Tro jë kowe la alien

Tro jë kowe la itre mekune ka co

Tro jë kowe la itre alien

Itretre Anyipici Iehova

Drehu

Trenge Edomë Qa Hnine La Tusi Hmitrötr

Edromë 72: Akötresie a Xatua Hezekia

Edromë 72: Akötresie a Xatua Hezekia

ATRE fe hi nyipunie la kepin, matre kola thithi koi Iehova hnene cahu atr? Nge hnauëne jë laka nyidrë a amë wengën la itre tus, qëmeken la ita ne huje i Iehova? Hezekia la ëjen lai atr. Nyidrëti la joxu ne la lue tribu, ne la götrane ailojë ne Isaraela. Nge tru catr la itre jol ka traqa koi nyidrë. Atre fe hi nyipunie la kepin?

Kola thithi hnei Hezekia Joxu

Pine laka, hnene lo trongene isi Asuria hna lepe apaatren lo treen lao tribu ne la götrane ailopi. Hnei Iehova hna nue troa lepi angatr, pine laka, macaje hë la ngazo thei angatr. Nge ame hë enehila, kola traqa hnene la trongene isi Asuria troa isi pena memine la baselaia ne la lue tribu.

Hna iupi fë hnene la joxu ne Asuria, la itre tus koi Hezekia joxu. Celë hi itre tusi lai hnei Hezekia hna amë xawan xajawa i Akötresie. Kola hnyima sai Iehova nge kola upi Hezekia troa qejemenu, matre amaman ka hape, thaa ene kö la troa isi. Celë hi la kepin, matre Hezekia a thithi jë me hape: ‘Iehova fe, epi amele hun qa ngöne la isi ne la joxu ne Asuria. Nge tro ha atre la fene hnengödrai asë laka, Cilieti la Akötresie ka caas.’ Hapeu, tro kö Iehova a kapa la thithi Hezekia?

Hezekia la ketre joxu ka lolo. Thaa ceitu i nyidrëti kö memine la itre joxu ka ngazo ne la baselaia ne la 10 lao tribu ne Isaraela, ketre thaa ka kötre kö nyidrë koi keme i nyidrë ene Ahaza, ketre joxu ka ngazo. Hnei Hezekia hna thel troa tro thenge hnyawa pala hi la itre wathebo i Iehova. Haawe, ase jë hi Hezekia thith, nge traqa fë pi hi Isaia perofeta koi nyidrë la maca i Iehova kola hape: ‘Thaa tro kö la joxu ne Asuria a lö hnine la traon e Ierusalema. Pëkö caasi thene la itre sooce i angeic ka troa cile easenyin la traon. Ketre thaa tro kö angatr a huj la caa hainyin la itre pehna i angatr.’

Goeëne cahu iatr. Atre fe hi nyipunie la atrekë soocene cahu itre sooc hna humuth? Itre sooc ne Asuria asë hi lai. Hnei Iehova hna upe la angela i Nyidrë, nge ngöne la caa jidr, hnene la angela hna humuth la 185 000 lao sooc ne Asuria. Celë hi matre hna kötre trije la isi hnene la joxu ne Asuria, me bëek kowe la nöje i nyidrë.

Itre sooce i angetre Asuria ka mec

Mele ju kö la baselaia ne la lue tribu, nge eje thei angatr la tingeting ngöne la ketre hnepe ijin. Ngo thupen la hna meci hnei Hezekia, kola nyi hnai nyidrë hnei Manase nekö i nyidrë. Lue joxu ka ngazo catr Manase memine la nekö i angeic, Amona la ëjen. Celë hi matre, tiqa catre hmaca ha la nöj hnene la iakötrë memine la ihumuth. Ame la kola ase humuthi Amona joxu hnene la itre sipu hlue i angeic, acili Iosea jë pena ha hune la baselaia ne la lue tribu.

2 Ite Joxu 18:1-36; 19:1-37; 21:1-25.



Itre Hnying

  • Drei cahu trahmanyi ngöne la iatr, nge pine nemen matre tru catr la itre jol ka traqa koi nyidrë?
  • Nemene la itre tus hna amë qëmeke i Akötresie, nge nemene la hna thithi fë hnei Hezekia?
  • Nemene joxu lae Hezekia, nge nemene la maca hnei Iehova hna upe koi angeic jëne Isaia perofeta?
  • Nemene la hna kuca hnene la angela i Iehova kowe la angetre Asuria tune cahu hna amaman ngöne la iatr?
  • Ngacama tingeting la baselaia ne la lue tribu, ngo nemene hë la ka traqa thupene la hna meci hnei Hezekia?

Itre xaa hnying

  • E jë la 2 Ite Joxu 18:1-36.

    Tune kaa la aqane thel hnei Rabesake atre nyitrenge ewekë ne la joxu, matre troa ananazijën la lapaune ne la itretre Isaraela? (2 Ite jo. 18:19, 21; Eso. 5:2; Sal. 64:3)

    Ame ngöne la angatr a cile kowe la itre atr ka icilekeu me angatr, tune kaa la aqane wanga atrun hnene la Itretre Anyipici Iehova la tulu i Hezekia? (2 Ite jo. 18:36; Sal. 39:1; Ite edomë 26:4; 2 Tim. 2:24)

  • E jë la 2 Ite Joxu 19:1-37.

    Tune kaa la aqane xötrethenge enehila hnene la nöje i Iehova la tulu i Hezekia ngöne la itre ijine akötr? (2 Ite jo. 19:1, 2; Ite edomë 3:5, 6; Heb. 10:24, 25; Iako. 5:14, 15)

    Tune kaa lo köni aqane ngaa Saneribi joxu, nge drei la hnei angeic hna nyi iahnuen? (2 Ite jo. 19:32, 35, 37; Hna ama. 20:2, 3)

  • E jë la 2 Ite Joxu 21:1-6, 16.

    Pine nemen matre hna qeje Manase, ka hape, pëkö joxu ka ngazo ka tune ekö e Ierusalema? (2 A. l. ite jo. 33:4-6, 9)