Tro jë kowe la alien

Tro jë kowe la itre mekune ka co

Tro jë kowe la itre alien

Itretre Anyipici Iehova

Drehu

Trenge Edomë Qa Hnine La Tusi Hmitrötr

Edromë 52: Gideona Me 300 Lao Sooce i Angeic

Edromë 52: Gideona Me 300 Lao Sooce i Angeic

NEMEN ewekë cahu? Pane hane wange cahu itre sooc ne Isaraela. Angatr a sa watingöne ca troa iji tim. Kola cile ezi angatr, hnei Gideona. Nyidrëti a goeën la aqane iji angatr la tim.

Goeëne hnyawa ju cahu itre aqane iji timi ne la itre sooc. Itre xan a thil timi eë, matre troa thinethinemën la tim. Ngo ame cahu ketre, kola iji la tim hune la ihnatrapaime i angeic, matre atreine angeic troa hmekën la ithupëjia. Ka nyipi ewekë catr koi Gideona, pine laka, qa ngöne la aqane iji tim ne la atr, ijiji angeic troa iën hmekuje hi la itre ka hmek. Ame pë hë itre xan, tro angatr a bëeke hmaca pe kowe la isa hnalapa i angatr. Tro sa ce wang la kepine lai.

Jole hmaca ha la aqane trongen la angetre Isaraela. Ase mina ha angatr thaa drei Iehova. Matre waja huji angatre ju me akötrë angatr hnei angetre Midiana. Haawe, Isaraela hmaca ha a xëwe me kötre mel koi Iehova, nge Nyidrëti a drenge la xëwe i angatr.

Iehova a upi Gideona jë troa icasikeun la 32 000 lao sooc. Ngo, ame kowe la trongene isi ka traqa troa icilekeu me Isaraela, tre ala nyimu catre kö angatr, 135 000 la etrun. Ngo Iehova a qaja koi Gideona ka hape: ‘Ala nyimu catr pala ha epun.’ Pine nemen matre Iehova a qaja tune lai?

Wanga tro Isaraela a mekun ka hape, angatr a hun hnene la hnei angatr hna sipu catr. Nge thaa wanga atrune hë laka, kola hun hnene la ixatua qaathei Iehova. Haawe, Iehova a qaja koi Gideona ka hape: ‘Qaja jë kowe la nöjei atr ka xou ka hape, isa bëeke hmaca jë koi hnalapan.’ Celë hi hna kuca lai hnei Gideona, ene pe 22 000 lao ka bëeke hmaca kowe la isa hnalapa i angatr. Matre kösë 10 000 pe hi la ka lapa matre troa isi memine lo lai itre ithupëjia me angatr ka ala 135 000 lao sooc.

Gideona a tupath la itre sooce i angeic

Ngo drenge ju! Iehova a ulatin ka hape: ‘Ala nyimu catre pala kö epun.’ Celë hi matre Nyidrëti a amekötin koi Gideona troa upe la itre sooce i angeic troa iji tim, nge troa abëekën asë la itre sooc ka thili wewë troa thinethinemën la tim. Iehova a iahnikeu ju me hape: ‘Tro ni a kuca matre tro nyipunie a ngaan jën la ala köni hadredre itretre hmek ngöne la angatr a iji tim.’

Traqa ha la ijin troa isi. Gideona a thawa könin lai ala 300 lao sooc. Isa caa trutru i angatr me isa caa gee ka pë alien, matre troa amë e kuhu hnin la itre lamepa. Ame hë la kola nyipine jidr, angatr a cile xötreith la hna lapa hnene la itre sooc, itre ithupëjia me angatr. Ame hë la kola traqa la ijin troa isi, ene pe angatr a ufe la itre trutru, me akaqan la itre gee i angatr, me sieje draië me hape: ‘Taua i Iehova me Gideona!’ Ame hna mejë hmo hnene la itre sooc, nge angatr a inyinyapekeu me xou atraqatr. Angatr a ikötreny, ene pe thapa pi la isi hnei angetre Isaraela.

Angete Amekötin mekene 6 koi 8.



Itre Hnying

  • Tune kaa la aqane traqa itrai la itre jol koi angetre Isaraela, nge pine nemene lai?
  • Pine nemen matre Iehova a qaja koi Gideona, ka hape, tru catre pala ha hnei sooce i angeic?
  • Ala ije la itre trahmanyi ka lapa pe, thupene la hnei Gideona hna upe la itre ka xou troa isa bëeke hmaca kowe la isa hnalapa i angatr?
  • Jëne la iatr, qaja jë la aqane uthe acon hnei Iehova la etrun la itre sooce i Gideona uti hë la 300 ju pe hi la etru i angatr.
  • Tune kaa la aqane thawa Gideona la itre sooce i angeic ka ala 300, nge tune kaa la aqane hun Isaraela ngöne la isi?

Itre xaa hnying

  • E jë la Angete Amekötin 6:36-40.

    Tune kaa la aqane mama me xecie hnyawa koi Gideona la aja i Iehova?

    Nemene la aqane atrepengöne hne së la aja i Iehova koi së enehila? (Ite edomë 2:3-6; Mat. 7:7-11; 2 Tim. 3:16, 17)

  • E jë la Angete Amekötin 7:1-25.

    Nemene la ini hne së hna kapa qa ngöne la aqane ujë ne lo lai ala 300 ka hmek, memine lo itre sooc ka thaa hane kö amamane, ka hape, angatr a hmek? (A. ame. 7:3, 6; Rom. 13:11, 12; Efe. 5:15-17)

    Tune la aqane kapa la ini hnene la ala 300 ngöne la angatr a goeë Gideona, tune kaa la aqane tro së a kapa la ini e hne së hna goeë Iesu Keriso lo Gideona ka tru? (A. ame. 7:17; Mat. 11:29, 30; 28:19, 20; 1 Pet. 2:21)

    Nemene la aqane xatua së hnene la tusi Angete Amekötin 7:21, troa nyihluei Iehova cememine la madrine ngöne la götrane hna athipe koi së ngöne la organizasio i Nyidrë? (1 Kor. 4:2; 12:14-18; Iako. 4:10)

  • E jë la Angete Amekötin 8:1-3.

    Ame ngöne la easë a nango iwesitrë memine la ketre trejine trahmany maine föe pena, nemene la ini hne së hna kapa qa ngöne la aqane isenyine hnei Gideona ngöne la kola thele iwesitrë koi angeic hnei angetre Eferaima? (Ite edomë 15:1; Mat. 5:23, 24; Luka 9:48)