Tro jë kowe la alien

Tro jë kowe la itre mekune ka co

Tro jë kowe la itre alien

Itretre Anyipici Iehova

Drehu

Trenge Edomë Qa Hnine La Tusi Hmitrötr

Edromë 70: Iona Memine La Ie Atraqatr

Edromë 70: Iona Memine La Ie Atraqatr

KOLA amaman hnene cahu iatr la ketre atr, kola hetin alön hnei gejë. Thaa fene jole kö la ka traqa koi angeic. Kola troa ulumi angeic, hnene cahu ie! Atre fe hi nyipunie la ëjen lai atr? Iona la ëje i angeic. Tro pe së a ce wang la qaan la itre jole cili.

Iona la ketre perofeta i Iehova. Ngöne la itre hnepe ijin, thupen la hna meci hnei Elisaia, Iehova a qaja jë koi Iona ka hape: ‘Tro jë kowe la traon ka tru e Nineve. Elë catr la ngazo ne la itre atr ne la traone cili, nge eni a ajan tro eö a qaja me fe amaman koi angatr.’

Iona memine la ie atraqatr

Ngo xele kö Iona ma tro Nineve. Hnei angeic pena ha hna saze gojeny. Thaa madrine kö Iehova koi Iona, pine la hnei angeic hna kötr. Haawe, Nyidrëti a axulune pi la janacas. Catrecatr la itre atueny, matre kola huj alön la he. Kola traqa la xou kowe la itre matelo, matre angatr a thith me sipo ixatua kowe la itre haze i angatr.

Ngo öni Iona jë pe koi angatr ka hape: ‘Ka hmi ni koi Iehova, Akötresie ka xup la fen memin la fene hnengödrai. Eni a kötr gaa nanyi eë, matre thaa tro kö ni a kuca la hnei Iehova hna upi ni.’ Ene pe hnyingëne jë hi koi angeic hnene la itre matelo, ka hape: ‘Nemen la nyine tro huni a kuca matre upu ju la eny?’

Öni Iona e sa ka hape: ‘Kuië ni pi hnagejë eë, nge tro ha haodrai la hnagejë.’ Xelene kö la itre matelo ma kuca la ewekë cili, ngo pine pe laka, kolo pala hi a hnahna catre la eny, ene pe ukapië Iona pi hi hnagejë eë hnei angatr. Haawe, ene pe upu ju hi la eny, nge haodrai fe hë la hnagejë.

Nge ame Iona, lö trootro ju pe hë uti hë la kola ulumi angeic, hnene la ketre ie atraqatr. Ngo thaa meci ju kö angeic. Köni drai pe nge köni jidri ne lapa Iona hnine la upin ne la ie. Tru la ietra i Iona, pine la hnei angeic hna triane la hna amekötine hnei Iehova, ene lo troa tro Nineve. Haawe, atre fe hi nyipunie la hnei angeic hna kuca?

Iona a thithi jë koi Iehova me sipon la ixatua i Nyidrë. Thupene lai, Iehova a upe la ie troa hmitra angeic ngöne la zanehngala. Haawe, Iona pë hë a tro pi Nineve eë. Hapeu, thaa nyine tulu kö la koi së, laka, nyipi ewekë troa apexejen pala hi la itre hnei Iehova hna upi së troa kuca?

Tusi Iona.



Itre Hnying

  • Drei lae Iona, nge nemene la hnei Iehova hna upi angeic troa kuca?
  • Pine laka hnei Iona hna xele ma tro kowe la götrane hna upi angeic kow hnei Iehova, nemene la hnei angeic hna kuca?
  • Nemene la hnei Iona hna qaja kowe la itre matelo matre upu ju la eny?
  • Tune la hna amaman ngöne la iatr, nemene la ewekë ka traqa ngöne la kola lö trootro hnei Iona hnine la tim?
  • Ije drai ne lapa Iona hnine la ie ka tru, nge nemene la hnei angeic hna kuca e cili?
  • Ekaa la hnei Iona hna tro kow thupene la hna hmitra angeic hnene lai ie ka tru, nge nemene la ini hne së hna xome qa ngöne lai?

Itre xaa hnying

  • E jë la Iona 1:1-17.

    Tune kaa la aqane mekune i angeic kowe la hnëqa hna athipe koi angeic, ene la troa cainöje kowe la itretre Nineve? (Iona 1:2, 3; Ite edomë 3:7; Ate Cai. 8:12)

  • E jë la Iona 2:1, 2, 10.

    Nemene la ini nyine tro sa xom qa ngöne la ewekë ka traqa koi Iona nyine acatren la mejiune së ka hape, tro Iehova a sa la itre thithi së? (Sal. 22:24; 34:6; 1 Ioane 5:14)

  • E jë Iona 3:1-10.

    Nemene la ixatua hne së hna kapa qa ngöne laka, Iehova pala hi a kepe Iona me upi angeice ngacama hnei angeic hna kötrene lo lai hnëqa i angeic? (Sal. 103:14; 1 Pet. 5:10)

    Nemene la ini hne së hna kapa qa ngöne la aqane ujë i Iona kowe la itretre Nineve, ngöne la troa iwangatrehmekunyi atr ngöne la teritoare së? (Iona 3:6-9; Ate Cai. 11:6; Ite hu. 13:48)