Tro jë kowe la alien

Tro jë kowe la itre mekune ka co

Tro jë kowe la itre alien

Itretre Anyipici Iehova

Drehu

Trenge Edomë Qa Hnine La Tusi Hmitrötr

Edromë 49: Thaa Enije Kö La Jö

Edromë 49: Thaa Enije Kö La Jö

GOEË Iosua. Kola qaja ka hape: ‘Jö fe, cile ju!’ Ame hna cile la jö. Ej a cile thaa enij nyipine la hnengödrai, ngöne la caa drai ka pexej. Iehova la ka kuca la iamamanyikeu cili! Ngo tro pe së a wang la kepin, matre Iosua a ajan tro la jö a pane cile thaa enij.

Jö

Ame la kola öhne hnene la itretre Gibeona, laka, kolo ha troa isi me angatr hnene lo lai faifi lao joxu ka ngazo ne Kanana, ene pe angatr a canga iupi fë maca koi Iosua troa sipo ixatua. Önine la atre tro fë maca ka hape: ‘Canga tro e kolemi koi hun, matre amele hun, me xatua hun, ke ase hë icasikeu koi huni la nöjei joxu ngöne la wetr, troa isi me itre hlue i nyipë.’

Ame hna canga tro hnei Iosua memin la itre sooce i angeic. Hnei angatr hna tro ngöne la jidri ka pexej. Ame la angatr a traqa e Gibeona, kola xou hnene la itre sooc ne lo lai faifi lao joxu, nge angatr a nyiqaane ikötreny. Ame hnei Iehova hna kuiën qaa hnengödrai la itre wene manie ka catr, kösë itre ietë, nge kola malatran la itre sooc, matre ala nyimu catre kö la ka meci hnene lai itre wene manie ka catr, hune la itre hna humuth hnene la itre sooce i Iosua.

Iosua

Iosua a öhne laka, easenyi hë matre lö pi hë la jö. Kolo ha troa jidr, nge troa hmaloi kowe la itre sooc ne lo faifi lao joxu troa kötr. Celë hi matre, hnei Iosua hna thithi koi Iehova me qaja ka hape: ‘Jö fe cile ju!’ Ame hna cile la jö, me aijijë angetre Isaraela troa umuth me hun ngöne la isi.

Tru catre pala kö la itre joxu ka ngazo e Kanana, angetre methinën la nöje i Iehova. Celë hi matre pane sikisi kö lao macatre ne Iosua me itre sooce i angeic a ngaan la 31 lao joxu ne la nöj. Thupene lai, hnei Iosua hna thawa la nöje Kanana kowe la itre tribu ka pë pala kö götranen.

Kola meci hnei Iosua, nge 110 lao macatre i nyidrë. Ame ngöne la ijine mele Iosua me itre sinee i nyidrë, hna drengethenge Iehova pala hi hnene la nöj. Ngo meci pi hi la itre atr ka lolo cili, ene pe kolo ha nyiqaane kuca hnene nöj la itre ewekë ka ngazo, nge traqa pi fe hi la gomegom. Nyipi ewekë catr ngöne la itre ijin, troa hetre ixatua qaathei Akötresie.

Iosua 10:6-15; 12:7-24; 14:1-5; Angete Amekötin 2:8-13.



Itre Hnying

  • Ame ngöne la iatr, nemene la hna qaja hnei Iosua, nge nemene kepine lai?
  • Tune kaa la aqane xatua Iosua memine la itre sooce i angeic hnei Iehova?
  • Ijetre la etrune la itre joxu hna ngaan hnei Iosua, nge ije macatre ne isi angatr?
  • Pine nemen matre kola thawa hnei Iosua la nöje Kanana?
  • Ije macatre i Iosua ngöne lo nyidrëti a mec, nge nemene la ewekë ka traqa kowe la nöj thupene lai?

Itre xaa hnying

  • E jë la Iosua 10:6-15.

    Qa ngöne laka hnei Iehova hna acilën la jö memine la treu thatraqai Isaraela, nemene la mejiune ka eje the së enehila? (Ios. 10:8, 10, 12, 13; Sal. 18:3; Ite edomë 18:10)

  • E jë la Iosua 12:7-24.

    Drei la atrekë ewekëne la kola lepe lo 31 lao joxu ekö e Kanana, nge pine nemen matre ka nyipi ewekë catre koi së lai enehila? (Ios. 12:7; 24:11-13; Deu. 31:8; Luka 21:9, 25-28)

  • E jë la Iosua 14:1-5.

    Tune kaa la aqane thawa la nöje matre itre tribu ne Isaraela, nge nemene la hna amamane hnene lai ngöne la itre hna troa kuca elanyi ngöne la Paradraiso? (Ios. 14:2; Is. 65:21; Ezek. 47:21-23; 1 Kor. 14:33)

  • E jë la Angete Amekötin 2:8-13.

    Tune la aqane ujë i Iosua ekö e Isaraela, drei enehila la ka ujë ceitu me petre së qëmekene la hmi ka thoi? (A. ame. 2:8, 10, 11; Mat. 24:45-47; 2 Thes. 2:3-6; Tito 1:7-9; Hna ama. 1:1; 2:1, 2)