Tro jë kowe la alien

Tro jë kowe la itre mekune ka co

Tro jë kowe la itre alien

Itretre Anyipici Iehova

Drehu

Trenge Edomë Qa Hnine La Tusi Hmitrötr

Edromë 74: Ketre Atr Ka Thaa Xou Kö

Edromë 74: Ketre Atr Ka Thaa Xou Kö

HANAWANG cahu nekö trahmany, a kola hnyima sai angeic hnene la itre xaa atr. Atre fe hi nyipunie la ëje i angeic? Ieremia hi lai. Angeic la ketre perofeta i Akötresieti ka tru.

Itre atr a hnyima sai Ieremia

Thupen la hna nyiqaan troa apaatren la itre idrola hnei Iosea joxu, e cili hi la kola ië Ieremia hnei Iehova troa perofeta i Nyidrë. Ngo ame koi Ieremia, thaa ijiji angeice kö, ke ka co petre kö angeic troa hane perofeta i Nyidrë. Ngo Iehova a qaja jë pe koi angeic ka hape, tro kö Nyidrëti a xatua angeic.

Ieremia a thuemacane jë la nöje Isaraela ka hape, loi e tro angatr a hmaca qa ngöne la itre huliwa ka ngazo. Öni angeic, ‘Ame la itre haze ne la itre nöj, tre ka thoi itre ej.’ Ngo nyimutre la itretre Isaraela ka ajan, matre tro pala kö a thili kowe la itre idrola hune la troa atrunyi Iehova, nyipi Akötresie. Ame ngöne la kola qaja hnei Ieremia kowe la nöj ka hape, tro Akötresie a nyithupene koi angatr la itre huliwa ka ngazo hnei angatr hna kuca, ene pe angatre pë hë lai a hnyima sai angeic.

Paatre tro hë la itre macatre. Köni treu thupen la hna meci hnei Iosea, nge kola sië Iehoiakima nekö i nyidrë troa joxu. Kola catre thuemacanyi angetre Isaraela hnei Ieremia, kola hape: ‘Troa lepe apaatren e Ierusalema, e thaa ujë kö nyipunie qa ngöne la itre thiina i nyipunie.’ Ame hna xolouthi Ieremia hnene la itretre huj me suen ka hape: ‘Loi e troa humuthi eö pine la itre trenge ewekë hnei eö hna qaja.’ Thupene lai, hnei angatr hna qaja kowe la itre tan ne Isaraela ka hape: ‘Loi e troa meci hnei Ieremia, pine laka, hna qaja angazon la traone së.’

Nemene ju hë la hna troa kuca hnei Ieremia? Thaa xou i angeice kö! Angeice a qaja koi angatr asë ka hape: ‘Hnei Iehova hna upi ni troa qaja koi nyipunie la itre ewekë celë. Maine thaa ujë kö nyipunie qa ngöne la itre jë i nyipunie ka ngazo, tro hë Iehova a lepe apaatren e Ierusalema. Ngo loi e tro nyipunie a atre me trotrohnine hnyawa ka hape: Maine tro nyipunie a humuthi ni, tre, nyipunieti hi lai a humuth menun la ketre atr, ngo pëkö kepin.’

Hnene la itre tan ne la nöj hna nue Ieremia, ngo thaa ujë pi kö angetre Isaraela qa ngöne la itre thiina i angatr ka ngazo. Thupene lai, kola tro hnei Nebukaneza joxu ne Babulona troa lep e Ierusalema. Hnei nyidrë hna ngaa angetre Isaraela me xomi angatr matre itre hlue i nyidrë. Nyidrë a ea la itre xan, itre thauzan la etrun, matre troa po e Babulona. Maine easë ju fe lai hna hane xome kowe la ketre nöj trehnyiwa, ma tro ju hë së a tune kaa!

Ieremia 1:1-8; 10:1-5; 26:1-16; 2 Ite Joxu 24:1-17.



Itre Hnying

  • Drei la nekönatr trahmany ngöne la iatr?
  • Nemene la hnei Ieremia hna mekune ngöne la kola ië angeic troa perofeta, ngo nemene la hnei Iehova hna qaja koi angeic?
  • Nemene la maca hnei Ieremia hna catre qaja kowe la nöj?
  • Tune kaa la aqane thele hnene la itretre huuj troa sewe Ieremia troa kuca la hnëqa i angeic, ngo nemene la aqane amamane angeic laka thaa xoue angatre kö hnei angeic?
  • Nemene la pune la hna thaa saze hnei angetre Isaraela la itre jë i angatr ka ngazo?

Itre xaa hnying

  • E jë la Ieremia 1:1-8.

    Tune la hna amamane hnene la tulu i Ieremia, nemene la ka aijijën la ketre atr kowe la huliwa i Iehova? (2 Kor. 3:5, 6)

    Nemene la ithuecatr hna hamën hnene la tulu i Ieremia kowe la itre thöth Keresiano enehila? (Ate Cai. 12:1; 1 T. 4:12)

  • E jë la Ieremia 10:1-5.

    Nemene la ketre ceitun ka hetre thangane catr hna xome hnei Ieremia matre troa amamane laka ka gufa e troa mejiune kowe la itre idrola? (Iere. 10:5; Is. 46:7; Hab. 2:19)

  • E jë la Ieremia 26:1-16.

    Ame ngöne la kola qaja la maca nyine hmekën hnene la thelene hna iën enehila, tune kaa la aqane lapa fë hnyawa hnei angatr e kuhu itre hni angatr la trenge wathebo hna hamën hnei Iehova koi Ieremia, ene laka ‘thaa tro kö a juetrëne la ketre ewekë’? (Iere. 26:2; Deu. 4:2; Ite hu. 20:27)

    Nemene la ketre tulu ka loi hna hamën hnei Ieremia kowe la Itretre Anyipici Iehova ngöne la troa cainöjën la maca i Iehova kowe la itre nöje asë? (Iere. 26:8, 12, 14, 15; 2 Tim. 4:1-5)

  • E jë la 2 Ite Joxu 24:1-17.

    Nemene la itre pune ka ngazo koi Iudra qa ngöne laka thaa hna mele nyipici kö koi Iehova? (2 Ite jo. 24:2-4, 14)