Tro jë kowe la alien

Tro jë kowe la itre alien

Itretre Anyipici Iehova

Iëne jë la qene hlapa Drehu

Edromë 100: Iesu Ngöne La Ketre Hlapa

Edromë 100: Iesu Ngöne La Ketre Hlapa

THUPENE la hnei Iesu memine la itre aposetolo i nyidrë hna lö pi qa hnine la hnahag ka he e koho, angatr a tro pi kowe la hnepe hlapa, Gethesemane la ëjen. Nyimu ijin angatre hë a lapaa traqa itronyi e cili. Ngo amë hë la ijine celë, Iesu a upi angatr troa hmek, me thith. Thupene lai, nyidrëti a nango tro ananyi angatre pi, me kei qe ipië hnadro eë me thith.

Ame hë thupene lai, Iesu a bëeke hmaca kowe la itre aposetolo i nyidrë. Nemen la hnei angatr hna kuca? Angatr a imeköleny! Akönia qaja Iesu koi angatr ka hape loi e tro angatr a hmek, ngo ame mina la nyidrëti a bëek troa wai angatr, tre, kola ihmulinyi hnei angatr. Ame ngöne la hnaakönine bëeke Iesu troa wai angatr, öni nyidrëti ka hape: ‘Atreine pi hë nyipunie imeköleny, me mano; hana wang, easenyi hë la hmekun, nge ase hë wanaxoeë ni kowe la itre iwanakoime ne la nöjei atr ka ngazo.’

Ene pe drenge ju angatr la mejene la ka ala nyimu kola tro. Matre goeëne cahu! Kola traqa la itre atr memine la itre taua me itre göjia! Nge angatr a xome la itre jina, matre troa thinane la gojenyi angatr. Ame hë la angatr a easenyi trootro, ene pe kola tro pi la ketre atr qaathei angatr me tro meköti koi Iesu. Nyipunie a öhne cahu angeic a idremi me Iesu. Iuda Isakariota la ëje i angeic! Pine nemen matre angeic a idremi me Iesu?

Iuda a wanaxoeë Iesu

Kola hnyinge hnei Iesu me hape: ‘Iuda, eö a wanaxoeë ni ngöne laka, eö a idremi me eni?’ Eje hi, hetre hatrene lai kola idrem. Iuda a nyi hatren matre wanga atrehmekuyi Iesu, hnene la itre atr ka traqa ne troa xolouthi nyidrë. Thupene jë hi lai, tro pi lai itre ithupëjia me Iesu troa xolouthi nyidrë. Ngo Peteru hi lai a cila maca jë troa isigöli Iesu. Angeic a uthepi la taua hnei angeic hna xome trongën, me lepe la ketre e angatr ka cile ezi angeic. Eloine hi, ke, tria ju kö la he ne lai atr, ngo hnangenyë i angeice maca la hna thupa. Ngo Iesu a ketr la hnangenyë ne lai trahmany, me aloine ej.

Kola qaja hnei Iesu koi Peteru ka hape: ‘Liine hmaca ju la taua i eö ngöne la trengen. Thatre kö eö laka, ijiji eni hi troa sipone kowe la Tretretrong, matre tro Nyidrëti a upe la itre angela, itre thauzan la etrun, troa amele ni?’ Nyipici, Thaa ka jole kö lai koi Nyidrë! Ngo thaa hnei Iesu kö hna sipo Akötresie troa upe la itre angela, pine laka, atre hi nyidrë laka, ijine tro hë la itre ithupëjia me nyidrë a xolouthi nyidrë. Haawe, nyidrëti a nue angatre pi troa kuca la aja i angatr. Tro sa ce wang enehila la ewekë ka troa traqa koi Iesu.

Mataio 26:36-56; Luka 22:39-53; Ioane 18:1-12.



Itre Hnying

  • Ekaa la hnei Iesu memine la itre aposetolo hna tro kow thupene la hnei angatr hna lö pi qa hnin la hnahag ka tru, nge nemene la hnei nyidrë hna upi angatr troa kuca?
  • Nemene la hnei Iesu hna öhne ngöne la nyidrëti a bëeke hmaca troa wang la itre aposetolo i nyidrë, nge aija tune lai?
  • Drei la ka traqa kowe la hlapa, nge nemene la hna kuca hnei Iuda Isakariota, tune cahu aqane amaman ngöne la iatr?
  • Pine nemen matre Iuda a idremi me Iesu, nge nemene la hna kuca hnei Peteru?
  • Nemene la hnei Iesu hna qaja koi Peteru, ngo pine nemen matre thaa sipo Akötresieti kö hnei Iesu troa upe la itre xaa angela troa isi göli nyidrë?

Itre xaa hnying

  • E jë la Mataio 26:36-56.

    Tune kaa la aqane eamone Iesu la itretre drei nyidrë, a ketre tulu ka lolo kowe la itre qatre thup Keresiano enehila? (Mat. 20:25-28; 26:40, 41; Gal. 5:17; Efe. 4:29, 31, 32)

    Nemene la aqane mekune i Iesu göne la troa xome la itre jiane isi ngöne la ngönetrei matre troa lepe la itre xaa atr? (Mat. 26:52; Luka 6:27, 28; Ioane 18:36)

  • E jë la Luka 22:39-53.

    Ame ngöne la kola mama la ketre angela koi Iesu ngöne la hlapa e Gethesemane matre troa aegöcatrenyi nyidrë, kolo kö lai a amaman, ka hape, hnei Iesu hna luelue ngöne la lapaune i nyidrë? Qejepengöne jë. (Luka 22:41-43; Is. 49:8; Mat. 4:10, 11; Heb. 5:7)

  • E jë la Ioane 18:1-12.

    Tune kaa la aqane thupëne Iesu la itretre drei nyidrë qa ngöne la itre ka icilekeu me nyidrë, nge nemene la ini nyine tro sa xome qa ngöne la tulu cili? (Ioane 10:11, 12; 18:1, 6-9; Heb. 13:6; Iako. 2:25)