ÖHNE fe hi nyipunie cahu piny, ej a traqa me të hune la he ne la thupëtesij, ene Iesu. Troa traqa kowe la 30 lao macatre i nyidrë. Nge Ioane lai ka cile ezi nyidrë. Hne së hë lo hna nango ce ithanatan la pengö i angeic. Mekune pala kö nyipunie lo kola hmeke sesë la medreng e kuhu hni Elisabeth, lo ijine kola traqa ne iwai hnei Maria, ketre atren la lapa i nyiidro? Ioane hi lo lai medreng. Ngo nemene cahu hna kuca hnei Ioane me Iesu?

Kola bapataiso Iesu

Kolo hi a fetra hmaca hnei Iesu, thupen la hna alö nyidrë hnei Ioane ngöne la Hneopegejë Ne Ioridrano. Celë hi aqane tro lai a bapataisone la atr. Tro lai a pane alöne asë la atr hnine la tim, nge e thupene hë, troa amejë angeice hmaca draië. Celë hi aqane kuca lai hnei Ioane kowe la itre atr, ene pe hë Ioane jë ka hape, Atre Bapataiso. Ngo nemen la kepin matre kolo fe a hane bapataiso Iesu hnei Ioane?

Pine laka, hnei Iesu hna tro koi Ioane, me sipo angeic troa bapataiso nyidrë. Ioane a bapataison la itre atr ka ietra me ka hetre hni ne ajan troa ujë qa ngöne la itre thiina ka ngazo. Ngo nemen la alien la bapataiso i Iesu, hapeu, nyine tro lai a amaman la hmaca i nyidrë qa ngön la ngazo, me thiina ka ngazo hna kuca? Ohea, pëkö alien e tro nyidrëti a hane ietra, pine laka, pë fe kö ngazo i nyidrë, nge Hupuna i Akötresieti nyidrë. Ngo hetre kepin matre nyidrëti a sipo Ioane troa bapataiso nyidrë. Tro sa ce wange la kepin cili.

Ka tratrau sinöe Iesu qëmeken tro nyidrëti a tro koi Ioane. Ame la atre tratrau, tre, atre huliwan la sinöe matre troa kuci laulau, me icea, me itre ta. Ame Iosefa föi Maria, tre, ka tratrau nyidrë, celë hi matre, hnei Iesu hna inin la huliwa cili thei Iosefa. Ngo thaa hnei Iehova kö hna upe la Hupuna i Nyidrë kowe la fen, matre tro nyidrë a atre tratrau. Hetre ketre huliwa kö hna upi nyidrëti troa kuca, nge ijinë hë koi Iesu troa kuca la huliwa cili. Celë hi matre, ame lo lai Iesu a sipo Ioane troa hane bapataiso nyidrë, tre, nyine tro hi lai a amaman laka, nyidrëti hë enehila a troa kuca la aja i Tretretro i nyidrë. Hapeu, hna kapa kö hnei Akötresie la ewekë cili?

Eje hi, hna anyipicine lai hnene la aqane ula qaa hnengödrai ngöne la kola fetra pi hnei Iesu qa hnine la tim, kola hape: ‘Drei la Nekönge hniminang; ini a madri nyidrë.’ Kösë pi lo kola fe la hnengödrai, nge kola uti pi me të hui Iesu la ketre ewekë, tune pi hi la piny. Ngo thaa nyipi pinyi kö. Celë hi uati hmitrötre i Akötresie.

Iesu a ajan troa pane lapa mekun me waipengöne la nöjei ewekë, celë hi matre nyidrëti a pane tro pi kowe la ketre götrane ka pë atren me lapa e cili koi 40 lao drai. Ene pe tro pi hi Satana koi nyidrë. Akönia tupathi nyidrë hnei Satana, nge angeice fe a iaö nyidrë, kola thele jën tro Iesu a ena la itre trenge wathebo i Akötresie. Ngo thaa drengethenge angeice pi kö hnei Iesu.

Thupene lai, hnei Iesu hna bëek, nge e cili nyidrëti a itronyi memine la itre atr, angatre hi lo lai itre ka troa pane xötrethenge nyidrë, me itretre drei nyidrë. Ame la itre ëje i angatr, tre, Anederea, me Peteru (hna ati ëjene fe Simona), me Filipo me Nathaniela (hna ati ëjene fe Batolomaio). Hnei Iesu memine la itretre drei nyidrëti cili, hna tro Galilaia eë. Hnei angatr hna pane cile e Kana, traon ne lai zi Nathaniela. Hetre ka nyikein e cili, nge celë hi hnei Iesu lai hna kuca ngön la pane iamamanyikeu i nyidrë. Atre fe hi nyipunie la pengöne la iamamanyikeu cili? Nyidrëti a ujën la tim, matre tro pena ha waina.

Mataio 3:13-17; 4:1-11; 13:55; Mareko 6:3; Ioane 1:29-51; 2:1-12.



Itre Hnying

  • Drei cahu la lue atr ngöne la iatr?
  • Tune kaa la aqane bapataisone la ketre atr?
  • Drei la ka ijije e nyidro troa xome la bapataiso?
  • Nemene la kepin ka ketre pengöne matre kola sipon hnei Iesu tro Ioane a bapataiso nyidrë?
  • Nemene la aqane amamane Akötresie, ka hape, Nyidrëti a madrin la kola xome la bapataiso hnei Iesu?
  • Nemene la ewekë ka traqa ngöne la tro caasi hnei Iesu kowe la ketre götrane gaa pë atr, 40 lao drai?
  • Drei la itre xaa ka pane xötrethenge Iesu, maine itretre drei nyidrë, nge nemene la pane iamamanyikeu i nyidrë?

Itre xaa hnying

  • E jë la Mataio 3:13-17.

    Nemene la aqane eköthe amë Iesu la Bapataiso matre nyine tulu kowe la itretre drei Nyidrë? (Sal. 40:7, 8; Mat. 28:19, 20; Luka 3:21, 22)

  • E jë la Mataio 4:1-11.

    Nemene la aqane xome inamacanëne Iesu la Tusi Hmitrötr, ka xatua së troa inine pala hi la Wesi Ula? (Mat. 4:5-7; 2 Pet. 3:17, 18; 1 Ioane 4:1)

  • E jë la Ioane 1:29-51.

    Ioane Bapataiso a eatrongëne la itretre drei angeic koi drei, nge tune kaa la aqane tro sa xötrethenge la tulu cili ngöne la hnedrai së? (Ioane 1:29, 35, 36; 3:30; Mat. 23:10)

  • E jë la Ioane 2:1-12.

    Nemene la aqane amamane hnene la pane iamamanyikeu i Iesu laka, thaa Iehova kö a thipëne la ketre ewekë ka lolo kowe la itre hlue i Nyidrë? (Ioane 2:9, 10; Sal. 84:11; Iako. 1:17)