa la aqane amamane Iesu laka thaa ka ngazo kö e troa latresi pine la meci ne la ketre atr hne së hnim? (Ioane 11:33-36, 38; 2 Sam. 18:33; 19:1-4)