Tro jë kowe la alien

Tro jë kowe la itre alien

Itretre Anyipici Iehova

Iëne jë la qene hlapa Drehu

Edromë 59: Kepin La Kötre i Davita

Edromë 59: Kepin La Kötre i Davita

THUPENE la hna humuthi Goliatha hnei Davita, hna tro sai angeic koi Saulo hnei Abinera, tane isi Isaraela. Tru catr la madrine i Saulo koi Davita. Hnei nyidrë hna acili angeic troa ketre tane isi ngöne la trongene isi nyidrë, nge hnei nyidrëti fe hna kepe angeic ngöne la hnalapa i nyidrë.

Ame ngöne la ketre ijin kola bëeke hmaca hnene la itre sooc qaa hna isi me angetre Filisiti, hna nyima hnene la itre föe me hape: ‘Hna lepe hnei Saulo la itre thauzan, ngo itre treen lao thauzan hnei Davita.’ Ame hna ngazo la hni Saulo, pine laka, sisitria ha la aqane atrunyi Davita. Ngo ame Ionathana nekö i Saulo, pë fe kö hni ne zalu thei angeic. Atraqatr nge ceitune hi la ihnimekeu, ka isa ej thei Ionathana me Davita. Celë hi matre hnei nyidroti hna isisinyikeu, matre tro pala hi a lapa nyipi nyidro hnene la inyipicikeu.

Saulo joxu a hna la jo

Atreine catr Davita elo kitara, nge pi tro Saulo a dreng la itre nine nyima hna elon hnei Davita. Ngo ame ju hi ngöne la ketre drai, hnene la hni ka zalu hna uku Saulo troa kuca la ketre ewekë ka ngazo catr. Davita pe a elo kitara, nge xome jë hi Saulo la jo i nyidrë me hna koi angeic, me qaja ka hape: ‘Tro ni a jaqa Davita kowe la uma!’ Eloine pe hnei Davita hna ne, matre trianyi angeice ju kö. Thupene lai, hnei Saulo hmaca hna thele troa jaqa Davita, ngo tria pala hi. Haawe, atre hë Davita laka, nyipi ewekë troa hmek.

Mekune hi nyipunieti lo hna thingehnaean hnei Saulo? Öni nyidrëti lo, tro nyidrëti a hamën la nekö i nyidrë jajiny, matre troa nyi föen la atr ka humuthi Goliatha. Matre kolo ha ithuemacany hnei Saulo koi Davita, ngo hamëne jë kö nyidrë la nekö i nyidrë jajiny, e thupene hnei Davita hna pane humuth la 100 lao sooc ne Filisiti. Öhne fe hi nyipunie! Ame la mekuna i Saulo, tro la itretre Filisiti a humuthi Davita. Ngo hune ju kö Davita, ame hnei Saulo hna hamëne pi la nekö i nyidrë nyine föi Davita.

Ame ngöne la ketre drai, kola qaja hnei Saulo koi Ionathana me itre hlue i nyidrë ka hape, nyidrëti a ajan troa humuthi Davita. Ngo öni Ionathana jë hi kowe la keme i angeic ka hape: ‘The akötrë Davita kö. Pëkö ewekë ka ngazo hnei angeic hna kuca koi nyipë. Ame la nöjei ewekë hnei angeic hna kuca, tre, ixatua ka tru pala hi koi nyipë. Hnei angeice hna nue la mele i angeic matre troa humuthi Goliatha, nge ketre, madrine catre nyipëti lo kola öhnyi angeic.’

Davita a neëne la jo

Saulo a drenge ju la nekö i nyidrë, me sisinyi koi angeic matre, thaa tro kö nyidrëti a humuthi Davita. Celë hi matre kola bëeke hmaca ju hnei Davita, troa huliwa hnine la uma i Saulo. Ngo ame hmaca ju hi la ketre ijin Davita a elo kitara, Saulo hmaca hi lai a xale angeic. Maca kö Davita troa neën la jo, matre trianyi angeice ju kö, ngo sesë jë hi ej a catr ngöne la ngöne uma. Hnaakönine kolo hë lai a pi humuthi Davita! Atre hë angeic e cili laka, epi tro angeic a mel, caasi hi la nyine troa kuca, loi e troa kötre mel!

Ame ngöne la jidri cili, kola kötr hnei Davita kowe la hnalapa i angeic. Ngo kola upe hnei Saulo la itre atr troa humuthi angeic. Atre hi Mikala la hna mekun troa kuca hnene la keme i angeic. Haawe, öni angeice jë hi kowe la föi angeic ka hape: ‘Maine thaa kötre kö nyipëti enehila jidr, ame elany, ka tro nyipëti a mec.’ Ame ngöne la jidri cili, kola xatua Davita hnei Mikala troa sesë mamala me kötr. Traqa ha kowe la hnaaseven ne macatre ne melën Davita la mele ne atre ka po, pine la imethinë i Saulo.

1 Samuela 18:1-30; 19:1-18.



Itre Hnying

  • Pine nemen matre kola zalu hnei Saulo koi Davita, ngo tune kaa pena ha la aqane ujë i Ionathana nekö i Saulo?
  • Nemene la ewekë ka traqa ngöne la ketre ijin kola elo kitara hnei Davita koi Saulo?
  • Thenge la hna qaja hnei Saulo, nemene la nyine tro Davita a kuca qëmekene tro angeic a xomi Mikala nekö i Saulo jajiny nyine föi angeic, nge nemene kepin matre Saulo a qaja lai ewekë cili?
  • Ame ngöne la Davita a elo kitara koi Saulo, nemene la ewekë ka traqa a hnaakönine hë lai, tune la hna amamane ngöne cahu iatr?
  • Tune kaa la aqane xatua Davita hnei Mikala troa kötre mel, nge nemene pë hë la hna melën hnei Davita e sevene lao macatre?

Itre xaa hnying

  • E jë la 1 Samuela 18:1-30.

    Tune kaa la aqane nyi iahnuen hnene la ihnimi Ionathana koi Davita, la ihnimi ne la “ite xa mamoe” memine la “hnënge mamoe ka xalaith”? (1 Sam. 18:1; Ioane 10:16; Luka 12:32; Zaka. 8:23)

    Maine ju tre Ionathana la ka troa nyihnai Saulo troa joxu, ke angeic la matran, ngo tune kaa la aqane amamane ngöne 1 Samuela 18:4, ka hape, Ionathana a ipië kowe la atr hna iën troa joxu?

    Nemene la aqane amamane hnene la tulu i Saulo laka, ame la pun la izalukeu tre troa kuca la ketre ngazo ka tru, nge kolo lai a hmekë së troa u? (1 Sam. 18:7-9, 25; Iako. 3:14-16)

  • E jë la 1 Samuela 19:1-17.

    Nemene la aqane amamane hnene la itre trenge ewekë i Ionathana ngöne 1 Samuela 19:4, 5, laka angeic a nue la sipu mele i angeic? (1 Sam. 19:1, 6)