Tro jë kowe la alien

Tro jë kowe la itre alien

Itretre Anyipici Iehova

Iëne jë la qene hlapa Drehu

Edromë 63: Solomona Joxu Ka Inamacan

Edromë 63: Solomona Joxu Ka Inamacan

KOLA nyiqaane cil hnei Solomona troa joxu, nge angeic petre kö a thöth. Ka hni angeic koi Iehova, me xötrethenge la itre nyipi eamo hna ihajin koi angeic hnei Davita keme i angeic. Ka madrin Iehova koi Solomona, matre ame ju hi la ketre jidr, öni Nyidrëti koi angeic jën la pu ka hape: ‘Solomona, nemen la hnei eö hna ajan tro ni a hamë eö?’

Kola sa hnei Solomona ka hape: ‘Iehova Akötresingö, nekönatre petre kö ni, nge thatre kö ni la aqane troa mus. Qa ngöne lai, epi hamë ni hnei Cilie la inamacan, matre tro ni a musinën hnyawa la nöje i Cilie.’

Ka madrine Iehova kowe la sipo i Solomona. Haawe, Nyidrëti a qaja ju me hape: ‘Pine laka hnei eö hna sipo ni la inamacan, ngo thaa mele aqeanyi kö maine mo pena, tro hë ni a hamë eö la ketre inamacan hna thaa hane kö kapa hnene la ketre atr e celë fen. Ngo tro fe ni a hamë eö la ewekë hnei eö hna thaa sipone kö, ene la mo memine la lolo.’

Itre hnepe ijin thupene lai, hna traqa fë jol hnene la lue föe koi Solomona. Kola qaja hnene la ketre ka hape: ‘Eni a ce mel memine la föe celë hnine la uma ka caas. Hnenge hna hnahon la ketre medreng trahmany, nge lue drai thupen, angeic pena ha a hane malane fe la ketre medreng trahmany. Ame hë ngöne la ketre jidr, tre, meci pi hi la nekö i angeic. Ame hë la eni a meköl, angeice hi lai a amë ju ezing la nekö i angeic ka mec, me xome pena la neköng. Ame la eni a hlë, kolo hmaca pena ha a meköl ezing lo nekönatr ka mec, a thaa nekönge kö.’

Önine hmaca jë pena ha la ketre föe: ‘Ohe! Ame la nekönatr ka mel, tre, neköng, ngo ame la ka mec, tre nekö i angeic!’ Sa hmaca jë hi hnene lo föe ka ithanata pa ka hape: ‘Ohea! Nekö i eö la ka mec, nge neköng la ka mele pe!’ Kola iöni ithanata hnene la lue föe. Nemene ju hë la hna kuca hei Solomona?

Nyidrëti a iupi jë troa xom la ketre taua, me qaja ka hape: ‘Thupa luëne pi la medreng, matre isa caa götranen la nekönatr nyine isa thawa kowe la lue föe.’

Ame hna ho la thine ne lai medreng, me hape: ‘Ohea! Epi thaa tro kö a humuth la medreng. Hamë angeice pi!’ Ngo önine jë pe kö lo ketre föe: ‘Pëkö ketre e nyiho ka troa xom la nekönatr; thupa luë nyëne pi.’

Solomona Joxu a nyinyine la ketre jole ka tru

Ene pe amekötine jë hi hnei Solomona, me hape: ‘The humuthe kö la nekönatr! Hamë nyëne jë kowe la pane föe. Nyidroti hi la sipu thine i nyën.’ Thaa hna hnihni Solomona kö, pine laka, kola mama la nyipi thin hnene la ihnimi nyiidro kowe la nekönatr, ene pe eahlo a ajan troa xom hnene la ketre föe, matre thaa tro kö a humuthi nyën. Atre jë hi hnene la nöj la aqane senge hnei Solomona la jole ka tru cili, ene pe atraqatr la madrine i angatr, pine laka, kola troa musi hui angatr la ketre joxu ka inamacan.

Ame hë la kola cilën hnei Solomona la mus, haawe Akötresieti hi lai a amanathithin la nöje i Nyidrë, me axenyën la dro matre wa hnyawa la qiitr, me bali, me wene vin, me wene hmejieng, me itre xaa xeni ju kö. Kola heetrën hnene la itre atr la itre iheetr ka mingöming, me lapan la itre uma ka lolo. Kola mele ka loi hnei angatr, ke hetrenyi angatr la itre ewekë ka lolo thatraqan la mele i angatr.

1 Ite Joxu 3:3-28; 4:29-34.



Itre Hnying

  • Nemene la hnei Iehova hna hnyingëne koi Solomona, nge tune kaa la aqane sa i angeic?
  • Pine laka Iehova a madrin la sipo i Solomona, nemene la hna thingehnaean hnei Nyidrë troa hamëne koi angeic?
  • Nemene la ketre jole ka tru hna traqa fë koi Solomona hnene la lue föe?
  • Tune cahu hna amamane ngöne la iatr, tune kaa la aqane senge Solomona la jol?
  • Hna aceitunën me nemen la mus i Solomona, nge pine nemen?

Itre xaa hnying

  • E jë la 1 Ite Joxu 3:3-28.

    Nemene la aqane tro la itre trenge ewekë i Solomona ngöne 1 Ite Joxu 3:7 a nyine ini kowe la itre trahmany ka cilën la itre hnëqa e hnine la organizasio i Akötresie? (Sal. 119:105; Ite edomë 3:5, 6)

    Tune kaa la aqane tro sa xötrethenge la tulu ka lolo i Solomona, ngöne laka hnei nyidrë hna sipone jëne la thith la itre nyipi ewekë? (1 Ite jo. 3:9, 11; Ite edomë 30:8, 9; 1 Ioane 5:14)

    Nemene la mejiune ka eje the së ngöne la aqane troa musi elanyi la Solomona Ka Tru, ene Iesu Keriso ngöne la easë a goeëne la aqane senge Solomona la jol ka eje thene la lue föe? (1 Ite jo. 3:28; Is. 9:6, 7; 11:2-4)

  • E jë la 1 Ite Joxu 4:29-34.

    Tune kaa la aqane sa i Iehova la sipo i Solomona ene la troa hetre hni ne drengethenge? (1 Ite jo. 4:29)

    Ngöne laka kola catre thele hnene la itre atr troa drenge la inamacane i Solomona, nemene la aqane tro sa isa wange la aqane troa inine la Wesi Ula i Akötresie? (1 Ite jo. 4:29, 34; Ioane 17:3; 2 Tim. 3:16)